Jueces

20 Chayrayku tukuy israelita qharisqa rerqanku Danmantapacha,+ Beer-Sebamantapacha, jinallataj Galaadmantapis.+ Paykunaqa uj runa jinalla Mizpapi+ tantaykukorqanku, Jehová Diospa ñaupaqenpi. 2 Tukuy israelita ayllusmanta* kamachejkunapis chaypi kasharqanku, Diospa israelita wawasnin ukhupi. Tukuyninpi 400.000 espadasniyoj soldados* karqanku.+

3 (Benjaminitasqa yacharqanku israelita qharis Mizpapi tantakusqankuta).

Chantá israelita qharisqa tapukorqanku: “¿Imaynapitaj chay jina jatun jucha ruwakorqari?”,+ nispa. 4 Wañuchisqa warmej qosan levitataj+ kuticherqa: “Noqaqa tanta warmiywan* Benjamín aylloj Guibeá+ llajtankuman chayakorqani, chaypi chay chʼisi qhepakunaykupaj. 5 Chay chʼisitaj Guibeá llajtayojkunaqa* alojakusharqayku chay wasita muyuykamorqanku wañuchiwayta munaspa. Pero mana wañuchiwarqankuchu, antes warmiyta violarqanku wañuchinankukama.+ 6 Chantá noqaqa warmiypa cuerponta khuchurarqani. Chay khuchurasqaytataj tukuy Israel jallpʼaman apacherqani ujtakama.+ Ajinamanta tukuy yachanankupaj chay jina millay juchata, chay jina sajrata Israelpi ruwakusqanta. 7 Kunanqa qankuna israelitas parlarikuychej, niychej imatachus ruwanaykichejta”,+ nispa.

8 Ajinapi tukuyninku uj runa jinalla jatarikuspa nerqanku: “Ni mayqenninchej toldo wasinchejman* ripusunchu, nitaj wasinchejmanpis kutipusunchu. 9 Astawanpis suerteta* choqasunchej pikunachus Guibeaman maqanakoj wicharinankuta yachanapaj.+ 10 Tukuy israelita ayllusmantaqa sapa pachajmanta chunkata tʼaqasunchej, sapa waranqamanta pachajta, sapa chunka waranqamantataj waranqata. Paykunaqa tukuy soldadospaj mikhunata apanqanku. Chay ujkunataj Guibeapi Benjamín ayllumanta kajkunawan maqanakamonqanku, chay jina millay juchata Israelpi ruwasqankurayku”, nispa. 11 Ajinata tukuy israelita qharisqa uj runa jinalla tantaykukorqanku Guibeá llajtayojkunawan maqanakamunankupaj.

12 Israelita ayllusqa Benjamín ayllumanta kajkunaman willachimorqanku: “¿Imaynapitaj chay jina millay juchata qankunamanta wakin ruwarqankichejri? 13 Kunanqa Guibeamanta chay mana imapaj valej runasta entregawayku wañuchinaykupaj.+ Ajinamanta Israelta chay millay juchamanta llimphuchanapaj”,+ nispa. Benjaminitastajrí chay israelita hermanosninkuta mana kasorqankuchu.

14 Benjaminitasqa llajtasninkumanta jamuspa Guibeapi tantakorqanku, chay israelitaswan maqanakunankupaj. 15 Chay pʼunchay benjaminitasqa llajtasninkumanta tantarqanku 26.000 qharista, espadasninkuwan sumaj wakichisqasta. Guibeamanta 700 ajllasqa soldadostaj wajlla karqanku. 16 Chay tukuyninku ukhupi kallarqankutaj waj 700 sumaj wapu soldados, tukuyninku lloqʼe makis. Paykunaqa warakʼawan rumita warakʼaspa uj chujchamanpis mana pantaspa japʼichej kanku.

17 Israelitaspis, Benjamín ayllumanta wajllata tantakorqanku 400.000 qharis, espadasninkuwan sumaj wakichisqas.+ Tukuyninku guerrapi maqanakojkuna karqanku. 18 Israelitasqa Betelman wicharispa Diosta taporqanku:+ “¿Mayqenniykutaj benjaminitaswan maqanakoj ñaupajta risqaykuri?”, nispa. Jehová Diostaj kuticherqa: “Ñaupajtaqa Judá ayllu renqa”, nispa.

19 Chantá israelitasqa tutamanta jatarikuspa Guibeá qayllapi jarakamorqanku, chaypi tiyakojkunawan maqanakunankupaj.

20 Israelitasqa Benjamín aylluwan maqanakoj rispa, Guibeá llajta chimpapi wakichisqas suyarqanku maqanakuman yaykunankupaj. 21 Jinallapi benjaminitasqa Guibeá llajtamanta llojsimuspa, 22.000 israelitasta chay pʼunchay wañuracherqanku. 22 Chaywanpis israelitasqa mana manchachikorqankuchu. Watejmanta maqanakuman yaykunankupaj rerqanku, maymanchus ñaupaj kaj pʼunchaypi rerqanku chayllamantaj. 23 Israelitasqa Betelman wicharispa chʼisiyaykunankama Jehová Diospa ñaupaqenpi waqarqanku. Chantá Jehová Diosta taporqanku: “¿Ujtawanchu risqayku Benjamín ayllumanta hermanosniykuwan maqanakoj?”,+ nispa. Jehová Diostaj kuticherqa: “Arí, ujtawan riychej”, nispa.

24 Iskay kaj pʼunchaypi israelitasqa watejmanta benjaminitaswan maqanakoj rerqanku. 25 Chay iskay kaj pʼunchaypipis Benjamín ayllumanta kajkunaqa, Guibeá llajtamanta llojsimuspa 18.000 espadasniyoj israelitasta wañurachillarqankutaj.+ 26 Chantá tukuy israelita qharisqa watejmanta Betelman wicharillarqankutaj. Chaypi tiyaykukuspataj Jehová Diospa ñaupaqenpi waqarqanku.+ Paykunaqa chʼisiyaykunankama chay pʼunchay ayunarqanku,+ Jehová Diosmantaj qʼolachina* ofrendasta+ jaywarqanku, khuska mikhurikuy ofrendastawan.+ 27 Chantá israelitasqa Jehová Diosta watejmanta taporqanku.+ Chay tiempoqa cheqa Diospa* trato ruwasqan arca nisqa cajaqa Betelpi kasharqa. 28 (Chay arcaj ñaupaqenpeqa Finehás+ chaypacha sirvisharqa. Payqa Eleazarpa wawan karqa, Aaronpa allchhintaj). Israelitasqa Diosta taporqanku: “¿Ujtawanchu risqayku Benjamín ayllumanta hermanosniykuwan maqanakoj chayri amañachu?”,+ nispa. Jehová Diostaj kuticherqa: “Ujtawan riychej. Qʼaya noqaqa paykunata makisniykichejman jaywaykusaj”, nispa. 29 Jinapi israelitasqa soldadosta kacharqanku Guibeá llajtaj muyuyninpi pakaykakamunankupaj.+

30 Kinsa kaj pʼunchaypi israelitasqa watej wicharillarqankutaj benjaminitaswan maqanakoj. Chay kutipis ñaupaj kutispi jinallataj, Guibeá llajtawan maqanakuman yaykunankupaj sayaykorqanku.+ 31 Benjaminitas paykunawan maqanakoj llojsimojtinkutaj, israelitasqa ayqekorqanku paykunata llajtankumanta karunchachinankupaj.+ Benjaminitastaj, ñaupaj kutispi jinallataj israelitasta qhatiykuspa jatun ñankunapi wakinta wañuracherqanku. Ujnin ñanqa Betelman rina ñan karqa, ujnintaj Guibeaman rina ñan. Chay kutipeqa uj 30 israelitasta wañuracherqanku.+ 32 Benjaminitasqa kay jinata yuyarqanku: “Ñaupaj kutispi jinallataj israelitasta atipaykushanchej”,+ nispa. Chaywanpis israelitasqa yachachinakusqankuña kay jinata: “Paykunamanta ayqekuspa llajtankumanta karunchachisunchej jatun ñankunaman”, nispa. 33 Jinallapi israelitasqa maypichus kasharqanku chaymanta llojsimorqanku Baal-Tamarpi maqanakoj. Guibeá llajtaj muyuyninpi pakaykukorqanku chay israelitaspis maqanakoj llojsimullarqankutaj. 34 Tukuy israelitasmanta 10.000 sumaj wapu soldados Guibeaman chimpaykorqanku. Chaypitaj maqanakoyqa may sinchʼi karqa. Benjaminitastaj mana reparakorqankuchu jatun llakiy paykunata qhatirinanpajña kashasqanta.

35 Ajinata Jehová Diosqa Benjamín aylluta israelitaswan atipacherqa.+ Chay pʼunchay israelitasqa Benjamín ayllumanta espadasniyoj 25.100 qharista wañuracherqanku.+

36 Benjaminitasqa israelitas ayqekushasqankuta rikuspa, yuyarqanku ujtawan atipanankuta.+ Chaywanpis israelitasqa ayqekorqanku Guibeá llajtaj muyuyninpi pakaykukojkunaman atienesqas kasqankurayku.+ 37 Pakasqa kasharqanku chay israelita soldadostaj, usqhayllata llojsimuspa Guibeaman yaykuykorqanku. Chay llajtaman juntʼaykuspa espadawan wañuracherqanku tukuy chaypi kajkunata.

38 Israelitasqa yachachinakusqankuña llajtaj muyuyninpi pakaykukoj soldadosqa qʼoshñichinankuta, llajtata japʼikapusqankutaña willanankupaj.

39 Israelitas ayqekojtinku Benjamín ayllumanta kajkunaqa qhatiykuspa uj 30 israelitasta wañuracherqanku.+ Paykunaqa yuyarqanku: “Ñaupaj kutipi jinallataj israelitasta atipaykushanchej”,+ nispa. 40 Jinallapi llajtamanta qʼoshñi llojsimorqa. Chayqa israelitaspaj uj señal karqa. Benjaminitaspis qhepata qhawarispa rikorqanku llajtanku lauraykushasqanta, ninataj cielokama chayashasqanta. 41 Chaypacha israelitasqa paykunawan maqanakoj kutirikamorqanku. Benjamín ayllumanta kajkunataj sinchʼita mancharikorqanku chay jina llakiy paykunata qhatirishasqanmanta. 42 Chantá paykunaqa israelitasmanta ayqekuyta qallarerqanku chʼin jallpʼa ladoman, israelitastaj paykunata qhatiykullarqankupuni. Chantapis chay qaylla llajtasmanta runas llojsimuspa benjaminitasta wañuchillarqankutaj. 43 Benjaminitasqa israelitaswan muyurisqa rikhurerqanku. Israelitastaj paykunata qhatiykuspa wañuracherqanku Guibeá chimpapi, inti llojsimuy ladopi. 44 Ajinata wañorqanku 18.000 benjaminitas. Tukuyninku karqanku wapu soldados.+

45 Wakintaj kutirispa chʼin jallpʼaman ayqekorqanku, Rimón chhankaman.+ Israelitastaj paykunata qhatiykuspa 5.000 qharista wañuracherqanku jatun ñankunapi. Chantá qhatiykullarqankupuni Guidomkama. Chay qhatiykusqankupitaj 2.000 qharistawan wañuracherqanku. 46 Chay pʼunchayqa 25.000 benjaminitas wañorqanku. Tukuyninku karqanku espadasniyoj wapu soldados.+ 47 Chaywanpis 600 qharisraj chʼin jallpʼaman ayqekuspa Rimón chhankaman chayarqanku. Chaypitaj tawa killasta qhepakorqanku.

48 Chantá israelita qharisqa kutimuspa benjaminitaspa tukuy llajtasninkupi puchoj runasta espadawan wañuracherqanku, jinallataj uywastapis. Chay llajtastataj ninawan ruphaykucherqanku.