کیہڑی چیز نے عبرانی مسیحیاں دی مدد کیتی کہ اوہ صبر نال مخالفت نُوں برداشت کر سکن؟ پولُس رسول جان دا سی کہ اوہدے ہم‌ایماناں نُوں ایہہ سمجھن دی لوڑ اے کہ مصیبتاں نُوں برداشت کرن نال اوہناں نُوں کیہڑے فائدے ہون گے۔ ایس لئی اوہنے دَسیا کہ جدوں اِک مسیحی نُوں اپنے ایمان دی وجہ توں کوئی مشکل برداشت کرنی پیندی اے تے اوہدوں اوس مسیحی دی تربیت ہوندی اے۔ ایس تربیت دی وجہ توں اوہ اپنیاں خوبیاں نُوں نکھارن تے اپنے اندر ہور خوبیاں پیدا کرن دے قابل ہوندا اے۔ جدوں عبرانی مسیحیاں نے غور کیتا ہوئے گا کہ مشکلاں نُوں برداشت کرن دے کِنّے چنگے نتیجے نکلدے نیں تے اوہناں لئی صبر نال ایہناں نُوں برداشت کرنا اسان ہویا ہوئے گا۔ ‎(‏عبرانیوں 12:‏11‏)‎‏ پولُس رسول نے عبرانی مسیحیاں نُوں ہلاشیری دِتی کہ اوہ ڈٹ کے مشکلاں دا سامنا کرن تے ہمت نہ ہارن۔ پولُس اوہناں نُوں ایہہ گل ایس لئی کہہ سکدا سی کیونکہ مسیحی بنن توں پہلاں اوہ آپ مسیحیاں تے ظلم کردا ہوندا سی۔ اوہ جان دا سی کہ مسیحیاں نال کِنّاں بھیڑا سلوک کیتا جاندا اے۔ اوہ صبر نال ظلم نُوں برداشت کرنا وی جان دا سی کیونکہ مسیحی بنن توں بعد اوہنوں وی مخالفت تے ظلم دا سامنا کرنا پیا سی۔—‏2-‏کُرنتھیوں 11:‏23-‏25‏۔ م24.‏09 ص.‏ 12، 13 پ.‏ 16، 17

جیویں جیویں دن لنگھدے جا رہے نیں، ساڈے لئی مُنادی کرنا ہور زیادہ ضروری ہوندا جا رہیا اے۔ پر ایہدی کیہہ وجہ اے؟ کیونکہ وقت تیزی نال لنگھ رہیا اے تے بوہت چھیتی خاتمہ آن والا اے۔ غور کرو کہ یسوع مسیح نے آخری زمانے چ مُنادی کرن بارے کیہڑی پیشین‌گوئی کیتی سی۔ متی دی اِنجیل چ دَسیا گیا اے کہ یسوع نے کہیا:‏ ”‏بادشاہی دی خوش‌خبری دی مُنادی ساری دُنیا چ کیتی جائے گی فیر خاتمہ آئے گا۔“‏ ‎(‏متی 24:‏14‏)‎‏ خاتمے دا کیہہ مطلب اے؟ خاتمے دا مطلب اے شیطان دی دُنیا دا مکمل خاتمہ۔ یہوواہ نے اوہناں واقعیاں دا دن یاں گھڑی طے کر لئی اے جیہڑے بس ہون ای والے نیں۔ ‎(‏متی 24:‏36؛‏ اعمال 1:‏7‏)‎‏ جیویں جیویں دن لنگھ رہے نیں، اَسی خاتمے دے ہور نیڑے ہوندے جا رہے آں۔ ‎(‏رومیوں 13:‏11‏)‎‏ پر جدوں تک دُنیا دا خاتمہ نئیں آندا، سانوں مُنادی کرن چ لگے رہنا چاہی دا اے۔ مُنادی دے کم تے غور کردے ویلے سانوں اپنے آپ کولوں ایہہ اہم سوال پچھنا چاہی دا اے:‏ اَسی خوش‌خبری دی مُنادی کیوں کرنے آں؟ ایہدا سادہ جیہا جواب اے، محبت دی وجہ توں۔ جدوں اَسی مُنادی کرنے آں تے اَسی ظاہر کرنے آں کہ سانوں خوش‌خبری دے پیغام نال محبت اے، لوکاں نال محبت اے تے سب توں ودھ کے یہوواہ تے اوہدے ناں نال محبت اے۔ م24.‏05 ص.‏ 14، 15 پ.‏ 2، 3

ماپیو، اپنے بچے نُوں ہلاشیری دَوو کہ اوہ یہوواہ دِیاں بنائیاں ہوئیاں چیزاں تے سوچ وچار کرے۔ جدوں تُسی اپنے بچیاں نال سیر کرن پارک جاندے او یاں اپنے گھر چ ای اوہناں نال مِل کے پودیاں دی دیکھ‌بھال کر رہے ہوندے او تے اوہناں دا دھیان ایس گل تے دَواؤ کہ یہوواہ نے کِنّے زبردست ڈیزائن والیاں چیزاں بنائیاں نیں۔ اِنج تُسی اوہناں نُوں ایہہ دَس سکو گے کہ یہوواہ چ کِنّی حکمت اے۔ مثال لئی، ذرا کائنات چ موجود اوہناں چیزاں تے غور کرو جنہاں چ گول دائرے والے ڈیزائن ہوندے نیں۔ اِک سائنس‌دان نے دَسیا کہ جے تُسی ایہناں ڈیزائناں چ گول دائریاں نُوں گنو گے تے توانوں پتہ چلے گا کہ ایہناں دائریاں دی اِک خاص تعداد ہوندی اے تے ایہہ اِک خاص ترتیب نال بنے ہوندے نیں۔ ایہہ ڈیزائن بوہت ساریاں چیزاں چ نظر آندے نیں جیویں کہ کہکشاواں، کجھ سپیاں دے خولاں چ، پتیاں چ تے سورج مکھی دے پُھل چ۔ م24.‏12 ص.‏ 16 پ.‏ 7