¿Imaraykú trabajana tiyan?

¿IMATA ruwaspataj aswan kusisqa kanki? ¿Pujllaspachu chayri trabajaspachu?... Pujllayqa mana juchachu. Bibliapi Jerusalenmanta nikorqa: “Juchʼuy qhari wawas chantá juchʼuy warmi wawaspis plazasnin juntʼata pujllarikonqanku”, nispa (Zacarías 8:5).

Jesusqa wawasta pujllajta rikuspa kusikoj. Cielopi kashaspataj nerqa: ‘Dioswan khuska karqani, yanapaj maestro jina. Tukuy rato paypa ñaupaqenpi kusikorqani’, nispa. Jesús chayta nisqanqa, Jehovawan khuska cielopi trabajasqanta rikuchin. Chantá nillarqataj: “Runasraykutaj sonqoy tʼikarerqa”, nispa. Yachakorqanchej jina, Jesusqa tukuy runasta munakoj, wawastapis (Proverbios 8:30, NM; 8:31).

Jesús wawa kashaspa, ¿pujllajchu?... Pujllarqachá. Jinapis cielopeqa “yanapaj maestro” karqa. ¿Manachu Jallpʼapipis trabajallanmantaj karqa?... Jesustaqa ‘carpinteroj wawan’ nej kanku. Chantapis “carpintero” nillajtaj kanku. ¿Imatá chay rikuchiwanchej?... Joseqa Jesusta wawanta jina uywakusqanrayku, carpintero kayta yachachisqanta. Chayrayku Jesús carpintero karqa (Mateo 13:55; Marcos 6:3).

¿Sumaj carpinterochu karqa?... Payqa cielopi “yanapaj maestro” kasqanrayku, imatapis sumajta ruwaj. Jallpʼapipis sumaj carpinterochá karqa, ¿icharí?... Jesuspa tiempopi, carpintero kayqa trabajo kaj. Ichapis Jesusqa maderata wasinman apananpaj, sachʼata kʼutumoj, chʼejtamojtaj. Chantarajchá mesasta, tiyanasta, waj imastawan ruwaj.

¿Tukuy sonqochu Jesús trabajaj?... Qanrí, runaspaj mesasta, sillasta, waj imastawan ruwaspa, ¿kusikuwajchu?... Bibliaqa uj runa “trabajasqampi kusikunan”, may sumaj kasqanta nin. Chay kusiytaqa mana pujllaspa tarisunmanchu (Eclesiastés 3:22).

Trabajayqa yuyayninchejpaj, cuerponchejpajpis may sumaj. Ashkha wawasqa telellata qhawanku, chayri videojuegosllapi sayanku. Chayraykutaj gordoyanku, kallpankutaj pisiyan. Chay wawasqa mana kusisqachu kanku, nitaj wajkunatapis kusichinkuchu. ¿Imatá ruwana tiyan kusisqa kanapaj?...

Kay libroj 17 yachaqananpi, qorikuyta yachaspa chayri wajkunata yanaparispa, kusikusqanchejta yachakorqanchej (Hechos 20:35). Bibliaqa Jehová “kusikuyniyoj Dios” kasqanta nin (1 Timoteo 1:11, NM). Proverbios libropi leerqanchej jinataj, Jesusqa “tukuy rato paypa ñawpaqempi” kusikorqa. ¿Imaraykú?... Pay nerqa: “Tatayqa kunankama trabajashan; noqapis trabajashallanitaj”, nispa (Juan 5:17).

Jesusqa Jallpʼapi kashaspa, uj tiempollata carpinteromanta trabajarqa. Imajtinchus Jehová Diosqa, aswan sumaj trabajota qorqa. ¿Yachankichu imachus kasqanta?... Jesús nerqa: ‘Diospa Gobiernonmanta evangeliota willamunay tiyan, imaraykuchus chaypaj kachamusqa kani’, nispa (Lucas 4:43). Wakin runasqa willayninta japʼikoj kanku, waj runasmanpis willarej kanku. Kay dibujopi qhawashanki chay warmeqa, chayta ruwarqa. Payqa Samariamanta karqa (Juan 4:7-15, 27-30).

Jesús chay trabajota ruwaspa, ¿kusikojchu?... Pay nerqa: “Mikhuyneyqa Kachamuwajniypa munayninta juntʼanay, ruwanantataj tukuychanay”, nispa (Juan 4:34). Gustasusqan mikhunata mikhurispa, ¿kusikunkichu?... Jesusqa Diospa kamachisqan trabajota ruwaspa mayta kusikoj.

Diosqa trabajaspa aswan kusisqa kananchejpaj ruwawarqanchej. Chantapis pay nisqanman jina, ‘llankʼasqanchejmanta kusiyta’ tarisqanchejqa, paypa regalon. Chayrayku wawamantapacha trabajayman yachakunki chayqa, aswan kusisqa kausakunki (Eclesiastés 5:19, Diospa Simin Qelqa).

Chayqa mana ninayanchu, kuraj runas jina trabajanayki kasqanta. Jinapis tukuyninchej imaynallamantapis trabajayta chayri yanapakuyta atisunman. Tatasniykeqa qolqeta ganakunankupaj, maytachá llankʼanku. Ajinamanta familiaykeqa mikhunayoj, wasiyojtaj. Wasita llimphuta, kʼuchunchasqata ima japʼinapajtaj, ashkha ruwanas tiyan.

¿Imastataj familiaykita yanapanaykipaj ruwawaj?... Ichá waykʼuysikuwaj, platosta mayllaysikuwaj, wasita pichawaj, puñunayki cuartota llimphuchawaj chayri pujllanasniykita waqaychawaj. Ichapis chaykunamanta wakinta ruwashankiña. Chayta ruwaspaqa familiaykita yanapashanki.

Imaynatachus chay ruwanas familiaykita yanapasqanpi tʼukuriy. Pujllayta tukuytawanqa, pujllanasniykita waqaychanayki tiyan. ¿Imaraykutaj?... Wasi kʼuchunchasqa kananpaj, nitaj pipis imanakunanpaj. Pujllanasniyki mana kʼuchunchasqa kajtenqa, ichá mamayki hospitalman chayanman, wasiman ima oqharisqapis yaykushaspa pujllanasniykipi urmasqanrayku. ¿Manacharí chay allinchu kanman?... Rikunchej jina, pujllanasniykita waqaychaspaqa familiaykita yanapanki.

Wawasqa escuelapi kaspa, tareasninkutapis ruwanallankutaj tiyan. Escuelaman rispaqa leeyta yachakunki. Wakin wawasqa kusiywan yachakunku. Wakintajrí mana atillankuchu. Ichá qanpis qallariypi mana atillankichu. Jinapis sumajta leeyta yachaspaqa kusikunki. Imaraykuchus ashkha imasta yachakuyta atinki. Diospa Palabrantapis, sapallayki leeyta atinki. Tareasniykita sumajta ruwayqa, ¿allinniykipaj icharí?...

Wakin runasqa qhellas kanku. Ichá chay jina runasta rejsinki. Chaywanpis Dios trabajanapaj ruwawasqanchejrayku, tukuy sonqo trabajakuyta yachakunanchej tiyan. ¿Imaynatá Jesús trabajonta qhawaj?... Paypajqa gustasqan mikhuna jina karqa. ¿Yachankichu imachus trabajon kasqanta?... Payqa Jehová Diosmanta, imaynatachus wiñay kausayta tarinamanta ima yachachej.

Imatapis kusiywan ruwanaykipajqa, tapurikuy: “¿Imaraykutaj kayta ruwanay tiyan?”, nispa. Chayta yachaspaqa, ruwayta atillanki. Ima ruwanallatapis tukuy sonqo, allintataj ruway. Ajinamanta, Jesús jina kusiywan trabajanki.