Josué

3 Chantá Josuewan tukuy israelitaswanqa,* tutamanta jatarikuspa Sitimmanta+ purirerqanku, Jordán mayumantaj chayarqanku. Paykunaqa chaypi chay chʼisi qhepakorqanku, manaraj mayuta pasashaspa.

2 Kinsa diasninmantaj cargoyoj kajkunaqa+ tukuynin campamentonta* purimorqanku. 3 Israelitasmantaj kamacherqanku: “Levita* sacerdotesqa*+ Jehová Diosniykichejpa trato ruwasqan arcata apanqanku. Paykunata apashajta rikuytawankamataj, maypichus kashankichej chaymanta puririnkichej, arcaj qhepanta rinkichej. 4 Jinapis uj kilometrota jina* qhepallanta rinkichej, ama astawanqa qayllaykunkichejchu. Ajinata arcaj qhepanta rinkichej may ñantachus rinaykichejta yachanaykichejpaj, imaraykuchus qankunaqa mana jaykʼajpis chay ñantaqa rerqankichejrajchu”, nispa.

5 Josuetaj israelitasman nerqa: “Llimphuchakuychej,+ imaraykuchus qʼayaqa Jehová Dios tʼukuna imasta qankunapaj ruwanqa”,+ nispa.

6 Sacerdotesmantaj nerqa: “Diospa trato ruwasqan arcata+ oqharikuspa, israelitaspa ñaupaqenkuman riychej”, nispa. Sacerdotestaj Diospa trato ruwasqan arcata oqharikuspa israelitaspa ñaupaqenkuman rerqanku.

7 Chaymanta Jehová Diosqa Josueta nerqa: “Kay pʼunchaymantapacha israelitasqa jatunpaj qhawasonqanku.+ Imaraykuchus noqa qanwan kasaj,+ imaynatachus Moiseswan karqani ajinata.+ 8 Trato ruwasqamanta arcata apaj sacerdotesmanqa, kayta kamachinki: ‘Jordán mayu kantunman chayaspaqa, yaku kantupi sayasqa qhepakunkichej’,+ nispa”.

9 Josuetaj israelitasman nerqa: “Jamuychej, Jehová Diosniykichejpa nisqanta uyarinaykichejpaj”, nispa. 10 Chantá Josueqa nillarqataj: “Kunanqa sutʼinta yachankichej kausaj Dios yanapashasusqaykichejta.+ Payqa ñaupaqeykichejmanta qharqonqapuni cananeosta, hititasta, heveosta, perizitasta, guirgaseosta, amorreosta, jebuseosta ima.+ 11 Jallpʼantinmanta Señorpa trato ruwasqan arcaqa, Jordán mayuman ñaupaqeykichejta yaykonqa. 12 Kunanqa Israel ayllusmanta* 12 qharista ajllaychej, sapa ayllumanta ujta.+ 13 Jallpʼantinmanta Señor Jehová Diospa arcanta apaj sacerdotespa chaki plantasninku Jordán yakuman saruykojtinkukama, patamanta jamoj yakoqa kikinpi sayaponqa uj qocha jina”,*+ nispa.

14 Israelitas qhepakorqanku chaymanta purirejtinku, niraj Jordán mayuta chimpashajtinku, Diospa trato ruwasqan arcata+ apaj sacerdotesqa israelitaspa ñaupaqenkuta rerqanku. 15 Chay arcata apajkunaqa Jordán mayuman chayarqanku. (Jordán mayu yakoqa sapa cosecha tiempo wasaykojpuni).+ Chay arcata apaj sacerdotes chakisninkuta yakuman churaykusqankutawankama, 16 patamanta jamoj yakoqa kikinpi sayaporqa. Uj qocha jina* sayarqa may karupi, Adán llajtapi, Zaretán qayllapi. Arabá qochaman, nisunman Kachi qochaman* rej yakutaj chʼakiporqa. Ajinata yakoqa kikinpi sayaporqa, israelitastaj mayuta pasarqanku, Jericó chayman. 17 Jehová Diospa trato ruwasqan arcata apaj sacerdotesqa, Jordán mayu chaupipi sayasqas qhepakorqanku, chʼaki jallpʼapi.+ Chaykamataj tukuynin israelitas Jordán mayuta chʼaki jallpʼanta pasarqanku.+