Lucas

8 Chay qhepata Jesusqa llajtamanta llajta, ranchomanta rancho rerqa, Diospa Gobiernonmanta sumaj willaykunata willaraspa.+ Paywan khuskataj rerqanku 12 apostolesnin, 2 wakin warmispis. Jesusqa chay warmismanta supaykunata qharqorqa, onqoykunasninkumantapis sanoyacherqa. Ujnenqa María karqa, paytaqa Magdalena nillajtaj kanku, paymantaqa qanchis supaykuna llojsisqanku. 3 Ujnintaj Juana+ karqa, Cuzaj warmin. Cuzaqa Herodespa wasinmanta encargado karqa. Chantá Susana, waj ashkha warmis ima. Paykunaqa kapuyninkuwan yanapaj kanku Jesusta, apostolesnintawan.+

4 Sapa llajtamanta paywan khuska rejkunaman ashkha runas tantakamojtinku, Jesusqa kikincharispa ajinata parlarqa:+ 5 “Uj tarpoj runa tarpoj llojsisqa. Tarpushajtintaj wakin mujoqa ñan pataman tʼakakusqa, chay mujutaqa runas sarurasqanku, pʼisqostaj mikhukapusqanku.+ 6 Wakin mujutaj chhanka pataman tʼakakusqa, chʼakipi kasqanraykutaj pʼutumuytawan chʼakipusqa.+ 7 Wakin mujutaj khishkas chaupiman tʼakakusqa, khishkastaj khuska wiñaspa pʼutumojta pʼampaykusqanku.+ 8 Wakin mujutaj sumaj jallpʼaman tʼakakusqa, pʼutumuytawantaj pachaj jinastawan poqosqa”,+ nispa. Chay imasta niytawan Jesusqa jatunmanta nerqa: “Pillapis ninriyojqa allinta uyarichun”,+ nispa.

9 Discipulosnintaj Jesusta taporqanku imachus chay kikinchay niyta munasqanta.+ 10 Jesustaj kuticherqa: “Qankunataqa Dios yanapasunkichej Gobiernonmanta pakasqa yachayta entiendenaykichejpaj. Wajkunapajrí chay kikinchasqayqa cuento jinalla,+ chayrayku qhawashaspapis qhasillata qhawanku, uyarishaspapis mana entiendenkuchu.+ 11 Chay kikinchayqa kayta niyta munan: Mujoqa Diospa palabran.+ 12 Wakin runasqa kanku ñan pata jina. Diospa palabranta uyarisqankutawanqa Diablo jamuspa, sonqonkumanta palabrata apakapun mana creenankupaj, nitaj salvasqa kanankupaj.+ 13 Wakin runastaj kanku chhanka pata jina. Paykunaqa Diospa palabranta uyariytawan kusiywan japʼikunku, mana saphiyoj kasqankuraykutaj uj tiempollata creenku, pruebas kajtintaj karunchakunku.+ 14 Khishkarara jallpʼaman muju tʼakakun chay jallpʼaqa rijchʼakun Diospa palabranta uyarejkunaman. Jinapis paykunaqa atipachikunku kay kausaypi llakiykunawan, qhapajyayta munasqankuwan,+ millay munayninkuwan+ ima. Chaykunataj paykunata pʼampaykun, nitaj allinta poqonkuchu.+ 15 Sumaj jallpʼaman muju tʼakakun chay jallpʼaqa Diospa palabranta uyariytawan sumaj sonqowan japʼikojkuna kanku.+ Paykunaqa llakiykuna kajtinpis sinchʼita sayaspa sumajta poqonku.+

16 ”Mana pipis mecherota japʼichiytawanqa fuentewan kʼumpuykunchu, nitaj catre uraman churaykunchu, astawanqa pataman churan yaykumojkunata kʼanchananpaj.+ 17 Mana imapis pakasqa kanchu mana rikuchikojqa, nillataj imapis sumaj pakasqa kayta atinchu mana jaykʼaj yachakojqa, nitaj sutʼinchakojqa.+ 18 Chayrayku allinta uyariychej, entiendejqa aswan sumajta entiendenqa.+ Pisillata entiendesqanta yuyajtajrí, chay entiendesqantapis chinkachenqa”,+ nispa.

19 Jesuspa maman, hermanosninpis+ payman jamorqanku, manataj qayllaykuyta aterqankuchu ashkha runas kasqanrayku.+ 20 Jesusmantaj willarqanku: “Mamaykiwan hermanosniykiwan jawapi sayashanku, qanwan tinkukuyta munaspa”, nispa. 21 Jesustaj kuticherqa: “Mamaywan hermanosniywanqa kaykuna kanku, pikunachus Diospa palabranta uyarinku, kasunkutaj chaykuna”,+ nispa.

22 Uj pʼunchay Jesusqa discipulosninwan canoaman wicharerqa, paykunamantaj nerqa: “Qocha chimpaman rinachej”, nispa. Chantá qochanta rerqanku.+ 23 Canoapi rishajtinkutaj Jesusqa puñurparerqa. Qochapitaj manchay sinchʼi wayra oqharikorqa, yakutaj canoaman juntʼaykamusharqa, chinkaykoj jinañataj kasharqa.+ 24 Ajinapi discipulosnenqa Jesusman qayllaykuspa rijchʼarichiytawan nerqanku: “Yachachejníy, Yachachejníy, ¡chinkaykushanchejña!”, nispa. Paytaj sayarispa wayrata kʼamerqa, yaku oqharikojtawan. Yakuwan wayrawantaj tiyaykorqanku, may chʼintaj karqa.+ 25 Jesustaj paykunata taporqa: “¿Imaraykutaj mana creenkichejchu?”, nispa. Discipulosnintaj mancharikuspa tʼukorqanku, ninakorqankutaj: “¿Pipunitaj kayri? Wayrapis yakupis kamachisqanta kasunku”,+ nispa.

26 Chantá gerasenospa jallpʼankuman chayarqanku,+ chaytaj Galilea chimpapi kashan. 27 Jesús canoamanta uraykusqantawan, llajtamanta uj runa taripaj jamorqa. Chay runaqa supayniyoj karqa, unayñataj mana ropata churakojchu, nitaj wasinpipis sayajchu, manachayqa panteonllapiña.+ 28 Payqa Jesusta rikuytawan qhaparikorqa, ñaupaqenpi qonqoriykukuspataj, jatunmanta nerqa: “Jesús, Aswan Patapi kaj Diospa Wawan, ¿ima ruwanay tiyan qanwanri? Mañakuyki ama ñakʼarichinawaykita”,+ nispa. 29 Ajinata mañakorqa, Jesús chay runamanta supayta llojsinanta kamachisqanrayku. Supayqa sapa kuti munayninta chay runata ruwaj.*+ Runastaj cadenaswan wataj kanku chay runaj chakisninta makisnintawan, guardiatapis qhawananpaj churaj kanku, paytajrí chay cadenasta pʼitiraj,* supaytaj chʼinnejkunaman apaj. 30 Jesús taporqa: “¿Imataj sutiyki?”, nispa. Paytaj kuticherqa: “Suteyqa Tropa”, nispa. Chayta nerqa ashkha supaykuna chay runapi kasqanrayku. 31 Chay supaykunaqa mayta mañakusharqanku ama paykunata chinkay ukhuman* kachananta.+ 32 Chay orqopeqa ashkha khuchis+ mikhusharqanku. Supaykunataj mayta mañakorqanku chay khuchisman yaykojta saqenanta, Jesustaj saqellarqa.+ 33 Chantá supaykunaqa runamanta llojsispa khuchisman yaykorqanku, khuchistaj qaqanta qochaman wijchʼuykukorqanku, jeqʼeqakuspataj wañorqanku. 34 Khuchista michejkunataj chayta rikuspa ayqekorqanku, chay rikusqankutataj llajtapitaj campopitaj willaramorqanku.

35 Runastaj jamorqanku imachus kasqanta qhawaj, Jesusman qayllaykuspataj rikorqanku chay runata, pimantachus supaykuna llojsisqanku chayta, Jesuswan khuska tiyashajta, ropayojta, yuyayninpitaj kashajta. Chayta rikuspa runasqa mayta mancharikorqanku. 36 Rikojkunataj jamojkunaman willarqanku imaynatachus chay supayniyoj runa sanoyapusqanta. 37 Chay gerasenospa jallpʼankumantataj ashkha runas mayta mañakorqanku Jesús ripunanta, anchata manchachikusqankurayku. Jesustaj ripunanpaj canoaman wicharerqa. 38 Pimantachus supaykuna llojserqanku chay runaqa, Jesusmanta mañakorqa paywan rejta saqenanta. Jesustajrí chay runata kachaporqa:+ 39 “Wasiykiman kutipuy, willamuytaj imastachus qanpaj Dios ruwasqanta”, nispa. Paytaj llajtantinpi willaramorqa imastachus Jesús paypaj ruwasqanta.

40 Jesús Galileaman kutipojtintaj ashkha runas chunka makiwan japʼikorqanku. Paytaqa tukuyninku suyashasqanku.+ 41 Chantá uj runa Jairo sutiyoj jamorqa, payqa sinagogapi kamachej karqa. Jairoqa Jesuspa ñaupaqenpi pampakama kʼumuykukuspa, wasinman rinanta mañakorqa.+ 42 Paypataqa uj kʼata imillitan* 12 watasniyoj jina wañupusharqaña.

Jesús rishajtintaj runasqa payta ñitʼimusharqanku. 43 Uj warmitaj 12 watastaña yawar apaywan+ onqosqa kasqa, manataj pipis sanoyachiyta atisqachu.+ 44 Chay warmeqa Jesusman qayllaykuspa qhepallanmanta ropanpa waychʼasninta* llankharerqa,+ yawar apaynintaj chʼakiporqapacha. 45 Jesustajrí taporqa: “¿Pitaj llankhaykuwanri?”, nispa. Tukuy runas “mana noqachu” nejtinkutaj, Pedro nerqa: “Yachachejníy, runasqa tukuynejmanta kʼiskinakamuspa ñitʼimushasunku”,+ nispa. 46 Jesustaj nerqa: “Pipunichá llankhaykuwan, reparani atiyniy+ llojsisqanta”, nispa. 47 Warmitaj manaña pakakuyta atispa, Jesusman kharkatitispa qayllaykorqa. Ñaupaqenman qonqoriykukuspataj, tukuy runaspa ñaupaqenpi willarqa imajtinchus llankhaykusqanta, imaynatatajchus chay ratopacha sanoyapusqanta. 48 Jesustaj nerqa: “Wawáy, creesqayki sanoyachisunki. Kunanqa allillanta ripuy”,+ nispa.

49 Jesús parlashajtillanraj, Jairoj wasinmanta uj runa jamuspa nerqa: “Imillitayki wañupunña. Amaña Yachachejta imatapis niychu”,+ nispa. 50 Chayta uyarispa Jesusqa Jairota nerqa: “Ama llakikuychu, creellaypuni, imillitaykitaj kausarimonqa”,*+ nispa. 51 Wasiman chayaspataj mana pitapis paywan yaykojta saqerqachu, manachayqa Pedrota, Juanta, Santiagota, imillitaj tatanta, mamanta imalla. 52 Tukuy runasqa imillitamanta waqasharqanku, llakiywantaj pechonkuta takakusharqanku. Jesustajrí nerqa: “Amaña waqaychejchu,+ imillitaqa mana wañupunchu, puñushallan”,+ nispa. 53 Chayta uyarispa runasqa Jesusta asipayarqanku, paykunaqa yacharqanku chay imillitaqa wañusqapuni kashasqanta. 54 Jesustaj imillitata makinmanta japʼispa nerqa: “Imillita, sayariy”,+ nispa. 55 Jinapi imillitaqa kausarimuspa*+ chay ratopacha sayarerqa,+ Jesustaj nerqa imallatapis mikhunanpaj jaywanankuta. 56 Tatasnenqa mayta tʼukuspa kusikorqanku, Jesustaj kamacherqa ama pimanpis chay ruwasqanta willanankuta.+