Lucas

24 Semanaj ñaupaj pʼunchaynin, chay warmisqa sutʼiyamuyta sepulturaman rerqanku, sumaj qʼapayniyoj qhorasta wakichisqankuta apaspa.+ 2 Sepulturaj punkunmanta rumitataj uj ladoman tanqasqataña tarerqanku.+ 3 Yaykuspataj Señor Jesuspa ayanta* mana tarerqankuchu.+ 4 Chayrayku chay warmisqa ni imanakuyta aterqankuchu, jinallapi iskay qharis ladonkupi rikhurerqanku, lliphipishaj ropasniyoj. 5 Chay warmisqa mancharikuspa pampallataña qhawasharqanku, chay qharistaj paykunata nerqanku: “¿Imaraykutaj kausashaj runata wañusqas chaupipi maskʼashankichejri?+ 6 Mana kaypichu kashan, kausarinpunña. Yuyarikuychej imatachus nisorqachej Galileallapiraj kashaspa. 7 Payqa* nisorqachej juchasapa runasman jaywaykunankuta, rakhu kʼaspipi* wañuchinankuta, kinsa pʼunchayninmantaj kausarinpunanta”,+ nispa. 8 Paykunataj Jesuspa nisqanta yuyarikorqanku.+ 9 Sepulturamanta kutimuspataj, chay tukuy imasta willarqanku 11 apostolesninman, waj discipulosninmanpis.+ 10 Chay imasta apostolesman willajkunaqa karqanku: María Magdalena, Juana, Santiagoj maman María, jinallataj paykunawan kasharqanku chay warmispis. 11 Paykunataj mana creerqankuchu chay warmispa nisqankuta, cuentolla kasqanta yuyaspa.

12 Pedrotaj sayarispa sepulturaman kachaykukorqa, kʼumuykuspataj lino telasllataña rikorqa. Chayta rikuspataj mayta tʼukuspa riporqa.

13 Chay pʼunchayllataj iskay discipulosnin Emaús nisqa ranchoman risharqanku, chayqa Jerusalenmanta 11 kilometrospi jina* kashan. 14 Parlasharqankutaj chay tukuy imas pasasqanmanta.

15 Parlan parlan rishajtinkutaj, kikin Jesús qayllaykuspa paykunawan khuska rerqa. 16 Paykunataj Jesusta rikuspapis mana rejserqankuchu.+ 17 Jesustaj taporqa: “¿Imamantapunitaj purej jina chay jinata parlaykushankichejri?”, nispa. Paykunataj phutisqa uyalla sayarparqanku. 18 Paykunamanta ujnenqa Cleopas sutikorqa, paytaj kuticherqa: “Kaypi tiyakuspapis, ¿nichu yachanki imachus Jerusalenpi kunallanraj kasqanta? ¿Forasterochu kanki?”, nispa. 19 Jesustaj taporqa: “¿Imataj karqari?”, nispa. Paykunataj kuticherqanku: “¿Nichu yachanki Nazareno Jesusta+ imatachus ruwasqankuta? Payqa Diospa ñaupaqenpi, tukuy runaspa ñaupaqenpipis may atiyniyoj profeta+ karqa ruwasqanpi, parlasqanpipis. 20 Kuraj sacerdotesniykuwan kamachejkunasniykuwan Jesusta jaywaykorqanku wañuchinankupaj,+ rakhu kʼaspimantaj clavaykorqanku. 21 Noqaykoqa suyasharqayku paypuni Israel nacionta librananta.+ Mana chayllachu, kunankamaqa kinsa pʼunchayña kashan chay imas kasqanmanta. 22 Chantapis noqayku ukhumanta wakin warmis tʼukuchillawaykutaj. Paykunaqa tutamanta sepulturaman risqanku,+ 23 manataj ayanta* tarisqankuchu, kutimuspataj niwarqayku angelesta rikusqankuta, chay angelesqa paykunaman nisqanku Jesús kausashasqanta. 24 Noqaykumanta wakinpis, sepulturaman rispa chʼusajllatataj tarisqanku,+ chay warmis nisqankuman jina, Jesustataj mana rikusqankuchu”, nispa.

25 Jesustaj paykunata nerqa: “¡Ay mana yuyayniyojkuna! Profetaspa tukuy nisqankuta ñakʼayllata creenkichej. 26 ¿Manachu Cristoqa ajinatapuni ñakʼarinan karqa+ jatunchasqa kananpaj?”,+ nispa. 27 Ajinapi Jesusqa paykunaman sutʼincharqa Diosmanta Qhelqasqapi imachus paymanta qhelqasqa kasqanta, Moisespa qhelqasqanmanta qallarispa, jinallataj tukuy Profetaspa qhelqasqankumantawan.+

28 Risharqanku chay ranchoman qayllaykushajtinkutaj, Jesusqa aswan karuman rej tukorqa. 29 Paykunatajrí Jesusta jarkʼarqanku: “Chʼisiyaykushanña, noqaykullawanña qheparikuy”, nispa. Jesustaj yaykuspa paykunawan qhepakorqa. 30 Paykunawan mikhushaspataj, tʼantata oqharispa Diosman graciasta qorqa, partispataj paykunaman jaywarqa.+ 31 Ajinapi paykunaqa pichus kasqanta reparaspa rejsirparerqanku, Jesustajrí ñaupaqenkumanta chinkarerqa.+ 32 Paykunataj ninakorqanku: “¿Manachu sonqonchejqa kʼajarerqa ñanta jamoj jina parlashawajtinchej, Diosmanta Qhelqasqatataj allinta sutʼinchashawajtinchej?”, nispa. 33 Chay ratopacha sayarispa Jerusalenman kutirerqanku, chaypitaj tariparqanku 11 apostolesta, waj discipulostawan tantasqata. 34 Paykunaqa nishasqanku: “¡Señorqa kausarinpusqapuni, Simonmanpis rikhurisqa!”,+ nispa. 35 Chantá chay iskay discipulosqa, paykunaman willarqanku ñanpi Jesuswan tinkukusqankuta, tʼantata partishajtintaj rejsikapusqankuta.+

36 Chay imasta parlashajtinkutaj, Jesusqa chaupinkupi rikhurispa nerqa: “Sonqo tiyaykuy qankunapaj kachun”,+ nispa. 37 Paykunatajrí uj angelta* rikushasqankuta yuyaspa ni imanakuyta aterqankuchu, maytataj mancharikorqanku. 38 Chayrayku paykunata nerqa: “¿Imaraykutaj mancharikushankichejri? ¿Imaraykutaj sonqoykichejpi iskayrayashankichejri? 39 Qhawariychej makisniyta, chakisniytawan. Noqa kani. Llankhariwaychej, qhawaychejtaj. Uj angelqa mana aychayojchu, nitaj tullusniyojchu, noqata rikushawankichej jinaqa”, nispa. 40 Chayta nispataj makisninta, chakisnintawan paykunaman rikucherqa. 41 Kusiymanta tʼukuspa niraj creeshajtinku, Jesusqa paykunata taporqa: “¿Imallapis mikhunapaj kapusunkichejchu?”, nispa. 42 Paykunataj uj chhikan pescado kankata jaywarqanku. 43 Jesustaj japʼikuytawan rikushajtinku mikhorqa.

44 Chaymantataj nerqa: “Qankunawan kashaspallaraj kay imastaqa nerqaykichejña:+ Moisespa Leyninpi, Profetaspa qhelqasqankupi, jinallataj Salmospipis imachus noqamanta qhelqakusqanqa juntʼakunanpuni kasqanta”,+ nispa. 45 Chantá paykunata yanaparqa Diosmanta Qhelqasqata allinta entiendenankupaj.+ 46 Pay nerqa: “Diosmanta Qhelqasqapi nin Cristoqa ñakʼarinanta, kinsa pʼunchayninmantaj wañusqas ukhumanta kausarinpunanta.+ 47 Chantá tukuy nacionespi+ Jerusalenmantapacha qallarispa,+ paypa sutinpi willakunanta runas arrepientekunankupaj, ajinamanta juchasninku perdonasqa kananpaj.+ 48 Qankunataj testigos kankichej chay tukuy imasmanta.+ 49 Kachamusqaykichej imatachus Tatay nerqa chayta. Qankunatajrí Jerusalén llajtallapi qhepakuychej, patamanta atiyta japʼinaykichejkama”,+ nispa.

50 Chaymanta Jesusqa paykunata pusarqa llajtamanta jawaman Betaniakama. Chaypitaj makisninta oqharispa paykunata bendicerqa. 51 Bendecishajtintaj karunchakorqa, Diostaj cieloman oqharikaporqa.+ 52 Paykunataj kʼumuykukuspa Jesusta jatuncharqanku, chantá may kusisqa Jerusalenman kutiporqanku.+ 53 Paykunaqa sapa día templopi Diosta yupaychaspa kasharqanku.+