1 Reyes

22 Siriawan Israelwanqa kinsa wata juntʼata mana guerraspi tinkorqankuchu. 2 Kinsa kaj watapitaj Judamanta rey Jehosafatqa+ Israelpa reyninta watukoj rerqa.+ 3 Israelpa reynintaj kuraj kamachisninta nerqa: “Ramot-Galaad+ jallpʼasqa noqanchejpata, ¿icharí? Noqanchejtajrí manchachikushanchej Siriaj reyninmanta qhechukapuyta”, nispa. 4 Chantá Jehosafatta nerqa: “¿Noqawan khuska riwajchu Ramot-Galaadpi maqanakoj?”, nispa. Jehosafattaj Israelpa reyninman kuticherqa: “Noqaqa qanwan khuska maqanakuman risaj. Soldadosniypis soldadosniykiwan khuska renqanku, caballosniypis caballosniykiwan khuska”,+ nispa.

5 Chantá Jehosafatqa Israelpa reyninman nerqa: “Ama jina kaspa, ñaupajtaqa Jehová Diostaraj tapurichiy”,+ nispa. 6 Israelpa reynintaj profetasta tantaykorqa 400 runasta jinapuni, chantá paykunata taporqa: “¿Risajchu Ramot-Galaadwan maqanakoj chayri manachu?”, nispa. Paykunataj kuticherqanku: “Rillay. Jehová Diosqa Ramot-Galaadta reypa makinman jaywaykonqa”, nispa.

7 Jehosafattaj nerqa: “¿Nichu kaypeqa Jehová Diospa profetan tiyan? Chay profetawan Diosta tapurichikullasunmantaj”,+ nispa. 8 Israelpa reynintaj Jehosafatta nerqa: “Kanraj uj runa, paynejta Jehová Diosta tapurisunman.+ Pero paytaqa chejnikuni.+ Payqa ni jaykʼaj ninchu allin rinawantaqa, mana allin rinallawantapuni niwan.+ Chay profetaqa Imlaj wawan Micaya”, nispa. Jehosafattaj nerqa: “Ama ajinata parlaychu”, nispa.

9 Israelpa reynintaj ujnin kuraj kamachinta wajyaspa nerqa: “Pusamuy Imlaj wawan Micayata, usqhayta”,+ nispa. 10 Israelmanta reywan Judamanta rey Jehosafatwanqa, sapa ujninku kamachina tiyanasninkupi tiyasqa kasharqanku, rey ropasninkuwan pʼachallisqas. Paykunaqa kasharqanku Samaria llajtaman yaykuna punkupi, era* patapi. Tukuynin profetastaj paykunaj ñaupaqenkupi profetas jina parlasharqanku.+ 11 Chaypi Kenaanaj wawan Sedequiasqa fierro wajrasta ruwakuspa nerqa: “Jehová Diosqa nin: ‘Kay wajraswan qanqa siriosta wajraykuspa qʼalata wañurachinki’, nispa”. 12 Chay tukuynin profetaspis kikinta nishallarqankutaj: “Wichariy Ramot-Galaadman, allin risonqa. Jehová Diosqa reypa makinman Ramot-Galaadta jaywaykonqa”, nispa.

13 Micayata wajyamorqa chay runataj Micayata nerqa: “Qhawariy, tukuynin profetas nishanku reyta allin rinanta. Ama jina kaspa, qanpis chay profetas jina nillay ari reyta allin rinanta”,+ nispa. 14 Micayataj nerqa: “Kausaj Jehová Diospa sutinpi jurani: Imatachá Jehová Dios niwanqa chayllata noqaqa parlasaj”, nispa. 15 Chantá Micayaqa reypaman rerqa, reytaj Micayata taporqa: “Micaya, ¿Ramot-Galaadwan maqanakoj wicharisqaykuchu* chayri manachu?”, nispa. Micayataj kuticherqapacha: “Rillay, atipanki. Jehová Diosqa Ramot-Galaadta reypa makinman jaywaykonqa”, nispa. 16 Reytaj Micayata nerqa: “¿Mashkha kutistawantaj jurachisqayki Jehová Diospa sutinpi cheqa kajtapuni willanawaykitari?”, nispa. 17 Micayataj nerqa: “Noqa rikushani tukuy israelitasta orqo puntastaña ayqekushajta+ mana michejniyoj ovejasta jina. Jehová Diosqa ninña: ‘Kaykunajtaqa manaña dueñonku kanchu. Sapa ujninku allillanta wasinkuman kutipuchunku’, nispa”.

18 Israelpa reynintaj Jehosafatta nerqa: “Nerqaykicharí, payqa ni jaykʼaj ninchu allin rinawantaqa, mana allin rinallawanta nin”,+ nispa.

19 Micayataj nerqa: “Kunanqa Jehová Diospa nisqanta uyariy. Noqaqa Jehová Diosta rikorqani kamachina tiyananpi tiyashajta,+ cielomanta tukuynin ejercitospis paypa ladonpi sayasharqanku paña ladonpi, lloqʼe ladonpipis.+ 20 Jehová Diostaj nerqa: ‘¿Pitaj Achabta* chʼaukiyamunman* Ramot-Galaadman rinanpaj, chaypi wañunanpaj?’, nispa. Chaypi kajkunamanta ujnenqa ajinata ruwasunman nisharqa, ujnintaj kay jinata ruwasunman nisharqa. 21 Chantá ujnin angelqa*+ Jehová Diospa ñaupaqenman jamuspa nerqa: ‘Noqa chʼaukiyamusaj’, nispa. Jehová Diostaj taporqa: ‘¿Imaynatá chʼaukiyamunki?’, nispa. 22 Chay angeltaj kuticherqa: ‘Tukuynin profetasninta llulleriosta parlachimusaj’,+ nispa. Diostaj nerqa: ‘Rispa chʼaukiyamullay. Allinpuni risonqa. Chay nisqaykita ruwamullay’, nispa. 23 Chayrayku Jehová Diosqa saqen uj ángel kay tukuynin profetasniykita llulleriosta parlachinanta.+ Jehová Diostaj ninña mana allin risunanta”,+ nispa.

24 Kenaanaj wawan Sedequiastaj Micayaman chimpaykuspa uyanpi laqʼarqa, nerqataj: “¿Jehová Diospa espiritonqa qanwan parlananpajchu noqataqa saqerpawasqa? ¿Mayqen ñantataj jamusorqari?”,+ nispa. 25 Micayataj kuticherqa: “Chaytaqa yachanki maypachachus ukhu cuartoman pakakoj chinkaykunki chaypacha”, nispa. 26 Israelpa reynintaj nerqa: “Micayata japʼispa jaywaykamuychej llajtamanta kamachej Amonman, reypa wawan Joasmanwan. 27 Paykunamanqa ninkichej: ‘Reyqa kayta nin: “Kay runata carcelman wisqʼaykuychej.+ Tʼantatapis yakutapis pisillata qonkichej, atipaytawan kutimunaykama”, nispa’”. 28 Micayataj nerqa: “Sichus atipaspa allillan kutimunki chayqa, sutʼi yachakonqa Jehová Diosqa mana noqawanchu parlasqanta”,+ nispa. Chantá Micayaqa nillarqataj: “Qankunapis tukuyniykichej chayta allinta yuyarikuychej”, nispa.

29 Ajinamanta Israelmanta reywan Judamanta rey Jehosafatwanqa Ramot-Galaadman rerqanku.+ 30 Israelpa reynintaj Jehosafatta nerqa: “Guerrapi maqanakunaypaj waj ropata churaykukusaj, qantaj rey ropallaykiwan rinki”, nispa. Ajinata Israelpa reynenqa mana rejsinankupaj ropanta cambiakuspa+ maqanakuman yaykorqa. 31 Siriamanta reytaj carretasninpata 32 comandantesninta kamachisqa:+ “Ama ni piwan maqanakunkichejchu, ni soldadoswan ni capitaneswanpis, Israelpa reynillanwan maqanakunkichej”, nispa. 32 Carretaspa comandantesnintaj Jehosafatta rikuytawan nerqanku: “Jaqaysina Israelpa reynin kashan”, nispa. Chayrayku kachaykukorqanku paywan maqanakoj. Jehosafattaj yanapata mañakuspa qhaparikorqa. 33 Carretaspa comandantesnenqa repararqanku mana Israelpa reyninchu kasqanta, chayrayku manaña qhatiykorqankuchu.

34 Ajinallapi uj runaqa wayrallaman flechaspa Israelpa reyninman japʼirpacherqa. Flechaqa fierro pecheranpa tinkuynin chayta payman satʼiykukusqa. Reytaj carretanta apaj runata nerqa: “Kutiriy, kay maqanakumanta* orqhoway, flechawan japʼirparichiwanku, wañusajsina”,+ nispa. 35 Maqanakoqa diantinpuni karqa, allin sinchʼipuni karqa. Reytataj carretanpi sayashajta japʼerqanku sirios qhawarisqata. Yawarnenqa mana sayaspa maqanakuna carretanman sururerqa. Tarde ladotataj wañuporqa.+ 36 Inti yaykuy horastaña campamentopi* sinchʼita qhaparerqanku: “Ripuychej llajtaykichejman, ripuychej jallpʼaykichejman”,+ nispa. 37 Ajinapi reyqa wañuporqa. Chantá Samaria llajtaman aparqanku, chaypitaj pʼamparqanku. 38 Reypa chay maqanakuna carretanta Samariaj estanquenpi mayllajtinku alqosqa jamuspa yawarninta llajwarqanku, khuchi warmispis* chaypi bañakorqanku.* Chay tukuy imas ajina karqa Jehová Dios nisqanman jina.+

39 Achabpa tukuy kausayninmanta, tukuy ima ruwasqanmanta, marfilmanta+ wasita* ruwachisqanmanta, tukuynin llajtasta ruwachisqanmantapis qhelqasqa kashan Israelpa reyesninmanta parlaj libropi. 40 Achabqa ñaupa tatasnin jina wañuporqa.+ Wawan Ocoziastaj+ paypa cuentanmanta Israelpi rey karqa.

41 Asajpa wawan Jehosafatqa+ Judapi rey jina kamachiyta qallarerqa, Israelpi rey Achab tawa watastaña kamachishajtin. 42 Jehosafatqa rey jina kamachiyta qallarishajtin 35 watasniyojña karqa, Jerusalenpitaj 25 watasta kamacherqa. Mamanqa Silhij wawan karqa, sutintaj Azubá karqa. 43 Jehosafatqa tatan Asá+ jinallataj cheqan ñanta purerqa, payqa mana chay ñanmanta wistʼuykorqachu. Payqa Jehová Diospa qhawayninpi cheqan kajta ruwarqa.+ Jinapis waj diosesta yupaychanapaj pata lugaresqa kakushallarqapuni. Runaspis chay pata lugarespi jaywanasta ruphachispa qʼoshñichishallarqankupuni.+ 44 Jehosafatqa Israelpa reyninwan allillanta kausakorqa.+ 45 Jehosafatpa tukuy kausayninmanta, guerraspi atipasqanmanta, imaynatachus guerraspi tinkusqanmantapis qhelqasqa kashan Judajpa reyesninmanta parlaj libropi. 46 Jehosafatqa nacionmanta wijchʼullarqataj templospi pagorayku khuchichakoj qharista,+ pikunachus puchusqankuraj tatan Asajpa tiemponmanta chaykunata.+

47 Chaypachasqa Edompi+ mana rey karqachu, uj capitanlla rey jina kamachisharqa.+

48 Jehosafatqa Tarsis barcosta* ruwachillarqataj Ofirmanta qorita+ apachimunanpaj. Chay barcostaj mana Ofirman rerqankuchu Ezión-Gueberpi+ phirikusqankurayku. 49 Achabpa wawan Ocoziasqa Jehosafatta nerqa: “Kamachisneyqa kamachisniykiwan khuska barcospi richunku”, nispa. Jehosafattaj mana munarqachu.

50 Chantá Jehosafatqa ñaupa tatasnin jina wañuporqa,+ pʼamparqankutaj maypichus ñaupa tatasninta pʼamparqanku chaypi, ñaupa tatan Davidpa Llajtanpi. Wawan Jehoramtaj+ paypa cuentanmanta rey jina kamachiyta qallarerqa.

51 Rey Jehosafat Judapi 17 watastaña kamachishajtin, Achabpa wawan Ocoziasqa+ Samariapi Israelta kamachiyta qallarerqa. Ocoziasqa Israelta iskay watasta kamacherqa. 52 Ocoziasqa Jehová Diospa qhawayninpi mana allin imasta ruwallarqapuni, tatan jina,+ maman jina purerqa,+ Nebatpa wawan Jeroboanpa chakintataj qhaterqa, Jeroboanqa israelitasta juchaman urmacherqa.+ 53 Ocoziasqa Baalta yupaychaspa+ Baalman kʼumuykukorqa. Payqa tatan jinallataj Israelpa Diosnin Jehovata phiñacherqa.+