‘Popohl en Krais en Kaunda Amwail Mohngiong’

Kolose 3:15 koasoia duwen “popohl en Krais.” Dahieu “popohl en Krais”? E kin pidada popohl me emen kak kakairada nin duwen tohnpadahk en Krais men. Soangen popohl wet kin kohsang atail ese me Siohwa oh sapwellime Ohlo ketin poakohng kitail.—Sohn 14:​23, 27.

Wahnpoaron Pohl kangoange Kristian ko nan mwomwohdisohn Kolose ren mweidohng soangen popohl wet en kaunda arail mohngiong, de soangen aramas dahmen irail. Ia duwen ar pahn wia met? Lepin lokaiahn Krihs me Pohl doadoahngki ong “kaunda” kin dokedoke lepin lokaiao ong ampaia men nan mwadong ehu. Ia duwe, met sou wehwehki me “popohl en Krais” me anahne sewese kitail en koasoanehdi mwomwen atail mour?

Karasepe, ni sawehwe ehu eh pwarada nanpwungen kitail oh iangatail tohnkaudok men, kitail en mweidohng “popohl en Krais” en wia “ampaia” men ni karasaras. E pahn sewese kitail en pilada dahme kitail kak wia pwehn kolokolete popohl oh miniminpene. Ni atail kin wia met, mehnda ma kitail anahne tounmeteikihla dahme kitail mwahuki de nsensuwedkihla, kitail kin kasalehda me kitail mweidohng “popohl en Krais” en kaunda atail mohngiong.—Kol. 3:​12-14.