Lucas

1 Imastachus noqanchejpis creenchej chaykunamantaqa ashkhasña qhelqayta munarqanku.+ 2 Pikunachus chay imasta rikuspa Diospa palabranmanta willararqanku,+ chaykunapis kikillantataj willawarqanchej.+ 3 Chayrayku may sumajpaj qhawasqa Teófilo,+ noqapis chay tukuy imasta sumajta waturerqani, chayman jinataj qhelqamuyki imaschus qallariymantapacha karqa chayta. 4 Ajinamanta yachanaykipaj imatachus yachakusqaykeqa cheqapuni kasqanta.+

5 Rey Herodes* Judeapi kamachishajtin,+ Abías nisqa grupomanta+ uj sacerdote* Zacarías sutiyoj karqa, warmintaj Aaronpa mirayninmanta karqa, Elisabet sutiyoj. 6 Iskayninku Diospa ñaupaqenpi llimphu kausayniyoj karqanku. Ni pejpa ima ninantaj karqanku Jehová* Diospa tukuy kamachisqasninta, leyesnintapis kasukusqankurayku. 7 Paykunajtaqa mana wawanku karqachu, Elisabet mana wijsallikuyta atisqanrayku. Iskayninkutaj machitusña karqanku.

8 Zacariaspa grupon+ templopi llankʼashajtin, payqa sacerdote jina Diospa ñaupaqenpi sirvisharqa. 9 Chaypachataj sacerdotes ruwayta yachasqankuman jina, payñataj Jehová* Diospa templonman yaykuspa+ inciensota qʼolachinan* karqa.+ 10 Inciensota qʼolachishajtintaj ashkha runas jawapi Diosmanta mañakusharqanku. 11 Jinallapi Jehová* Diospa angelnin Zacariasman rikhurerqa. Angelqa incienso altarpa* pañannejpi sayasharqa. 12 Zacariastaj angelta rikuspa ni imanakuyta aterqachu, maytataj mancharikorqa. 13 Angeltajrí payta nerqa: “Ama mancharikuychu Zacarías, mañakusqaykitaqa Dios uyarinña. Warmiyki Elisabetqa wawayoj kanqa, chay wawamantaj Juan sutita churanki.+ 14 Qanqa mayta kusikunki, ashkha runaspis kusikullanqankutaj wawayki nacekusqanmanta.+ 15 Payqa Jehová* Diospa ñaupaqenpi jatunpaj qhawasqa kanqa.+ Mana jaykʼajpis tomananchu tiyan vinota, nitaj waj machanastapis.+ Mamanpa wijsanpi kasqanmantapacha espíritu santowan juntʼa kanqa.+ 16 Payqa ashkha israelitasta Jehová* Diosninkuman kutirichenqa.+ 17 Chantapis Diospa ñaupaqenta Elías jina atiyniyoj renqa,+ tataspa sonqonkuta wawaspa sonqonkuman jina tukuchinanpaj,+ mana kasukojkunatataj yanapanqa cheqan runas jina allin yuyayniyoj kanankupaj. Ajinamanta runasta Jehová* Diospaj wakichinanpaj”.+

18 Zacariastaj angelta nerqa: “Noqaqa viejituña kani, warmiypis viejitaña. ¿Imaynatataj wawayku kanmanri?”, nispa. 19 Angeltaj kuticherqa: “Noqa Gabriel+ kani, Diospa ñaupaqenpitaj sayani.+ Pay kachamuwan kay sumaj willaykunata willasunaypaj. 20 Mana creewasqaykiraykutaj opayapunki, nisusqay juntʼakunankama. Chaytaj maychus tiemponpi juntʼakonqapuni”, nispa. 21 Chaykamataj runasqa Zacariasta maytapuni suyasharqanku, templo ukhumanta mana usqhayta llojsimusqanrayku. 22 Llojsimuspataj Zacariasqa mana parlayta aterqachu. Runasqa repararqanku imatachá* templo ukhupi rikusqanta. Zacariastajrí opayapusqanrayku señasllawanña parlasharqa. 23 Chantá templopi sirvinan pʼunchaykuna juntʼakojtin wasinman riporqa.

24 Chay qhepatataj warmin Elisabetqa wijsallikorqa, phishqa killa juntʼatataj mana wasinmanta llojserqachu, nerqataj: 25 “Jehová* Dios kaytaqa noqarayku ruwan. Payqa noqamanta yuyarikun, amaña runas qhawaranawankupaj”,+ nispa.

26 Elisabet sojta killaña onqoj kashajtintaj, Diosqa ángel Gabrielta+ kacharqa, Galileapi kaj Nazaret llajtaman, 27 María sutiyoj doncellajman.+ Mariaqa Josewan casarakunanpaj parlasqaña karqa. Joseqa Davidpa mirayninmanta karqa.+ 28 Ángel Gabrielqa María kasharqa chayman yaykuytawan kay jinata napaykorqa: “Imaynalla María, Jehová* Diosqa sonqo juntʼasqa qanwan kashan, bendecisunkitaj”, nispa. 29 Angelpa nisqanta uyarispa Mariaqa mayta tʼukorqa, entiendeyta munaspa imachus niyta munasqanta chay napaykusqan. 30 Angeltaj nerqa: “Ama manchachikuychu María. Qantaqa Dios allinpaj qhawasunki. 31 Qanqa onqoj rikhurispa uj qhari wawata nacechikunki,+ paymantaj Jesús sutita churanki.+ 32 Payqa jatunpaj qhawasqa kanqa,+ sutichasqataj kanqa Aswan Patapi kaj Diospa Wawan.+ Jehová* Diostaj payman qonqa tatan Davidpa kamachina tiyananta.+ 33 Jacobpa miraynintataj wiñaypaj rey jina kamachenqa, Gobiernontaj mana tukukonqachu”,+ nispa.

34 Mariatajrí angelta taporqa: “¿Imaynataj chay kanmanri? Noqaqa mana ni pi qhariwanpis puñuykunirajchu”,+ nispa. 35 Angeltaj kuticherqa: “Espíritu santo qanman jamonqa,+ Aswan Patapi kaj Diospa atiynin llanthuykusonqa. Ajinamanta chay nacej wawaqa Diospaj tʼaqasqa kanqa,+ Diospa Wawan nisqataj kanqa.+ 36 Familiayki Elisabetpis awelita kayninpi qhari wawayoj kanqa. Payta mana wawata rejsej nejtinkupis, sojta killaña onqoj kashan. 37 Diospajqa ni imapis mana atikojqa kanchu”,+ nispa. 38 Mariataj nerqa: “Jehová* Diospa kamachin kani, nisqaykiman jina noqapi ruwakuchun”, nispa. Chantá angelqa riporqa.

39 Pisi tiemponman Mariaqa usqhayllata orqos chaynejman rerqa, Judaj ujnin llajtanman. 40 Zacariaspa wasinman yaykuspataj Elisabetta napaykorqa. 41 Mariaj napaykusqanta Elisabet uyarejtintaj, wawitanqa wijsanpi kuyurerqa. Elisabettaj espíritu santowan juntʼa kaspa, 42 jatunmanta nerqa: “María, bendecisqa kanki warmis ukhupi, wijsaykipi kaj wawitapis bendecisqallataj. 43 ¿Pitaj noqa kasqani Señorniypa maman watukunawanpajri? 44 Napaykuwasqaykita uyarisqaytawan, wawitayqa wijsaypi kusiywan kuyurin. 45 María, kusikullaytaj creesqaykimanta, Jehová* Diosqa imastachus nisusqanta tukuyninta juntʼanqapuni”, nispa.

46 Mariataj nerqa: “Noqaqa Jehová* Diosta jatunchani,+ 47 sonqoytaj kusiywan juntʼasqa kashan Salvawaj Diosniyrayku.+ 48 Payqa kay wajcha kamachinta qhawariwarqa.+ Kunanmantapachataj runaspa tukuy miraynenqa kusisqa kasqayta niwanqanku.+ 49 Atiyniyoj Diosqa tʼukuna imasta noqapaj ruwapuwan. Santomin sutenqa.+ 50 Khuyakuyninpis wiñay wiñaypaj kallanqapuni payta manchachikojkunapaj.+ 51 Payqa tʼukuna imasta atiyninwan ruwan, chʼeqerachintaj* sonqonkupi jatunchakojkunata.+ 52 Atiyniyoj runasta kamachina tiyanankumanta uraykuchin,+ kʼumuykukoj sonqoyojkunatataj pataman oqharin.+ 53 Yarqhasqa kajkunataqa allin imaswan sajsachin,+ qhapajkunatataj mana imayojta kachapun. 54 Payqa Israel kamachinta yanapaj jamun, nisqanta yuyarikuspa.+ 55 Payqa wiñaypaj khuyakunanta nerqa Abrahanta, miraynintapis.+ Chaytaqa ñaupa tatasninchejman nerqa”. 56 Mariaqa kinsa killata jina Elisabetwan qhepakorqa. Chaymantataj wasinman kutiporqa.

57 Elisabetpa nacechikunan tiempo chayamojtintaj, qhari wawata nacechikorqa. 58 Qayllanpi tiyakojkuna, familiasninpis Elisabetwan khuska kusikorqanku, Jehová* Dios mayta khuyakusqanta yachaspa.+ 59 Paykunaqa pusaj pʼunchayninman jamorqanku wawata circuncidaj,*+ wawamantaj churayta munasharqanku tatan Zacariaspa sutinta. 60 Mamantaj nerqa: “Mana. Wawayqa Juan sutikonqa”, nispa. 61 Paykunataj nerqanku: “Mana pipis familiaykipi chay sutiyojqa kanchu”, nispa. 62 Chantá wawaj tatanta señaswan taporqanku ima sutitachus churayta munasqanta. 63 Paytaj tablitata mañakuspa qhelqarqa: “Sutenqa Juan”,+ nispa. Chayta rikuspataj tukuyninku tʼukorqanku. 64 Chay ratopachataj Zacariasqa watejmanta parlarerqa+ Diosta bendecispa. 65 Wasinku qayllapi tiyakojkunaqa mayta tʼukorqanku,* Judeaj orqosninpi tiyakojkunapis chay tukuy imasmanta parlasharqanku. 66 Chayta uyarejkunataj tʼukuspa nisharqanku: “¿Chanta imayna runapunitaj chay wawa kanqari?”, nispa. Paykunaqa repararqanku Jehová* Dios chay wawata bendecishasqanta.

67 Tatan Zacariastaj espíritu santowan juntʼa kaspa kay jinata nerqa: 68 “Jatunchasqa kachun Israelpa Diosnin Jehovaqa,*+ payqa llajtanta khuyakuspa kacharichin.+ 69 Kamachin Davidpa+ mirayninmanta atiyniyoj salvajta*+ sayarichipuwanchej, 70 unay profetasninpa* siminnejta parlasqanman jina.+ 71 Pay nerqa salvanawanchejta enemigosninchejmanta, chejnikuwanchej chaykunamantawan.+ 72 Payqa khuyakuwasun ñaupa tatasninchejta nisqanman jina, santo tratontataj yuyarikonqa.+ 73 Chaytaqa ñaupa tatanchej Abrahanman jurarqa.+ 74 Diosqa enemigosninchejpa makisninmanta kacharichiwasqanchejtawan, mana manchachikuspa yupaychananchejta saqewasunchej. 75 Ajinamanta kausashaspa payta mana wasanchananchejpaj, cheqan kajtataj ruwananchejpaj. 76 Qantajrí wawitáy, Aswan Patapi kaj Diospa profetan kanki. Jehová* Diospa ñaupaqenta rinki ñankunasninta allinchanaykipaj,+ 77 llajtanmantaj rejsichinaykipaj, Diosqa juchasninkuta pampachaspa salvananta+ 78 Diosninchej may khuyakuyniyoj kasqanrayku. Chay khuyakuynintaj cielomanta kʼanchamuwasun, imaynatachus inti sutʼiyayta kʼanchamun ajinata, 79 laqhapi tiyakojkunata, jinallataj wañuypa llanthunpi kajkunatapis kʼanchananpaj.+ Chay kʼanchayqa rikuchiwasun sonqo tiyasqa kausakunapaj imatachus ruwananchejta”.

80 Wawaqa wiñarqa, yuyaytapis astawan astawan japʼerqa. Payqa manaraj Israel nacionman willamushaspa chʼinnejpi tiyakorqa.