Jueces

11 Jefteqa+ galaadmanta wapu soldado karqa. Payqa uj khuchi warmej* wawan karqa, tatantaj Galaad karqa. 2 Galaadpataqa warminpipis waj qhari wawasnin tiyapullarqataj. Chay wawasnintaj runayaykuytawan Jefteta wasinkumanta wijchʼorqanku, nerqankutaj: “Qanqa mana ima herenciatapis tataykumanta japʼinkichu, qanqa waj warmej wawan kanki”, nispa. 3 Chayrayku Jefteqa chay hermanosninmanta ayqekorqa, Tob jallpʼamantaj tiyakoj riporqa. Chaypeqa mana trabajoyoj runas payman ujchaykukorqanku.

4 Chay qhepata ammonitasqa israelitaswan maqanakuyta qallarerqanku.+ 5 Ammonitas israelitaswan maqanakuyta qallarejtinkutaj, Galaadmanta kurajkunaqa usqhayllata Tob jallpʼaman rerqanku Jefteta pusarimunankupaj. 6 Paykunaqa Jefteman nerqanku: “Jaku rinachej ari, ammonitaswan maqanakoj. Qan comandanteyku kanki”, nispa. 7 Jeftetajrí Galaadmanta kurajkunaman kuticherqa: “¿Manachu qankunallataj chejnikuwaspa tataypa wasinmanta wijchʼumuwarqankichej?+ ¿Imaraykutaj kunan llakiypi kasparaj maskʼawankichejri?”, nispa. 8 Galaadmanta kurajkunataj Jefteta nerqanku: “Kajllata parlashanki. Kunanqa sichus noqaykuwan rispa ammonitaswan maqanakamunki chayqa, qan kamachejniyku kanki tukuy Galaadpi tiyakojkunajta”,+ nispa. 9 Chantá Jefteqa Galaadmanta kurajkunata nerqa: “Sichus ammonitaswan maqanakunaypaj pusawankichej, Jehová Diostaj paykunata atipachiwanqa chayqa, kamachejniykichej kasaj”, nispa. 10 Galaadmanta kurajkunataj Jefteta nerqanku: “Jehová Dios testigo kachun.* Noqaykoqa chay nisqaykiman jinapuni ruwasqayku”, nispa. 11 Chantá Jefteqa Galaadmanta kurajkunawan rerqa. Israelitastaj payta churarqanku kamachejninku, comandantenku ima kananpaj. Jefteqa imatachus ñaupajta nisqanta Mizpapi+ watejmanta nillarqataj, Jehová Diospa ñaupaqenpi.

12 Chaymanta Jefteqa runasta kacharqa ammonitaspa+ reyninkuman nimunankupaj: “¿Imataj contraykupi tiyan kay jallpʼaykuman maqanakoj jamunaykipajri?”, nispa. 13 Ammonitaspa reyninkutaj Jeftejpa kachasqan runasman kuticherqa: “Israelitasqa Egiptomanta llojsimuspa jallpʼasniykuta qhechuwarqayku,+ Arnón mayumanta+ Jaboc mayukama, chantá Jordán mayukama.+ Kunanqa chay jallpʼasniykuta chʼinllamanta kutichipuwayku”, nispa. 14 Jeftetajrí ujtawan runasta kachallarqataj ammonitaspa reyninkuman, 15 kay jinata nimunankupaj:

“Jefteqa kayta nimusunki: ‘Israelitasqa mana ima jallpʼatapis qhechorqankuchu moabitasmanta,+ nitaj ammonitasmantapis.+ 16 Maypachachus israelitasqa Egiptomanta llojsimorqanku chaypacha, chʼin jallpʼanta jamorqanku Puka markama,+ chaymantataj Cadesman+ chayamorqanku. 17 Chantaqa runasta kacharqanku Edommanta+ reyman nimunankupaj: “Ama jina kaspa, jallpʼaykita pasarichiwayku ari”, nispa. Edommanta reytajrí mana paykunata pasajta saqerqachu. Moabmanta+ reymanpis runasta kachallarqankutaj. Paypis manallataj pasachiyta munarqachu. Chayrayku israelitasqa Cadespi+ qhepakorqanku. 18 Israelitasqa chʼin jallpʼanta purishaspa Edom+ jallpʼaj wasanta, Moab jallpʼaj wasanta muyuykamorqanku. Paykunaqa Moab+ jallpʼaj inti llojsimuynin ladonta rerqanku. Chantaqa Arnón mayu chaypi qhepakorqanku, manataj Arnón mayuta chimparqankuchu Moab+ jallpʼaj lindenña* kasqanrayku.

19 ”’Chantaqa Hesbonpi tiyakoj amorreospa reyninku Sehonmanñataj runasta kacharqanku nimunankupaj: “Ama jina kaspa, jallpʼaykita pasarichiwayku ari, maymanchus rishayku chayman chayanaykupaj”,+ nispa. 20 Sehonpis manallataj israelitasta pasachiyta munarqachu, mana de confianza runaschu kasqankuta yuyaspa. Astawanpis tukuy soldadosninta tantaykorqa. Jahazpi jarakuspataj israelitaswan maqanakorqa.+ 21 Chayrayku Israelpa Diosnin Jehovaqa Sehonta, tukuy soldadosnintawan israelitaspa makisninkuman jaywaykorqa. Israelitastaj paykunata atipaykuytawan chay cheqaspi tiyakoj amorreospa jallpʼasninkuta japʼikaporqanku.+ 22 Paykunaqa amorreospa tukuy jallpʼasninkuta japʼikaporqanku, Arnón mayumantapacha Jaboc mayukama, chantá chʼin jallpʼamantapacha Jordán mayukama.+

23 ”’Israelpa Diosnin Jehovamin amorreosta kay jallpʼamanta qharqospa israelita wawasninman qoporqa.+ Kunanqa, ¿qanchu israelitasta jallpʼankumanta qharqoyta munashanki? 24 Sichus diosniyki Kemós+ imatapis qosunkiman chayqa, ¿manachu qanpata kasqanta niwaj? Ajinallatataj noqaykupis ima jallpʼatachus Jehová Diosniyku qowasqaykutaqa noqaykojta kasqanta niyku.+ 25 ¿Qanqa yuyankichu Ziporpa wawan Balacmanta+ aswan allin kasqaykita? Payqa Moabmanta rey karqa. Ni paypis israelitaswan churanakorqachu, nitaj maqanakojpis jamorqachu. 26 Israelitasqa 300 watastaña tiyakushanku Hesbonpi, muyuyninpi kaj ranchosninpiwan,+ chantá Aroerpi, muyuyninpi kaj ranchosninpiwan, jinallataj Arnón mayu kantupi kaj tukuynin llajtaspipis. ¿Imaraykutaj kunanraj chay jallpʼasmanta parlashankichejri?+ 27 Noqaqa mana ima sajratapis contraykipi ruwanichu. Qan antes mana allintachu ruwashanki noqawan maqanakoj jamuspa. Jehová Diosmin Juezqa.+ Pay juzgachun israelitastapis ammonitastapis’, nispa”.

28 Chaywanpis ammonitaspa reyninkoqa mana Jeftej willachisqanta kasorqachu.

29 Chaypacha Jehová Diospa espiritonqa Jefteman jamorqa.+ Paytaj Galaadnejta,+ Manasés jallpʼanejta pasaspa Galaadpi Mizpeman rerqa. Mizpemantataj ammonitaswan maqanakoj rerqa.

30 Jefteqa Jehová Diosman kayta ruwananta nerqa:+ “Sichus ammonitasta atipanaypaj yanapawanki chayqa,* 31 pichus ñaupajta wasiymanta taripawaj llojsimonqa chayta qopusqayki.+ Jehová Diosníy, paytaqa qʼolachina* ofrendata jina jaywasqayki”,*+ nispa.

32 Chantá Jefteqa ammonitaswan maqanakoj rerqa, Jehová Diostaj paykunata makisninman jaywaykorqa. 33 Jefteqa may chhika ammonitasta wañuracherqa, atiparqataj 20 llajtasta, Aroermantapacha Minitkama, chantá Abel-Keramimkama. Ajinata israelitasqa ammonitasta atipaykorqanku.

34 Jefteqa Mizpaman+ wasinman kutipojtin, warmi wawan payta taripaj llojsimorqa panderetata* tocaspa, tususpa ima. Pay sapallan wawan karqa, mana waj wawan tiyaporqachu ni qharipis, ni warmipis. 35 Jefteqa wawanta rikuspa ropanta llikʼikorqa, nerqataj: “Ay wawáy, qannejta jatun llakiypi rikhurini. Karuman ripunayki kanqa. Imatachus Jehová Diosman nisqaytaqa juntʼanaypuni tiyan”,+ nispa.

36 Wawantajrí nerqa: “Tatáy, noqamanta imatachus Jehová Diosman nisqaykitaqa ruwallay.+ Jehová Diosqa enemigosniyki ammonitasta atipanaykipaj yanapasorqa”, nispa. 37 Chantapis tatanman nillarqataj: “Ujllata mañarikusqayki tatáy: Iskay killa juntʼata orqosninta amigasniywan purimuyta munani. Chay orqospi paykunawan waqamusaj mana casaranaychu kasqanmanta”, nispa.

38 Tatantaj kuticherqa: “Rillay wawáy”, nispa. Ajinamanta payqa iskay killapaj amigasninwan orqosman riporqa, paykunawan waqamunanpaj mana casarananchu kasqanmanta. 39 Chay iskay killa juntʼakojtintaj tatanpa wasinman kutimorqa, Jeftetaj imatachus ruwasaj nisqanta juntʼarqa.+ Wawanqa wañupunankama mana pi qhariwanpis puñuykorqachu. Chaymantapacha Israelpeqa kay costumbre* karqa: 40 Sapa wata Israelmanta sipaskunaqa galaadita Jeftej wawanta kallpachaj rej kanku, tawa pʼunchayta.