Nen sinulatan nen apostol Pablo iray Hebreon Kristiano, antoy imbaga tod sikara ya makatulong pian nasarag tan naanosan da ray subok ya dadalanen da? Maabig no isipen da ray maong ya resulta no mananos ira. Imbaga nen Pablo ya no maminsan et iyabuloy na Dios so sakey ya subok ta kabiangan itan na panangipasal ed sakey ya Kristiano. No anosan day subok, naaralan dan ipanengneng iray balibalin kualidad tan mas napino ira. No ontan so isipen da, mas mainomay day makapan-anos. (Heb. 12:11) Pinaseseg nen Pablo iray Hebreon Kristiano ya makpel dan arapen iray subok. Amta nen Pablo so irap na napasegsegang, ta antis ya nagmaliw ya Kristiano et pinairap to ray disipulo nen Jesus. Tan diad tua, no subok labat so pantongtongan, agla nabilang so subok ya dinalan nen Pablo nen nagmaliw lan Kristiano, tan asarag to iratan ya amin!—2 Cor. 11:23-25. w24.09 12-13 ¶16-17

Diad kada agew ya onlalabas, mas kaukolan tayoy mamasya ed panagpulong. Akin ey? On ta antiktikey lay nakekeran panaon. Diad Marcos 13:10, imbaga nen Jesus so rason no akin ya importante so kimey ya panagpulong diad sayan kaunoran iran agew. Tan diad salaysay nen Mateo, imbaga nen Jesus ya say maong a balita na Panarian et nipulong ed interon dalin antis ya onsabi so “anggaan.” (Mat. 24:14) Anto tay “anggaan”? Ontutukoy itan ed panaon ya deralen nen Jehova so mauges ya sistema nen Satanas. Wala lay inyeskedyul nen Jehova ya “agew tan oras” parad satan. (Mat. 24:36; Gawa 1:7) Kanian kada agew, paasingger tayo lan paasingger ed anggaan. (Roma 13:11) Importante sirin ya itultuloy tayoy manpulong legan ya wala ni panaon! Walay importantin tepet ya nepeg tayon pan-isipan: Antoy rason akin et manpupulong tayo? Say simplin ebat et panangaro. Say panagpulong tayo et pakanengnengan ya inar-aro tayoy katuaan, inar-aro tayo ray totoo, tan nagkalalo ed amin, inar-aro tayoy Jehova tan say ngaran to. w24.05 14-15 ¶2-3

Atateng, paseseg yoy anak yo ya obserbaan to ray walad kalikasan. Legan kayon manaakar ed kaalogan o mantatanaman, ipaimano yod anak yo iray balibalin kurti o desinyo ya nanengneng ed kalikasan. Makatulong itan pian natalosan to ya walay sakey ya matalino tan marundunong ya nandesinyo ed saratan. Singa bilang, abaybayag lan aaralen na saray scientist so patelek o spiral ya kurti ya nanengneng ed kalikasan. Imbaga na biophysicist ya si Nicola Fameli ya no obserbaan mo iratan ya maong, nanengneng mo ya wala manayay tutumboken dan espisipikon bilang o numero. Aratan ya numero et tatawagen ya Fibonacci sequence. Dakel so nanengneng tayon patelek o spiral ya kurti diad kalikasan, singa say kurti na arum ya galaxy, say desinyo na shell na bisukol, saray bulong na tanaman, tan say inkaalasir na saray bukel na sunflower. w24.12 16 ¶7