Jueces

1 Josué wañupusqanmanta qhepaman,+ israelitasqa* Jehová Diosta tapurerqanku:+ “¿Mayqen ayllutaj* ñaupajta cananeoswan maqanakoj renqa?”, nispa. 2 Jehová Diostaj paykunaman kuticherqa: “Judá aylluraj ñaupajta maqanakoj renqa.+ Noqa chay jallpʼasta paykunaman qosaj”,* nispa. 3 Chantá Judá ayllumanta kajkunaqa, Simeón ayllumanta hermanosninkuta nerqanku: “Cananeoswan maqanakoj rina ari, noqaykuman tocawayku* chay jallpʼasman.+ Chaymantaqa qankunaman tocasunkichej chay jallpʼasmanñataj risunchej”, nispa. Ajinapi Simeón ayllumanta kajkunaqa, Judá ayllumanta kajkunawan khuska maqanakoj rerqanku.

4 Judá ayllumanta kajkuna maqanakoj wicharejtinku, Jehová Diosqa cananeosta, perizitastapis makisninkuman jaywaykorqa.+ Bezecpeqa 10 mil runasta atiparqanku. 5 Ajinata cananeosta,+ perizitastawan+ atipaykushaspa, Adoni-Bezectapis Bezecpi tariparqanku, chaypitaj paywan maqanakorqanku. 6 Adoni-Bézec ayqekojtintaj, qhatiykuspa japʼimorqanku. Chantataj makisninmanta, chakisninmantawan machu dedosninta mururparerqanku. 7 Ajinata ruwajtinku Adoni-Bezecqa nerqa: “Noqaqa 70 reyespa machu dedosninkuta mururpacherqani makisninkumanta, chakisninkumantapis. Chay runasqa mesay uramanta mikhuy puchusta oqharikunku. Kunantaj Diosqa imatachus noqa paykunata ruwarqani, chayllatataj ruwawan”, nispa. Chantaqa payta Jerusalenman pusarqanku,+ chaypitaj wañuporqa.

8 Judá ayllumanta kajkunaqa Jerusalén llajtawanpis maqanakullarqankutaj.+ Chay llajtayojkunata espadawan wañurachiytawantaj, chay llajtataqa ninawan ruphaykucherqanku. 9 Chantaqa orqospi tiyakoj cananeoswanñataj maqanakoj rerqanku, jinallataj Neguebpi, Sefelapi+ tiyakoj cananeoswanpis. 10 Chantá Hebronpi tiyakoj cananeoswanpis maqanakullarqankutaj. Chaypitaj atiparqanku Sesaita, Ahimanta, Talmaita ima. Hebronqa ñaupajta sutikorqa Quiryat-Arbá.+

11 Chaymantaqa Debir llajtayojkunawan maqanakamorqanku.+ (Debirqa ñaupajta sutikorqa Quiryat-Séfer).+ 12 Chaypacha Calebqa+ nerqa: “Pichá Quiryat-Séfer llajtawan maqanakonqa, atipaykonqataj chay runamanqa, waway Acsata warmin kananpaj qosaj”,+ nispa. 13 Chay llajtataqa atipaykorqa Quenazpa+ wawan Otniel.+ Payqa Calebpa sullkʼa hermanonpa wawan karqa. Calebtaj warmi wawan Acsata Otnielman qorqa warmin kananpaj. 14 Otniel payta wasinman pusakapushajtin, Acsaqa Otnielta nerqa tatan Calebmanta jallpʼata mañakunanta. Chantá Acsaqa burronmanta uraykorqa.* Calebtaj taporqa: “¿Imatá munanki wawáy?”, nispa. 15 Paytaj nerqa: “Ujta mañarikusqayki tatáy. Ñapis qowankiña sur ladopi* jallpʼata. Kunanqa qollawaytaj ari Gulot-Maimtawan”,* nispa. Calebtaj payman qorqa Pata Gulotta, Ura Gulottawan.

16 Moisespa suegronpa+ mirayninmanta quenita runasqa,+ palma sachʼasniyoj llajtamanta*+ wicharerqanku Judá ayllumanta kajkunawan khuska. Rerqankutaj Judaj chʼin jallpʼasninman, Aradpa+ sur ladonman.* Chaypitaj tiyakorqanku chay llajtayojkunawan.+ 17 Judá ayllumanta kajkunataj, Simeón ayllumanta hermanosninkuwan rillarqankupuni. Paykunaqa maqanakamorqanku Zefatpi tiyakoj cananeoswan, chay llajtatataj qʼalata thuñiykorqanku.+ Chayrayku chay llajtataqa Hormá*+ nispa suticharqanku. 18 Chanta Judá ayllumanta kajkunaqa japʼikaporqanku Gazata+ jallpʼasnintawan, Asquelonta+ jallpʼasnintawan, jinallataj Ecronta+ jallpʼasnintawan. 19 Jehová Diosqa Judá ayllumanta kajkunawan kasharqa. Chayrayku paykunaqa orqospi kaj jallpʼasta japʼikaporqanku. Chaywanpis chay ura pampaspi tiyakojkunataqa mana wijchʼuyta aterqankuchu. Chay runaspataqa tiyaporqa maqanakuna carretasninku, ruedasninpi fierro josesniyoj.*+ 20 Moisés nisqanman jina, Hebrontaqa Calebman qoporqanku.+ Calebtaj chaymanta wijchʼorqa Anacpa kinsantin wawasninta.+

21 Chaywanpis Benjamín ayllumanta kajkunaqa, Jerusalenpi tiyakoj jebuseosta mana wijchʼorqankuchu. Chayrayku jebuseosqa kunankama Jerusalenpi tiyakushanku, benjaminitaswan khuska.+

22 Chaypachallataj Josejpa mirayninmanta kajkunaqa+ Betelman maqanakoj wicharerqanku, Jehová Diostaj paykunawan kasharqa.+ 23 Paykunaqa wateqajkunata Betelman kacharqanku. Betelqa ñaupajta sutikorqa Luz.+ 24 Chay wateqajkunataj uj runata chay llajtamanta llojsimushajta rikuspa, nerqanku: “Ama jina kaspa rikuchiwayku ari maynintachus llajtaman yaykunata, noqaykutaj qanta khuyasqayku”, nispa. 25 Ajinapi chay runaqa paykunaman rikucherqa maynintachus llajtaman yaykunata. Paykunataj llajtaman yaykuspa, chay llajtayojkunata espadawan wañuracherqanku. Chay runatataj mana wañucherqankuchu, nitaj familiantapis.+ 26 Chay runaqa hititaspa jallpʼankuman ripuspa chaypi uj llajtata sayaricherqa, suticharqataj Luz nispa. Kunankamapis chay llajtaqa ajinallapuni sutikun.

27 Manasés ayllumanta kajkunaqa mana wijchʼorqankuchu kay llajtasmanta cananeosta: Bet-Seanmanta, Taanacmanta,+ Dormanta, Ibleammanta, Meguidomanta, jinallataj chay llajtaspa muyuyninkupi kaj ranchosmantapis.+ Cananeosqa mana chay jallpʼasmanta kuyuriyta munarqankuchu. 28 Israelitasqa aswan atiyniyojña kaspa, tukuy chay cananeosta wijchʼunankumantaqa,+ esclavosta jina sinchʼita trabajachiyta qallarerqanku.+

29 Efraín ayllumanta kajkunapis, manallataj wijchʼorqankuchu Guezerpi tiyakoj cananeosta. Ajinamanta cananeosqa paykunallawanpuni Guezerpi tiyakorqanku.+

30 Zabulón ayllumanta kajkunapis, manallataj wijchʼorqankuchu Quitronpi tiyakojkunata, nillataj Nahalolpi+ tiyakojkunatapis. Ajinamanta cananeosqa paykunallawanpuni tiyakorqanku, esclavos jina sinchʼita trabajaspa.+

31 Aser ayllumanta kajkunapis, manallataj wijchʼorqankuchu kay llajtaspi tiyakojkunata: Akkomanta, Sidonmanta,+ Ahlabmanta, Aczibmanta,+ Helbamanta, Aficmanta,+ Rehobmanta+ ima. 32 Chay jallpʼasmanta cananeosta mana wijchʼusqankurayku, Aserpa mirayninmanta kajkunaqa paykunawan khuska tiyakorqanku.

33 Neftalí ayllumanta kajkunapis, manallataj wijchʼorqankuchu Bet-Semespi tiyakojkunata, nillataj Bet-Anatpi+ tiyakojkunatapis. Ajinamanta paykunaqa chay jallpʼaspi tiyakoj cananeoswan khuska tiyakorqanku.+ Chaywanpis Bet-Semespi, Bet-Anatpi tiyakojkunataqa, esclavosta jina sinchʼita trabajachiyta qallarerqanku.

34 Amorreosqa manapuni Dan ayllumanta kajkunata saqerqankuchu ura pampasman uraykojta. Chayrayku paykunaqa orqosllapiña tiyakaporqanku.+ 35 Chay amorreosqa manapuni llojsiyta munarqankuchu Heres orqomanta, Ayalonmanta,+ Saalbimmantawan.+ Chaywanpis Josejpa mirayninmanta kajkunaqa, atiyniyojña kaspa amorreosta esclavosta jina sinchʼita trabajachiyta qallarerqanku. 36 Amorreospa jallpʼasninkoj lindesnenqa* Acrabim wichaymantapacha karqa,+ chantapis Selamantapacha orqoskama.