Dochau a Rengrir a Rechad el Diak a Klechelid er Tir

 1. Ngera el omelodech a mla mo er ngii er aika el mereko el rak?

NGMLA mo betok el telael el rak el ruumesingd el chad er a beluulechad a ngar ngii a klechelid er tir. Engdi ngar aika el mereko el rak, e ngmla mo er ngii a klou el omelodech, e le te mla mo betok el chad a diak a klechelid er tir. Ngar er a bebil el beluu, e a ruumesingd el chad er ngii a melekoi el kmo ngdiak a klechelid er tir.b​—Mt. 24:12.

 2. Ngera bebil er a uchul me a rebetok el chad a diak a klechelid er tir?

² Ngera uchul me a rebetok el chad a melekoi el kmo ngdiak a klechelid er tir?c A rebebil a locha ultaut a osengir er a tametereng me a lechub e te di melatk a mondai er tir. (Lk. 8:14) A rekuk bebil a mla mo diak loumerang er a Dios. E kuk ngar ngii tirke el oumerang er a Dios engdi te omdasu el kmo a klechelid a dikea ultutelel e diak loltirakl a tekoi er a science me a ungil omesodel a tekoi. Te locha rongesterir a resechelirir, me a resensei, me a lechub a rechad er a media el melekoi el kmo a klengar a mlo er ngii el okiu a evolution, e diak el renges a ungil el uchul me ngkired el oumerang er a Dios. Ngdirrek el ngar ngii a rebebil el mederdirk a rengrir er a remengeteklel a klechelid el merechorech a rengrir el di sorir a udoud me a klisiich. Ngar er a kuk bebil er a beluu, e a kabelment a ngar ngii a llecherir el merrob aike el tekoi el loruul a klechelid.

 3. Ngera moktek er tia el suobel?

³ A Jesus a mengerechir er kid el ‘mor a bek el bedengir a re chad er ker me ker e doruul er tir el mo obengkel.’ (Mt. 28:19) Ngmekera dengesuterir a rechad el diak a klechelid er tir el mo betik a rengrir er a Dios e mo disaiplo er a Kristus? Ngkmal kired el mo medengei el kmo a rolel a chad a lomes er tia el klumech el domerk er ngii a locha ultuil er a beluu el lemlukeroul er ngii. El ua tiang, a rechad er a Europe a locha kakerous a uldesuir er a rechad er a Asia sel domerk er a klumech el mo er tir. E ngera uchul? E le ngar er a Europe, e a rebetok a ngar ngii a klemedengei er tir el kirel a Biblia e mla remenges el kmo a Dios a mileob a rokui el tekoi. Engdi ngar er a Asia, e a ruumesingd el chad a di telkib me a lechub e ngdiak a klemedengei er tir el kirel a Biblia, e locha diak loumerang er a Ulemeob. Tia el suobel a mo ngosukid el mo meduch el mengedecheduch er a rokui el chad sel doldingel, el kakerous a belurir me a lechub e ngklaumerang er tir.

 4. Ngera uchul me ngkired el melemolem el oba ungil uldasu?

⁴ Moba Ungil Uldasu. A bek el rak, e te ngar ngii a rechad el diak a klechelid er tir el mo Sioning er a Jehovah. A rebetok er tir a kmal mle ungil a omerellir, e kmal mle chetirir a chelebeldil a klechelid. A rekuk bebil a dimlak el ungil a rolel a klengar er tir, e dirrek el betok er tir a mla er ngii a mekngit el omerellir el mle kirir el mengoit. Ngokiu a ngelsuil a Jehovah, e ngsebechel el mo ulterekokl a rengud el kmo kede mo metik er tirke el “rredemelel a diak a ulebengelel el klengar.”​—Rel. 13:48, NW; 1 Ti. 2:3, 4.

 5. Ngera blechoel el rulleterir a rechad el mo kongei el orrenges er a klumech el domerk er ngii?

⁵ Bo Bekokuii e Lungil a Cheldechedecham. A rechad a blechoel el kongei el orrenges er kid, el diak el tekoi el dolekoi, e ngbai rolel a dolekoi er ngii. Ngsorir sel debekokuii, e dungil mengedecheduch e dolecholt er a klemeriarreng er kid er tir. Ngdiak dorrimel er tir el mo orrenges er kid, e kede bai melasem el mo medengelii a osengir el kirel a klechelid. El ua tiang, a rebebil a diak el sorir el mesaod el kirel a klechelid el obengkel a chad el diak lodengelii. E a rekuk bebil a omes er ngii el kmo ngdiak lungil blekeradel a doker er a chad er a uldesuel el kirel a Dios. Ngdirrek el ngar ngii a rebebil el merur sel lomes er tir a rechad el menguiu er a Biblia, el ileakl el obengkel a ta er a Sioning er a Jehovah. Me ngar er a chelsel a ngii di el blekeradel, e kede melasem el mo medengei a uldesuir.​—2 Ti. 2:24.

 6. Ngmilekera apostol Paulus e ochotii el kmo ngmle sebechel el melodech a cheldechedechal, e mekera doukerebai er ngii?

⁶ Kede mo mekerang a lsekum a chad el dongedecheduch er ngii a diak el soal sel dousbech a tekoi el uai a “Biblia,” me a “blebelel a Dios” me a “Dios” me a lechub e ng “klechelid”? Ngsebeched el oukerebai er a apostol Paulus e ngodechii a rolel a dongedecheduch er tir. A Paulus er sera longedecheduch er a rechad er a Judea, e nguluusbech a Bades. Engdi sera kuk longedecheduch er a remellomes a rengrir el chad er a Grik el ngar er a Areopagus, e ngdimlak lolekoi el kmo ngmelai a tekingel er a Biblia. (Rel. 17:2, 3, 22-31) Me kede mekera oukerebai er a Paulus? A lsekum e ke metik er a chad el diak el soal mesaod er a Biblia, e nglocha ungil a lak molekoi er ngii el kmo ke melai a tekingem er a Biblia sel mongedecheduch er ngii. Me a lsekum e ke mesa el kmo a chad a diak el soal a rechad a lesa el menguiu er a Biblia el obengkem, e nglocha sebechem el di olecholt a bades el okiu a electronic device er kau.

 7. A doukerebai er a Paulus, el ua losaod a 1 Korinth 9:20-23, e nglocha kired el mo mekerang?

⁷ Bo Moba Sekutaberreng e Morrenges er Tir. Ngkired el melasem el mo medengei ike el tekoi el ngar ngii a lerellii er tirke el chad el dongedecheduch er tir. (Osi. 20:5) Ka mluut el melatk er a kerebil a Paulus. Ngmlukeroul er a delongelir a rechad er a Judea. Me ngmle kirel el melodech er a rolel a lomerk er a klumech el mora rechad er a Chisentael, el tir a di mle telkib me a lechub e ngdimlak a klemedengei er tir el kirel a Jehovah me a Bades. Me nglocha kired el meruul a research me a lechub e kede mengedecheduch er tirke el klou a klemedengei er tir el ngar er a ongdibel me bo el sebeched el mo ungil medengei a uldesuir me a rengrir tirke el domerk er a klumech el mo er tir.​—Monguiu er a 1 Korinth 9:20-23.

 8. Ngera ta er a rolel a domuchel a cheldechedechad el kirel a Biblia?

⁸ A moktek er kid a soad el osiik er tirke el “chad el redemelel.” (Mt. 10:11, BT) Me a bo doruul er tiang, e ngkired el oker a uldesuir a rechad e mo kerekikl el orrenges er tir. A ta el odam el ngar er a England a oker er a rechad er a uldesuir el kirel a ungil chebechiil, me a rolel a lomekeroul er a rengalek, me a lechub e ngrolel a loutekangel a chelebirukel el omeruul. Me a uriul er a lorrenges er tir, e ngoker el kmo, “Ngera uldesuem el kirel tia el ulekrael el milluches er a bekord el 2,000 el rak er a mla me mong?” E sola e diak lousbech er a tekoi el “Biblia,” e bai ochotii a ungil bades el bla lengiltii el ousbech er a dengua er ngii.

 9. Ngmekera sebeched el ngosuterir a rechad el chetirir el mesaod el kirel a Dios?

⁹ Ngsebeched el ochau a rengrir a rechad el tir a chetirir el mesaod el kirel a Dios lokiu sel dosaod a tekoi el lesemeriar er ngii. El ua tiang, a rebetok el chad a mechas a rengrir er a bleob el ngar tia el chutem me a dirrek el ngar er a eanged. Me nglocha sebeched el melekoi er tir el kmo: “Ke locha kongei el kmo a betok el tekoi el loruul a rechad a mlukdubech e le re scientist a uluusbech a tekoi el mla mo er ngii er tia el chutem. El ua tiang, a rechad el meruul a microphone a mesuub a dingad, me a remeruul a camera a mesuub a medad. Ngera uldesuem sel molatk el kirel aika el tekoi er tia el chutem? Omomdasu, e ngmlo er ngii el okiu a mengasireng el klisiich, me a lechub e ngchad, me a lechub e ngkuk ta er a tekoi?” A uriul er a dekerekikl el orrenges er tir, e ngsebeched el kmo: “A re engineer sel losuub er a rolel a lobeob a dingad me a medad, e kede locha omdasu el kmo tirka te mesuub aika el tekoi er techang. Ngkmal mle mechas a renguk er a tekoi el ledillii a ta er a chad er a omeluches er a irechar el kmo: ‘Ngike el mileob a dingad, ngdiak el sebechel lorrenges? Ngike el mileob a medad, ngdiak el sebechel lomes? . . . Ngii Ngike el lomesterir a rechad a klemedengei!’ A rebebil el scientist a oba osisiu el uldasu. (Psa. 94:9, 10, NW) E sebeched el ochotii a video er a jw.org^® er cheungel a “Interviews and Experiences” el ngar cheungel a “Viewpoints on the Origin of Life.” (Momes er cheungel a PUBLICATIONS > VIDEOS.) Me a lechub e kede mesterir a brochure el Was Life Created? me a lechub sel The Origin of Life​—Five Questions Worth Asking.

10. Ngmekera domuchel a cheldechedechad el obengkel a chad el diak el soal mesaod el kirel a Dios?

¹⁰ A ruumesingd el chad a oureng er a ungil klengar er a ngar mederir el klebesei. Engdi a rebetok a medakt el kmo tia el beluulechad a mo nguemed me a lechub e ngmo diak a chad el kiei er ngii. A ta el odam el oldingel a ongdibel el ngar er a Norway a melekoi el kmo a rechad el diak el sorir el mesaod el kirel a Dios a bai blechoel el kongei el mesaod el kirel a blekeradel er a beluulechad. Me a uriul er a loutkeu er a chad, e ngkmo: “Omomdasu, e ngmo uangera klengar er a ngar medad el klebesei? A ungil omeltked, ngultuil er a rechad er a balatiks, me a re scientist me a lechub e ngkuk ta er a chad?” A uriul er a lorrenges er tir, e ngmenguiu me a lechub e ngmesaod er a ta el bades el melekoi el kirel a ungil klengar er a ngar medad el klebesei. A rebebil a mechas a rengrir er a telbiil el ngar er a Biblia el melekoi el kmo tia el chutem a di ngar ngii el mo cherechar me a rungil chad a mo kiei er ngii el diak a ulebengelel.​—Psa. 37:29; Oli. 1:4.

11. Ngera uchul me ngkired el melasem a kakerous el rolel a cheldecheduch, e mekera doukerebai er a Paulus, el ua losaod a Rom 1:14-16?

¹¹ Ngkired el ousbech a kakerous el rolel a cheldecheduch sel dongedecheduch er a rechad. E ngera uchul? E le derta el chad a kakerous. A tekoi el lesemeriar er ngii a tang a locha kuk diak lsoal a ta er a chad. A rebebil a kongei el mesaod el kirel a Dios me a lechub a Biblia, engdi rekuk bebil a sorir a dosaod er a kuk bebil er a tekoi er a uchei. Me ngar er a chelsel a ngii di el blekeradel, e ngkired el ousbech a techall el mengedecheduch er a rekakerous el chad. (Monguiu er a Rom 1:14-16.) Nguaisei, engdi ngkired el blechoel el melatk el kmo a Jehovah a ngike el omekeroul er a klemerang er a chelsel a rengrir tirke el melemalt a rengrir el chad.​—1 Ko. 3:6, 7.

12. Ngmekera e mo sebeched el omeksemeriar a rengrir a rechad er aike el beluu er a Asia el tir a dirkak a ta el bo lomdasu el kmo ngmera el ngar ngii a Ulemeob?

¹² Meliuekl er a beluulechad, e a rebetok el publisher a mla metik er a rechad er aike el beluu er a Asia, el uldimukl er a rebebil el mla er aike el beluu el kabelment a mla merrob a bebil el tekoi el loruul a klechelid. Me ngar er a bebil el beluu er a Asia, e a rebetok a dirkak a ta el bo lomdasu el kmo ngmera el ngar ngii a Ulemeob. Me a rebebil a kora semeriar e kongei er a omesubel a Biblia, engdi rekuk bebil a diak el semeriar el mesuub a beches el uldasu. Me ngmekera dengesuterir? A rebebil er a publisher a mla muchel a ungil cheldecheduch lobengterir a rechad lokiu a sel lungil mengedecheduch er tir, e lolecholt a klemeriarreng, e sel lebo er ngii a techall e te ouchais er a rolel e a klengar er tir a mlo ungil e le tir el ulemuchel el oltaut a omellach er a Biblia.

13. Ngera sebechel ngosuterir a rechad el mo semeriar er a Biblia? (Momes er a siasing er a medal tia el babier.)

¹³ A rebetok el chad el dekot el mengedecheduch er tir a kmal sorir aike el mellomes el ulekrael er a Biblia el kirel a klengar er a bek el sils. (Oli. 7:12) Ngar er a New York, e a ta el odos el oldingel er a rechad el melekoi a tekoi er a Mandarin a kmo: “Ak melasem el olecholt a klemeriarreng el mora rechad el kungedecheduch er tir e dirrek el orrenges er tir. A lsekum ak mo medengei el kmo te dirk mla er a ngodech el beluu el mei, e a kuker er a derta er tir el kmo: ‘Ngkora uangera delengcheklem? Ke mla metik er a urerem? A rechad er a beluu, ngungil a omerellir el bedul kau?’” A lebebil er a taem e tiang a ngosuir el mo sebechel el mesaod er a ta er a osisechakl er a Biblia. Me sel lebo er ngii a techall, e ngii el odos a kmo: “Omomdasu, e ngera kot el klou a ultutelel el tekoi el kired el meruul er ngii me bo lengar ngii a ungil deleuill er kid me a rechad? Ngsebechek el ochotii a ta er a omelekoi el ngar er a Biblia? Ngmelekoi el kmo: ‘A uchelel a klautoketok a ua sel le kot el mesubech a kaud; mterebengii me lak lorael el mo klou.’ Omomdasu, e tia el ulekrael ngsebechel ngosukid el mo ungil a deleuill er kid me a rebebil?” (Osi. 17:14) A chouaika el rolel a cheldecheduch a sebechel el ngosukid el mo medengelterir tirke el sorir a deluut el mo oldingel er tir.

14. Ngmekera ta el odam el ngar er a Far East a lolengeseu er a rechad el melekoi el kmo ngdiak loumerang er a Dios?

¹⁴ E kuk mekerang el kirir tirke el melekoi el kmo te diak loumerang er a Dios? A odam el kemanget el taem el lomerk er a klumech el mora rechad el diak a klechelid er tir el ngar er a Far East a mesaod el kmo: “Ngblechoel sel ledu chad el kmo, ‘Ngdiak kuumerang er a Dios,’ e ngbelkul a kmo ngdiak loumerang aike el chelid el longull a ruumesingd el chad el ngar er sel basio er ngii. Me ak blechoel el kongei el kmo a oumesingd el chelid el rruul er a rechad a diak el merang. Ak dirrek el blechoel el menguiu er a Jeremia 16:20 el kmo: ‘Ng sebechel a chad el di ngii el meruul a chedul? Ng diak, e ngdi lsekum ng meruul er a chedul, e ng diak le meral chelid.’ E sola oker el kmo: ‘Kede mekera medengei el kmo ngera el chelid a merang me a ngera ulebeob er a rechad?’ Ak kerekikl el orrenges er ngii, e mo chiuii a Isaia 41:23 el kmo: ‘Msbedemam er a ikel ngar ngii er a ngar medad el sils, isei e a kim mo medengei el kmo kom chelid!’ E sola e ochotii a ta er a ulochel a Jehovah el kirel a ngar medad el taem.”

15. Ngera sebeched el suubii er a kerebai er a odam el ngar er a East Asia?

¹⁵ A ta el odam el ngar er a East Asia a ousbech er tiaikid el rolel a cheldecheduch sel lluut el mo oldingel er a rechad. Ngmelekoi el kmo: “Ak ulecholt a mellomes el ulekrael el ngar er a Biblia, me a mla tmaut el ulaoch er a Biblia, e dirrek el mesaod a tekoi el kirel tia el chutem. E sola e ochotii a rolel e aika el rokui a melutk el mora di ngar e mellomes a rengul el Ulemeob. Me a chad sel bocha lomdasu el kmo nglocha ngar ngii a Dios, e a kumuchel el olecholt er ngii a omesodel a Biblia el kirel a Jehovah.”

16. A doltirakl er a Hebru 11:6, e ngera uchul me a chad el mesuub a Biblia a kirel el mo oumerang er a Dios me a Biblia? E mekera dengesuir el mekurulii a klaumerang er ngii?

¹⁶ Sel dosuub a Biblia el obengterir a rechad el diak a klechelid er tir, e ngkired el blechoel el ngosuterir el smisichii a klaumerang er tir el kmo ngar ngii a Dios. (Monguiu er a Hebru 11:6.) E kired el ngosuterir el mo omekeroul a klaumerang er tir el ngar er a Biblia. Me nglocha mo kired el blechoel el omelekl a bebil el osisechakl. Me a bek el taem el dosuub el obengterir, e nglocha mo kired el mesaod a olechotel a kmo a Biblia a Tekingel a Dios. E tia locha uldimukl er a kedeb el omesodel a otutel a ulaoch er a Biblia, me a omesodel el kirel a tekoi er a science me a reksi, me a rolel a lolengeseu er kid er a klengar er kid er a bek el sils.

17. A bltkil a rengud er a rechad, ngera ngrullii el kirir?

¹⁷ Kede ngosuterir a rechad el mo disaiplo er a Kristus lokiu sel dolecholt a bltikerreng el mo er tir, alta ngar ngii a klechelid er tir me a lechub e ngdiak. (1 Ko. 13:1) Me sel dosisecheklterir, e ngsoad el ochotii el kmo a Dios a betik a rengul er kid e soal a bo lebetik a rengud er ngii. A bek el rak e a rebetok el telael el di mekekerei me a lechub e ngdimlak a klemedengei er tir el kirel a klechelid a mo metecholb e le tir el mla mesuub el mo betik a rengrir er a Dios. Me bo moba ungil uldasu, e molecholt a bltikerreng me a klemeriarreng el mora rokui el chad. Morrenges er tir e molasem el mo medengei uldesuir. Ngokiu a kerebai er kau, e mosisecheklterir el mo disaiplo er a Kristus.