Diosman qayllaykuy

Waynaman, sipasman ima kutiptinchik

MACHUYAYTAQA mana pipis munanchu, imaraykuchus nanaykuna rikhurin, kallpa pisiyan, aycha kʼusuyapun, ñawi chharpuyan, ninripis mana uyarinñachu... ¿Jinapichu rikukuchkanki? Wayna chayri sipas kasqaykita yuyarikuspa tapukunkichá: “¿Imaraykutaq machuyanay tiyan? ¿Imaptintaq Dios jinata ruwawarqanchik?”. Jehová mana chaypaqchu ruwawasqanchikta yachaspa kusikunkichá. Mayta munakuwasqanchikrayku machuyayta wiñaypaq chinkachinqa. ¿Jinachu kanman? Qhawarina imatachus Job 33:24, 25 willawasqanchikta.

Jehovaqa unay tiempomanta chiqa sunqu Jobta mayta munakurqa. Satanastaq mana Job yachanallanta, tukuy imata qusqanraykulla Diosta sirvisqanta nirqa. Chaywanpis Diosqa yacharqa Job chiqa sunqu kananta, ima ñakʼariynintapis allinchayta atisqanta. Chayrayku Kuraq Supay Jobta “chaki puntanmanta uma puntankama” millayta unquykuchinanta saqillarqa (Job 2:7). Cuerponman khuru, sarna ima juntʼaykurqa, aychanpis yanaman tukuchkarqa, lluchʼurpakuchkarqataq (Job 7:5; 30:17, 30). Maytachá ñakʼarinman karqa, chaywanpis Diosta ni imaynamanta wasancharqachu, nirqataq: “Ñuqaqa, wañupunaykama juntʼa sunqullapuni kasaq” nispa (Job 27:5, NM).

Job wañunanpaqjina kachkasqanta yuyaspa, aswan yachayniyuq kasqanta nisqanpi mayta pantarqa, chayrayku “Diospa ñawpaqempi mana juchayoj” kasqanta nirqa (Job 32:2). Jehovaqa Eliuniqta chay nisqanmanta kʼamirqa, ajinapis “kacharichina preciota” tarisqanrayku “wañuymanta payta libra[nanta]” nirqa. Nillarqataq “cuerponqa llampʼuman tukonqa wawaj aychanmantapis aswan llampʼuman, imaynachus wayna kashaspa karqa, chay kikinman”, nispa (Job 33:24, 25). Ñakʼariynin Jobta mana wañuyman apananta yachaspa maytachá sunqucharqa. Chantapis juchanmanta pesachikuptin Diosqa “kacharichina preciota” qunanmanta allinpaq qhawaspa, llakiyninmanta libranman karqa.a

Job llampʼu sunqu kasqanrayku kʼamichikuqta saqirqa, juchanmantataq pesachikurqa (Job 42:6). Jehovaqa Job kacharichina preciota jaywasqanta allinpaq qhawarqa, allinyakunanpaqtaq punkupis kicharikunmanjina karqa. Chayrayku “Jobta bendecerqa chay wataspi, ñawpaj watasmanta nisqaqa astawan” (Job 42:12-17). ¿Imaynatá? Unquyninmanta sanoyachispa, aycha cuerponta “wawaj aychanmantapis aswan llampʼuman” tukuchispa ima. May kusiy, ¿icharí?

Chaywanpis kacharichina preciota qusqanqa mana unaypaqchu karqa, Job juchayuqllapuni kasqanraykutaq qhipaman wañupurqa. Jehovaqa Jobta kacharichisqanmanta nisqaqa aswan sumaq kacharichiyta yanapachikunanchikpaq tukuyman quwanchik. Chaytaq Jehová munakuywan Jesusta ñuqanchikrayku wañunanpaq kachamusqan kachkan (Mateo 20:28; Juan 3:16). Diosqa Jesuspa wañuyninpi iñiqkunata Jallpʼapi mana machuyaspa wiñaypaq kawsanankuta saqinqa. Aychanchik “wawaj aychanmantapis aswan llampʼuman” tukunanpaq, ¿imatá ruwananchik tiyan? Bibliap kutichiyninta maskʼanaykita mañayku.

[Sutʼinchaynin]