Lucas

11 Jesusqa uj cheqapi Diosmanta mañakusharqa, tukusqantawantaj ujnin discipulon nerqa: “Señor, yachachiwayku Diosmanta mañakuyta, imaynatachus Juanpis discipulosninman yachacherqa ajinata”, nispa.

2 Jesustaj paykunata nerqa: “Diosmanta mañakushaspaqa niychej: ‘Tatáy, sutiyki jatunchasqa kachun.*+ Gobiernoyki jamuchun.+ 3 Sapa pʼunchaypaj tʼantaykuta* qowayku necesitasqaykuman jina.+ 4 Juchasniykutataj perdonawayku,+ noqaykupis contraykupi juchallikojkunata* perdonayku.+ Amataj juchaman urmajta saqewaykuchu’,+ nispa”.

5 Chantá Jesusqa nillarqataj: “Sichus ujniykichej chaupi tutata amigonpaman rispa nimunman: ‘Amigóy, kinsa tʼantata ayniriway. 6 Ujnin amigoy karumanta chayamun, nitaj imaypis kanchu qorinaypaj’, nispa. 7 Chay amigontaj wasi ukhumanta nimunman: ‘Amaña umayta nanachiwaychu. Punkoqa llavesqaña, wawitasniypis noqawan khuska camapi puñushankuña, mana jatarimuymanchu qosunaypaj’, nispa. 8 Kayta niykichej: Amigon kajtinpis payqa mana jatarimonqachu imallatapis qonanpaj, astawanpis anchata mañakusqanraykulla+ jatarimuspa tukuy ima necesitasqanta qonqa. 9 Chayrayku niykichej: Mañakullaychejpuni+ qosonqachejtaj, maskʼallaychejpuni tarinkichejtaj, punkutapis takallaychejpuni kicharisonqachejtaj.+ 10 Mañakojqa japʼin,+ maskʼajpis tarin, punkuta takajtapis kicharenqanku. 11 ¿Mayqen tatataj qankunamanta wawanman katarita qonman pescadota mañakushajtinri?+ 12 Runtuta mañakojtinpis, ¿alacrantachu qonman? 13 Sichus qankuna sajra runas kashaspa, allin imasta wawasniykichejman qoyta yachankichej chayqa, astawanrajchá cielopi kashaj Tataykichejqa espíritu santota qonqa mañakojkunaman”.+

14 Aswan qhepaman Jesusqa opayachej supayta uj runamanta qharqorqa,+ chay supay llojsisqantawan opitaqa parlarerqa. Runastaj mayta tʼukorqanku.+ 15 Wakintaj nerqanku: “Kay runaqa supaykunata qharqon supaykunaj kamachejninku Satanaspa* atiyninwan”,+ nispa. 16 Wakintajrí Jesusta pantachiyta munaspa cielomanta uj señalta+ rikuchinanta mañarqanku. 17 Jesusqa imatachus yuyasqankuta yachaspa+ paykunata nerqa: “Mayqen nacionllapipis tʼaqanaku kan chayqa, chay nacionqa chinkapun. Uj familiapipis tʼaqanaku kan chayqa, manaña khuska tiyakuyta atinkuchu. 18 Ajinallataj, Satanaschus pay kikin tʼaqanasqa kashan chayqa, gobiernonqa chinkanqa. Chayta niykichej Satanaspa* atiyninwan supaykunata qharqosqayta niwasqaykichejrayku. 19 Satanaspa* atiyninwanchus supaykunata qharqoni chayqa, ¿pejpa atiyninwantaj discipulosniykichej supaykunata qharqonkuri? Chayrayku paykunallataj juzgasonqachej. 20 Sichus noqa Diospa atiyninwan*+ supaykunata qharqoni chayqa, Diospa Gobiernonqa taripasunkichejña.+ 21 Uj kallpasapa runa sumaj armasqa wasinta qhawajtenqa, ni pipis kapuyninta suwayta atinchu. 22 Wajchus paymanta aswan kallpayoj jamuspa atipanman chayqa, tukuy atienekusqan armasninta qhechunman. Chantá apakapusqan imasta wajkunaman rakʼiranman. 23 Pillapis mana noqawan kajqa, contraypi kashan. Runasta noqawan mana tantajpis, runasta noqamanta ayqechin.+

24 ”Millay supayqa uj runamanta llojsispa, chʼaki jallpʼasta purimun samarinanpaj uj lugarta maskʼaspa, mana tarispataj nin: ‘Wasiyman kutipusaj, mayqenmantachus llojsiporqani chayman’,+ nispa. 25 Chayaspataj pichasqata taripan, kʼachanchasqatataj. 26 Chantá rispa waj qanchis supaykunatawan pusamun, paymanta aswan sajrasta, chay runaman yaykuspataj chaypi tiyakunku. Chay runaj kausaynintaj ñaupajmanta nisqaqa aswan mana walejman tukupun”, nispa.

27 Jesús chayta nishajtintaj, runas ukhumanta uj warmi qhaparimorqa: “Maytachá kusikun wijsanpi apasorqa, ñuñuchisorqataj chay warmeqa”,+ nispa. 28 Jesustajrí kuticherqa: “Mana. Diospa palabranta uyarispa kasukojkunamin kusisqaqa kanku”,+ nispa.

29 Ashkha runas kʼiskinakamushajtinkutaj, Jesús nerqa: “Kay tiempomanta sajra runasqa uj señalta mañakushanku. Manataj ima señaltapis rikonqankuchu, manachayqa Jonaspa señalnillanta.+ 30 Imaynatachus Jonás+ señal karqa ninivitaspaj, ajinallatataj noqapis* señal kasaj kay tiempomanta runaspaj. 31 Sur ladomanta* reinaqa,+ kay tiempomanta runaswan Juicio Pʼunchaypi kausarimonqa, paykunatataj juchachanqa. Payqa karu jallpʼamanta jamorqa Salomonpa yachayninta uyarej. Chaywanpis Salomonmanta nisqaqa aswan kuraj kaypi kashan.+ 32 Ninivemanta runaspis, kay tiempomanta runaswan Juicio Pʼunchaypi kausarimonqanku, paykunatataj juchachanqanku. Ninivemanta runasqa Jonás willasqanrayku juchasninkumanta pesachikorqanku.+ Chaywanpis Jonasmanta nisqaqa aswan kuraj kaypi kashan. 33 Mecherota japʼichispaqa, mana pipis pakaykunchu, nitaj canastawan* kʼumpuykunchu, astawanqa pataman churan+ yaykumojkunata kʼanchananpaj. 34 Ñawiykeqa cuerpoykej kʼanchaynin. Ñawiyki sutʼita* qhawan chayqa, tukuy cuerpoyki lliphipirin.* Ñawiykichus envidiakun chayqa,* cuerpoyki laqha kanqa.+ 35 Chayrayku allinta qhawarikuy, qanpi kaj kʼanchay ama laqha kananpaj. 36 Tukuy cuerpoykichus ni imayna laqhayoj lliphipirishan chayqa, tukuy cuerpoyki mayta lliphipirenqa, imaynatachus mecheropis kʼanchasunki ajinata”.

37 Jesús parlayta tukojtin, uj fariseoqa payta wajyarikorqa khuska mikhunankupaj. Ajinamanta fariseoj wasinman yaykuspa mikhoj tiyaykukorqa. 38 Chay fariseotajrí mayta tʼukorqa, Jesús mikhunanpaj mana makisninta mayllakusqanmanta.*+ 39 Señor Jesustaj payta nerqa: “Qankuna fariseosqa, vasota, platotapis jawallanta mayllankichej, ukhuntataj mana. Ajina qankunapis kankichej, ukhuykichejqa juntʼa kashan tukuy imata munapayaywan, sajra kaywanpis.+ 40 Mana yuyayniyojkuna. ¿Manachu jawanta ruwajqa, ukhuntapis ruwallarqataj? 41 Chayrayku imallatapis wajchaspaj ruwaspaqa tukuy sonqo ruwaychej. Ajinamanta tukuy imaykichej llimphu kanqa. 42 ¡Ay qankunamanta fariseos! Qankunaqa mentamanta, rudamanta, waj qhorasmantawan* sapa chunkamanta ujta qonkichej.+ Qonqakapunkichejtaj Diospa cheqan kayninta, payta munakuytapis. Chay imastaqa qonaykichejpuni karqa, ama chay ujkunata qonqaspalla.+ 43 ¡Ay qankunamanta fariseos! Qankunaqa sinagogaspi ñaupajpipuni* tiyayta munankichej, mercado plazaspipis napaykuchikuyta munankichej.+ 44 ¡Ay qankunamanta! Qankunaqa mana rikukoj sepulturas jina* kankichej,+ runastaj chay patanta purinku mana yachaspalla”.

45 Leymanta sumajta yachajkunamanta ujnintaj Jesusta nerqa: “Yachachejníy, chay imasta nispaqa noqaykutawan insultashawayku”, nispa. 46 Jesustaj kuticherqa: “¡Ay qankunamantapis Leymanta sumajta yachajkuna! Qankunaqa mana apay atina qʼepista runasman qʼepirichinkichej, qankunatajrí mana dedollaykichejwanpis chay qʼepista llankhaykunkichejchu.+

47 ”¡Ay qankunamanta! Qankunaqa profetaspa sepulturasninkuta allinchankichej, ñaupa tatasniykichejtaj paykunata wañucherqanku.+ 48 Qankunaqa ñaupa tatasniykichejpa ruwasqankuta yachashaspa, chay ruwasqankuta allinpaj qhawankichej. Paykunaqa profetasta wañucherqanku,+ qankunatajrí chay profetaspa sepulturasninkuta allinchankichej. 49 Chayrayku Diosqa yachayninpi nillarqataj: ‘Noqa paykunaman kachasaj profetasta, apostolestawan, paykunatataj wakinta wañuchenqanku, wakintataj qhatiykachanqanku. 50 Ajinamanta kay tiempomanta runasqa juchayoj rikhurenqanku* qallariymantapacha* tukuy profetaspa yawarnin jichʼakusqanmanta,+ 51 Abelpa+ yawarninmantapacha Zacariaspa yawarninkama, pitachus temploj ñaupaqenpi, altar qayllapi wañucherqanku chaypa yawarninkama’,+ nispa. Arí, qankunata niykichej, kay tiempomanta runasqa chay yawarmanta juchayoj rikhurenqanku.*

52 ”¡Ay qankunamanta Leymanta sumajta yachajkuna, yachaypa llaventa runasmanta qhechunkichej! Qankunaqa mana yaykorqankichejchu, yaykushajkunatapis jarkʼankichej”.+

53 Jesús chaymanta llojsipusqantawan, leymanta yachachejkunawan fariseoswanqa phiñasqa payta muyuykuspa, tukuy imamanta tapuykacharqanku, 54 parlasqanpi imallapipis pantajtin chʼataykunankupaj.*+