LECCIÓN 43
¿Imatá Biblia nin machachej ujyanasmanta?
Ashkha runasqa machachej ujyanasta wakin kutislla amigosninkuwan tomanku, wakintaj ni uj chhikata tomankuchu, wakintajrí machaykunankukama tomanku. ¿Imatá Biblia nin machachej ujyanasmanta? Chayta kaypi yachakusun.
1. ¿Machachej ujyanasta tomay juchachu?
Bibliaqa mana juchachanchu machachej ujyanasta uj chhikata tomayta. Astawanpis nin: “Vinotapis qon runaj sonqonta qhallallarichinanpaj”, nispa. Arí, Jehovaqa vinota qowanchej sonqota kusirichinapaj (Salmo 104:14, 15). Chantapis Bibliapeqa parlallantaj wakin Diospa kamachisnin machachej ujyanasta uj chhikata tomasqankumanta (1 Timoteo 5:23).
2. Machachej ujyanasta tomajkunapaj, ¿ima yuyaychaytaj Bibliapi tiyan?
Jehová Diosqa mana machaykuyllatachu juchachan, manaqa anchata tomaytapis (Gálatas 5:21). Biblia nin: “Anchata vinota tomajkunamanta ama ujninku kaychu”, nispa (Proverbios 23:20). Sapallanchej chayri wajkunawan machachej ujyanasta tomanchej chayqa, cuidakunanchej tiyan mana yuyayninchejta chinkachinanchejkama tomanapaj. Jina kanman chayqa imatapis ruwaykullasunman, chayri imatapis parlallasunman. Anchata tomayqa mana cuerponchejpaj allinchu, onqochiwasunman. Uj chhikata tomaytawan machaykunakamapuni tomanchej chayqa, allin kanman ni uj chhikata tomananchej.
3. Wajkuna tomaytachus manachus ajllasqankuta respetasqanchejta, ¿imaynatá rikuchisunman?
Sapa uj ajllananchej tiyan machachej ujyanasta tomaytachus manachus. Uj cristiano machachej ujyanasta uj chhikata tomananta ajllan chayqa, mana qhawaranachu tiyan. Mana tomananta ajllajtintaj mana tanqananchejchu tiyan tomananpaj (Romanos 14:10). Sichus machachej ujyanasta tomaspa wajkunata pantachej jina kanchej chayqa, aswan allin kanman mana tomananchej (Romanos 14:21 leey). Ajinamanta ‘wajkunaj allinninkuta maskʼasqanchejta rikuchinchej, manataj allinnillanchejtachu’ (1 Corintios 10:23, 24 leey).
ASTAWAN YACHAKUNA
Kaypi yachakusun Bibliaj nisqanman jina machachej ujyanasta tomanatachus manachus, mashkhatachus tomanatapis. Yachakullasuntaj imastachus ruwanata machachej ujyanasta saqeyta munashanchej chay.
4. Tomanatachus manachus ajllana
Jesús imatachus machachej ujyanasmanta yuyasqanta yachanapajqa, ñaupaj kutipi milagrota ruwasqanmanta parlarina. Juan 2:1-11 leeriychej, chantá yachakojta tapuriy:
Kay leerisqanchejman jina, ¿Jesús juchacharqachu machachej ujyanasta tomayta?
¿Uj cristiano machachej ujyanasta uj chhikata tomayta ajllajtin qhawaranachu kanman? ¿Imaraykú chayta ninki?
Uj cristiano machachej ujyanasta uj chhikata tomayta ajllan chaypis, wakin kutisqa ichapis ajllanqa mana tomayta. Proverbios 22:3 leeriychej, chantá yachakojwan parlariy imaraykuchus mana tomanata:
Autota manejana kajtin chayri waj herramientaswan trabajopi trabajana kajtin.
Uj warmi onqoj kajtin.
Doctor machachej ujyanasta mana tomanata niwajtinchej.
Machachej ujyanasta uj chhikata tomarispa astawan tomayta munajtinchej.
Leyesman jina mana tomana kajtin.
Machachej ujyanasta tomayta saqej cristianowan kashajtinchej.
Uj matrimoniopi chayri uj fiestitapi machachej ujyanasta churanatachus manachus yachanapaj, ¿imapirajtaj ñaupajta piensarinanchej kanman? VIDEOTA qhawariychej.
Romanos 13:13; 1 Corintios 10:31, 32 leeriychej, chantá yachakojta tapuriy:
Jehová Diosta kusichinapaj jina imatapis ajllanapaj, ¿imaspitaj ñaupajta piensarina kanman?
Sapa uj cristiano ajllanan tiyan machachej ujyanasta tomanantachus manachus, ima kutispichus tomananta, ima kutispitajchus mana.
5. May chhikatachus tomanata ajllana
Machachej ujyanasta tomayta ajllanchej chayqa, yuyarikuna tiyan anchata tomayta Jehová juchachasqanta, uj chhikata tomaytataj mana. Oseas 4:11, 18 leeriychej, chantá yachakojta tapuriy:
Anchata tomaj runa, ¿imaspitaj rikukunman?
¿Imataj yanapawasunman mana anchata tomanapaj? Kʼumuykukoj sonqo kay. Proverbios 11:2 leeriychej, chantá yachakojta tapuriy:
¿Imaraykutaj qhawarikunanchej tiyan machachej ujyanasta mashkhallatachus tomana kasqanta?
6. ¿Imataj yanapawasunman machachej ujyanasta saqenapaj?
Qhawarina imachus uj runata yanapasqanta manaña tomananpaj. VIDEOTA qhawariychej, chantá yachakojta tapuriy:
Videopi rikorqanchej chay runaj kausaynin, ¿imaynataj karqa anchata tomasqanrayku?
¿Machachej ujyanasta tomayta ujllapichu saqerqa?
¿Imataj yanaparqa machachej ujyanasta niña ujtawan tomananpaj?
1 Corintios 6:10, 11 leeriychej, chantá yachakojta tapuriy:
¿Machaykuy juchachu? ¿Imaraykú chayta ninki?
Uj runa machachej ujyanasman qokuspa, ¿saqeyta atinmanchu?
Mateo 5:30 leeriychej, chantá yachakojta tapuriy:
Jesusqa kay kikinchaywan yachachisharqa Diosta kusichinapaj kallpachakunata. Sichus machachej ujyanasta saqeyta munashanki chay, ¿imastataj ruwawaj?a
1 Corintios 15:33 leeriychej, chantá yachakojta tapuriy:
¿Anchata tomajkunawan masichakojtinchej imataj kanman?
ICHÁ WAKIN TAPUSONQANKU: “¿Imaraykú mana allinchu machachej ujyanasta tomay?”, nispa.
Ajinata tapusojkunaman, ¿imatá kutichiwaj?
¿IMASTÁ YACHAKUNCHEJ?
Kaypi yachakunchej, Jehová Diosqa machachej ujyanasta kusirikunapaj qowasqanchejta. Jinapis machaykuyta, anchata tomaytapis juchachasqanta.
Yuyarikunapaj
¿Imatá Biblia nin machachej ujyanasmanta?
¿Imajtintaj mana allinchu anchata tomay?
Wajkuna tomaytachus manachus ajllasqankuta respetasqanchejta, ¿imaynatá rikuchisunman?
ASTAWAN YACHAKUNAYKIPAJ
¿Imapitaj jóvenes piensarinanku tiyan tomanankutachus manachus ajllashaspa? Chayta yachanaykipaj kay videota qhawariy.
Machachej ujyanasta mashkhatachus tomanata yachanapaj, ¿imastaj yanapawasunman? Chayta yachanaykipaj kayta leeriy.
“¿Imatá ruwawaq alcoholman manaña qukunaykipaq?” (Torremanta Qhawaj, 1 de julio de 2010)
¿Cristianos brindankuchu? Chayta yachanaykipaj kayta leeriy.
Uj runata tomayta saqenanpaj imachus yanapasqanta yachanaykipaj “Alcohol lata karqani” nisqata leeriy.
“Bibliaqa cambianankupaj yanaparqa” (La Atalaya, 1 de mayo de 2012)
a Machachej ujyanasta tomayta mana saqeyta atejkunaqa, ichapis uj doctorwan yanapachikunanku kanqa. Ashkha doctoresqa ninku chay vicioman yachasqa kajkunaqa, saqeytawan ni uj chhikitallatapis tomanankuñachu kasqanta.