2 Crónicas

24 Jehoasqa kamachiyta qallarishajtin qanchis watitayoj karqa.+ Jerusalenpitaj 40 watasta kamacherqa. Jehoaspa mamanqa Beer-Sebamanta+ karqa, sutintaj Zibíah karqa. 2 Jehoasqa Jehová Diospa qhawayninpi cheqan kajta ruwarqa, sacerdote Jehoiadá kausakushajtin.+ 3 Jehoiadaqa iskay warmista Jehoaspaj maskʼaporqa. Jehoaspataqa qhari wawasnin, warmi wawasninpis kaporqa.

4 Tiemponmantaj Jehoasqa sonqonpi munarqa Jehová Diospa wasinta allinchayta.+ 5 Chayrayku payqa sacerdotesta, levitastawan tantaykuspa paykunata nerqa: “Judaj llajtasninman riychej, tukuynin Israelmanta qolqeta tantamuychej Diosniykichejpa wasinta sapa wata allinchanapaj.+ Usqhayta tantamuychej”, nispa. Levitastaj mana chay ratochu kasukorqanku.+ 6 Chayrayku reyqa kuraj sacerdote Jehoiadata wajyachispa nerqa:+ “¿Imajtintaj manaraj levitaswan tantachimunkichu Judamanta, Jerusalenmantawan Diospaj tʼaqasqa impuestotari? Jehová Diospa kamachin Moisés chay impuestota qonankuta kamacherqa.+ Diospaj tʼaqasqa impuestotaqa israelitas qonanku tiyan trato ruwasqa arca kashan chay toldopaj.*+ 7 Chay millay warmi Ataliaj+ wawasnenqa a la fuerzalla cheqa Diospa* wasinman yaykuykunku.+ Jehová Diospa wasinmantataj paypaj tʼaqasqa imasta oqharinku Baal santosta yupaychanankupaj”, nispa. 8 Chantá rey kamachisqanman jina uj cajata+ ruwarqanku, chaytataj Jehová Diospa wasi punkun jawaman churarqanku.+ 9 Chantá tukuynin Judapi, Jerusalenpipis willarqanku Jehová Diospaj tʼaqasqa impuestota apamunankuta,+ mayqentachus cheqa Diospa kamachin Moisés chʼin pampapi israelitasman kamacherqa chayta. 10 Tukuy runaspis tukuy kuraj kamachejkunapis kusikorqanku,+ paykunaqa chay impuestota apamuspa chay cajaman churaj kanku juntʼachinankukama.*

11 Levitasqa chay cajapi ashkha qolqeña kasqanta rikuspa, chay cajata reypaman apamoj kanku. Reypa secretarionwan kuraj sacerdotej yanapajninwantaj jamuspa chay cajata chʼusajchaj kanku,+ chantá lugarninman churallajtaj kanku. Chaytaqa sapa día ruwaj kanku, ajinamanta ashkha qolqeta tantarqanku. 12 Reywan Jehoiadawantaj chay qolqeta jaywaj kanku Jehová Diospa wasinpi trabajosmanta encargadosman. Chay encargadostaj contrataj kanku rumita kʼutojkunata, tukuy imata ruwayta yachaj trabajadorestawan, Jehová Diospa wasinta allinchanankupaj.+ Contratallajtaj kanku fierrowan cobrewan trabajajkunata Jehová Diospa wasinta arreglanankupaj. 13 Trabajosmanta encargadostaj ruwachiyta qallarerqanku, ajinamanta Diospa wasenqa arreglakusharqa paykunaj mandonkupi. Cheqa Diospa wasintaqa qallariypi ruwakorqa ajinaman tukucherqanku, aswan sumajtataj ruwarqanku. 14 Chay wasita arreglayta tukuchaytawantaj reyman, Jehoiadamanwan puchoj qolqeta apamorqanku. Chay qolqewantaj Jehová Diospa wasinpaj wakin imasta ruwacherqanku: Diosta yupaychanapaj imasta, ofrendasta jaywanapaj imastawan. Chantá ruwachillarqankutaj qorimanta, qolqemanta copasta, waj imastawan.+ Jehoiadá kausashajtenqa Jehová Diospa wasinpi mana faltayta uywasta qʼolachej kanku.*+

15 Jehoiadaqa unayta kausakuytawan sonqo juntʼasqa wañuporqa. Payqa 130 watasniyoj wañuporqa. 16 Jehoiadaqa Israelpi allin imasta ruwarqa cheqa Diospaj,+ jinallataj Diospa wasinpajpis. Chayrayku Davidpa Llajtanpi pʼamparqanku reyespa ladonkuman.+

17 Jehoiadá wañupusqantawan Judamanta kuraj kamachejkunaqa jamuspa reypa ñaupaqenman kʼumuykukorqanku, reytaj paykunata uyarerqa. 18 Paykunaqa ñaupa tatasninkoj Diosninku Jehovaj wasinmanta qonqakaporqanku, yupaychana kʼullu postesta,* santostawan sirvej churakorqanku. Chay juchankurayku Diosqa phiñakorqa Judapaj, Jerusalenpajpis. 19 Jehová Diosqa paykunaman profetasta kachallarqapuni payman kutirinankupaj. Profetasqa paykunata kʼamej kanku, paykunataj mana uyarejchu kanku.+

20 Diospa espirituntaj sacerdote Jehoiadaj+ wawan Zacariasman jamorqa. Chayrayku Zacariasqa runasmanta aswan patapi sayaykuspa paykunata nerqa: “Cheqa Diosqa kayta nisunkichej: ‘¿Imajtintaj Jehová Diospa kamachiykunasninta mana kasukunkichejchuri? Chaywanqa ni imata tarinkichejchu. Qankunaqa Jehová Diosta saqerparinkichej, chayrayku paypis saqerparisonqachej’,+ nispa”. 21 Runastaj Zacariaspa contranta oqharikorqanku,+ rey kamachisqanman jinataj rumiswan chʼanqaspa wañucherqanku Jehová Diospa wasi pationpi.+ 22 Rey Jehoasqa mana yuyarikorqachu Zacariaspa tatan Jehoiadaqa payta munakusqanta, astawanpis wawan Zacariasta wañucherqa. Zacariasqa wañupushaspa nerqa: “Jehová Dios castigasuchun kay ruwasqaykimanta”,+ nispa.

23 Wata qallariytataj siriospa soldadosninkoqa Jehoaswan maqanakunankupaj jamorqanku. Judaman Jerusalenmanpis yaykuykamorqanku,+ runaspa kuraj kamachejkunasninkutataj+ qʼalata wañuracherqanku, tukuy ima saqueasqankutataj Damascoj reyninman apacherqanku. 24 Yaykuykamorqanku chay sirio soldadosqa pisilla karqanku. Jinapis Jehová Diosqa paykunaj makinkuman jaywaykorqa may chhika soldadosta,+ chay nación ñaupa tatasninkoj Diosnin Jehovata saqerparisqanrayku. Ajinata sirio soldadosqa Diospa castigonta Jehoasman chayacherqanku. 25 Chay soldadosqa ripushaspa Jehoasta wañuy patallapiña saqerparqanku. Chantá kamachisnillantaj paypa contranta oqharikorqanku sacerdote Jehoiadaj+ wawasninta* wañuchisqanrayku. Jehoastaqa kikin camallanpitaj wañurpacherqanku.+ Chantá Davidpa Llajtanpi pʼamparqanku,+ jinapis mana reyespa sepulturasninkupichu.+

26 Kaykuna Jehoaspa contranta oqharikorqanku:+ ammonita Simeatpa wawan Zabad, moabita Simritpa wawan Jehozabad ima. 27 Jehoaspa wawasninmanta, Jehoasta profetas kʼamisqankumanta,+ cheqa Diospa wasinta allinchasqankumantapis+ qhelqasqa kashan Reyesmanta Libropi. Wawan Amasiastaj paypa cuentanmanta rey jina kamachiyta qallarerqa.