Divorciakuymanta, wawasta munakuymantawan

Jesusqa yachachisqasninwan khuska Galileamanta ripuytawan, Jordán mayuta chimparqa Pereaman. Chantá Pereanta sur ladoman rerqa. Jesusqa aswan ñaupajtaña, Pereapi kashaspa fariseosman sutʼincharqa imatachus Diosninchej divorciakuymanta yuyasqanta (Lucas 16:18). Jinapis fariseosqa Jesús Pereaman kutejtin, payta pantachiyta munaspa divorciakuymanta ujtawan tapullarqankutaj.

Moisespa qhelqasqanman jinaqa, uj qhari warminmanta divorciakuyta atej “paypi ima pʼenqaytapis” tarispa (Deuteronomio 24:1). Jinapis runasqa imaymanata nej kanku. Wakin runasqa yuyaj kanku imitallamantapis divorciakuyta atisqankuta. Chayrayku fariseosqa Jesusta taporqanku: “¿Uj runa atillanchu warminmanta divorciakuyta mana imallamanta?”, nispa (Mateo 19:3).

Jesusqa mana runaspa yuyasqankuman jinachu kuticherqa. Astawanpis payqa, Diosninchej qhariwarmi kausayta rikhurichisqanmanta nerqa: “¿Manachu leerqankichej, Diosqa runasta qallariypi qharitawan warmitawan ruwasqanta? Nerqataj: ‘Chayrayku qhareqa tatanta, mamantawan saqespa, warminman ujchaykukonqa, iskayninkutaj ujllaña kanqanku’, nispa. Ajinapeqa manaña iskaychu kanku, manachayqa ujllaña. Chayrayku Diospa ujchasqantaqa, ama pipis tʼaqachunchu”, nispa (Mateo 19:4-6). Diosqa Adanta Evatawan mana divorciakunankupajchu casaracherqa.

Fariseostajrí nerqanku: “Chantá, ¿imaraykutaj Moisés kamacherqa, divorcio papelta qospa warmita kachapunata?”, nispa (Mateo 19:7). Jesustaj nerqa: “Moisesqa, rumi sonqo kasqaykichejrayku saqesorqachej warmiykichejmanta divorciakunaykichejta. Chaywanpis mana qallariymantapachachu ajina karqa”, nispa (Mateo 19:8). Jesusqa ‘qallariymantapacha’ nispa, Dios qhariwarmi kausayta Edén huertapi qallarichisqanmanta parlasharqa, nitaj Moisespa tiemponmantachu.

Chantá Jesús nerqa: “Pillapis warminmanta divorciakuspa wajwan casarakun chayqa, qhenchachakun. Warmin khuchichakuy juchamana urmajtillan paymanta divorciakuyta atin”, nispa (Mateo 19:9). Arí, qhariwarmi kajkunaqa, paykunamanta ujninku khuchichakuy juchaman urmajtillan divorciakuyta atinku.

Jesuspa yachachisqasnenqa, chayta uyarispa nerqanku: “Casado kausay ajina kajtenqa, casarakoyqa mana allinchu”, nispa (Mateo 19:10). Chayrayku casarakuyta munajqa, mana qonqananchu tiyan, piwanchus casarakonqa chaywanqa wiñaypaj ujchasqa kananta.

Chantá Jesusqa soltero kausaymanta nerqa: “Wakin qharisqa nacekusqankumantapacha mana casarakunankupajchu kanku. Wakintataj runas capanku, wakintajrí paykunaj munayninkumanta mana casarakunkuchu cielopi kaj Gobiernorayku. Pichus mana casarakuspalla kakuyta atejqa, ajinalla kakuchun”, nispa (Mateo 19:12).

Chantá runasqa wawitasninkuta Jesusman apamorqanku. Jinapis yachachisqasnenqa, ichapis yuyarqanku wawas Jesusta rabiachinankuta. Chayrayku runasta kʼamerqanku. Jesustajrí chayta rikuspa phiñakorqa, nerqataj: “Saqeychej wawasta noqaman jamunankuta, amataj jarkʼaychejchu, imaraykuchus Diospa Gobiernonqa paykuna jina kajkunajta. Cheqatapuni niykichej: Pichus mana wawa jina Diospa Gobiernonta japʼikojqa, ni imarayku chayman yaykonqachu”, nispa (Marcos 10:14, 15; Lucas 18:15).

Chay yachachisqanqa may sumajpuni karqa. Diospa Gobiernonman yaykunapajqa kʼumuykukoj sonqo kana tiyan, wawitas jinataj astawan yachakuyta munana tiyan. Chantá Jesusqa wawitasta ichurikuspa munarikorqa, bendicerqataj. Jesusqa mana wawitasllatachu ajinata munakun. Manachayqa ‘Diospa Gobiernonta tukuy sonqo japʼikojkunatapis’ munakullantaj (Lucas 18:17).