Lucas

19 Jesusqa Jericó llajtaman yaykuspa, llajta chaupita pasasharqa. 2 Chaypitaj uj qhapaj runa karqa, Zaqueo sutiyoj, impuesterospa kurajninku. 3 Zaqueoqa Jesusta rikuyta munasharqa, pichus kasqanta yachananpaj. Juchʼuy runalla kaspataj, mana rikuyta aterqachu ashkha runa kasqanrayku. 4 Chayrayku ñaupaykuspa uj kʼita higo sachʼaman* wicharerqa, chaymanta Jesusta rikumunanpaj, niraj chayninta pasapushajtin. 5 Jesús chayninta pasashaspataj, Zaqueota qhawarispa nerqa: “Zaqueo, usqhayta uraykamuy, kunan wasiykipi qhepakusaj”, nispa. 6 Zaqueotaj usqhayllata uraykamuytawan, Jesusta wasinman kusisqa pusarqa. 7 Chayta rikuspataj tukuy runas thutorqanku: “¿Imaynatá juchasapa runaj wasinman chayakonqari?”,+ nispa. 8 Zaqueotaj sayarispa Señor Jesusta nerqa: “Señor, tukuy kapuwasqanmanta khuskanta wajchasman qopusaj. Wajkunamanta chʼaukiyaspa* qolqenkuta suwasqaytapis, tawa jinastawanraj kutichipusaj”,+ nispa. 9 Jesustaj nerqa: “Kunan pʼunchay kay wasiman salvación chayamun, Zaqueopis Abrahanpa wawan kasqanrayku. 10 Noqaqa* jamuni chinkasqa kajta maskʼaj, salvajtaj”,+ nispa.

11 Discipulosnin chayta uyarishajtinku, Jesusqa watejmanta kikincharispa parlarqa, paykunaqa yuyasharqanku Jerusalenman chayasqankutawan Diospa Gobiernon ima ratollapis rikhurimunanta.+ 12 Chayrayku pay nerqa: “Uj reypa wawan karu llajtaman risqa,+ rey churasqa kananpaj. Chantá rey kaspaña kutinpunan kasqa. 13 Niraj rishaspataj chunka kamachisninta wajyaytawan ashkha qolqeta* qosqa, nisqataj: ‘Kay qolqeta mirachimuychej kutimunaykama’,+ nispa. 14 Llajta masisnintajrí payta chejnikuspa runasta kachasqanku nimunankupaj: ‘Mana munaykuchu reyniyku kanaykita’, nispa.

15 ”Tiemponmantaj rey kaspaña kutimusqa, chantá pikunamanchus qolqeta* qosqa, chay kamachista wajyachimusqa, yachananpaj mashkhatachus qolqeta mirachisqankuta.+ 16 Ujnin kamachintaj chimpaykuspa nisqa: ‘Señor, qolqeykitaqa chunka jinastawanraj mirachini’,+ nispa. 17 Reytaj kutichisqa: ‘Sumajta ruwanki allin kamachi. Pisi kajpi allinta juntʼasqaykirayku chunka llajtasta kamachinki’,+ nispa. 18 Wajñataj chimpaykuspa nisqa: ‘Señor, qolqeykitaqa phishqa jinastawanraj mirachini’,+ nispa. 19 Reytaj payta nillasqataj: ‘Qanpis phishqa llajtasta kamachinki’, nispa. 20 Chantá wajñataj jamuspa nisqa: ‘Señor, kayqa qolqeyki, uj pañuelopi wataykaporqayki. 21 Manchay sajra kasqaykirayku manchachikorqayki. Qanqa bancomanta orqhonki mana churasqayki qolqeta, oqharinkitaj mana tarpusqaykita’,+ nispa. 22 Reytaj kutichisqa: ‘Sajra kamachi, parlasqaykiman jina juchachasqayki. Yachasqanki sajra runa kasqayta, bancoman mana churasqay qolqeta orqhosqayta, mana tarpusqaytataj oqharisqayta.+ 23 Chanta, ¿imaraykutaj mana bancoman qolqeyta* churarqankichuri? Noqaqa chayamuspa interesniyojta orqhokapuyman karqa’, nispa.

24 ”Chantá chaypi kajkunaman nisqa: ‘Qhechuychej chay qolqeta. Chunkaman mirachejmantaj qopuychej’,+ nispa. 25 Paykunatajrí nisqanku: ‘¡Señor, payqa chunka jinastaña japʼishan!’, nispa. 26 Reytaj kutichisqa: ‘Qankunata niykichej: Kapuyniyojmanqa astawan qosqa kanqa, mana kapuyniyojmantataj kapusqanpis qhechusqa kanqa.+ 27 Chantapis enemigosniyta kayman apamuychej, pikunachus mana munarqankuchu reyninku kanayta chaykunata, ñaupaqeypitaj wañurachiychej’, nispa”.

28 Chayta niytawan, Jesusqa puririspa Jerusalenman wicharillarqapuni. 29 Chantá Olivos orqoman+ qayllaykusharqa, maypichus Betfagué rancho, Betania ranchopis kashan chayman. Iskay discipulosnintataj kachaspa nerqa:+ 30 “Jaqay ranchoman riychej. Yaykuspataj uj maltón burrota watasqata tarinkichej, chay burromanqa mana pipis lloqʼaykunrajchu. Phaskaraspataj qhatimunkichej. 31 Sichus pipis tapusonqachej, ‘¿imapajtaj phaskarashankichej?’ nispa chayqa, ninkichej ‘Señor kay burrota necesitan’ nispa”. 32 Discipulosnintaj rispa Jesús nisqanman jina, burrota tarerqanku.+ 33 Maltón burrota phaskarashajtinkutaj dueñosnin taporqanku: “¿Imapajtaj chay maltón burrota phaskarashankichej?”, nispa. 34 Paykunataj kuticherqanku: “Señor kay burrota necesitan”, nispa. 35 Chantá Jesuspaman qhaterqanku, ropasninkuta maltón burroman caronaykuspataj Jesusta lloqʼaykucherqanku.+

36 Risqanman jinataj, runasqa ropasninkuta ñanman mastʼararqanku.+ 37 Olivos orqomanta uraykoj ñanman qayllaykojtintaj, tukuy discipulosnin kusisqa qhaparispa, Diosta jatunchayta qallarerqanku tukuy laya* milagrosta rikusqankumanta. 38 Nerqankutaj: “Jehová* Diospa sutinpi jamoj Reyqa, bendecisqa kachun. Cielopi sonqo tiyaykuy kachun. Cielopi kashaj Diosqa jatunchasqa kachun”,+ nispa. 39 Wakin fariseostaj runas chaupimanta nimorqanku: “Yachachejníy, chʼinyachiy chay discipulosniykita”,+ nispa. 40 Jesustajrí kuticherqa: “Noqa niykichej: Paykunachus chʼinyakunkuman chayqa, rumisñataj qhaparinkuman”, nispa.

41 Jerusalenman qayllaykushaspataj Jesusqa llajtata qhawarispa waqarikorqa,+ 42 nerqataj: “Noqa munarqani reparanaykita imaschus allin kausayta qosunanta, kunantaj chay imasqa qanmanta pakasqa kashan.+ 43 Pʼunchaykuna chayamusonqanku, chaypachataj enemigosniyki jatuchaj filochasqa estacaswan muyuykuchisonqanku, wisqʼaykusonqankutaj.*+ 44 Pampaman wijchʼusonqanku qanta, qanpi tiyakojkunatawan.*+ Qanqa mana reparakorqankichu Dios watukoj jamushasojtin, chayrayku qanpeqa mana uj rumillatapis rumi patapi saqenqankuchu”,+ nispa.

45 Chantá Jesusqa temploman yaykuytawan, vendejkunata jawaman qharqospa,+ 46 nerqa: “Qhelqasqa kashan: ‘Waseyqa Diosmanta mañakuna wasi kanqa’.+ Qankunatajrí suwa thapaman tukuchisqankichej”,+ nispa.

47 Jesusqa sapa día templopi yachachej. Kuraj sacerdotestaj, leymanta yachachejkunawan, llajtamanta kurajkunawan payta wañuchiyta munarqanku.+ 48 Chaywanpis ni imanayta aterqankuchu, tukuy runas tʼukulla Jesusta uyarishasqankurayku.+