Leejkunaj tapuyninku

2 Corintios 6:14 versiculopi ‘mana creejkuna’ nispa, ¿pikunamantataj apóstol Pablo parlasharqa?

2 Corintios 6:4 versiculopi nin: “Ama uj yugollapi ujchakuychejchu mana creejkunawanqa”, nispa. Apóstol Pabloqa ‘mana creejkuna’ nispa, pikunachus mana Jehovaj testigon jinachu bautizasqa kanku, chaykunamanta parlashan. Apóstol Pabloqa waj versiculospipis ‘mana creejkuna’ nisqa palabrata oqharillantaj, chay runasllamantataj parlananpaj.

Uj pacha apóstol Pabloqa cristianosta kʼamerqa, hermanosninkumanta “mana creej” runasman rispa quejakamusqankumanta (1 Corintios 6:6). Mana creejkuna nispaqa, Corinto llajtapi juezkunamanta parlasharqa. Corintomanta cristianosman iskay kaj cartanta qhelqashaspa, apóstol Pablo nerqa: “Kay mundoj diosnintaj, chay mana creej runaspa yuyayninkuta laqhayachin, ama paykunaman sumaj willaykunaj kʼanchaynin chayananpaj”, nispa. Chay mana creej runasqa, Jehová Diosta sirvinankupaj mana imatapis ruwasharqankuchu. Chayrayku apóstol Pablo nillarqataj: “Jehová Diosman pillapis kutirikojtenqa, chay veloqa qhechusqa”, nispa (2 Corintios 3:16; 4:4).

Mana creejkunaqa sajra imasta ruwanku, santostapis yupaychanku (2 Corintios 6:15, 16). Jinapis mana tukuychu Jehovaj kamachisninman churanakunku, wakenqa Bibliamanta yachakuyta munanku. Wakinpataqa qosanku chayri warminku, Jehová Diosta yupaychanku, jinapis paykunallawanpuni tiyakuyta munanku (1 Corintios 7:12-14; 10:27; 14:22-25; 1 Pedro 3:1, 2). Apóstol Pabloqa ‘mana creejkuna’ nispa, parlasharqa ñaupajpi nerqanchej jina, pikunachus mana Jehovaj testigosninchu kanku chaykunamanta. Jehovaj testigosnenqa ‘Señorpi creejkuna’ kanku (Hechos 2:41; 5:14; 8:12, 13).

2 Corintios 6:14 versiculopi yuyaychayqa tukuy cristianospaj kashan. Astawanqa pikunachus casarakuyta yuyashanku chaykunapaj (Mateo 19:4-6). Jehová Diosta sirvej cristianoqa, allin yuyaywan uj qosata chayri uj warmita maskʼanqa, manataj uj mana creej runawanchu ujchakuyta maskʼanqa. Mana creej runasqa, mana Jehová Diosta sirvej cristianos jinachu yuyanku, ruwanku chayri creenku.

Bibliata yachakoj reunionesman rinña, hermanoswan khuska predicanña, nirajtaj bautizakunchu chay, ¿nisunmanchu mana creejkuna ukhullamantataj kasqanta? Mana. Pikunachus Bibliata estudiashanku, bautismoman chayanankupajtaj mayta kallpachakushanku, ñauparishankutaj chaykunataqa, mana nisunmanchu mana creejkuna kasqankuta (Romanos 10:10; 2 Corintios 4:13). Bibliaqa Cornelio mana bautizasqaraj kajtinpis, ajinata nin: “Cornelioqa Diosta manchachikoj”, nispa (Hechos 10:2).

Apóstol Pabloqa 2 Corintios 6:14 versiculopi nerqa, mana bautizasqa estudiosqa mana creejkuna ukhupichu kashasqankuta. ¿Chaywan nisharqachu uj cristiano mana bautizasqa estudiowan rejsinakuyta, casarakuyta ima atisqanta? Mana. Imaraykuchus Pabloqa viuda cristianasman kayta nerqa: “Qosan wañupojtinrí, atin casarakuyta piwanchus munasqanwan, chaywanpis Señorllapi kanan tiyan”, nispa (1 Corintios 7:39). Chaywan nisharqa uj bautizasqa cristianoqa, bautizasqa cristianallawantaj casarakunan kasqanta, nisunman ‘Señorpi’ creejllawan.

¿Ima niyta munasharqa Pablo “Señorllapi kanan tiyan” nispa? Chayta nispa Diosta sirvej runasmanta parlasharqa. Chayrayku Colosenses 4:7 versiculopi nerqa: “Munasqa hermanoy Tiquicoqa [...] Señorpa sumaj kamachin, kamachi masiytaj”, nispa.

¿Imatataj uj runa ruwanan tiyan ‘Señorpa kamachinman’ tukunanpaj? Jesuspa kamachisqanta tukuy sonqo ruwanan tiyan, ajinamanta Jesusta uj kamachi jina sirviyta qallarin. Chantapis chay runaqa niña munaynintachu ruwanan tiyan. Jesús nerqa: “Sichus pipis qhepayta jamuyta munan chayqa, pay kikinta chejnikuchun, ñakʼarina kʼaspin aparisqataj qhepayta jamullachunpuni”, nispa (Mateo 16:24). Jesuspa qhepanta riyta munaj runaqa, uj mañakuypi Jehová Diosman ninan tiyan payllataña sirviyta munasqanta. Chantá bautizakunan tiyan, Jehová Diosllatañataj sirvinan tiyan.a Señorpi creejllawan casarakuna nispaqa, Jehová Diosta yupaychajllawan casarakuna kasqanta nishanchej, nisunman ‘Diospatawan, Señor Jesucristojpatawan kamachillanwan’ (Santiago 1:1).

Sichus uj runa Jehovaj testigosninwan Bibliata estudiashan chayqa, ñauparishantaj chayqa, allinta ruwashan. Jinapis manaraj kausayninta Jehovaman jaywapunchu, nitaj Jehová Diospa nisqanman jinachu kausakushan chayqa, kausayninta cambiananpaj kallpachakunallanpuni tiyan. Niraj casarakuypi yuyashaspaqa, ñaupajta kausayninta cambianan tiyan, Jehová Diosman kausayninta jaywapunan tiyan, bautizakunantaj tiyan.

¿Allinchu kanman uj cristiano Bibliata yachakojwan rejsinakuyta qallarinan? Chantapis, ¿allinchu kanman ninan “suyasaj bautizakunankama chaymantaqa casarakusqayku” nispa? Mana. Ajina kanman chayqa, mana sutʼita yachakunmanchu casarakunanraykullachus chayri Jehovata munakusqanraykuchus bautizakuyta munasqan. Imaraykuchus Bibliamanta yachakojqa yachan bautizasqa kajtillan, paywan uj cristiano chayri uj cristiana casarakuyta atisqanta.

¿Pikunatataj Bibliamanta yachakojkuna ninchej? Pikunachus uj pisi tiempollata Jehovaj testigosninwan Bibliata estudianku, bautismoman chayanankukamataj ñauparinku chaykunata. Bautizasqa kaspañapis Señorllapi creejwan casarakuymanta kamachiyta kasukoyqa allinninpaj kanqa. Wakenqa familianku Jehovaj testigosnin kajtinpis, unayña Bibliata estudianku, nitaj bautizakunkuchu. Chayrayku kay tapuykunapi piensarina: “¿Imaraykutaj manaraj Jehovata sirvinanpaj bautizakunchu? ¿Imamantapis iskayrayashanrajchu?”, nispa. Chay runa mana creejkuna ukhumanta kajtinpis, ¿nisunmanchu Señorpi creej kasqanta? Mana.

Apóstol Pablo, Señorpi creejllawan casarakunata nisqanqa allinninchejpaj (Isaías 48:17). Uj bautizasqa cristiano, uj bautizasqa cristianallawantaj casarakonqa chayqa, qhari warmi kausayninkupi allinta kausakonqanku. Jehová Diostapis tukuy sonqo sirvenqanku. Imaraykuchus iskayninku uj yuyaylla kanqanku, imatapis khuska ruwayta ajllanqanku. Chantapis qhariwarmi kausayninkupeqa kusisqa kausakonqanku. Señorpi creejllawan casarakuspaqa, rikuchishanchej Jehovaj kamachiykunasninta kasukushasqanchejta. Kasukunapaj kallpachakullasunpuni chaytaj, ashkha bendicionesta japʼisunchej. Chayrayku Bibliapi nin: “Señor Diosníy, huntʼaqpaqqa huntʼaqllataqmi kanki”, nispa (Salmo 18:25, Diospa Simin Qhelqa, 2004).

[Sutʼinchaynin]

[Dibujo/foto]

‘Diosqa kamachisqanta juntʼajpaj juntʼajllatajmin kanqa’.