LECCIÓN 13
Llulla religiones Diosta sajrapaj qhawachinku
Diosninchej munakuyniyoj chayqa, ¿imaraykutaj ashkha iglesias paypa sutinpi imaymana sajra imasta ruwanku? Imaraykuchus chay iglesiaspeqa mana cheqa kajtachu yachachinku. Chantapis yachachisqankuwan ruwasqankuwan ima, Diosta sajrapaj qhawachinku. ¿Imaynatá chayta ruwanku? ¿Imaynatá Dios chayta qhawan? Chanta, ¿imatá chay iglesiaswan ruwanqa?
1. ¿Imaynatá yachachisqankuwan Diosta sajrapaj qhawachinku?
Llulla religionesqa ‘Diosmanta cheqa kajta yachachinankumantaqa, llulleriosta yachachinku’ (Romanos 1:25). Casi tukuynin iglesiaspi mana Diospa sutinta yachachinkuchu. Bibliatajrí nin Diospa sutinta oqharinapuni kasqanta (Romanos 10:13, 14). Ima llakiypis rikhurejtin, wakin pastoreswan curaswanqa ninku: “Dios castigashasunki”, nispa. Chay nisqankoqa llulla. Imaraykuchus Diosqa ni jaykʼaj ima sajratapis ruwanchu (Santiago 1:13 leey). Ajina llulla imasta yachachispaqa runasta Diosmanta karunchachinku.
2. ¿Imaynatá ruwasqankuwan Diosta sajrapaj qhawachinku?
Pastoreswan curaswanqa mana Jehová jinachu runasta munakunku. Chayrayku Biblia nin, ‘juchasninkoqa cielokamapuni tauqaykukusqanta’ (Apocalipsis 18:5). Unaymantaña llulla religionesqa politicaman satʼikunku, guerraman rejkunatapis bendecinku. Ajinamanta juchayoj kanku may chhika runas wañunankupaj, chay runas wañuchisqa kanankutapis allillanpaj qhawanku. Chantapis iglesiankuman rejkunamanta qolqeta orqhospa qhapajyanku. Chay ruwasqankutaj rikuchin Diosta mana rejsisqankuta. Qhasillata Diospa kamachisnin kasqankuta ninku (1 Juan 4:8 leey).
3. ¿Imaynatá Dios llulla religionesta qhawan?
Jehovaqa paykunapaj phiñasqa kashan. Imaraykuchus llulla religionesqa Diosta sajrapaj qhawachinku, iglesiankuman rejkunatapis sufrichinku. Chayta rikuspa rabiakunchej, Jehovataj astawanraj rabiakun. Chayrayku tukuy llulla religionesta chinkachenqa, “nitaj jaykʼajpis ujtawan tarisqachu kanqa” (Apocalipsis 18:21). Jehovaqa runasta munakusqanrayku pisimantawan chay religionesta tukuchenqa (Apocalipsis 18:8).
ASTAWAN YACHAKUNA
Kaypi astawan yachakusun imaynatachus Dios llulla religionesta qhawasqanta, imastachus chay religiones ruwasqankutapis. Chantá yachakullasuntaj chay religiones pantajtinkupis, imaraykuchus Jehová Diosmanta yachakunallatapuni.
4. Diosqa mana tukuy religionestachu allinpaj qhawan
Ashkha runasqa ninku tukuynin religiones Diosman pusawasqanchejta. Biblia imatachus nisqanta qhawarina. Mateo 7:13, 14 leeriychej, chantá yachakojta tapuriy:
¿Imatá Biblia nin kausayman pusaj ñanmanta?
VIDEOTA qhawariychej, chantá yachakojta tapuriy.
¿Tukuy religionestachu Dios allinpaj qhawaj kasqa?
5. Llulla religionesqa Diosta sajrapaj qhawachinku
Llulla religionesqa imaymana sajra imasta ruwaspa Diosta sajrapaj qhawachinku. Chaykunamanta ujqa kashan guerrasman satʼikusqanku. VIDEOTA qhawariychej, chantá yachakojta tapuriy.
¿Imatataj casi tukuynin iglesias ruwasqanku Segunda Guerra Mundialpi?
¿Imatá qan chay ruwasqankumanta niwaj?
Juan 13:34, 35; 17:16 leeriychej, chantá yachakojta tapuriy:
¿Allinpajchu Jehová Dios qhawanman iglesias guerraman chhapukusqankuta?
¿Imasta ruwaspataj llulla religiones munakuyniyoj Diosninchejta sajrapaj qhawachinku?
Llulla religionesqa ruwasqankuwan Diosta sajrapaj qhawachinku.
6. Jehová Diosqa llulla religionesmanta llojsipunanchejta munan
Apocalipsis 18:4 leeriychej,a chantá yachakojta tapuriy:
Ashkha runas llulla religionespi kashanku. Jehová Diostaj chaymanta llojsipunankupaj paykunata yanapayta munan. ¿Imatá qan chaymanta niwaj?
7. Jehová Diosmanta yachakullaypuni
Llulla religiones sajra imasta ruwajtinkupis, ama saqeychu Jehová Diosmanta yachakuyta. Tatanta mana kasukoj jovenpi piensariy. Payqa tatanta mana kasukuspa wasinmanta ripun, mana allin kausaymantaj chayan. Ajinata purisqanmanta, ¿nisunmanchu tatan juchayoj kasqanta?
Llulla religiones sajra imasta ruwajtinku, ¿allinchu kanman Jehová Diosta juchachananchej, niñataj paymanta yachakunanchej?
WAKIN RUNAS NINKU: “Hermanosqa sajras kanku. Chayrayku ni mayqen iglesiamanta yachayta munanichu”, nispa.
Qanrí, ¿imatá niwaj?
Llulla religiones sajra imasta ruwasqankurayku, ¿allinchu kanman niña Diosmanta yachayta munananchej?
¿IMASTÁ YACHAKUNCHEJ?
Kaypi yachakunchej llulla religionesqa llullasta yachachisqankuwan ruwasqankuwan ima Diosta sajrapaj qhawachisqankuta. Chayrayku Diosqa chay religionesta chinkachenqa.
Yuyarikunapaj
¿Imasta ruwaspataj llulla religiones Diosta sajrapaj qhawachinku?
¿Imaynatá Dios llulla religionesta qhawan?
¿Imatá Dios ruwanqa llulla religioneswan?
ASTAWAN YACHAKUNAYKIPAJ
Iglesiasqa iskay imasta ruwaspa Diosta phiñachinku. Chayta yachanaykipaj kayta leeriy.
¿Imaraykutaj Jehová payta yupaychananchejpaj tantakunanchejta munan? Chayta yachanaykipaj kayta leeriy.
“¿Uj religionniyojpunichu kana tiyan?” (Chaytaqa Internetpi jw.org nisqapi tarinki)
Uj curaqa iglesianpi mana Bibliaj nisqantachu yachachisqankuta repararqa. Paymanta yachanaykipaj kayta leeriy.
¿Llulla religiones imasta yachachispataj Diosta sajrapaj qhawachinku? Chayta yachanaykipaj kayta leeriy.
a Apocalipsis libroqa tukuynin llulla religionesta uj khuchi warmiwan kikinchan, “Jatun Babilonia” nispataj sutichan. Kay libroj tukukuyninpi “Sutʼinchaykuna” nisqapi 1 kaj sutʼinchayninta leeriy.