Wajyarikunamanta, Diosmanta mañakunamantawan

Betaniaqa Olivos orqo kinraypi kasharqa, Jerusalenmanta kinsa kilometrospi jinalla (Juan 11:18). Chay ranchopi tiyakorqanku Marta, hermanan María, hermanon Lázaro ima. Paykunaqa Jesuspa amigosnin karqanku. Jesustaj Martata, Mariatawan watukoj rerqa.

Paykunaqa may kusisqachá kasharqanku Mesías wasinkuman risqanmanta. Chayrayku Martaqa Jesuspaj aswan sumaj mikhunata waykʼupuyta qallarerqa. Waykʼushajtintaj Mariaqa Jesuspa ñaupaqenpi tiyaykukuspa yachachisqanta uyarisharqa. Chaymanta uj ratonmantaj, Martaqa Jesusta nerqa: “Señor, ¿manachu rikunki hermanay mana ruwaysiwasqanta? Niy ari yanapanawanta”, nispa (Lucas 10:40).

Jesustajrí mana imatapis Mariata nerqachu. Astawanpis mikhunata waykʼuspa musphashasqanrayku Martata yuyaycharerqa: “Marta, Marta, ancha phutisqa kashanki, musphashankitaj chay chhika ruwanaswan. Imaschus necesitakusqanqa pisilla kanku chayri ujlla. Mariatajrí allin kajta ajllakun, chaytaqa mana pipis qhechonqachu”, nispa (Lucas 10:41, 42). Ajinata nispa, Jesusqa Martata reparacherqa mana ashkha mikhunatapunichu waykʼunan kasqanta.

Martaqa Jesusta allinta atiendeyta munarqa. Jinapis waykʼunallapi musphasharqa, manataj Diospa Wawanmanta yachakusharqachu. Mariatajrí Jesuspa yachachisqanta uyarispa allinta ruwasharqa. Chay yachakusqanqa tukuy kausayninpi payta yanaparqa. Tukuypis María jina ruwananchej tiyan. Chaytaqa amapuni qonqanachu.

Chaymanta qhepaman, Jesusqa Diosmanta mañakunatañataj yachacherqa. Paytaqa ujnin yachachisqan nerqa: “Señor, yachachiwayku Diosmanta mañakuyta, imaynatachus Juanpis yachachisqasninman yachacherqa, ajinata”, nispa (Lucas 11:1). Jesusqa orqopi yachachishaspa Diosmanta mañakunata yachacherqaña. Chaymantapachataj wata partiyojña kasharqa (Mateo 6:9-13). Jinapis Jesusta taporqa chay yachachisqanqa, ichapis mana chaypichu kasharqa. Chayrayku Jesusqa ujtawan Diosmanta mañakunata yachacherqa. Diosmanta mañakunapuni kasqanta yachachinanpajtaj uj cuentitota cuentarerqa.

Jesús nerqa: “Pitaj qankunamanta chaupi tutata amigonpaman rispa nimunman: ‘Amigóy, kinsa tʼantata ayniriway. Ujnin amigoy karumanta chayamun, nitaj imaypis kanchu qorinaypaj’, nispa. Chay amigontaj wasi ukhumanta nimunman: ‘Ama umayta nanachiwaychu. Punkoqa llavesqaña, wawitasniypis noqawan khuska camapi puñushankuña, mana jatarimuymanchu qosunaypaj’, nispa. Kayta niykichej: Amigon kajtinpis payqa mana chaupi tutata sayarimonqachu imallatapis qonanpaj, astawanpis anchata mañakusqanraykulla imatachus mañakusqanta qonqa”, nispa (Lucas 11:5-8).

Jesusqa mana nisharqachu, Diosninchej mañakusqanchejta mana uyariyta munasqanta. Astawanpis kasukoj kamachisninpa tukuy sonqo mañakusqankuta Dios uyarinantapuni nisharqa. Imaynatachus tʼantata mañakoj runata, anchata mañakusqanrayku amigon uyarerqa, ajinata. Chantá Jesús nillarqataj: “Mañakullaychejpuni qosonqachejtaj, maskʼallaychejpuni tarinkichejtaj, punkutapis takallaychejpuni kicharisonqachejtaj. Mañakojqa japʼin, maskʼajpis tarin, punkuta takajtapis kicharenqanku”, nispa (Lucas 11:9, 10).

Chantá Jesusqa, Diosninchej mañakusqanchejta uyarisqanta aswan sutʼita entiendenankupaj nerqa: “¿Mayqen tatataj qankunamanta wawanman katarita qonman pescadota mañakushajtinri? Runtuta mañakojtinpis, ¿alacrantachu qonman? Sichus qankuna sajra runas kashaspa, allin imasta wawasniykichejman qoyta yachankichej chayqa, astawanrajchá cielopi kashaj Tataykichejqa atiyninta qonqa mañakojkunaman”, nispa (Lucas 11:11-13). Yachakunchej jina, Tatanchej Jehovaqa mañakusqanchejta uyariyta munan, imatachus necesitasqanchejtapis qoyta munawanchej.