Números

11 Uj pacha israelitasqa Jehová Diospa ñaupaqenpi manchayta quejakuyta qallarerqanku. Jehová Diostaj chayta uyarispa sinchʼita phiñakorqa, paykunaj patankumantaj Jehová Diosqa ninata apachimorqa. Chay ninataj paykunamanta wakinta ruphaykorqa campamentomanta* jawapi. 2 Chantá runas Moisesman qhaparikojtinku, Moisesqa Jehová Diosmanta mañakorqa,+ ninataj wañuporqa. 3 Chayrayku chay lugartaqa suticharqanku Taberá* nispa, chaypi Jehová Dios ninata paykunaman apachimusqanrayku.+

4 Israelitas ukhupeqa waj llajtayoj ashkha runas*+ karqanku. Paykunataj waj mikhunasmanta wañurisharqanku,+ israelitaspis watejmanta waqayta qallarerqanku, nerqankutaj: “¿Pitaj kunan aychata mikhuchiwasqaykuri?+ 5 Egiptopeqa qhasilla pescadosta mikhoj kayku. Mikhullajtaj kayku pepinosta, sandiasta, puerrosta, cebollasta, ajosta ima.+ 6 Kaypitajrí qʼalata llauchhuyapushayku. Ni imapis kaypeqa kanchu, maná nisqa mikhunalla tiyan”,+ nispa.

7 Maná+ nisqa mikhunaqa culantro* mujitus jina+ karqa, colornintaj karqa sachʼa waqay jina. 8 Sabornenqa karqa aceiteyoj miskʼi tʼantapis kanman jina. Runasqa llojsispa pampasmanta pallakamoj kanku. Chantá maki molinospi jakʼoj kanku chayri maranpi kutaj kanku. Jinaspataj mankaspi chayachej kanku chayri muyu tʼantasta ruwakoj kanku.+ 9 Campamento pataman chʼisisnin chhulla urmamojtin, maná nisqa mikhunapis urmamullajtaj.+

10 Moisesqa uyarerqa tukuy runas waqashasqankuta. Sapa familia, sapa runapis toldo wasin* punkupi waqasharqa. Jehová Diostaj chaymanta sinchʼita phiñakorqa,+ Moisesmanpis manallataj allinchu rijchʼarqa. 11 Chantá Moisesqa Jehová Diosman nerqa: “¿Imaraykutaj kay kamachiykita kay jinata llakichinkiri? ¿Imatataj ruwarqani mana allinpaj qhawanawaykipajri? ¿Imajtintaj kay tukuynin runasta qhawanaypaj churawankiri, mana atinaypaj jina kashajtinri?+ 12 ¿Noqachu kay tukuy runaspa mamanku kani imatajri? ¿Noqachu paykunata nacechikorqani, ‘makiykipi ichurikuy* imaynatachus uj kamachi* ñuñoj wawata ichurikun ajinata’ nispa ninawaykipaj, may jallpʼatachus ñaupa tatasninkuman qonaykita jurarqanki chayman pusanaypaj?+ 13 ¿Maymantataj aychata apamusaj kay chhika runasta mikhuchinaypajri? Paykunaqa noqallata waqaspa nishawanku: ‘Aychata qowayku mikhunaykupaj’, nispa. 14 Mana sapallayqa kay runasta qhawayta atinichu, anchapuni noqapajqa.+ 15 Sichus ajinallatapuni ruwawanki chayqa, ama jina kaspa wañuchikapullawayña ari.+ Sichus allin ñawiwan qhawawanki chayqa, amaña ima llakiytapis rikuchiwaychu”, nispa.

16 Jehová Diostaj Moisesman kuticherqa: “Israelpi kurajkunamanta 70 qharista tantapuway, pikunatachus qan churawaj israelitaspa kurajkunasninku, kamachejkunasninkutaj kanankupaj chaykunata.*+ Paykunatataj pusay tinkukuna toldoman, chaypitaj suyawaychej. 17 Noqataj chayman uraykamuspa+ qanwan parlasaj.+ Chantaqa qanpi kaj espíritu santoymanta+ paykunamanpis qollasajtaj. Paykunataj kay runasta qhawayta yanapasonqanku, mana atikunanpaj jina kashajtinpis. Ajinamanta manaña sapallaykichu chayta ruwanki.+ 18 Qantaj tukuy runasman ninki: ‘Qʼayapaj llimphuchakuychej.+ Qʼayaqa aychata mikhunkichej, imaraykuchus Jehová Diosqa waqasqaykichejta uyarin,+ kay nisqaykichejtapis: “¿Pitaj aychata qowasunchej mikhunanchejpajri? Egiptopeqa aswan allinta kausakusharqanchej”,+ nispa. Jehová Diosqa aychata qosonqachej mikhunaykichejpaj.+ 19 Aychataqa mikhunkichej mana uj diallatachu, nitaj iskay diallatachu, nitaj phishqa diasllatachu, nitaj chunka diasllatachu, nitaj 20 diasllatachu. 20 Manachayqa uj killa juntʼata mikhunkichej, senqasniykichejmanta llojsiramunankama, millachikunaykichejkamataj.+ Qankunaqa Jehová Diosta qhesachankichej, qankuna ukhupi kashajtin. Chantapis paypa ñaupaqenpi waqashankichej, nishankichejtaj: “¿Imapajtaj Egiptomanta llojsimorqanchejri?”,+ nispa’”.

21 Moisestajrí Diosman nerqa: “Noqawan rejkunaqa 600.000 qharis*+ kanku. Chaywanpis qan nishanki: ‘Uj killa juntʼata mikhunankupaj paykunaman aychata qosaj’, nispa. 22 Tropa ovejasta, tropa wakasta ñakʼajtiypis,* ¿chaywan sajsakunkumanchu? Mar qochamanta tukuynin pescadosta japʼejtiypis, ¿chaywan sajsakunkumanchu?”, nispa.

23 Jehová Diostaj Moisesman nerqa: “¿Manachu Jehová Diosqa chayta ruwayta atinman?+ Kunanmá rikunki parlasqayta juntʼasajchus manachus chayta”, nispa.

24 Moisestaj llojsiytawan runasman willamorqa imatachus Jehová Dios payman nisqanta. Chantá israelitas ukhumanta 70 kurajkunata tantachispa toldoj muyuyninman sayaracherqa.+ 25 Jehová Diostaj chayman uj phuyupi uraykamuspa+ Moiseswan parlarqa.+ Moisespi kasharqa chay espíritu santonmantataj+ 70 kurajkunamanpis qollarqataj, sapa ujninkuman. Chay espíritu paykunaman chayajtintaj, chay kutilla profetas jina* parlayta qallarerqanku.*+

26 Jinapis iskayqa campamentollapi qhepakorqanku. Paykunaqa karqanku Eldadwan Medadwan. Paykuna toldoman mana rejtinkupis chay espíritu santoqa paykunamanpis chayallarqataj, paykunaj sutisninku chay ujkunajtawan khuska qhelqasqa kasqanrayku. Jinapi paykunaqa profetas jina campamentopi parlayta qallarerqanku. 27 Uj joventaj Moisesman willaj correrqa: “Eldadwan Medadwanqa profetas jina campamentopi parlashanku”, nispa. 28 Chantá Nunpa wawan Josueqa,+ pichus jovenmantapacha Moisespa yanapajnin karqa, Moisesman nerqa: “Wiraqochi Moisés, niy ari ama jinata ruwanankuta”,+ nispa. 29 Moisestajrí payman kuticherqa: “¿Noqamantachu llakikushanki? Ama llakikuychu. Noqaqa munayman Jehová Diospa tukuy israelita wawasnin profetas kanankuta, tukuyninkumantaj Jehová Diosqa espíritu santonta qonanta”, nispa. 30 Chay qhepatataj Moisesqa Israelmanta kurajkunawan khuska campamentoman kutiporqanku.

31 Chaypacha ujllata Jehová Diosqa wayrachimorqa, chay wayrataj ashkha yuthusta* mar qochamanta apamorqa. Chaykunataj israelitaspa campamentonkoj muyuyninman juntʼaykamorqanku,+ ujnin ladonmanqa uj día puriyman jina, ujnin ladonmanpis uj día puriyman jinallataj, tukuy campamentoj muyuyninman. Chay yuthusqa montonakorqanku uj metrota jina,* patan patanpi. 32 Jinapi runasqa chay yuthusta japʼillarqankupuni tukuy chay diantin, tutantin, qʼayantinpis. Aswan pisita japʼej runaqa chunka wirkhisman juntʼachinapaj jina* japʼerqa. Jinamanta runasqa chay japʼisqanku yuthu aychasta campamentoj muyuyninman chʼakirachikorqanku. 33 Chay aycha simillankupiraj kashajtin, niraj khamuyta tukushajtinku, Jehová Diosqa paykunapaj sinchʼita phiñakorqa. Chayraykutaj Jehová Diosqa may chhika runasta wañucherqa.+

34 Chayrayku chay cheqata suticharqanku Quibrot-Hataavá*+ nispa, imaraykuchus chaypi pʼamparqanku mikhunallapi yuyajkunata.+ 35 Chantá israelitasqa chay Quibrot-Hataavamanta Hazerotman rerqanku, Hazerotpitaj qhepakorqanku.+