¿Ujtawanchu jatun parapi sajra runas chinkanqanku?

¿MAYKʼAJLLAPIS juicio pʼunchaymanta parlajta uyarerqankichu?... Kay tiempopeqa chaymanta mayta parlakun. Wakin runasqa yuyanku, runallataj bombasta tʼojachispa kay pachata chinkachinanta. ¿Dios saqenqachu kay kʼachitu Jallpʼanchejta runas chinkachinankuta?...

Yachakorqanchej jina, Biblia nin: “Kay pachaqa tukukapushan”, nispa (1 Juan 2:17). ¿Chay ninayanchu Jallpʼanchej chinkachisqa kananta?... Mana. Biblia sutʼinchasqanman jina, Diosqa Jallpʼata ruwarqa “kawsayniyojkuna chaypi tiyakunankupaj”, kusisqastaj kausakunankupaj (Isaías 45:18). Salmo 37:29 nin: “Cheqan runasqa kay pachata herenciankupaj japʼenqanku, chaypitaj wiñaypaj kawsanqanku”, nispa. Chayrayku Bibliaqa Jallpʼa ni jaykʼaj chinkachisqa kananta nin (Salmo 104:5; Eclesiastés 1:4).

Kay pachaj tukukuyninpeqa, mana Jallpʼachu chinkachisqa kanqa. Chantá, ¿imataj chinkachisqa kanqa?... Chayta yachanapaj, qhawarina imachus Noej tiemponpi kasqanta. Biblia sutʼinchan: “Chaypacha runasqa yakoj pʼampasqan chinkarqanku”, nispa (2 Pedro 3:6).

Noej tiemponpi runas jatun parawan chinkachisqa kashajtinku, ¿pillapis salvakorqachu?... Biblia nisqaman jina, Diosqa “cheqan kajta willaj Noeta waqaycharqa waj qanchis runastawan khuskata”. Chaywanpis “mana cheqan kajman jina kawsajkunata chinkacherqa jatun musphay parawan” (2 Pedro 2:5).

Rikunchej jina, ¿imataj chinkachisqa karqa? ¿Jallpʼachu chayri sajra runaschu?... Bibliaqa nin, “mana cheqan kajman jina” kausajkuna, chayri sajra runas chinkachisqa kasqankuta. Chantapis Noeqa, “cheqan kajta willaj” nisqa karqa. ¿Imatá willaj?... ‘Chaypacha runas’ chinkachisqa kanankuta willaj.

Uj kutipi, Jesusqa yachachisqasninman Jatun Paramanta willarqa. Sutʼincharqataj jatun para qayllata imatachus runas ruwasqankuta. Pay nerqa: “Manaraj jatun para chayamushajtin, runasqa mikhusharqanku, ujyasharqanku, casarakusharqanku, ususisninkutapis casarachisharqanku, arcaman Noé yaykunankama. Paykunaqa mana imatapis reparakorqankuchu [chayri mana kasukorqankuchu] jatun para jamunankama, tukuyninkutaj chinkachisqa karqanku”. Jesusqa kay pachaj tukukuynin qayllata, kikillantataj runas ruwanankuta nerqa (Mateo 24:37-39).

¿Imatá yachakusunman Noej tiempopi runasmanta? Kay libroj 10 yachaqananpi, imastachus chay runas ruwasqankuta yachakorqanchej. ¿Yuyarikunkichu?... Wakin runasqa kallpankuman atienekuspa sajrata ruwaj kanku. Jesús nerqa jinataj, may chhika runas Noej willasqanta mana kasukorqankuchu.

Uj pʼunchay, Jehovaqa sajra runasta jatun parawan chinkachinanta Noeman willarqa. Yakoqa Jallpʼata, jatuchaj orqostapis pʼampaykunan karqa. Chayrayku Jehovaqa, Noeta uj jatun arcata ruwananta kamacherqa. Chay arcaqa uj jatun chhoqo caja jina kanan karqa, 238 paginapi kaj dibujopi jina.

Diosqa, ajina jatun arcata ruwananta kamacherqa, imaraykuchus Noé, familian, ashkha animales ima salvakunanku karqa. Noewan familianwanqa jumpʼi suruyta trabajarqanku. Sachʼasta kʼutorqanku, chay maderawantaj arcata ruwayta qallarerqanku. Chay jatun arcataqa, ashkha wataspi tukucharqanku.

¿Yuyarikunkichu imatawanchus Noé chay wataspi ruwasqanta?... Runasman jatun para jamunanmanta willarqa. ¿Pillapis uyarerqachu? Familiallan uyarerqa. Chay waj runastajrí ruwanasninkupi kakusharqanku. Jesús nisqanman jina, ¿imastá ruwasharqanku?... Mikhusharqanku, ujyasharqanku, casarakusharqankutaj. Paykunaqa mana sajra runas kasqankutachu yuyarqanku. Chayrayku Noeta uyarinankupaj, mana tiempochakorqankuchu. Imachus paykunamanta kasqanta yachakuna.

Noewan familianwan arcaman yaykojtinku, Jehovaqa arcaj punkunta wisqʼaykorqa. Chay waj runastaj, manapuni creerqankuchu jatun para jamunanta. Jinallapi parayta qallarerqa, manataj tumpallatachu, manaqa sinchʼitapuni. Chay rato jatuchej mayus rikhurerqa, sinchʼitataj sonasharqanku. Jatun sachʼasta urmaracherqa, jatuchej rumistapis tʼuna rumista jina apakaporqa. ¿Imataj karqa arcaman mana yaykojkunamanta?... Jesús nerqa: ‘Jatun para jamorqa, tukuyninkutaj chinkachisqa karqanku’, nispa. Ni mayqenninku salvakorqankuchu. ¿Imaraykú?... Jesús nisqanman jina, paykunaqa ‘mana kasukorqankuchu’. Noej willasqanta mana japʼikorqankuchu (Mateo 24:39; Génesis 6:5-7).

Jesús nerqa chay tiempopi imachus kasqanqa, yachakunanchejpaj kasqanta. ¿Imatá yachakusunman?... Chay tiempomanta runasqa, mana sajra kasqankuraykullachu chinkachisqa karqanku. Manaqa Diosmanta, munayninmanta ima yachakunankupaj, mana tiempochakorqankuchu. Mana paykuna jina kanapaj, allinta qhawarikuna tiyan, ¿icharí?...

¿Watejmantachu Dios sajra runasta jatun parawan chinkachenqa?... Mana. Diosqa manaña ujtawan chayta ruwananta nerqa. Pay nerqa: “Kʼuychiyta [arco irista] churani phuyuspi, chaytaj kanqa señal”. “Manaña jaykʼajpis ni ima yaku jamuspa tukuy kawsajkunata chinkachenqachu”, nispa (Génesis 9:11-17).

Arí, Diosqa sajra runasta manaña ujtawan parawan chinkachenqachu. Chaywanpis yachakorqanchej jina, Bibliaqa kay pacha tukukunanta nin. Dios kay pachata tukuchishajtin, ¿pikunataj salvakonqanku?... Ruwanasnillankupi kasqankurayku, ¿Diosmanta mana yachakuyta munajkunachu? ¿Bibliamanta yachakunankupaj ni jaykʼaj tiempochakojkunachu? Qan, ¿imatá niwaj?...

Noqanchejqa Dios salvanawanchejta munanchej, ¿icharí?... Sumaj kanman familianchej Noej familian jina kanan, ajinamanta tukuy familianchejta Jehová salvananpaj, ¿icharí?... Chaywanpis salvakunapajqa, entiendena tiyan imaynatachus Dios kay pachata chinkachinanta, mosoj pachata apamunanta ima. Chaymanta parlarina.

Bibliaqa Daniel 2:44 versiculopi chayta sutʼinchan. Kay tiempomanta parlaspa nin: “Chay reykuna kamachishajtinku, janaj pachapi kaj Dios uj reinota [chayri uj gobiernota] sayarichenqa, chaytaj mana jaykʼajpis chinkachisqachu kanqa, manataj mayqen reinopis payta atipanqachu. Tukuynin waj reinosta tukuchenqa, chay atipaj reinotajrí wiñaypaj sayanqa”, nispa.

¿Chayta entiendenkichu?... Bibliaqa Diospa Gobiernon kay Jallpʼamanta tukuy gobiernosta tukuchinanta nin. ¿Imaraykutaj?... Jehovaj churasqan Reyta mana kasukusqankurayku. ¿Pitaj chay rey?... Jesucristo.

Jehová Dioslla ima laya gobiernochus allin kasqanta niyta atin. Paytaj Wawan Jesusta Rey kananpaj ajllarqa. Pisimantawantaj chay Reyqa, soldadosninwan khuska tukuy gobiernosta chinkachenqa. Apocalipsis 19:11-16 versiculosqa imaynatachus chayta ruwananta sutʼinchan. Chayta kay 243 paginapi qhawariy. Biblia nin jina, chay maqanakoyqa Armagedón sutikun. Jehovaqa chay maqanakuypi tukuy gobiernosta chinkachenqa.

Jinapis, ¿chay maqanakupi yanapakunanchejta niwanchejchu?... Mana. Biblia nin, Armagedonqa ‘Tukuy Atiyniyoj Diospa jatun maqanakuy pʼunchaynin’ kasqanta (Apocalipsis 16:14, 16). Arí, Armagedonqa Diospa jatun maqanakuynin. Paytaj Jesucristota churan, chay maqanakupi janaj pacha soldadosta kamachinanpaj. Chay maqanakuy, ¿qallarenqañachu?... Chayta qhepan yachaqanapi yachakusun.