Marso

Agtayo ni nanenengneng natan so balon mundo ta anggapo ni. Pero isip mo pa ray nanenengneng mod kaliberliber—saray bitewen, kakiewan, ayayep, tan totoo. Antam ya tua ira, ta nanenengneng mo ra. Pero di ba, anggapo iratan dati? Wala la iratan natan ta pinalsa ira nen Jehova. (Gen. 1:​1, 26, 27) Ontan met ed balon mundo. Anggapo ni itan natan, pero im-promise nen Jehova ya gawaen to itan. Tan no antoy im-promise to, tooren to. Diad balon mundo, agti la mansakit tan maksil lay laman tayo. On, diad panaon ya inyeskedyul nen Jehova, nanengneng mo lanlamang so balon mundo. (Isa. 65:17; Apo. 21:​3, 4) Legan mon aalagaren so balon mundo, gawam so anggaay nayarian mon pabiskegen so pananisiam. Dalepdep moy dondon. Isip mon maong so pakapanyari nen Jehova. Tan mansiansia kan aktibo ed espiritual. No nagawa la so amin ya im-promise nen Jehova, seguradon wadman ka no mananos kan manalagar tan no natan ni labat et ipanengneng mo lay mabiskeg ya pananisia!—Heb. 6:​11, 12. w23.04 31 ¶18-19

Tinmangay si Jesus ed tawen tan nampikasi ta labay ton si Jehova so nirayew ed ontumbok ya gawaen to. Kayari ton nampikasi, inmeyag: “Lazaro, paway ka!” (Juan 11:43) Tan pinmaway si Lazaro! Seguradon mankelaw iray totoo, lalo la ta iisipen na arum ed sikara ya imposible lan nabilay so apat agew lan inatey. Sayan salaysay et pabiskegen toy pananisia tayo ed kioli. Kasin nanonotan yo may promise nen Jesus ed si Marta? Kuan to: “Say agim et onoli.” (Juan 11:23) Singa si Jehova, labalabay tan sarasarag met nen Jesus ya tooren itan ya promise. Amay inyakis to et patunay ya labalabay to lan naekal so patey tan say graben ermen ya epekto na satan. Nen binmilay si Lazaro, pinatunayan lamet nen Jesus ya sarasarag ton paolien iray inatey. Dalepdepen tayo sirin imay imbaga nen Jesus ed si Marta ya abitla ed teksto tayo ed sayan agew. On, talagan manisia tayo ya tooren nen Jehova so promise to ya bilayen to iray inaatey. w23.04 11-12 ¶15-16

No natebek o na-realize tayo ya walay arum ya labay nen Jehova ya gawaen tayo, ompan kaukolan tayon umanen so ipipikasi tayo. Tandaan tayo ya wala lay inyeskedyul nen Jehova no kapigan to sumpalen so gagala to. Onsabi panaon ya permanente to lan ekalen so amin ya problema tayo—singa say kalamidad, sakit, tan patey. Usaren to so Panarian to pian nasumpal so gagala to. (Dan. 2:44; Apo. 21:​3, 4) Pero anggad agni itan sinmabi, aabuloyan ni nen Jehova si Satanas ya uleyan o kontrolen so mundo. (Juan 12:31; Apo. 12:9) No solusyonan la nen Jehova so amin ya problema tayo natan, ompaway laingen ya marakep so uley nen Satanas. Tandaan tayo sirin ya aliwa nin saya so panaon ya gawaen nen Jehova so amin ya im-promise to. Pero legan tayon manaalagar, tulongan to tayo ed saray problema tayo. w23.05 8 ¶4; 9-10 ¶7-8

Antoy gawaen tayo pian natulongan tayoy arum ya minabang ed Memoryal? Siempre unona ed amin, imbitaan tayo ra. Aliwan saramay walad teritorya tayo labat so sarag tayon imbitaan. Imbitaan tayo met iray kakanayon, katrabaho, kaklase, tan arum nin naisip tayo. Ilistam iray labay mon imbitaan pian anggapoy nalingwanan mo. No bilang ta onkulang so inimprintan imbitasyon, i-share mo may link na electronic ya imbitasyon. Man-imbita ka labat. Malay mo, dakel manaya ed sikara so onatendi! (Ecl. 11:6) No mangiimbita tayo parad Memoryal, tandaan tayo ya ompan wala ray tepet na saray iimbitaan tayo, lalo la no agda nin balot asali so akiaral. Kanian isipen tayo la no anto ray nayarin itepet da tan iparaan tayo lay ebat. Kayari na Memoryal, ompan wala ni ray tepet na saray interesado ya first time day inmatendi. Komon ta antis, legan, tan kayari na Memoryal et gawaen tayoy anggaay nayarian tayo ya tulongan iray “walaan na dugan kipapasen na puso.”—Gawa 13:48. w24.01 12 ¶13, 15; 13 ¶16

Nabasa ed Biblia so waloran totoo ya binilay lamet nen Jehova diad dalin. Marakep no i-personal study’m iratan. Legan mo irayan aaralen, isip mo no antoy naaralan mo ed kada salaysay tan no panon dan ipapanengneng ya talagan labalabay tan sarasarag na Dios ya bilayen iray inaatey. Tan agmo lilingwanan ya aralen so sankaimportantian ya kioli—say inkioli nen Jesus. Amayamay so akanengneng ya talagan sikatoy inmoli. Say inkioli nen Jesus et mabiskeg ya patunay ya talagan walay kioli ed arapen. (1 Cor. 15:​3-6, 20-22) Maong labat ta walay ilalon kioli! Makapantiwala tayo ed satan ya promise nen Jehova ta labalabay tan sarasarag ton gawaen itan. Komon ta tuloytuloy tayon pabiskegen so pananisia tayo ed kioli. No ontan so gawaen mo, mas lalom ya naar-aro si Jehova, say Dios ya mangipapaseguro ed sika ya, ‘Onoli so inad-arom!’—Juan 11:23. w23.04 8 ¶2; 12 ¶17; 13 ¶20

No say sakey et mapaabeba, aliwan atagtagey so pakanengneng tod sarili to. Bibidbiren to ya walay limitasyon to, kanian tanggap tod sarili to ya wala ran talagay agto nasarag ya gawaen. Walay respeto tod arum, tan ipapasen to ya mas atagey ira nen say sikato. (Fil. 2:3) Mapaabeban too si Gideon. Nen imbaga na anghel nen Jehova ed si Gideon ya sikato so apili ya manligtas ed saray Israelita ta papairapen ira na saray Midianita, oniay inyebat nen Gideon: “Say boleg ko [o pamilyak] so sankaraisetan ed Manases.” Imbaga to ingen ya anggapoy kana to no ikompara ed saray agagi to. (Ukom 6:15) Inisip nen Gideon ya agto kaya itan ya asainmin, pero baleg so tiwala nen Jehova ya sarag to itan. Diad tulong nen Jehova, agawaan nen Gideon so asainmin to. Gagawaen na saray elder so anggaay nayarian da ya magmaliw ya mapaabeba. (Gawa 20:​18, 19) Agda ilalastog iray abilidad da tan saray marakep ya nagagawaan da. Tan tanggap da ya aliwa ran perpekto kanian walan-walay nagawaan dan lingo. w23.06 3 ¶4-5

Say panmekmek ed ulo nen Satanas et nagawa ni diad arapen—palabasen tayo ni so masulok ya 1,000 ya taon. (Apo. 20:​7-10) Pero antis to ’tan, seguradon nabigla so interon mundo no nagawa la ray impropesiya na Biblia. Unona, ideklara na saray bansa so “kareenan tan kaligenan!” (1 Tes. 5:​2, 3) Atan so signal ya onggapo la so baleg ya kairapan. “Tampol” ya deralen na saray gobierno so amin ya palson relihyon. (Apo. 17:16) Kayari to ’tan, ukomen nen Jesus iray totoo tan ibiig to iray karnero ed saray kanding. (Mat. 25:​31-33, 46) Si Satanas balet ey? Sikatoy onsanok kanian sugsogan toy alyansa na saray bansa pian atakien da iray lingkor nen Jehova. Sayan alyansa et tinawag ed Biblia ya “Gog ed dalin na Magog.” (Eze. 38:​2, 10, 11) Legan na baleg a kairapan, tiponen nen Jesus ed tawen iray nakekeran alanaan diad dalin tan kaiba iran miguerra diad Armagedon. Say Armagedon so sampot na baleg ya kairapan! (Mat. 24:31; Apo. 16:​14, 16) Kayari to ’tan, uleyan la nen Jesus so interon dalin diad loob na Sanlibon Taon.—Apo. 20:6. w23.10 20-21 ¶9-10

Dakel ya lingkor nen Jehova natan so manaayam ed bansa ya bawal so kimey tayo. Singa si Obadias, rerespetoen day gobierno, pero desidido iran ag-itunda so pandadayew dad si Jehova. (Mat. 22:21) Inar-aro tayo irayan makmakpel ya agagi! Matakot ira ed Dios, kanian sikato so uunoren da imbes ya saray totoo. (Gawa 5:29) Katon anggano bawal so kimey tayo, itutuloy day manpulong tan miaral diad maingat ya paraan. (Mat. 10:​16, 28) Sankanonot da so espiritualidad na agagi kanian seseguradoen da ya walay espiritual ya naakan da. Ontan so ginawa nen Brother Henri ya manaayam ed sakey ya bansa ed Africa. Nen imbawal so kimey tayo nensaman ed satan ya bansa, namboluntaryo si Henri ya sikato so mangibunog na literatura ed saray agagi. Insulat to: “Mabaing ak. . . . Pero akapampakpel ak ta mas antakot koy Dios nen say too.” Sika ey, no ibawal lay kimey ed lugar yo, kasin manpakpel ka tan gawaen mo met imay ginawa nen Henri? Sarasarag mon gawaen itan no walay takot mod Dios. w23.06 16 ¶9, 11

Nen nanrebelde si Adan tan Eva, seguro inisip nen Satanas ya ahadlangan toy gagala na Dios ya napano so dalin na perpekto tan matunong ya totoo. Tan anganko et inisip to met ya anggapo lay marakep ya opsyon nen Jehova. Singa bilang, no say desisyon nen Jehova et pateyen toy Adan tan Eva tan manggawa lamet na perpekton sanasawa, walay rason nen Satanas ya ibagan matila so Dios. Akin ey? On ta diad Genesis 1:​28, say imbaga nen Jehova ya manbilay diad dalin et saray ananak nen Adan tan Eva. Odino ompan inisip to ya paulyan labat nen Jehova ya nawalaan na ananak si Adan tan Eva anggano anggapo ed saratan so magmaliw ya perpekto. (Ecl. 7:20; Roma 3:23) No ontan so nagawa, walay rason nen Satanas ya ibagan palpak so gagala nen Jehova. Akin ey? On ta say gagala nen Jehova et perpekto tan maunor ya totoo so manayam ed Paraison dalin. w23.11 6 ¶15-16

Diad panaon tayo, uunoren tayo ray malinew ya ganggan tan prinsipyo nen Jehova ya nabasa ed Biblia tan saray instruksion ya iiter na organisasyon to. Sapat la iratan kanian agtayo la aaruman. (Pro. 3:​5-7) Agtayo sirin manggagawa na kaaruman iran guidelines insan tayo piliten iray agagi ya unoren da itan, lalo la no tungkol ed personal iran bagay. Uusaren nen Satanas so “maapan panagpalikdo” tan saray ideyan anggapoy kakanaan to pian naloko tan agmankakasakey iray totoo. (Col. 2:8) Nen inmunan siglo, inusar nen Satanas iray pilosopiya na matatalinon totoo tan saray agmakasulatan ya bangat na saray Judio pian naibalang to iray Kristiano. Inkayat to ni ingen so ideya ya kaukolan da nin unoren so Mosaikon Ganggan. No agmanalwar iray Kristiano nensaman, ompan atan lay panisiaan da imbes ya si Jehova, say Lapuan na tuan karunongan. Diad panaon tayo ey? Uusaren nen Satanas iray balita tan social media pian mangikalat na fake news tan saray aliwan tuan impormasyon, ya diad tua et nanlapud saray sakim ya politician. w23.07 16 ¶11-12

Seguro abigbigla si Satanas ed solusyon nen Jehova ed impanrebelde to tan na inmunan sanasawa. Pinaulyanan nen Jehova ya nawalaan na ananak si Adan tan Eva, kanian anggapoy rason nen Satanas ya ibagan matila so Dios. Tan impropesiya nen Jehova ya walay “ilalak” ya iter toy bilay to pian nadondon so kasalanan na saray maunor ya ananak nen Adan tan Eva, kanian anggapoy rason nen Satanas ya ibagan palpak so gagala na Dios. (Gen. 3:15; 22:18) Seguro, agmakapanisia si Satanas ed impangiter nen Jehova na dondon. Akin ey? On ta say rason no akin ya inter nen Jehova so dondon et lapud inar-aro to ray totoo. Sikatoy akaparaan ya mansakripisyo parad sikara. (Mat. 20:28; Juan 3:16) Kabaliktaran itan ed ugali nen Satanas ta sarili to labat so iisipen to. Antoy nagmaliw ya posible lapud dondon? No nasumpal la so Sanlibon Taon ya Uley nen Kristo, Paraiso la so interon dalin. Say manayam ditan et saray perpekto tan maunor ya ananak nen Adan tan Eva. Atan imay orihinal ya gagala nen Jehova. w23.11 6 ¶17

Uunoren tayoy ganggan nen Jehova tungkol ed inkasagrado na bilay tan dala. Diad pakanengneng nen Jehova, sagrado so dala. Akin ey? On ta irerepresenta na dala so bilay, ya mabmablin regalo na Dios. (Lev. 17:14) Nen inyabuloy nen Jehova ya nayari lan kanen na too so karne na ayep, ingganggan to ya agnepeg ya kanen so dala. (Gen. 9:4) Imbaga to lamet itan nen inter toy Mosaikon Ganggan ed saray Israelita. (Lev. 17:10) Tan inggiya to so mananguley ya ulop nen inmunan siglo ya bagaan iray Kristiano ya ‘itultuloy dan arawian so dala.’ (Gawa 15:​28, 29) Determinado tayon unoren itan ya ganggan, lalo la no mandedesisyon tayo no anton klase na panagpatambal tan medical procedure so awaten tayo. Desidido tayo met ya agmanggawa na imoral. Bibilinen itayo nen apostol Pablo ya ‘pateyen’ tayo ray kabiangan na laman tayo. Antoy labay ton ibaga? No imbagan pateyen, talagan milaban tayo pian ag-itayo nadaeg na mauges tan makalaman iran pilalek. Iwasan tayo sirin so anggan anto ya mantukso ed sikatayon manggawa na imoral. Agtayo anggan labay ya linggisen iratan!—Col. 3:5; Job 31:1. w23.07 15 ¶5-6

Akin et aglabat alikas nen Samson ya walay mauges ya plano ed sikato nen Delila? Kasin abulag na panangaro tod si Delila kanian agla akapan-isip na duga? Aminpigan pinilit nen Delila si Samson ya ibaga toy sekreto na biskeg to, ya anggad agla akaanos kanian imbaga to. Agto la ninonot so pansumpalan na sayan ginawa to. Makapaermen ta aliwa labat ya biskeg to so abalang to, noagta pati say pabor nen Jehova. (Ukom 16:​16-20) Ansakisakit so agawa ed si Samson lapud nantiwala ed si Delila imbes ya diad si Jehova. Sikatoy inerel na saray Filisteo tan “sinukit da iray mata to.” Impriso da ed Gaza, tan ginawa ran managgiling na ilik diad prisoan. Ag-abayag, nantitipon iray Filisteo tan nanliliket ira. Dakdakel so inyapay dan bagat ed si Dagon ya dios da. Panisiaan da ya ayan palson dios so tinmulong pian naerel day Samson. Inawit day Samson ed saman ya selebrasyon pian “walay panliketan” tan panelekan da.—Ukom 16:​21-25. w23.09 5-6 ¶13-14

Panon to no walay katrabahom o classmate mo ya kukuestionen toy papanisiaan tayo tungkol ed moralidad? Makpel mon i-explain no akin ya ontan so papanisiaan tayo, pero ipaliknam ed sikato ya rerespetoen moy opinyon to. (1 Ped. 3:15) Imbes ya isipen mo ya labay to kan insultoen, misalamat ka ya nantepet ta naamtaan mo no antoy walad isip to. Antokaman so rason na impantepet to, gawam so anggaay nayarian mo ya onebat diad malumanay tan marespeton paraan. No ontan so gawaen mo, ompan magmaliw ya open-minded ed saray ibagam. Singa bilang, panon to no nantepet so katrabahom: “Akin et agkayo manbe-birthday?” Antis kan onebat, isip mo ni: Kasin iisipen to ya masyadon istrikto iray Tasi tan boring so bilay tayo? Antis kan man-explain, pisalamatan mo ni ta walay concern to ed sika. No ontan so gawaen mo, ompan dengelen to ka no i-explain mo la ed sikato so ibabaga na Biblia tungkol ed birthday. w23.09 17 ¶10-11

Samboten tayo ya ipulong so maong a balita ed interon dalin legan ya wala ni panaon. Imbaga nen apostol Pedro ya importantin “sankanonot [tayon] lanang so isabi na agew nen Jehova.” (2 Ped. 3:​11, 12) Antoy makatulong pian mabilabilay itan ed isip tayo? Inagew-agew tayon isipen iray bendisyon nen Jehova diad balon mundo. Imadyin mo pay sarilim ya mamangan na masustansia iran naakan. Nai-enjoy moy kaliberliber ta malinlinis tan preskoy dagem. Aabeten mo la ray kapamilyam tan kakaarom ya inmoli. Tan ibabangat mo ray totoo ya nambilay ed nanduruman panaon no panon ya agawa iray propesiya ed Biblia. No inagew-agew mo iratan ya imadyinen, agka onsawa ya mantalaran tan agmo isipen ya mabaybayag ni Armagedon. Sakey ni, “lapud amta [tayo] la” iray nagawa ed arapen, ag-itayo naibalang na saray palson managbangat. w23.09 27 ¶5-6

Dakel ya ananak natan so “agmatulok ed atateng da.” (2 Tim. 3:​1, 2) Akin et nanairapan iran ontulok? Iisipen na arum ya ananak ya aliwan maong ya alimbawa iray atateng da ta duma kunoy ibabangat da ed gagawaen da. Iisipen met na arum ya masyadon makaluma tan istrikto iray atateng da. Kasin ontan met so pakanengneng mod atateng mo? Ompan nanairapan kan unoren so ganggan nen Jehova ya walad teksto tayod sayan agew. Antoy makatulong pian magmaliw kan maunor ed atateng mo? No katutulok ed atateng so pantongtongan, si Jesus so sankaabigan ya alimbawa. (1 Ped. 2:​21-24) Perpekto si Jesus, pero baleg so respeto to ed saray atateng to anggano aliwa ran perpekto. (Exo. 20:12) Wala ray pagkakataon ya alingo met ira tan agda atalosay Jesus. w23.10 7 ¶4-5

In-explain nen apostol Pablo ed saray Hebreon Kristiano ya anggano mangiyapay iray ayayep ta atan so ibabaga na Mosaikon Ganggan, ag-itan sapat pian naperdona so kasalanan da. Atan so rason no akin ya “pinaandi” la so Mosaikon Ganggan. Insan to ra tinulongan pian natalosan da iray aralem ya katuaan. Impanonot tod sikara ya “mas maabig ya ilalo” so naawat da lapud dondon bagat nen Jesus ta atan so ontulong ed sikara ya onapit ed Dios. (Heb. 7:​18, 19) Imbaga nen Pablo so rason no akin ya mas maong ya aminpigapiga so panagdayew da no ikompara ed Judaismo. Say panagdayew na saray Judio et “anino [labat] na saray bengatlan onsabi, balet say tudtua et say Kristo.” (Col. 2:17) No imbagan anino, say nanengneng mo labat et amay hugis to may sakey ya bagay. Aliwan satan imay aktual ya bagay. Amay panagdayew na saray Judio et singa labat anino ta isisimbolo toy mas maabig ya uksoyan na panagdayew ya isalat nen Jehova. Kaukolan tayon talosan itan ya uksoyan ta atan so paraan pian naperdona iray kasalanan tayo tan awaten nen Jehova so panagdayew tayo. w23.10 25 ¶4-5

Ibabaga na Daniel kapitulo 11 ya walay duaran arari o gobierno ya kompetensyaen day sakey tan sakey. No ikonekta tayo iyan propesiya ed arum ni ran propesiya ed Biblia, malinlinew ya say “ari na amianen” et say Russia tan saray kaalyansa ton bansa, tan say “ari na abalaten” et say alyansa na Britanya tan Amerika. Papairapen na “ari na amianen” iray lingkor na Dios ya walad sakop to. Wala ray kaagian tayo ya minaltrato tan impriso lapud pananisia ra. Pero imbes ya nataktakot irayan agagi ed gagawaen na “ari na amianen,” mas binmiskeg laingen so pananisia ra ed si Jehova tan ed Biblia. Akin ey? On ta amta ra ya say pamapairap na gobierno ed sikara et kasumpalan na saray propesiya ed libron Daniel. (Dan. 11:41) No tandaan tayo itan, ombiskeg so tiwala tayo ed saray sipan na Dios tan determinado tayon manmatoor ed sikato. w23.08 11 ¶15-16

Malikas si Jehova ed liknaan tayo, tan sikatoy akaparaan ya manprotekta ed sikatayo ta inar-aro to tayo. No nasasakitan itayo, nasasakitan met. Kanian seguradon dengelen to tayo no ipikasi tayon: “Alwaran mo ak pa a singa bukel na matam.” (Sal. 17:8) Say mata et sensitibo tan importantin parte na laman. Kanian nen inkompara itayo nen Jehova ed bukel na mata to, singa to ibabagan, ‘Importante kayon maong ed siak. Kanian no sakitan da kayo, singa da ak met sasakitan.’ Aglabay nen Jehova ya pandudaan mo ya inar-aro to ka. Pero amta to ya lapud background o aliwliwan agawa ed bilay tayo, ompan onsagi ed isip tayo ya agto tayo inaro. Odino ompan walay dadalanen tayon subok natan tan say pakalikna tayo et singa to tayo la pinaulyanan. Antoy gawaen tayo pian mas ombiskeg so tiwala tayo ya inar-aro itayo nen Jehova? Makatulong no amtaen tayo no panon ton imbalikas so panangaro tod si Jesus, diad saray alanaan, tan ed amin ya totoo. w24.01 27 ¶6-7

Anengneng ya mismo nen Esdras no panon ya tinulongan nen Jehova iray lingkor To diad mair-irap iran situasyon. Nen 484 B.C.E., posiblin manaayam si Esdras diad Babilonia nen pinirmaan nen Arin Ahasuero so ganggan ya pateyen so amin ya Judio diad interon empiryo na Persia. (Est. 3:​7, 13-15) Seguradon natatakot so amin ya Judio, kaiba lay Esdras, ta napepeligroy bilay da tan posiblin naupot so lahi da. Antoy ginawa da ey? Nan-ayunal ira, tan manak-akis iran nampikasi ed si Jehova pian tulongan to ra. (Est. 4:3) Imadyin mo pay alikna nen Esdras tan saray kapara ton Judio nen kabaliktaran so agawa. Say pinatey laingen et saramay namplano ya mamatey ed sikara! (Est. 9:​1, 2) Seguradon tinmatak itan ed isip nen Esdras. Binmiskeg so tiwala to ya anggan anto ni tay onsabin subok, sarasarag nen Jehova ya protektaan iray lingkor To. w23.11 17 ¶12-13

Say tutukoyen nen apostol Pablo ya “gawa” et “saray gawa a kakaukolanen na ganggan”—amay ganggan ya inter nen Jehova ed saray Israelita diad Palandey Sinai. (Roma 3:​21, 28) Nen panaon nen Pablo, wala ray Judion Kristiano ya agda natanggap ya agla kaukolan ya unoren so Mosaikon Ganggan. Pian nakombinse ira nen Pablo ya agla ra obligadon unoren itan, inusar toy alimbawa nen Abraham. Sikatoy inyabawag na Dios ya matunong anggano anggapo ni ed saman so Mosaikon Ganggan. In-explain nen Pablo ya say sakey ya too et naala toy pabor na Dios no walay pananisia to, aliwan lapud uunoren toy Mosaikon Ganggan. Makapaseseg itan ed sikatayo ta amta tayon aliwan mair-irap ya alaen so pabor na Dios. Say importante ed Dios tan ed si Jesus et walay pananisia tayo ed sikara. Si Santiago balet ey? Anton “gawa” so tutukoyen to ed Santiago kapitulo 2? Duma iya ed “saray gawa a kakaukolanen na ganggan” ya imbaga nen Pablo. Say tutukoyen nen Santiago et saray inagew-agew ya gagawaen na saray Kristiano. (Sant. 2:24) Indanet to ya ditan nanengneng no kasin tua so pananisia na sakey ya Kristiano o andi. w23.12 3 ¶8; 4-5 ¶10-11

No sakey kan sister tan walay planom ya miasawa, pilim ya maong so piasawaan mo. Sakey itan ed saray sankaimportantian ya desisyon ya gawaen mod bilay mo. Tandaan ya say asawam so magmaliw ya ulom ya pampasakopan mo. (Roma 7:2; Efe. 5:33) Kanian tepetan moy sarilim: ‘Kasin maespiritual iyan brother? Kasin iyuuna toy Jehova ed bilay to? Kasin ibabase tod Biblia iray desisyon to? Kasin mapaabeba ton aaminen so lingo to? Kasin marespeto ed saray bibii? Kasin sarag ton iter so espiritual, materyal, tan emosyonal ya pankaukolan ko?’ Siempre, no labay mon maespiritual tan makalakal ya brother so makaasawa ed sika, dapat nanengneng met ya maespiritual tan maong kan sister. Say asawan bii et “katulongan” tan “kaiba” na asawa to. (Gen. 2:18) Tan lapud inar-aro toy Aman Jehova, gagawaen toy anggaay nayarian to pian maabig so reputasyon na asawa to. (Pro. 31:​11, 12; 1 Tim. 3:11) Magmaliw kan maong ya asawan bii no natan ni labat et pabiskegen mo lay panangarom ed si Jehova tan no ipasal mo lay sarilim ya ontulong ed saray kapamilyam tan kakongregasyon mo. w23.12 23 ¶18-19

Labay nen Jehova ya duga iray desisyon tayo, kanian im-promise to ya ikdan to tayoy karunongan no mandedesisyon tayo. Kaukolan tayoy karunongan lalo la no say gawaen tayon desisyon et apektoen toy interon bilay tayo. Ikdan to tayo met na biskeg pian makapan-anos tayo. Singa si apostol Pablo, ikdan itayo nen Jehova na biskeg ya kaukolan tayo pian naanosan tayo ray subok. (Fil. 4:13) Say sakey ya uusaren nen Jehova pian pabiskegen itayo et say espiritual ya pamilya tayo. Diad samay labi antis ya iyapay nen Jesus so bilay to, aminpigan nampikasi ya impapuso. Sankanonot toy akusasyon ed sikato ya anggapo kunoy respeto tod Dios, tan inisip to ya mangiter itan na kababaingan ed Ama to. Kanian akikasi ed si Jehova ya aliwan ontan komon so ipatey to. Pero dumay ebat nen Jehova. Sikatoy angibaki na anghel ya manpabiskeg ed si Jesus. (Luc. 22:​42, 43) Diad panaon tayo, ompan pakilosen nen Jehova so sakey ya agi ya ontawag o ompasyar ed sikatayo pian napaseseg itayo. Anggan siopa ed sikatayo et sarag ya usaren nen Jehova. Kanian komon ta alisto tayon manpaseseg ed saray agagi. Agtayo papalampasen so kada pagkakataon ya napabiskeg tayo ra.—Pro. 12:25. w23.05 10-11 ¶9-11

No walay inaktibo ya inmatendi ed Memoryal, ompan aburido ira ya nahusgaan ira tan ag-ira pansinen na agagi. Kanian alwaran tayoy panagsalita tayo. Seguradoen tayo ya ag-ira nasakitan o nabaingan ed ibaga o itepet tayo. Agtayo komon lilingwanan ya agagi tayo ni ran siansia. Labalabay tayo ran nakaiba lamet ya mandayew ed si Jehova. (Sal. 119:176; Gawa 20:35) Maong labat ta ingganggan nen Jesus ya tinaon tayon nodnonoten so impatey to. Dakel so maabig ya resulta na iyatendi tayo ed Memoryal. (Isa. 48:​17, 18) Lalo tayon naaaro si Aman Jehova tan Jesus. Naipapanengneng tayo ya misatsalamat tayo ed amin ya ginawa ra parad sikatayo. Lalo met ya onaapit so liknaan tayo ed saray agagi. Tan natutulongan tayoy arum pian minabang ira ed dondon. Manparaan tayon maong sirin parad sayan Memoryal—say sankaimportantian ya agew ed sayan taon! w24.01 14 ¶18-19

Panon itayon igigiya nen Jehova? Say manunan uusaren to et say Salita to, say Biblia. Pero wala met iray totoon uusaren to ya mangigiya ed sikatayo. Singa bilang, uusaren toy “matoor tan makabat ya aripen” pian mangitarya na espiritual ya naakan ya ontulong ed sikatayon mandesisyon na duga. (Mat. 24:45) Uusaren to met so arum ni ran kualipikadon lalaki ya mangigiya ed sikatayo. Singa bilang, papasesegen itayo na saray manangasikaso na sirkito tan saray elder ed kongregasyon. Tan iikdan da tayoy instruksion pian amta tayoy gawaen tayo diad mairap iran situasyon. Misatsalamat tayod si Aman Jehova ta igigiya to tayo diad sayan kaunoran iran agew. Anggano mair-irap tan mapeligro iyan panaon, tutulongan itayo nen Jehova pian makapanmatoor tayo ed sikato tan tuloytuloy tayon makapanakar ed dalan paarap ed bilay. No maminsan balet, ompan nairapan tayon unoren so instruksion nen Jehova, lalo la no impasabi itan na kapara tayon too ya agmet perpekto. Diad ontan iran situasyon, antoy makatulong pian onunor tayo nin siansia? Dapat mabiskeg so tiwala tayo ya si Jehova ya mismo so mangidadaulo ed saray lingkor to tan bendisyonan to tayo no onunor tayo. w24.02 20 ¶2-3

Ombiskeg so panangaro tayo ed si Jehova no maaral tan mabasa tayo na Biblia. Kada no man-Bible reading ka, isip mon maong no antoy naaralan mo tungkol ed si Jehova. Tepetan moy sarilim: ‘Diad sayan salaysay, anto ran detalye so mangipapanengneng ya inar-aro ak nen Jehova? Anto ray alabayan ko dia ya ugali o kualidad to?’ No isipen mo iratan, seguradon ombiskeg so panangarom ed Dios tayo. Say sakey nin paraan pian ombiskeg so panangaro tayo ed si Jehova et no lanang tayon mitongtong ed sikato tan ibaga tayoy amin ya walad puso tayo. (Sal. 25:​4, 5) Dengelen tan ebatan nen Jehova so ontan iran pikakasi. (1 Juan 3:​21, 22) Kaukolan tayo met ya pabiskegen so panangaro tayod kapara tayon too. Kayari na pigaran taon manlapud impagmaliw nen apostol Pablo ya Kristiano, walay akabat to ya makakkalakal ya balolaki, si Timoteo. Inaro nen Timoteo si Jehova, tan inaro to met iray agagi. Oniay imbaga nen Pablo tungkol ed si Timoteo nen sinulatan toy kongregasyon diad Filipos: “Anggapo lay arum a nibakik . . . a singa sikato a peteg a mangasikaso ed sikayo.” (Fil. 2:20) Mapatnag ya pambiliban nen Pablo so panangaro nen Timoteo ed saray agagi. Baleg so tiwala to ya agto ra paulyanan. Seguradon naar-aro met na agagi si Timoteo kanian tatalaranan day ibisita to ed kongregasyon da.—1 Cor. 4:17. w23.07 9 ¶7-10

Inatey lay Moises antis ya makaloob iray Israelita diad Insipan ya Dalin. Nen anggapo lay Moises, kasin pinaulyanan ira nen Jehova? Andi, inasikaso to ra. Diad tua, antis ya inatey si Moises, nampili lay Jehova na onsalat ed sikato ya mangidaulo ed bansan Israel—si Josue, ya pigaran dekada lan ipapasal nen Moises. (Exo. 33:11; Deu. 34:9) Tan diad interon Israel, dakel so lalaki ya marunong tan eksperiensyado ya apilin mangidaulo—‘saray pangulo na nilibo, nilasus, alimamplo, tan asamplora’ ni ingen. (Deu. 1:15) On, ag-apaulyanan iray Israelita. Ontan met so agawa diad panaon nen Elias. Abaybayag ya sikato so inusar nen Jehova ya mangidaulo ed dugan panagdayew diad samploran tribu ya panarian na Israel. Pero sinmabi panaon ya sikatoy inyasain la nen Jehova diad duaran tribu ya panarian na Juda. (2 Ara. 2:1; 2 Awa. 21:12) Kasin apaulyanan iray matoor ya Israelita diad samploran tribu? Andi, ta say sinmalat diman et si Eliseo, ya abayag lan impasal nen Elias. Tuloytuloy iran inasikaso nen Jehova tan ag-ahadlangan so gagala to. w24.02 5 ¶12

Nen naamtaan na saray agagi ed Efeso so katuaan ed Salita na Dios, atan la so nagmaliw ya liwawa ya pinagkagiya da. (Sal. 119:105) Tinaynan da la iray kaugalian ya konektado ed palson relihyon, pati say imoral ya kagagawa ra. Nandesisyon ira ya mandayew lad si Jehova. Ginawa day anggaay nayarian dan ‘aligen so Dios’ tan gawaen no antoy makapaliket ed sikato. (Efe. 5:1) Singa saray agagi ed Efeso nensaman, antis tayo met ya naamtaan so katuaan et singa tayo walad bilunget ta manisia tayod saray palson bangat tan naimpluensyaan tayo na abebbeban moralidad na sayan mundo. Singa bilang, panlikliketan tayo nensaman iray selebrasyon tan piesta ya konektado ed palson relihyon. Ompan say arum ed sikatayo et datin imoral so kabibilay da. Pero inuman tayoy bilay tayo nen akabat tayoy Jehova tan nen naaralan tayoy estandarte to. Diad tua, sikatayo lanlamang so agunggonaan nen inunor tayo ray ganggan to. (Isa. 48:17) Pero kaukolan tayon gawaen so anggaay nayarian tayo pian agtayo la napawil so bilunget tan tuloytuloy tayon “manbilay bilang ananak na liwawa.” w24.03 21 ¶6-7

Ompan nalikas mod sarilim ya agka ni ready parad dedikasyon tan bautismo. Ompan wala ni ray kailangan mon umanen ed bilay mo pian naunor moy estandarte nen Jehova odino ompan kailangan mo ni panaon pian napabiskeg moy pananisiam. (Col. 2:​6, 7) Tandaan ya aliwan parepareho so peles na iyaligwas na saray Bible study, anggan saray anak na Tasi. Kanian no uusisaen mo no kasin ready ka la parad dedikasyon tan bautismo, agmo komon ikokomparay sarilim ed arum. Mas marakep no manpokus kad iyaaligwas mon mismo tan saray kailangan mo nin umanen. (Gal. 6:​4, 5) Panon to no a-realize mo ya agka nin talaga ready ya idedika so sarilim ed si Jehova? Agka komon nadidismaya. Say importante et i-goal mo nin siansia itan. Ipikasim ed si Jehova ya tulongan to kad saray kailangan mo nin paaligwasen tan umanen ed sarilim. (Fil. 2:13) Seguradon dengelen tan ebatan nen Jehova iray ontan ya pikakasi.—1 Juan 5:14. w24.03 5 ¶9-10

Wala ’tay aminsan ya mansyodot ya maong si Sara tan impangget toy pasnok to ed si Abraham, tan tinetel to ni ingen! Amta nen Abraham ya mapasakop tan masuportan asawa si Sara. Kanian pinaulyan to labat ya ibalikas toy nalilikna to tan nanggaway paraan pian agla ombaleg so problema. (Gen. 16:​5, 6) Antoy naaralan tayo? Tua ya sikayo ran asawan lalaki so inikdan na autoridad ya mandesisyon parad pamilya yo. (1 Cor. 11:3) Pero ipapanengneng yo ya rerespetoen yoy misis yo no dengelen yon maong tan laen yo ni opinyon to antis kayon mandesisyon, lalo la no walay epekto na satan ed sikato. (1 Cor. 13:​4, 5) Wala met tay inkagawa ya wala ray biglan sinmabin bisita di Abraham tan Sara. Pinatuloy ira nen Abraham tan labay to ran pakanen. Linmad si Sara tan pinan-apura to ya manggawa na dakel ya tinapay. (Gen. 18:6) Anganko walay gagawaen nen Sara ed saman, pero intunda to tan ginawa ton tampol so ipapagawa nen Abraham. No sakey kan asawan bii, panon mon naalig so alimbawa nen Sara? Suportaan mo iray desisyon nen asawam. No nalikna to ya susuportaan mo, mas naar-aro to ka.—1 Ped. 3:​5, 6. w23.05 24-25 ¶16-17

Nen nagmaliw ya ukom si Gideon ed Israel, asubok ya tampol so inkamaunor tan pakpel to. Sikatoy ingganggan nen Jehova ya igeba toy altar nen Baal, ya say akanggawa et say mismon ama to. Delikado iman! (Ukom 6:​25, 26) Ag-abayag, sikatoy amiduan ingganggan nen Jehova ya bawasan so bilang na sundalo to. (Ukom 7:​2-7) Tan anggano pegley-labi, imbaga nen Jehova ya lusoben da la so kampo na kalaban. (Ukom 7:​9-11) Saray elder et “akaparaan ya ontulok.” Uunoren da so ibabaga na Biblia tan agda pandududaan so instruksion na organisasyon nen Jehova, kanian maong iran alimbawa ed saray agagi. Pero wala ray situasyon ya nasubok so inkamaunor na sakey ya elder. Singa bilang, ompan nairapan ya man-adjust no mantutumbokan so instruksion ya iter na organisasyon o bigla labat iratan ya manguman. No maminsan, ompan walay naawat ton instruksion ya isipen ton aliwan praktikal o singa aliwan saman so sankaabigan ya gawaen. Odino ompan makaawat na asainmin ya nayarin pakaarestoan to. Diad sarayan situasyon, panon ya naalig na saray elder so inkamaunor nen Gideon? Nepeg dan kabisadoen so instruksion tan iyaplika itan. w23.06 4-5 ¶9-11