“Noqa kani kausarimuy, kausaytaj”

Jesusqa Pereamanta riytawan, Betania chaynejman chayarqa. Betaniaqa Jerusalenmanta kinsa kilometrospi jinalla kasharqa, inti llojsimuy ladopitaj. Chay ranchomanqa ashkha judíos risqanku Martata, Mariatawan sonqochaj, hermanonku Lázaro wañupusqanrayku.

Chantá uj runa Martaman willarqa Jesús qayllapiña kashasqanta. Paytaj usqhayllata Jesusta taripamorqa. Payta taripaytawantaj nerqa: “Señor, kaypichus kawaj karqa chayqa, hermanoyqa mana wañupunmanchu karqa”, nispa. Martawan hermananwanqa, ajinatachá hermanonku wañupusqanmanta qhepan tawa diaspi yuyasharqanku. Jinapis Martaqa wañusqas kausarimunankupi creerqapuni. Imaraykuchus payllataj Jesusman nerqa: “Yachani imatapis Diosmanta mañakojtiyki, Diosqa qosunantapuni”, nispa (Juan 11:21, 22). Arí, Martaqa repararqa hermanonta Jesús kausarichimuyta atisqanta.

Chantá Jesús nerqa: “Hermanoykeqa kausarinponqa”, nispa. Martataj yuyarqa, qhepa pʼunchaypi kausarimuy kananmanta parlashasqanta. Martaqa wañusqas kausarimunankuta suyakusharqa, imaynatachus Abrahán, Diospa waj kamachisninpis suyakorqanku, ajinata. Chayraykutaj nerqa: “Noqa yachani kausarimunanta qhepa kaj pʼunchaypi, wañusqas kausarimonqanku chaypacharaj”, nispa (Juan 11:23, 24).

Jesusrí, ¿Lazarota kausarichiyta atinmanchu karqa? Diosqa payman atiyta qorqa wañuyta atipananpaj. Marta chayta yuyarikunanpajtaj, Jesús nerqa: “Noqa kani kausarimuy, kausaytaj. Pichus noqapi creejqa wañuspapis kausarimonqa. Pillapis kausashaspa noqapi creejqa mana wiñaypajchu wañonqa”, nispa (Juan 11:25, 26).

Jesusqa chayta nispa sutʼita nisharqa yachachisqasnin wañunanku kasqanta. Imaraykuchus paypis apostolesninman wañunanta nerqa (Mateo 16:21; 17:22, 23). Jinapis mana wiñaypajchu wañunanku karqa. Astawanpis Jesuspi creejkunaqa wiñay kausayta japʼinanku karqa. Ashkha runasqa, wañuymanta kausarimuytawan wiñay kausayta japʼenqanku. Kay mundoj tukukuynin tiempopi Diosta tukuy sonqo sirvejkunaqa, ichapis ni jaykʼaj wañonqankuchu. Arí, Jesuspi creejkunaqa mana wiñaypajchu wañonqanku.

¿Jesús atinmanchu karqa Lazarota ashkha días wañusqamanta kausarichimuyta? Jesús nerqa: “Noqa kani kausarimuy, kausaytaj”, nispa. Chantá Martata taporqa: “¿Chayta creenkichu?”, nispa. Martataj nerqa: “Arí Señor, noqa creeni Diospa Wawan Cristopuni kasqaykita, pichus kay mundoman jamunan karqa chay”, nispa. Martaqa yacharqa hermanonta Jesús yanapayta atisqanta. Chayrayku usqhayllata wasinman kutispa hermanan Mariata wajyamorqa, pakayllamantataj nerqa: “Yachachejninchej kaypi kashan, wajyashasunki”, nispa (Juan 11:25-28). Mariataj usqhayllata wasimanta llojserqa. Runastaj qhepanta rerqanku sepulturaman waqaj rishasqanta yuyaspa.

Jinapis Mariaqa Jesusman rerqa. Payta rikuytawantaj, hermanan Marta jinallataj ñaupaqenman qonqoriykukuspa nerqa: “Señor, kaypichus kawaj karqa chayqa, hermanoyqa mana wañupunmanchu karqa”, nispa. Jesusqa Mariata, paywan jamoj judiostapis waqajta rikuspa, sinchʼita llakikorqa, waqarikorqataj. Chayrayku runas nerqanku: “Chay jinatapuni Lazarotaqa munakusqa”, nispa. Wakintajrí nerqanku: “Kay runaqa ciegoj ñawisninta kicharerqa. ¿Manachu imatapis ruwanman karqa Lázaro mana wañupunanpaj?”, nispa (Juan 11:32, 37).