Rebecaqa, Jehová Diosta kusichiyta munarqa

¿PILLATAPIS, Rebeca sutiyuqta riqsinkichu?a... Ajina Diospa juknin chiqa sunqu kamachin sutikurqa, Bibliataq paymanta parlan. ¿Imallatapis paymanta yachankichu?... Kay yachaqanapi paymanta yachakusunchik.

Bibliaqa, Diosman chiqa sunqu warmismanta parlan. Niraq Rebecamanta parlachkaspa, ¿mayqin chiqa sunqu warmimantachus parlasqanta yachankichu?... Arí, Abrahampa, Sara warminmanta parlan. Payqa, payitaña kachkaspa wawayuq karqa, chay wawataq Isaac sutikurqa. Unayninmantaq Isaacqa, Rebecawan casarakurqa. ¿Imaynatá riqsinakurqanku? ¿Imaynatá Rebeca, Diosta kusichirqa?

Diosqa, 60 watas ñawpaqta Abrahamtawan, Saratawan Harán llaqtamanta Canaán jallpʼaman ripunankuta kamachirqa. Chantá machuyayninkupi, wawayuq kanankutataq nirqa, chay wawataq Isaac karqa. ¡Maytachá Isaacta munakurqanku! Chayrayku Isaacqa, maman 127 watasniyuq wañupusqanmanta may llakisqachá qhipakurqa. Abrahamtaq, wawan casarakunanpaqjinaña kasqanta reparaspa, Diosta mana yupaychaq warmiwan casarakunanta mana munarqachu. Chayrayku, ichá Eliezerta kamachinta, Haranman kacharqa, Haranpi kaq familianmanta Isaacpaq juk warmita pusampunanpaq. Chay kamachitaq Haranman chayananpaq, 800 kilometrosmanta astawan karuta purirqa (Génesis 12:4, 5; 15:2; 17:17, 19; 23:1).

Eliezer, wak kamachis ima, 10 camellosman mikhunata, regalosta ima chaqnaykuytawan, Haranman puririrqanku. Chʼisiyaykuchkaptinñataq Haranman chayarqanku, juk pukyu qayllapitaq samarikurqanku, chay horatataq warmisqa, familiasninkupaq, animalesninkupaqpis pukyumanta yakuta urqhuq kanku. Chaypacha Eliezerqa, Diosmanta mañakurqa, Isaacpaq juk warmita tarinanpaq. Chaywanpis, ¿imaynatá yachanman karqa mayqin warmichus kananta? Pay Diosmanta mañakurqa: ‘Mayqin sipastachus nisaq “yakuta quriway” nispa, chay sipastaq “kayqa, ujyarikuy, camellosniykimampis ujyarichipusqayki”, nispa niwaptin, chay kachun kamachiyki Isaacpaq akllasqayki warmi’, nispa.

Jinallapi, juk kʼachita sipas Rebeca sutiyuq chayamurqa. Eliezer yakuta mañakuptintaq, ¿imatá chay sipas nirqa? Chay sipasqa, payman, camellosmanpis yukuta qurinanta nirqa. Kutin kutita yakuta urqhumuqta rikuspa, Eliezerqa mayta tʼukurqa, imaraykuchus yakumanta chʼakisqa 10 camellosqa, 1.000 litros yakuta ukyankuman.

Chantá Eliezerqa, Rebeca Betuelpa ususin kasqanta yachaytawan Rebecaman regalosta jaywarqa, Betueltaq Abrahampa sobrinon karqa. Chantá Rebeca, tatanpa wasinman waqyarirqa, usqhaytataq familiaman, Canaanmanta Abrahampa kamachisnin chayamusqankuta willamurqa.

Rebecap hermanon Labantaq, chayta uyariytawan, hermananman imatachus regalasqanta qhawaytawan ima, mikhurikunanpaq Eliezerta waqyarirqa. Chaywanpis Eliezer nirqa: “Mana mikhuymanrajchu, imatachus ninay kashan, chayta qankunaman manaraj nishaspaqa”, nispa. Chantá Eliezerqa, Rebecap tatasninman, Labanman ima, Abrahampa churin Isaacpaq juk warmita pusapunanpaq risqanta nirqa. Paykunataq, Rebeca Isaacwan casarakunanta may allinpaq qhawaspa, “Patronniykej churimpa warmin kachun”, nirqanku.

Eliezer, wak kamachis ima, chay chʼisi Betuelpa wasinpi puñukurqanku. Qʼayantintaq Eliezerqa, patronninpaman Rebecantin kutipuyta munarqa. Chaywanpis Rebecap maman, hermanon ima ‘10 pʼunchaytawan karikullachunraq ari’ nispa nirqanku. Rebecarí, ¿qhipakuytaraqchu munarqa? Mana, pay nirqa: “Rillasajña”, nispa. Rebecaqa, Eliezerwan Canaanman rirqa, chayaspataq Isaacwan casarakurqa (Génesis 24:1-58, 67).

Rebecap ruwasqanpi tʼukuriy. Payqa, karu llaqtaman ripurqa familianta, amigasninta ima saqispa. ¿Chayta ruwayta atisqallantachu yuyanki?... Ichapis mana atillarqachu. Chaywanpis Diosta kusichiyta munasqanrayku chayta ruwarqa, chayraykutaq Diosqa mayta tʼinkarqa, imaraykuchus paypa mirayninmanta runasta Salvaq Jesús jamurqa. Rebecajina ruwayninchikwan Diosta kusichiptinchikqa, ñuqanchiktapis mayta tʼinkawasunchik (Romanos 9:7-10).