Lucas

6 Jesusqa samarikuna pʼunchaypi trigo chajras chaupita pasasharqa, discipulosnintaj trigo umasta pʼitispa*+ makisninkuwan qhaqoytawan mikhusharqanku.+ 2 Wakin fariseostaj paykunata nerqanku: “¿Imaraykutaj samarikuna pʼunchaypi mana ruwanata ruwashankichejri?”,+ nispa. 3 Jesustaj kuticherqa: “¿Manachu jaykʼajpis leerqankichej imatachus David ruwasqanta paypis paywan kajkunapis yarqhachikushajtinku?+ 4 Payqa Diospa wasinman yaykuytawan, Diosman jaywasqa tʼantasta* japʼispa mikhorqa, paywan kajkunamanpis jaywarillarqataj. Chay tʼantataqa ni pi mikhunanchu karqa, manachayqa sacerdoteslla”,+ nispa. 5 Chantá nillarqataj: “Noqaqa* samarikuna pʼunchaypa Señornin kani”,+ nispa.

6 Jesusqa waj samarikuna pʼunchaypi+ sinagogaman yaykuspa yachachiyta qallarerqa. Chaypitaj uj runa kasharqa paña makin chʼakisqa.+ 7 Leymanta yachachejkunawan fariseoswantaj Jesusta wateqasharqanku, samarikuna pʼunchaypi pillatapis sanoyachejtin chʼataykunankupaj.* 8 Jesustaj imatachus yuyashasqankuta yachaspa,+ makin chʼakisqa runata nerqa: “Sayarispa kay chaupiman jamuy”, nispa. Chay runataj chaupiman rerqa. 9 Jesustaj paykunata nerqa: “Tapurisqaykichej: ¿Imatataj samarikuna pʼunchaypi ruwana tiyan? ¿Allin kajtachu, sajra kajtachu? ¿Runata salvanachu, wañuchinachu?”,+ nispa. 10 Chantá Jesusqa muyuyninpi kajkunata qhawarispa, chay runata nerqa: “Makiykita aysariy”, nispa. Aysarejtintaj makenqa sano rikhurerqa. 11 Paykunatajrí rabiamanta phatasharqankuña, paykunapurataj parlanakorqanku imatachus Jesusta ruwaykunankuta.

12 Uj pʼunchay Jesusqa orqoman rerqa Diosmanta mañakoj,+ chaypitaj tutantin Diosmanta mañakorqa.+ 13 Tutamantataj discipulosninta wajyaspa, paykunamanta 12 runasta ajllarqa. Paykunamantaj apóstoles sutita churarqa.+ 14 Paykunaj sutisninkutaj karqa: Simón pimanchus Pedro sutita churarqa chay, Simonpa hermanon Andrés, Santiago, Juan, Felipe,+ Bartolomé, 15 Mateo, Tomás,+ Alfeoj wawan Santiago, Simón, pitachus ninku “imatapis tukuy sonqo ruwarqon” chay, 16 Santiagoj wawan Judas,* chantá Judas Iscariote, pichus aswan qhepaman Jesusta japʼicherqa chay.

17 Jesusqa paykunawan orqomanta uraykamuspa uj pampaman chayarqa. Chaypitaj ashkha discipulosnin may chhika runaswan kashasqanku. Paykunaqa tukuynin Judeamanta, Jerusalenmanta, mar qocha kantupi kaj Tiro, Sidón jallpʼasmantawan jamusqanku Jesusta uyarinankupaj, onqoyninkumantataj sanoyachisqa kanankupaj. 18 Supaykunawan ñakʼarichisqa kajkunapis sanoyachisqa karqanku. 19 Tukuyninkutaj Jesusta llankhariyta munarqanku, paymanta llojsej atiy+ tukuyta sanoyachisqanrayku.

20 Jesusqa discipulosninta qhawarispa nerqa:

“Kusisqa kankichej wajchasqa, Diospa Gobiernonqa qankunajta.+

21 ”Kusisqa kankichej kunan yarqhachikojkunaqa, qankunaqa sajsachisqa kankichej.+

”Kusisqa kankichej kunan waqajkunaqa, qankunaqa asirikunkichej.+

22 ”Kusisqa kankichej noqarayku* runas chejnisojtiykichej,+ chaupinkumanta qharqosojtiykichej,+ rimasojtiykichej, sajra runata jina qhesachasojtiykichejpis. 23 Chaypachaqa kusirikuychej, phinkiriychejtaj, cielopi tʼinkaykichej jatun kasqanrayku. Paykunaj ñaupa tatasninkupis ajinallatataj profetasta ruwaj kanku.+

24 ”Ay qankunamanta qhapajkuna,+ qankunapajqa imachus kapusunkichej chayllaña kanqa.+

25 ”Ay qankunamanta kunan sajsasqa kajkuna, qankunaqa yarqhaymanta wañunkichej.

”Ay qankunamanta kunan asikojkuna, qankunaqa llakikunkichejtaj waqankichejtaj.+

26 ”Ay tukuy runas qankunamanta allinta parlajtinku,+ ñaupa tatasninkupis ajinata llulla profetasmanta parlarqanku.

27 ”Qankuna uyariwajkunamanqa niykichej: Enemigosniykichejtaqa munakullaychejpuni, qankunata chejnejkunapajpis allin kajta ruwapullaychejpuni.+ 28 Qankunata maldicejkunatapis bendecillaychejpuni, insultasojkunapajpis Diosmanta mañapullaychejpuni.+ 29 Pillapis uj lado uyaykipi laqʼasojtenqa, ujnin lado uyaykitawan rikuchiy. Pillapis ujnin ropaykita qhechusojtenqa, ujnin ropaykitawan lluchʼukuspa qopuy.+ 30 Mañakusojmanqa qoy,+ imaykita qhechusojmantapis ama mañakapuychu.

31 ”Chantapis imatachus munankichej runas ruwapusunaykichejta, chayllatataj paykunapajpis ruwapuychej.+

32 ”Qankunata munakojkunallatachus munakunkichej chayqa, ¿ima allintaj qankunapaj kanmanri? Juchasapaspis paykunata munakojkunallata munakunku.+ 33 Qankunapaj allinta ruwajkunallapajchus allinta ruwankichej chayqa, ¿ima allintaj qankunapaj kanmanri? Chaytaqa juchasapaspis ruwallankutaj. 34 Chantapis kutichipusunaykichejta suyaspallachus wajkunaman manurinkichej* chayqa, ¿ima allintaj qankunapaj kanmanri?+ Juchasapaspis juchasapasman manurillankutaj, tukuyninta kutichipunankuta suyaspa. 35 Qankunatajrí enemigosniykichejta munakullaychejpuni, paykunapaj allin kajta ruwapullaychejpuni, ama imata suyaspa manullaychejpuni.+ Ajinamanta tʼinkaykichejqa jatun kanqa, Aswan Patapi kaj Diospa wawasnintaj kankichej. Payqa malagradecidospajpis sajra runaspajpis kʼacha.+ 36 Khuyakoj Tataykichej jina, qankunapis khuyakullaychejpuni.+

37 ”Amaña wajkunata juzgaychejchu, nitaj jaykʼajpis juzgasqachu kankichej,+ amaña wajkunata juchachaychejchu, nitaj jaykʼajpis juchachasqachu kankichej. Perdonallaychejpuni* qankunapis perdonasqa* kankichej.+ 38 Wajkunaman qorikuyta yachaychej, qankunamanpis qorillasonqachejtaj.+ Tʼimpiykichejmantaj ashkhata thalliykamusonqachej matʼi winasqata, thalaykusqata, tʼimpiykichejta atipashajtataj. Imawanchus wajkunata midinkichej, chayllawantaj paykunapis midisonqachej”.

39 Chantá Jesusqa kikincharispa, kay jinata paykunaman nerqa: “¿Atinmanchu uj ciegoqa waj ciegota pusaykachayta? ¿Manachu iskayninku tʼoqoman urmaykunkuman?+ 40 Yachakojqa mana yachachejninmanta aswan kurajchu, chaywanpis sumaj yachachisqa kajqa yachachejnin jina kanqa. 41 ¿Imaraykutaj hermanoykej ñawinpi qʼopata qhawanki, manataj ñawiykipi kʼullu kasqanta reparankichu?+ 42 ¿Imaynatá hermanoykita niwaj ‘hermanóy, saqeway ñawiykimanta qʼopata orqhojta’ nispa, ñawiykipi kʼullu kashasqanta mana reparakuspari? ¡Puraj uya! Ñaupajtaqa ñawiykimantaraj kʼulluta orqhokuy. Chaymantaraj sutʼita rikuspa hermanoykej ñawinmanta qʼopata orqhonki.

43 ”Mana kanchu allin sachʼa mana walejta poqojqa, nillataj kanchu mana allin sachʼapis sumajta poqojqa.+ 44 Sapa sachʼataqa poqoyninpi rejsikun.+ Runasqa mana khishkasmantachu higosta pallanku, nillataj khishkarara sachʼasmantachu uvasta pallanku. 45 Kʼacha runaqa allin imasta parlan, sonqonpi allin imas kasqanrayku, sajra runatajrí sajra imasta parlan, sonqonpi sajra imas kasqanrayku. Sonqopi imachus juntʼa kashan, chaymanta simeqa parlan.+

46 ”Chanta, ¿imaraykutaj ‘¡Señor! ¡Señor!’ nillawankichej, nitaj nisqasniyta ruwankichejchu?+ 47 Pichus noqaman jamuspa nisqasniyta uyarintaj ruwantaj chayqa, nisqaykichej pimanchus rijchʼakusqanta.+ 48 Chay runaqa rijchʼakun wasita ruwajman, pichus ukhuta allasqa chhankata taripanankama, chaymantaj cimientota churasqa. Ashkha yaku chayamojtintaj mayoqa wasiman qʼajchakamusqa, chay wasitaj mana imanakusqachu sumaj ruwasqa kasqanrayku.+ 49 Chantá pichus nisqasniyta uyarispa ni imata ruwanchu chayqa,+ rijchʼakun jallpʼa patallapi mana cimientoyoj wasita ruwaj runaman. Chay wasiman mayu qʼajchakamojtintaj urmaykusqapacha, thuñikuynintaj manchay kasqa”.