Jesusqa Lazarota kausarichin

Jesusqa Betania chaynejpi Martawan Mariawan tinkuytawan, Lazaroj sepulturanman rerqa. Chay sepulturaqa uj qaqa juskʼu karqa, rumiwan atiykusqataj. Jesusqa chayman chayaytawan nerqa: “Chay rumita tanqaychej”, nispa. Martataj imatachus Jesús ruwayta munasqanta mana yachaspa nerqa: “Señor, tawa pʼunchayña kashan wañupusqanqa, asnashanñachari”, nispa. Jesustaj nerqa: “¿Manachu nerqayki creenkichus chayqa Diospa jatun kayninta rikunaykita?”, nispa (Juan 11:39, 40).

Chantá rumita tanqarqanku. Jesustaj cielota qhawarispa Diosmanta mañakorqa: “Tatáy, graciasta qoyki uyariwasqaykimanta. Noqaqa yachani uyariwasqaykitapuni, kaytarí nini kay muyuyniypi kashanku chay runasrayku, qanpuni kachamuwasqaykita creenankupaj”, nispa. Jesusqa runaspa ñaupaqenpi mañakorqa, runas yachanankupaj Diospa atiyninwan tukuy imata ruwasqanta. Chantá jatunmanta qhaparerqa: “¡Lázaro! ¡Llojsimuy!”, nispa. Wañusqa kasharqa chay Lazarotaj llojsimorqa chakisnin, makisnin, uyanpis telawan maytʼusqa. Jesustaj nerqa: “Phaskaraychej purinanpaj”, nispa (Juan 11:41-44).

Mariatawan Martatawan sonqochaj rerqanku chay judiosmanta ashkhasqa, Jesuspa ruwasqanta rikuspa paypi creerqanku. Wakin judiostaj fariseosman rispa imatachus Jesús ruwasqanta willamorqanku. Chayrayku kuraj sacerdoteswan fariseoswanqa, Jatun Juntamanta kajkunata tantaykorqanku. Jatun Juntaqa judiospa jatun juzgadonku karqa. Chay Juntamanta ujnintaj, kuraj kaj sacerdote Caifás karqa. Chay Jatun Juntamanta wakenqa nerqanku: “¿Imatataj ruwasunri? Chay runaqa ashkha milagrosta ruwan. Qhawallasunpuni chayqa tukuy runas paypi creenqanku, romanostaj jamuspa qhechuwasun templonchejta, nacionninchejtapis”, nispa (Juan 11:47, 48). Paykunaqa yacharqanku Jesús “ashkha milagrosta” ruwasqanta. Jinapis mana kusikorqankuchu Diosninchej tʼukuna imasta Jesusnejta ruwashasqanmanta. Astawanpis llakisqa kasharqanku manaña jatunpaj qhawasqachu, nitaj autoridadchu kanankumanta.

Saduceosqa ni imanakuyta aterqankuchu Jesús Lazarota kausarichimusqanta yachaspa, imajtinchus paykunaqa kausarimuy mana kasqanta nej kanku. Kuraj kaj sacerdote Caifaspis, saduceos ukhumanta karqa, paytaj nerqa: “Qankunaqa mana imatapis yachankichejchu, nitaj reparankichejchu qankunaj allinniykichejpaj kasqanta, uj runalla tukuy runasrayku wañunanqa, nacionnintin tukuchisqa kananmantaqa”, nispa (Juan 11:49, 50; Hechos 5:17; 23:8).

Caifasqa mana payllamantachu chayta nerqa, astawanpis kuraj kaj sacerdote kasqanrayku Dios chayta parlacherqa. Caifasqa chayta nispa, Jesusta wañuchinankuta nisharqa. Ajinamanta judiospa religionninkuta ñaupajman apajkuna jatunpaj qhawasqallapuni, autoridadllapunitaj kanankupaj. Jinapis Caifás nerqa jina, Jesusqa mana judiosraykullachu wañunan karqa, “manachayqa Diospa chʼeqerasqa” wawasninrayku (Juan 11:51, 52).

Ajinamanta Caifasqa, Jatun Juntamanta kajkunata yuyaycharqa Jesusta wañuchinankupaj. Aswan ñaupajtaña yachakorqanchej jina, Jatun Junta ukhupeqa Nicodemo kasharqa, pichus Jesuspa yachachisqanta uyariyta munaj. ¿Pay willanmanchu karqa Jesusman, Jatun Juntamanta kajkuna wañuchiyta munasqankuta? Pay willajtinpis chayri manapis, Jesusqa Jerusalenmanta riporqa. Imajtinchus wañuchisqa kananpaj Diospa churasqan horaqa, manaraj chayamorqachu.