Ke Medengei el Kmo Ngerang?

A ONGNGAK a kmal mle klou a ultutelel er a klengar er a rechad er a Israel er a irechar. Ngsebeched el metik a betok el omesodel a tekoi er ongngak me a klekedall er ongngak er a Biblia. Ngklou el part er a Biblia a chelitakl, el ua babier er a Psalm, Cheliteklel a Salomon, me a klengiterreng. A babier el Music in Biblical Life a mesaod el kirel a klengar er a taem er a Biblia el kmo, “ngbleketakl el meues el kmo a ongngak a ulebengkel a betok er aike el tekoi el lurruul.”

Ongngak me a klengar er a bek el sils. A rechad er a Israel uluutumetum e mengitakl el rolel te ouchais aike el ngar er a rengrir me a uldesuir. (Isa. 30:29) A redil a uluutumetum a tambourine e mengitakl e meloik sel lebo er ngii a beches el king, sel bo lekats a resoldau er a mekemad, me a temel aike el chedaol sils el telengtengil omengull. (Men. 11:34; 1 Sa. 18:​6, 7; 1 Ki. 1:​39, 40) A rechad er a Israel a dirrek el milengitakl a chelitakl er a klengiterreng lolechotel a kngtil a rengrir er a chad el mla mad. (2 Kr. 35:25) Ngua lolekoi a Cyclopedia er a McClintock me a Strong, “a rechad er a Hebru a kmal mle sorir a ongngak.”

Ongngak me tirke el olab omerreder. A reking er a Israel me ngdirrek el kmal mle sorir ongngak. King Saul ulemekedong er a David el mora blil el mo ousekool er a harp el mo er ngii. (1 Sa. 16:​18, 23) Uriul er a lebo el king a David e ngriruul a klekedall er ongngak, liluches a chelitakl, e tiltketerir a rechad el mo outumetum e mengitakl er a templo er a Jehovah. (2 Kr. 7:6; Amo. 6:5) A King Salomon a dirrek el mla er ngii a remesiungel el sechal me a redil el mengitakl.—Oli. 2:8.

Ongngak me a omengull. Sel kot el klou a ultutelel a tuluusbech ongngak el mengull. Te mle 4,000 el chad a milsiou loutumetum er a templo er a Jerusalem. (1 Kr. 23:5) Te uluutumetum a ongesmoll, lyre, harp, me a trombetang. (2 Kr. 5:12) Me nguaisei engdi ngdimlak di el tir a milengull er a Jehovah loeak a ongngak. A rebetok el chad er a Israel a milengitakl sel lorael er a rael el mora Jerusalem el mo meruul aike el chedaol sils. Aika el chelitakl a okedongall el Songs of the Ascents. (Psa. 120-134) E a doltirakl a babilengir a Rechijudea e a rechad er a Israel a milengitakl a bebil er a Psalma er a temel a blengur er a Baskua.

A ongngak a dirk klou a ultutelel er a rechedal a Dios. (Jak. 5:13) Omengitakl a telengtengil a omengull er kid. (Efe. 5:19) A ongngak oldak er kid me a rudam me a rudos er kid. (Kol. 3:16) E smisichid sel dechelebangel a ringel. (Rel. 16:25) Ongngak a klebokel el rolel e kede ochotii a klaumerang er kid me a bltkil a rengud el mora Jehovah.