Chʼaskasta qhawaj yatiris Jesusman rinku

Inti llojsimuynej ladopeqa, wakin runas chʼaskasta qhawaj yatiris karqanku. Paykunaqa estrellasta qhawaj kanku runaj suertenta yachanankupaj (Isaías 47:13). Llajtankupi kashaspataj uj estrellata rikusqanku. Chay estrellataj paykunata Jerusalén llajtakama pusasqa. Jerusalenqa llajtankumanta may karupi kasharqa.

Jerusalenman chayaytawan, chay yatirisqa runasta taporqanku: “¿Maypitaj kashan judiospa reynin nacekojri? Noqaykoqa inti llojsimuynejpi kashaspa, chʼaskanta rikumuyku, chayrayku ñaupaqenman kʼumuykukoj jamuyku”, nispa (Mateo 2:1, 2).

Jerusalenpeqa rey Herodes kamachisharqa. Paytaj chayta yachaspa, mayta phiñakorqa. Chay ratopachataj tukuynin kuraj sacerdotesta, judiospa religionninkuta ñaupajman apajkunatawan tantacherqa. Chantá paykunata taporqa, maypichus Cristo nacekunan kasqanta. Paykunatajrí Diosmanta Qhelqasqapi leesqankuman jina, nerqanku: “Belén llajtapi”, nispa (Mateo 2:5; Miqueas 5:2). Chaymanta rey Herodesqa, chʼaskasta qhawaj yatirista pakayllamanta wajyacherqa. Nerqataj: “Riychej, chay wawata allinta maskʼamuychej. Wawata tarispataj, kutimuspa willawankichej, noqapis rispa payman kʼumuykakamunaypaj”, nispa (Mateo 2:8). Jinapis payqa Jesusta wañuchiyta munaspa chayta nerqa.

Chay yatiris ripusqankutawan, qhatisharqanku chay estrellaqa ñaupaqenkuta riyta qallarerqa. Chaytaj tʼukunapaj karqa. Imaraykuchus estrellasqa, mana runasta pusaykachankuchu. Chayrayku pipunichá chay estrellata purichisharqa. Chantá chay purej estrellaqa, chay yatirista Belenkama pusarqa, uj wasi patapitaj sayaykorqa. Chay wasipeqa tiyakorqanku, Josewan Mariawan wawitanku Jesuspiwan.

Chaymanta yatirisqa wasi ukhuman yaykorqanku. Chaypitaj Jesusta rikorqanku, maman Mariatawan. Chantá Jesusman qonqorikuspa kʼumuykukorqanku. Paymantaj jaywarqanku: qorita, yuraj inciensota, mirratawan. Mirraqa sachʼaj waqaynin karqa, sumajtataj qʼapaj. Chay yatiris Herodespaman kutinankupajña kashajtinku, Diosqa mosqoypi kamacherqa ama kutinankuta. Chayrayku waj ñanta llajtankuman kutiporqanku.

¿Pitaj chay purej “chʼaskata” churarqa? Diospa enemigon Satanás. Imaraykuchus payqa Jesusta wañuchiyta munarqa. Chay chʼaskatajrí, yatirista Jerusalenmanraj pusarqa, maypichus rey Herodes kasharqa, chayman. Herodestaj Jesusta wañuchiyta munarqa. Manachus Diosninchej chay yatirista Jerusalenman ama kutinankuta ninman karqa chayqa, rey Herodesqa Jesusta wañuchinmanpuni karqa. Chantapis sichus Diosninchej chay “chʼaskata” churanman karqa chayqa, chay estrellaqa yatirista cheqanta Belenkama pusanman karqa, maypichus Jesús kasharqa, chayman.