Wat nao iumi savve abaotem mercy blo Jehovah? Hao nao hem showimaot dat “hem no laekem eniwan for dae”? (2 Pet. 3:9) Tingim mercy wea hem showim lo samfala wea duim serious sin. King David duim samfala barava serious sin, olsem adultery and murder. Nomata olsem, David hem repent, so Jehovah showimaot mercy and forgivim hem. (2 Sam. 12:​1-12) King Manasseh hem barava wicked for klosap full laef blo hem. Nomata wat hem duim hem barava nogud tumas, Jehovah acceptim wei wea hem repent and Hem showimaot mercy and forgivim hem. (2 Chron. 33:​9-16) Olketa example hia remindim iumi hao Jehovah evritaem showimaot mercy taem hem lukim reason for duim datwan. Hem bae resurrectim pipol olsem bikos olketa luksavve lo sin wea olketa duim and olketa repent. w24.05 4 ¶12

Bihaen Jehovah mekem olketa Israelite kamap free from Egypt, Jehovah appointim olketa priest for serve lo tabernacle. Olketa Levite kasem assignment for duim samfala waka lo datfala tabernacle. Hao, Jehovah lukaftarem gud olketa wea serve lo tabernacle or olketa wea camp klosap lo tabernacle, winim olketa narawan? Nomoa! Jehovah no fevarem eniwan. Evriwan lo camp blo Israel garem chance for enjoyim klos frenship witim Jehovah. For example, Jehovah mek sure full nation blo Israel savve lukim datfala spesol cloud and fire wea stap antap lo tabernacle. (Ex. 40:38) Taem datfala cloud start for muv lo eni niu direction, nomata olketa lo barava end blo datfala camp olketa savve lukim, and olketa savve redyim tings blo olketa, daonem tent, and muv lo semtaem witim full nation. (Num. 9:​15-23) Distaem tu, nomata wea nao iumi stap lo earth, iumi kasem benefit from wei wea Jehovah lovem, lukaftarem, and protectim iumi. w24.06 4 ¶10-12

Laef blo David stap lo danger. Son blo hem Absalom barava laek for kamap king and tekovarem kingdom blo hem. (2 Sam. 15:​12, 13) David need for lusim Jerusalem kwiktaem! Taem olketa start for lusim Jerusalem, David luksavve hem needim samwan for stay bak mekem datfala person savve updatem hem lo olketa plan blo Absalom. So David talem Zadok and olketa nara priest for stay bak lo Jerusalem mekem olketa savve report go bak lo hem. (2 Sam. 15:​27-29) Olketa mas barava careful. David mekem wanfala plan witim Zadok and Hushai, wea tufala hia loyal fren blo David. (2 Sam. 15:​32-37) Hushai followim datfala plan and mekem Absalom trustim hem. Hushai advaesem Absalom lo hao for attakim David, bat datwan givim chance for David redi for datfala attak. Then, Hushai talem Zadok and Abiathar abaotem datfala plan. (2 Sam. 17:​8-16) So tufala man hia pasim message go lo David, and datwan help for protectim David.—2 Sam. 17:​21, 22. w24.07 4-5 ¶9-10