Jeremías

26 Josiaspa wawan Jehoiaquim+ Judapi rey kayta* qallarishajtin, Jehová Diosqa Jeremiasman nerqa: 2 “Jehová Diosqa kayta nin: ‘Jehová Diospa wasi pationpi sayaykamuy. Chaypitaj Judá llajtasmanta tukuy runasman willamuy,* pikunachus Jehová Diospa wasinman yupaychaj jamunku chaykunaman. Paykunamanqa tukuy kamachisusqayta willamuy, ni uj palabrata pakaspa. 3 Ichapis paykunaqa uyarisonqanku, sajra kausayninkutataj saqeponqanku. Ajinamanta noqaqa niña apachimusajchu* sajra ruwasqasninkurayku ima ñakʼariytachus apachimusaj nishani chayta.+ 4 Paykunaman ninki: “Jehová Diosqa kayta nin: ‘Sichus qankuna mana uyariwankichejchu, qankunaman qorqaykichej chay leytapis* mana kasunkichejchu chayqa, 5 sitajchus profetasniyta mana uyarinkichejchu, pikunatachus kutin kutita* kachamorqaykichej chaykunata chayqa,+ 6 kay wasitaqa Silota jinallataj ruwaykusaj.+ Kay llajtataqa chinkasqata chinkachisaj, tukuy nacionestaj kay llajtaj sutinta oqharenqanku maldecinankupaj’,+ nispa”’”.

7 Jehová Diospa wasinpi Jeremiaspa willasqantaqa uyarerqanku sacerdotes, profetas, chay nacionpi tukuy tiyakojkunapis.+ 8 Jeremiasqa chay nacionpi tukuy tiyakojkunaman willarqa, imatachus Jehová Dios willananta kamacherqa chayta. Willayta tukuchasqantawantaj sacerdotespis, profetaspis, chay nacionpi tukuy tiyakojkunapis, Jeremiasta japʼiytawan nerqanku: “Kunanqa wañunkipuni. 9 ¿Ima nispataj Jehová Diospa sutinpi willanki: ‘Kay waseqa Siloman jinallataj tukonqa. Kay llajtaqa chinkachisqa kanqa, nitaj pipis kaypi tiyakonqañachu’, nispari?”, nispa. Chantá tukuy runas tantakamuspa Jeremiasta muyuykorqanku Jehová Diospa wasinpi.

10 Judamanta kuraj kamachejkunaqa chay willayta uyariytawan, reypa wasinmantapacha* wicharerqanku Jehová Diospa wasinman. Chayaytawantaj Jehová Diospa wasinpa mosoj punkunpi tiyaykukorqanku.+ 11 Sacerdoteswan profetaswanqa, chay kuraj kamachejkunaman, chaypi kaj tukuy runasmanpis nerqanku: “Kay runaqa wañuchisqa kanan tiyan,+ kay llajtaman ñakʼariy jamunanta willasqanrayku. Chay willasqantaqa qankunapis uyarerqankichej”,+ nispa.

12 Jeremiastaj kuraj kamachejkunaman, tukuy chaypi kajkunamanpis nerqa: “Noqataqa Jehová Diospuni kachamuwarqa kay wasej contranta, kay llajtaj contrantapis willanaypaj. Chay willasqayta qankunaqa uyarerqankichej.+ 13 Chayrayku kunanqa allinta puriychej, allin kajta ruwaychej, Jehová Diosniykichejpa nisqasnintataj kasukuychej. Chaytachus ruwankichej chayqa, Jehová Diosqa manaña apachimonqachu* ima ñakʼariytachus qankunaman apachimunanta nerqa chayta.+ 14 Noqatajrí qankunaj makiykichejpi kashani. Kunanqa imatachus munasqaykichejta ruwawaychej, imachus qankunaman allin rijchʼasunkichej chayta. 15 Sichus noqata wañuchiwankichej chayqa, qankunapis, kay llajtapis, kay llajtapi tiyakojkunapis juchayoj rikhurinkichej mana juchayoj runata wañuchisqaykichejmanta. Noqataqa Jehová Diospuni kachamuwarqa kay tukuy imasta qankunaman willasunaykichejpaj”, nispa.

16 Chantá kuraj kamachejkuna, jinallataj chaypi kajkunapis, sacerdotesman, profetasmanwan nerqanku: “Kay runaqa mana wañuchisqa kananpaj jinachu. Payqa Jehová Diosninchejpa sutinpi parlawanchej”, nispa.

17 Chantá llajtamanta wakin kuraj kamachejkunaqa sayarikuytawan tukuy chaypi tantasqa kajkunaman nerqanku: 18 “Moresetmanta Miqueasqa+ Judamanta rey Ezequías kamachishajtin profeta jina willarqa.+ Payqa Judamanta tukuy runasman willarqa: ‘Angelesta kamachej Jehová Diosqa kayta nin:

“Sionqa tarpuna jallpʼa jina llankʼarparisqa kanqa.

Jerusalenqa rumi montonesllaña kanqa.+

Templo* kashan chay orqopis sachʼarara loma jinallaña kanqa”,+ nispa’.

19 ”Chantá Judamanta rey Ezequías, Judapi tukuy tiyakojkunapis, ¿Miqueasta wañucherqankuchu? ¿Manachu Ezequiasqa Jehová Diosta manchachikorqa, Jehová Diosmantataj rogakorqa? Chayrayku Jehová Diosqa manaña apachimorqachu* ima ñakʼariytachus paykunaman apachimunanta nerqa chayta.+ Kunanrí, kay jatun juchata ruwaspaqa noqallanchejpaj ñakʼariyta tarikusunman.

20 ”Chantapis waj profeta kallarqataj, paypis Jehová Diospa sutinpi willaj. Payqa karqa Quiryat-Jearimmanta+ Semayaj wawan Uriya. Payqa Jeremías jinallataj willarqa kay llajtaj contranta, kay nacionpa contrantapis. 21 Uriyaj willasqantaqa uyarerqanku rey Jehoiaquim,+ tukuy wapu soldadosnin, tukuy kuraj kamachejkuna ima. Chantá reyqa Uriyata wañuchinanta nerqa,+ Uriyataj chayta yachaytawan manchachikorqa, Egiptomantaj ayqekorqa. 22 Chaymanta rey Jehoiaquimqa Egiptoman kacharqa Acborpa wawan Elnatanta,+ waj runastawan khuska. 23 Paykunataj Uriyata Egiptomanta orqhomuytawan rey Jehoiaquimman aparqanku. Paytaj espadawan Uriyata wañucherqa,+ cuerpontataj wajcha runaspa cementerionkupi pʼampamorqa”, nispa.

24 Chantá Safanpa+ wawan Ahicamqa+ Jeremiasta yanaparqa, manataj saqerqachu llajtamanta runasman entregaykunankuta wañuchisqa kananpaj.+