Mateo

21 Jerusalenman qayllaykushaspa Betfagueman chayarqanku, Olivos orqo chaynejman. Jesustaj iskay discipulosninta kachaspa nerqa:+ 2 “Jaqay ranchoman riychej. Chayaytawantaj uj china burrota, maltón uñantawan watasqata tarinkichej, phaskaraspataj qhatimunkichej. 3 Sichus pipis imata nisonqachej chayqa, ‘Señor kay burrosta necesitan’ ninkichej. Chay ratopachataj qhatichimusonqachej”, nispa.

4 Chayqa ajina karqa profetaj nisqan juntʼakunanpaj. Pay nerqa: 5 “Sionpa warmi wawanta niychej: ‘¡Qhawariy! Reyniykeqa qanman jamushan.+ Payqa llampʼu sonqoyoj,+ burropi lloqʼaykusqa jamushan, maltón burropi, chajnana* uywaj uñanpi’,+ nispa”.

6 Discipulosnintaj Jesuspa kamachisqanman jina ruwamorqanku.+ 7 Paykunaqa china burrota, uñantinta qhatimorqanku. Ropasninkuta caronaykojtinkutaj Jesusqa lloqʼaykorqa.+ 8 Chantá ashkha runas ropasninkuta ñanman mastʼararqanku,+ wakintaj sachʼa ramasta kʼutuspa ñanman mastʼallarqankutaj. 9 Ñaupaqenta rejkuna, qhepanta rejkunapis qhaparisharqanku: “Diosníy, Davidpa Wawanta salvanaykita mañakuyku.*+ Jehová* Diospa sutinpi jamojqa bendecisqa kachun.+ Cielopi kashaj Diosníy, payta salvanaykita mañakuyku”,+ nispa.

10 Jerusalenman Jesús yaykojtintaj, llajtantin chʼajwaspa tapukusharqanku: “¿Pitaj kayri?”, nispa. 11 Jesuswan kaj runastaj kutichisharqanku: “Kayqa profeta Jesús,+ Galileapi kaj Nazaretmanta”, nispa.

12 Jesusqa temploman yaykuspa tukuy vendejkunata, rantejkunatawan jawaman qharqorqa. Qolqeta cambiajkunaj mesasninkuta, palomasta vendejkunaj tiyanasninkutapis tijrararqa.+ 13 Nerqataj: “Qhelqasqa kashan: ‘Waseyqa Diosmanta mañakuna wasi nisqa kanqa’.+ Qankunatajrí suwa thapaman tukuchishankichej”,+ nispa. 14 Jesús templopi kashajtin ciegos, cojos payman qayllaykorqanku. Paytaj sanoyacherqa.

15 Kuraj sacerdotes, leymanta yachachejkunapis rikorqanku Jesús milagrosta ruwasqanta. Wawastapis rikullarqankutaj templopi qhaparejta: “¡Diosníy, Davidpa Wawanta salvanaykita mañakuyku!”,+ nispa. Chayrayku mayta phiñakorqanku.+ 16 Jesustataj nerqanku: “¿Uyarinkichu imatachus kaykuna nishasqankuta?”, nispa. Jesustaj kuticherqa: “Arí, uyarini. Qankunarí, ¿manachu jaykʼajpis leerqankichej ‘qanqa wawaswan, ñuñushaj wawitaswanpis jatunchachikunki’ nispa nisqanta?”.+ 17 Paykunata saqerpayaspataj, llajtamanta llojsispa Betania ranchoman rerqa. Chay tutataj chaypi qhepakorqa.+

18 Tutamanta Jerusalenman kutishaspa Jesusqa yarqhachikorqa.+ 19 Ñan patapitaj higo sachʼata rikorqa, qayllaykuspataj mana higosta tarerqachu, manachayqa laqhesllata.+ Chay sachʼatataj nerqa: “Manaña jaykʼajpis poqonkiñachu”,+ nispa. Higo sachʼataj chay ratopacha chʼakiporqa. 20 Discipulosnintaj chayta rikuspa mayta tʼukorqanku, nerqankutaj: “¿Imaynapitaj kay higo sachʼa chay ratopacha chʼakipunri?”,+ nispa. 21 Jesustaj kuticherqa: “Cheqatapuni niykichej: Creeyniyojchus kawajchej, manataj iskayrayawajchejchu chayqa, mana higo sachʼawan ruwasqallaytachu ruwawajchej. Sichus kay orqotapis niwajchej ‘jatariy, qochamantaj wijchʼuykukuy’ nispa chayqa, chay nisqaykichejqa ruwakunman.+ 22 Creespachus Diosmanta mañakunkichej chayqa, tukuy ima mañakusqaykichejta japʼinkichej”,+ nispa.

23 Jesús temploman yaykuspa yachachishajtin kuraj sacerdotes, kurajkunapis qayllaykuspa taporqanku: “¿Ima atiywantaj chay imasta ruwanki? ¿Pitaj chay imasta ruwanaykita nisorqa?”,+ nispa. 24 Jesustaj kuticherqa: “Noqapis ujta tapullasqaykichejtaj. Kutichiwankichej chayqa, noqapis nisqaykichej ima atiywanchus chay imasta ruwasqayta: 25 ¿Pitaj Juanta kachamorqa bautizananpaj? ¿Dioschu* runaschu?”, nispa. Paykunapurataj ninakorqanku: “‘Dios kachamorqa’ nisun chayqa, niwasun: ‘Chanta, ¿imaraykutaj mana payta creerqankichejchu?’,+ nispa. 26 ‘Runas kachamorqanku’ nisun chaytaj, runas imanawasunmanchus ari. Tukuy yuyanku Juanqa profeta kasqanta”, nispa. 27 Chayrayku Jesusman kuticherqanku: “Mana yachaykuchu”, nispa. Jesustaj paykunata nerqa: “Noqapis manallataj nisqaykichejchu ima atiywanchus chay imasta ruwasqayta.

28 ”¿Ima niwajchejtaj kaymanta? Uj runa iskay wawasniyoj kasqa. Kuraj wawanman chimpaykuspa nisqa: ‘Wawáy, kunan pʼunchay uva huertapi llankʼamuy’, nispa. 29 Wawantaj nisqa: ‘Mana risajchu’, nispa. Chaywanpis pesachikusqa, risqataj. 30 Sullkʼa wawanman chimpaykuspa kikillantataj nisqa. Chay wawantaj nisqa: ‘Risaj tatáy’, nispa. Manataj risqachu. 31 Iskayninkumanta, ¿mayqentaj tatanpa munasqanta ruwarqa?”. Paykunataj nerqanku: “Kuraj wawan”, nispa. Jesustaj nerqa: “Cheqatapuni niykichej, impuestota cobrajkuna, khuchi warmispis* ñaupaqeykichejta Diospa Gobiernonman yaykonqanku.* 32 Juanqa jamuspa cheqan ñanta rikuchisorqachej, qankunatajrí mana creerqankichejchu. Impuestota cobrajkunaraj, khuchi warmisraj creerqanku.+ Qankunataj chayta rikushaspapis mana pesachikorqankichejchu, nitaj payta creerqankichejchu.

33 ”Waj kikinchaytañataj uyariychej: Uj patronqa jallpʼanpi uvasta plantasqa,+ perqawantaj muyuykuchisqa. Chaypitaj uvas chʼirwanata ruwasqa, qhawana torretapis sayarichisqa.+ Chantá llankʼajkunaman partidapi qospa karu llajtaman ripusqa.+ 34 Uvas pallay tiempoña kajtintaj, kamachisninta uva huertanman kachamusqa, llankʼajkuna partenta apachipunankupaj. 35 Chay llankʼajkunatajrí patronpa kamachisninta japʼiytawan ujninta maqaykusqanku, ujninta wañuchisqanku, ujnintataj rumiswan chʼanqaykusqanku.+ 36 Patronqa waj kamachisnintañataj kachamusqa, ñaupajta kachamusqanmanta aswan ashkhata. Chaykunatapis kikillantataj ruwasqanku.+ 37 Qhepatarí wawantañataj paykunaman kachamusqa: ‘Wawaytaqa respetanqanku’, nispa. 38 Llankʼajkunataj wawanta rikuytawan ninakusqanku: ‘Kaymin herenciata japʼejqa.+ Jamuychej, wañuchinachej, herenciantataj japʼikapusunchej’, nispa. 39 Wawanta japʼispataj uva huertamanta jawaman qhatatasqanku, wañuchisqankutaj.+ 40 Uva huertayoj jamojtin, ¿imananqataj chay llankʼajkunatari?”. 41 Uyarejkunataj Jesusman kuticherqanku: “Sajras kasqankurayku paykunata wañurachenqa. Uva huertantataj waj llankʼajkunaman partidapi qonqa, paykunataj tiemponpi partenta qoponqanku”, nispa.

42 Jesustaj paykunata nerqa: “Diosmanta Qhelqasqapi nin: ‘Wasita ruwajkunaj mana valechisqanku rumeqa, aswan patapi kaj esquina rumiman+ tukupun. Chaytaqa Jehová* Dios ruwarqa, noqanchejpajtaj chayqa may tʼukunapuni’,+ nispa. ¿Manachu jaykʼajpis chayta leerqankichej? 43 Chayrayku niykichej: Diosqa Gobiernonta qhechusonqachej, munayninta ruwaj nacionmantaj qoponqa. 44 Chantapis pichus chay rumi pataman urmajqa tʼunasqa kanqa.+ Pejpa patanmanchus chay rumi urmaykonqa, chaypis qʼala tʼunasqallataj kanqa”,+ nispa.

45 Chay kikinchaykunata uyarispa, kuraj sacerdoteswan fariseoswanqa paykunamanta parlashasqanta reparakorqanku.+ 46 Chayrayku Jesusta japʼichiyta munarqanku. Chaywanpis runasta manchachikorqanku, profetata jina qhawasqankurayku.+