Ñawiriqkuna yachayta munanku

¿Machkha qullqitataq qunay kanman?

“Diosqa munakun pichus kusiywan qojta.” (2 Corintios 9:7.) Pachantinmanta achkha runas Diospi creeqkuna, Bibliamanta kay pʼitita riqsispapis iglesiasninkupi tanqasqajinalla qullqinkumanta qunku. Imaraykuchus iglesiasninkupiqa, killapi machkhatachus ganasqankumanta chunkamanta juktapuni qunankuta ninku.

¿Machkhatapunichus qunanchik kasqanta Biblia sutʼinchanchu? ¿Machkhatapunitaq quna kanmanrí?

Unay tiempomanta Israel llaqtapi imaynatachus quq kasqankumanta

Bibliaqa, Dios kamachisqanmanjina machkhatachus israelitas qunanku kasqanta willawanchik (Levítico 27:30-32; Números 18:21, 24; Deuteronomio 12:4-7, 11, 17, 18; 14:22-27). Kay kamachiytaq juntʼanankupaqjinalla karqa. Ajinata ruwaptinkutaq Jehová, paykunaman “khuyakuyninta rikuchi[nanta]” nirqa (Deuteronomio 28:1, 2, 11, 12).

Wakin kuti israelitasqa, munasqankumanjina pisita chayri achkhata quq kanku. Sutʼincharinapaq, kamachiq David Jehovapaq juk templo ruwakunanpaq wakichichkaptin, kamachisninqa “pachaj sojta chunka phishqayoj waranqa kilos qorita” qurqanku (1 Crónicas 29:7).a Kay chhika qurita qusqankuta, Jesús kay Jallpʼapi kachkaptin juk wakcha viuda machkhatachus qusqanwan kikinchana. Chaypacha Jesusqa, ‘juk wakcha viudata iskay phatasllata churaykuqta rikurqa’. Chay viudap churasqan, juk pʼunchaypi machkhatachus juk llamkʼaq ganasqanwan kikinchakunanpaq, chay viudaqa ichá, ¡suqta chunka tawayuq jinatawanraq churanan karqa! Chaywanpis Jesusqa, chay iskay phatas churasqanta, Jehová allinpaq qhawasqanta nirqa (Lucas 21:1-4).

Chiqa cristiano qullqimanta, ¿machkhatapunitaq qunan tiyan?

Kunan tiempopi chiqa cristianosqa, manaña Moisespa Leyninpi kamachikusqanmanjinachu, kapusqankumanta sapa chunkamanta jukta qunanku tiyan. Chaywanpis, kapusqankumanta quspaqa mayta kusikunku. Imaraykuchus Jesusqa nirqa: “Aswan kusiy wajman qoriy qorichikunamanta nisqaqa”, nispa (Hechos 20:35).

Jehovamanta sutʼinchaqkunaqa, Jallpʼantinpi Diospa Reinonmanta willakunanpaq, munasqankumanjina qullqinkumanta qunku. Chay qusqankuwantaq Biblia nisqanmanjina publicacionesta urqhunku, chantá Diosta yupaychanankupaq Tantakunapaq Wasista ruwanku, allinchasqallatapunitaq japʼinku. Manapis kay qullqitaqa Jehovamanta sutʼinchaqkunaman paganankupaq apaykachankuchu. Wakin Jehovamanta sutʼinchaqkunamanqa, Diospa Reinonmanta runasman willanankupaq, yachachinankupaqtaq tukuy tiemponkuta churasqankurayku, imatachus necesitasqankuta rantikunankupaq juk chhika qullqita qunku. Chaywanpis ni mayqin chay yanapata mañakunchu. Jehovamanta sutʼinchaqkunamanta yaqha tukuyninku, Pablojina Diospa Reinonmanta willasqankumanta mana qullqita japʼinkuchu. Astawanpis imaynatachus apóstol Pablo, imatachus necesitasqanta rantikunanpaq toldosta ruwaspa llamkʼaq, paykunapis imatachus necesitasqankuta rantikunankupaq llamkʼallankutaq (2 Corintios 11:9; 1 Tesalonicenses 2:9).

Pillapis Diospa Reinonmanta willakunallanpaqpuni, qullqinmanta quyta munan chayqa, ¿machkatataq qunan tiyan? Apóstol Pablo kay tapuyman kutichin, nintaq: “Sapa uj churachun sonqompi yuyasqanman jina, mana llakikuspa, nitaj kamachisqa jinachu, imaraykuchus Diosqa munakun pichus kusiywan qojta”, nispa (2 Corintios 8:12; 9:7).

[Sutʼinchaynin]