Diospa llaqtanmanta qharquchikuqta imaynatá qhawana

Familianchikmanta mayqillanpis, chayri munasqa amigonchik mana juchanmanta pesachikusqanrayku Diospa llaqtanmanta qharquchikuptinqa, mayta sunqunchik nanawanchik. Chaywanpis, imayna sunquwanchus qharqusqa runata qhawanamanta Bibliap nisqanta kasukusqanchikqa, rikuchinqa machkhatachus Jehová Diosninchikta munakusqanchikta, maykamachus kasukuyta munasqanchikta ima.a Chayrayku qhawarina wakin kuti imatachus ruwanamanta.

¿Imaynatá Diospa llaqtanmanta qharquchikuqwan apanakunanchik tiyan? “Ama kawsa[kuychikchu] ni mayqen runawan: Hermano kani, nishaspa khuchichakojwan, michʼakojwan, chayri lanti yupaychajwan, runa masimpaj sajrata rimajwan, chayri machaykojwan, suwakojwan; chay jina runawanqa ama mikhullaychejpischu.” (1 Corintios 5:11.) Chantapis, Biblia nillawanchiktaq: “Pillapis qankunaman jamuspa, mana [Cristomanta] yachachiyta apamojtenqa, ama wasiykichejpi japʼikuychejchu, nitaq napaykuychej. Pillapis payta napaykojqa [griego simipi kjáiro] sajra ruwanasninwan chajrukun” (2 Juan 9-11, Qheshwa Biblia). Chantapis 15 noviembre 1981 watamanta La Atalaya revistaqa 19 paginanpi niwanchik: “Imaynalla niyqa, paywan astawan parlanapaq apawasunman, jinamanta amigonchikman tukunman. ¿Chayta ruwayta munasunmanchu Diospa llaqtanmanta qharquchikuqwan?” Kaykama rikunchikjina Diospa llaqtanmanta qharquchikuqwanqa, manaña ni imamanta parlananchikchu tiyan.

¿Biblia niwasqanchikmanjinapunichu, Diospa llaqtanmanta qharquchikuqta qhawana? Arí, qhawarina imaraykuchus. Qallarinapaqqa Diosninchikta, Bibliap nisqanta ima mana wasanchayta munasqanchikrayku. Mayta Jehovata munakusqanchikrayku payta kasukuytapuni munanchik, wakin kuti mana atinapaqjina kaptinpis. Chantapis yachanchik Jehová chiqan, munakuyniyuq, kamachiykunasnintaq allinninchikpaq ima kasqanta (Isaías 48:17; 1 Juan 5:3). Chantapis, juchanmanta mana pesachikuqqa mana allinchu Diospa llaqtanpi kananqa. Chayrayku mana paywan purinanchikchu tiyan, llimphu kawsayninchikta, Diosta yupaychayninchikta ima jarkʼananchikrayku, jinata ruwaspataq Diospa llaqtanta llimphupaq, jatunpaq ima qhawachisunchik (1 Corintios 5:6, 7). Astawanpis juchachakuqtaqa, Diospa llaqtanmanta qharquchikusqanqa pay kikinta yanapanqa. ¿Imaynamantá? Bibliap yuyaychawasqanchikmanjina, ancianos nisqankumanjinataq ruwasun chayqa, ichapis juchallikuqta yanapasunman, ancianos yuyaychasqankumanjina ruwananpaq. Chantapis ruwasqanchikwanqa sunqunta llampʼuyachisunman, chaytaq yanapanman yuyayninta tikrachinanpaq. Qutuchakuymanta munasqa amigosnin manaña parlapayasqankurayku, ichá “yuyayninman churakuspa”, juchanmanta pesachikunqa, Jehovaman kutirikunanpaqtaq tukuy imata ruwanqa (Lucas 15:17).

¿Familianchikmanta pillapis Diospa llaqtanmanta qharquchikuptinri? Jehovata yupaychayninchik pruebapi churasqa kanman, familianchikmanta kasqanrayku. Jina kaptin, ¿imaynatá payta qhawana kanman? Imaynatachus qharqusqa runata qhawanamanta mana tukuyninmantapunichu parlasunchik, chaywanpis iskay ruwaykunamanta sutʼinchasunchik.

Wakin kuti qharquchikuqqa familianwan tiyakun. Qharquchikusqanqa mana ninayanchu familianmanta tʼaqakunanta, chayrayku familianqa paywan parlayta atinraq. Chaywanpis, Jehovata mana wasanchayta munasqankurayku, juchallikuqwanqa Bibliamanta, Diosta yupaychaymanta ima manaña parlayta atinkumanñachu, manaña Diospa llaqtanpi kayta munasqanrayku. Ichapis familiankupi Bibliamanta yachakuchkaspa chaypi uyarinallanpaq kananta saqinkuman. Chaywanpis qharquchikuq wawallaraq chayqa, tatasnin Bibliamanta yachachillankumanpuni, imaraykuchus paykuna yachachinankupaq, kʼaminankupaq ima kamachisqas kachkanku (Proverbios 6:20-22; 29:17).b

¿Qharquchikuq mana familianwan tiyakuptinri? Jina kaptin chiqa cristianosqa, mana anchata paywan purinkuchu, familiapi ima chʼampaypis kaptillan parlanku. Manataq paywan puriytapuni maskʼankuchu. Jehovata, llaqtanta ima mana wasanchayta munasqankurayku Bibliap nisqanta kasukunku. Munankutaq qharquchikuqpa allinninta maskʼayta, chiqan kaqta ruwaspataq Diosman kutirikunanpaq yanapayta (Hebreos 12:11).c