Números

18 Chantá Jehová Diosqa Aaronman nerqa: “Qanwan, wawasniykiwan, mirayniykimanta kajkunawan ima cuentata qonkichej santo lugarpa contranta pipis juchallejtin.+ Sichus sacerdote ruwanasniykichejmanta kamachiykunata pʼakinkichej chayqa, qanwan wawasnillaykiwantaj cuentata qonkichej.+ 2 Chantapis Leví ayllumanta* hermanosniykita, nisunman ñaupa tataykej ayllunmanta kajkunata pusamuy, paykuna qanwan khuska trabajanankupaj,+ jinallataj qanta, wawasniykitawan yanapasunaykichejpaj trato ruwasqamanta arca kashan chay toldoj ñaupaqenpi.+ 3 Paykunaqa ruwanqanku imatachus paykunaman kamachisqaykita, jinallataj toldo wasipi ruwanastapis.+ Jinapis ama qayllaykuchunkuchu santo lugarpa imasninman, nillataj altarmanpis. Ajinamanta ama wañunankupaj, nitaj qankunapis wañunaykichejpaj.+ 4 Paykunaqa qanta yanapasonqanku tinkukuna toldopi llankʼayninkuta juntʼaspa, jinallataj chay toldopi ruwanasta ruwaspa. Sacerdote ruwanasta ruwashajtiykichejqa, pichus mana sacerdotechu kajqa* ama qankunaman qayllaykamuchunchu.+ 5 Qankunalla sacerdote ruwanasta ruwankichej santo lugarpi,+ jinallataj altarpipis.+ Ajinamanta amaña israelitaspa contranpi astawan phiñakunaypaj.+ 6 Noqaqa hermanosniykichej levitasta israelitas ukhumanta ajllani qankunajta kanankupaj.+ Paykunaqa Jehová Diosman entregasqa kanku, tinkukuna toldopi ruwanasta ruwanankupaj.+ 7 Qanwan wawasniykiwan cuentayoj kankichej sacerdote ruwanasmanta, altarpi, jinallataj cortina wasapi kashan chay imasmantapis.+ Chay ruwanastaqa qankuna ruwankichej.+ Qankunaman qopuykichej sacerdote ruwanasta. Toldo wasiman mana sacerdotechu kaj runa* chimpaykonqa chayqa, wañuchisqa kanqa”,+ nispa.

8 Jehová Diosqa Aaronman nillarqataj: “Qan cuentayoj kanki noqaman apamuwanku chay ofrendasmanta.+ Ima ofrendastachus israelitas noqaman apamuwanku chaykunamantaqa qanman, wawasniykimanpis uj chhikata qoykichej. Chaytaj qankunapaj tʼaqasqallapuni kanqa.+ 9 Ninapi qʼolachina* may llimphuchasqa ofrendasmantaqa kaykuna qanpaj kanqa: israelitaspa apamusqanku chʼaki mikhuy ofrendasninku,+ jucharayku ofrendasninku,+ pantasqarayku ofrendasninkupis,+ mayqenkunatachus noqaman apamuwanku chaykuna. Chay llimphuchasqa ofrendasqa qanpaj, wawasniykipajwan kanqa. 10 Chaytaqa uj santo lugarpi mikhunkichej.+ Qankuna ukhumanta tukuy qharis chayta mikhunkichej. Chaytaqa Diospaj tʼaqasqata jina qhawanki.+ 11 Kaykunapis qanllapajtaj kanqa: israelitaspa apamusqanku ofrendas,+ kuyuchisqa ofrendaspis.+ Chaykunataqa qanman qoyki, jinallataj qhari wawasniykiman, warmi wawasniykimanpis. Chaytaj qankunaman qosqallapuni kanqa.+ Chaytaqa wasiykipi tukuy llimphu kajkuna mikhonqanku.+

12 ”Qanman qollaykitaj israelitas ñaupaj kaj poqochisqankumanta+ Jehová Diosman apamusqankumanta aswan sumaj aceiteta, aswan sumaj mosoj vinota, aswan sumaj trigota* ima.+ 13 Jallpʼasninkoj ñaupaj kaj poqoyninmanta Jehová Diosman apamusqankoqa qanpaj kanqa.+ Chaytaqa wasiykipi tukuy llimphu kajkuna mikhonqanku.

14 ”Imatachus israelitas Diosman wiñaypaj qopunku chay imasqa qanpaj kanqa.+

15 ”Israelitas Jehová Diosman apamonqanku chay tukuy kuraj wawasninkoqa qanpaj kanqa, jinallataj uywasninkoj ñaupaj kaj uñasninkupis.+ Chaywanpis kuraj kaj wawasninkumantaqa qolqeta pagachunku,+ mana llimphupaj qhawasqa uywasninkoj ñaupaj kaj uñasninkoj cuentanmantataj waj uywata qochunku.+ 16 Uj killayojmanta pataman kuraj kaj wawasmantaqa kacharichina preciota pagachunku phishqa siclos* qolqeta.+ Chaytaj kanan tiyan santo lugarpi mashkhachus uj siclo pesasqanman jina. Sapa sicloqa 12 gramos pesan.* 17 Wakaspata, ovejaspata, cabraspata ñaupaj kaj orqo uñasnillankumanta ama waj uywata qochunkuchu.+ Chaykunaqa Diospaj tʼaqasqaña kanku. Chay uywaspa yawarninkuwanqa altarta chʼajchunki,+ wirasninkutataj qʼolachinki ninapi qʼolachina ofrendata jina, ima munayta qʼaparispa Jehová Diospa sonqonta tiyaykuchinanpaj.+ 18 Aychasnintaj qanpaj kanqa, imaynatachus kuyuchisqa ofrenda pecho aycha, paña piernapis qanpaj ajina.+ 19 Israelitas llimphuchasqa ofrendasta Jehová Diosman jaywasqankutapis+ qanman qollaykitaj, jinallataj qhari wawasniykiman, warmi wawasniykimanpis. Chaytaj qankunaman qosqallapuni kanqa.+ Kay tratoqa kachi trato* nisqa, unay wataspaj. Chaytaqa Jehová Diosmin qanwan ruwan, jinallataj mirayniykiwanpis”.

20 Jehová Diosqa Aaronman nillarqataj: “Qanqa mana ima herenciatapis japʼinkichu israelitaspa jallpʼasninku ukhupi, jallpʼaykeqa ni uj chhikallanpis kanqachu paykuna ukhupi.+ Noqa qanpata kani, israelitas ukhupi noqa herenciayki kani.+

21 ”Israelitas poqochisqankumanta sapa chunkamanta ujta apamusqankutaqa levitasman qoni+ herencianku kananpaj. Chaytaj pagonku jina kanqa tinkukuna toldopi ruwanasta ruwasqankumanta, chaypi llankʼasqankumanta. 22 Israelitasqa tinkukuna toldoman manaña qayllaykunankuchu tiyan. Chayman qayllaykuspaqa juchallikonqanku, wañonqankutaj. 23 Levitaslla tinkukuna toldopi ruwanasta ruwanqanku. Paykuna cuentata qonqanku santo lugarpa contranpi israelitas juchallikojtinku.+ Levitasqa mana ima herenciatapis japʼenqankuchu israelitas ukhupi.+ Chaytaj uj ley kanqa unay wataspaj, paykunapaj mirayninkupajpis. 24 Levitasmanqa herenciankupaj qoni israelitas sapa chunkamanta ujta apamusqankuta, Jehová Diospaj apamunku chay imasta. Chayrayku nini: ‘Levitasqa mana ima herenciatapis japʼenqankuchu israelitas ukhupi’,+ nispa”.

25 Chantá Jehová Diosqa Moisesman nerqa: 26 “Levitasman niy: ‘Qankunaqa japʼinkichej sapa chunkamanta ujta israelitas qosqankuta. Chayta qoykichej herenciaykichej kananpaj.+ Qankunataj chaymanta sapa chunkamanta ujta Jehová Diosman qollankichejtaj.+ 27 Chay qosqaykichejqa qhawasqa kanqa eraykichejmantapis* trigota apamushawajchej jina+ chayri ashkha vinotawan ashkha aceitetawan ruwasqaykichejmantapis apamushawajchej jina. 28 Ajinamanta qankunapis Jehová Diosman qollankichejtaj sapa chunkamanta ujta, israelitas apamusqankuta japʼisqaykichejmanta. Jehová Diospata kajtataj sacerdote Aaronman qonkichej. 29 Ima ofrendatapis Jehová Diosman qospaqa japʼisqaykichejmanta aswan sumajnin kajta qonkichej.+ Chayqa santo kanqa’.

30 ”Chantá paykunaman nillankitaj: ‘Qankuna levitas, imatachus japʼisqaykichejmanta aswan sumajnin kaj ofrendata qonkichej chayqa, eraykichejmantapis trigota apamushawajchej jina kanqa chayri vinotawan aceitetawan ruwasqaykichejmantapis apamushawajchej jina kanqa. 31 Chaytaqa qankuna, wasiykichejpi kajkunapis mayllapipis mikhunkichej, imaraykuchus chayqa tinkukuna toldopi ruwanasta ruwasqaykichejmanta pagoykichej.+ 32 Imastachus japʼisqaykichejmanta manachus aswan sumajnin kajta qonkichej chayqa, juchallinkichej. Israelitas apamonqanku chay llimphuchasqa imastaqa ama chʼichichankichejchu, manachayqa wañunkichej’”.+