Jesusqa apostolesninta astawan yuyaychan

Jesusqa yachachisqasninman nerqa wawas jina llampʼu sonqos kanankuta. Paykunaqa mana yuyanankuchu karqa mayqenninkuchus aswan kuraj kasqankupi, Jesús jinataj ruwananku karqa (Mateo 18:5).

Apostolesqa mayqenninkuchus aswan kuraj kasqankumanta sapa kuti siminakusharqanku. Jesús paykunaman llampʼu sonqo kayta yachachisqanmantataj maytaraj yachakunanku karqa. Apóstol Juanqa Jesusman nerqa: “Yachachejníy, uj runata sutiykipi supaykunata qharqoshajta rikorqayku, mana noqanchejwan kasqanraykutaj jarkʼayta munarqayku”, nispa (Lucas 9:49).

Juanqa ichapis yuyarqa paykunalla supaykunata qharqoyta atisqankuta. Chayrayku chay judío runa supaykunata qharqosqanta mana allinpajchu qhawarqa. Imaraykuchus chay judío runaqa mana Jesuswan khuskachu, nitaj paykunawan khuskachu purej.

Jesús nerqa: “Ama jarkʼaychejchu. Mana pipis noqapaj sajrata parlanmanchu uj milagrota sutiypi ruwaytawanqa. Pichus mana contranchejpi kajqa, noqanchejwan kashan. Pichus uj vaso yakullatapis Cristojta kasqaykichejrayku jaywarisojtiykichejqa, cheqatapuni niykichej, tʼinkantaqa japʼenqapuni”, nispa (Marcos 9:39-41). Apóstol Juanqa chayta uyarispa maytachá tʼukorqa.

Chay runaqa Jesuspi creesqanta rikuchinanpaj mana Jesuswanpunichu purinan karqa. Chantapis chaypachaqa manaraj congregación karqachu. Chayrayku chay judioqa sapallan kasharqa. Jinapis payqa mana Jesusman churanakorqachu, nitaj llullatachu yachacherqa. Chayrayku Jesusqa chay runa tʼinkanta japʼinanta nerqa.

Apostolestajrí chay runata pantachispa jatun juchata ruwankuman karqa. Jesús nerqa: “Noqapi creejkunaqa wawas jina kanku. Sichus pipis ujninta juchaman urmachinman chayqa, aswan allin kanman chay runapajqa burro muyuchin chay molino rumita kunkanman warkhuykuspa, qochaman wijchʼuykunanku”, nispa (Marcos 9:42). Chayrayku Jesusqa nerqa, makinku chayri chakinku wajkunata pantachejtin khuchurpakunankuta. Ñawinku pantachejtinpis sikʼispa wijchʼunankuta. Jesusqa nillarqataj, aswan allin kasqanta chʼulla makilla chayri chʼulla chakilla Diospa Gobiernonman yaykunanku, ‘Hinón Wayqʼoman’ wijchʼusqa kanankumanta nisqaqa. Apostolesqa Jerusalén qayllapi kaj ‘Hinón Wayqʼopi’ qʼopata runas ruphachisqankuta yacharqanku. Chayrayku entienderqankuchá wiñaypaj chinkachisqa kanamanta Jesús parlashasqanta.

Jesús nillarqataj: “Ama mayqentapis kay juchʼuykunamanta pisipaj qhawaychejchu. Noqa niykichej, cielopi kaj angelesninkoqa, cielopi kashaj Tataypa ñaupaqellanpipuni kashanku”, nispa. Jehová Diosqa chay “juchʼuykunamanta” kajkunata may allinpaj qhawan. Jesustaj chayta rikucherqa, 100 ovejasniyoj runa ujnin ovejanta chinkachisqanmanta parlaspa. Chay runaqa, 99 ovejasninta saqespa chinkasqa ovejanta maskʼaj risqa. Tarikapuspataj chay ovejanmanta astawan kusikusqa. Chantá Jesús nerqa: “Ajinallatataj cielopi kashaj Tatayqa, mana munanchu ni ujpis kay juchʼuykunamanta chinkananta”, nispa (Mateo 18:10, 14).

Jesusqa yuyarikorqachá apóstoles pichus aswan kuraj kasqankumanta siminakusqankuta. Chayrayku nerqa: “Qankunapis kachinchasqa jina kaychej, ujkuna ujkunawantaj allinta kausakuychej”, nispa (Marcos 9:50). Jesusqa chaywan nisharqa, wajkunawan mana chʼajwanapaj kʼacha simiwanpuni parlana kasqanta. Kʼacha simiwan parlaytaj sumaj kachinchasqa mikhuna jina (Colosenses 4:6).

Chantá Jesusqa, uj hermano pantajtin imatachus ruwanamanta nerqa: “Sichus hermanoyki juchallikun chayqa, rispa pantasqanta sapallanpi sutʼinchamuy. Uyarisonqa chayqa, hermanoykita cheqan ñanman kutirichimunki. Mana uyarisojtenqa, ujta chayri iskayta pusakuy. Ajinamanta iskay chayri kinsa testigospa nisqankuwan tukuy ima sutʼinchakunanpaj”, nispa. Chay testigostapis mana uyarejtenqa, Jesús nerqa “congregacionman” chayta willanankuta, nisunman ancianosman. Paykunataj chay hermanota yanaparinkuman. Ancianostapis mana kasojtinrí, ¿imatataj ruwananku karqa? Jesús nerqa: “Payta qhaway mana creej runata jinallaña, impuesterota jinataj”, nispa (Mateo 18:15-17). Jesús chayta nerqa, judíos chay runaswan mana masichakusqankurayku.

Ancianosqa, uj hermanota Bibliaj nisqanman jinapuni juzgananku tiyan. Ichapis ancianosqa ninkuman, uj hermano juchayojpuni kasqanta, chayraykutaj kʼamisqa chayri qharqosqa kananta. Ajina kajtin ancianos imatachus ‘kay jallpʼapi watasqankoqa, cielopi watasqaña kanqa’. Chantapis ichá ancianos ninkuman pantaj hermano mana juchayojchu kasqanta. Ajina kajtintaj ancianos imatachus ‘kay jallpʼapi phaskarasqankoqa, cielopi phaskarasqaña kanqa’. Chayta kamachikusqantaj, congregación sayarichisqa kajtin mayta yanaparqa. Chantá Jesús nillarqataj: “Maypichá iskay chayri kinsa sutiypi tantasqa kashanku, chaypi noqaqa kashani paykunaj chaupinkupi”, nispa (Mateo 18:18-20). Chayta nispaqa, juchallikoj hermanosta juzgajkunata yanapananta nisharqa.