¿Jehová herencianchik kananta saqinchikchu?

“Ñawpajtaqa Diospa reinonta, cheqan kaynintawan maskʼaychej, chay tukuy imatataj yapata jina Dios qosonqachej.” (MAT. 6:33.)

1, 2. a) Gálatas 6:16 nisqanmanjina, ¿pikunataq “Diospa nacionnin Israel” kanku? b) Mateo 19:28 nisqanmanjina, ¿pikunataq “Israelpa chunka iskayniyuq ayllusnin” kanku?

BIBLIAPI Israel rimayta ñawirispaqa, ichá Isaacpa churin Jacobpi, mirayninmanta kaq suyupi ima tʼukurinchik. Chantapis “Diospa nacionnin Israel[manta]” nisunman 144.000 akllasqas cristianosmanta parlananpaq uqharillantaq. Paykunaqa, janaqpachapi reyes, sacerdotes ima kanankupaq espíritu santowan akllasqas kanku (Gál. 6:16; Apo. 7:4; 21:12). Chantapis Mateo 19:28 “Israelpa chunka iskayniyoj ayllusnin[man]ta” parlan. Kunantaq chayta ukhuncharisun.

² Jesús nirqa: “Tukuy ima mosojman tukojtin, Runaj Churin kamachinan jatun tiyanampi tiyaykukojtintaj, qhepayta jamusqaykichejrayku qankuna chunka iskayniyoj kamachina tiyanaspi tiyaykukullankichejtaj, Israelpa chunka iskayniyoj ayllusninta juzganaykichejpaj”, nispa. Chay “Israelpa chunka iskayniyoj ayllusnin[qa]”, Paraisopi wiñaypaq kawsakuyta suyakuqkuna kanku, paykunataqa Jesuspa akllasqa discipulosnin juzganqanku. Chay 144.000 sacerdotes ruwasqankuqa allinninkupaq kanqa.

3, 4. ¿Imatá akllasqa cristianosmanta yachakunchik?

³ Akllasqa cristianosqa, unay tiempomanta sacerdotesjina, levitasjinataq Diosta sirvisqankuta may sumaqpaq qhawanku (Núm. 18:20). Arí, paykunaqa Apocalipsis 4:10, 11 nisqanmanjina Jesucristowan khuska janaqpachapi reyesjina, sacerdotesjinataq kayta suyakunku (Eze. 44:28).

⁴ Akllasqa cristianosqa, Jallpʼallapiraq kachkaspa Diosta sirviy aswan allinpuni kasqanta kawsayninkuwan rikuchinku. Chantapis Cristop wañuyninpi iñinku, kamachiykunasnintataq kasukunku. Ajinamanta “wajyasqas, ajllasqastaj kasqa[nkupi] sumajta sayan[ku]” (2 Ped. 1:10). Paykunaqa mana tukuyninkuchu imallatapis kikinta ruwayta atinku, chaywanpis mana chayraykuchu pisillataña Diosta sirvinku. Astawanpis tukuy atisqankuta kallpachakunku. Jallpʼapi wiñaypaq kawsakuyta suyakuqkunaqa, paykunamanta mayta yachakusunman.

 5. ¿Imatataq Jehová herencianchikjina kananpaq ruwananchik tiyan, chantá imaraykutaq mana atikullanchu?

⁵ Jesús nirqa: “Pillapis noqawan riyta munajqa pay kikinta qhesachakuspa, [kurkunta, NM] oqharisqa qhepayta jamuchun”, nispa (Mat. 16:24). Chayrayku may chhika runas Paraisopi kawsakuyta suyakuqkunaqa, Jehovata yupaychachkanku, Cristop qhipantataq richkallankupuni. Chantapis atisqankumanjina mayta kallpachakuchkanku. Achkha hermanosqa, kawsayninkupi ruwanasninkuta pisiyachispa precursores regularesjina llamkʼayta qallarinku. Wakintaq wakin killaspi precursores auxiliaresjina llamkʼanku. Wakkunataq mana precursores kayta atispapis Diosmanta willanankupaq mayta kallpachakunku. Ajinamantaqa, Mariajina ruwanku, payqa Jesuspa chakisninman perfumewan jichʼaykurqa. Chayrayku Jesús nirqa: “Allinta noqapaj ruwapuwan. [...] Kay warmeqa atisqanta ruwan”, nispa (Mar. 14:6-8). Chantapis kay pacha Satanaspa kamachiyninpi kachkasqanrayku, mana tukuy munasqanchikta ruwayta atillanchikchu. Chaywanpis kallpachakunallapuni, Jehovapitaq atienekunallapuni. ¿Imaynasmantá chayta ruwasunman? Kunanqa chayta ukhuncharina.

Diospa Reinonta ñawpaqta maskʼana

 6. a) ¿Imaraykutaq nisunman kay pachamanta runaspa herencianku kay kawsayllapi kasqanta? b) ¿Imaraykutaq may allin Davidjina yuyay?

⁶ Jesusqa, discipulosninman Diospa Reinonta, chiqan kaynintawan ñawpaqta maskʼanankuta yachachirqa. Chaywanpis “kay pacha runas[pataqa]” “kay kawsayllapi” herencianku kachkan (Salmo 17:1, 13-15 ñawiriy). Diosmanta yuyarikunankumantapis achkha qullqiyuq kayllapi, familiayuq kayllapi, wawasninkumantaq achkha qullqita saqiyllapi yuyanku. Ñuqanchiktaqrí Davidjina kayta munanchik, payqa Jehovap ñawpaqinpi “sumaj runapaj rejsisqa” kayta aswan allinpaq qhawarqa. Churin Salomonpis aswan qhipaman chayta yuyaycharqa (Ecl. 7:1). Davidpis Asafjinallataq Jehovap amigon kaspalla kusisqa kawsayta atisqanta repararqa. Kay tiempomanta achkha cristianosqa kikillantataq yuyanku. Chayrayku wak imasmanta nisqaqa Diospaq llamkʼayta ñawpaqman churanku.

 7. ¿Ima bendicionestataq juk hermano, Diospa Reinontaraq ñawpaqta maskʼasqanrayku japʼirqa?

⁷ Jean-Claude hermanop kawsayninmanta parlarina. Payqa qutuchakuymanta anciano, warmiyuq, kimsa wawasniyuq, República Centroafricana suyupitaq tiyakun. Juk pʼunchayqa, juknin patronnin semanapi qanchis pʼunchaynintinta 6:30 chʼisiyaymantapacha llamkʼananta nirqa. Chay suyupiqa, mana ancha llamkʼay kanchu, chayrayku runasqa llamkʼayninkumanta mana wikchʼuchikunankupaq mayta kallpakunku. ¿Imatá Jean-Claude ruwarqa? Payqa patronninman mana familianta uywanallanpaqchu llamkʼasqanta, manaqa Diosmanta yachachinan kasqanta, qutuchakuyta yanapanan kasqanta ima sutʼincharqa. Patronnin payman nirqa: “Suerteyuq kaspa llamkʼachkanki. Warmiykimanta, wawasniykimanta, chʼampaykunasniykimanta ima qunqapullayña, llamkʼayllamanñataq qukuy. Qammantaña: religionniykichu chayri llamkʼayniykichu”, nispa. Jinapi rikukuspa, ¿imatá ruwasunman karqa? Jean-Claudeqa llamkʼayninmanta wikchʼuptinkupis, Jehová yanapananpi atienekurqa. Chayrayku familianta, Dios yanapananpi atienekuspa, cristiano ruwanasninta ruwallarqapuni. Payqa tantakuyninman rirqa, chaymantataq llamkʼayninman rinanpaq wakichikurqa, nitaq yacharqachu llamkʼachinallankutapunichus manachus. Jinallamanta telefononiqta chay patronninta wikchʼusqankuta willamurqanku. Paytarí mana wikchʼusqankuchu.

8, 9. ¿Imaynasmantataq levitasjina, sacerdotesjina ima, ruwayta munanchik?

⁸ Achkha cristianosqa, chay hermanojina rikukuspa tapukurqanku: “Manaña llamkʼaspa, ¿imaynatá familiayta uywasaqri?”, nispa (1 Tim. 5:8). Yachanchikjina, ajinapi rikukuspapis manapis Jehovaqa, herenciankupaq qhawaqkunata, payta sirviyta sumaqpaq qhawaqkunata ima, ni jaykʼaq saqirparinchu. Chantapis ichá kawsayninchikpi Jesuspa nisqan chiqapuni kasqanta repararqanchik, pay nirqa: “Ñawpajtaqa Diospa reinonta [...] maskʼaychej, chay tukuy imatataj [mikhunata, pʼachata ima] yapata jina Dios qosonqachej”, nispa (Mat. 6:33).

⁹ Watiqmanta Leví ayllunmanta kaqkunapi tʼukurina. Paykunaqa mana jallpʼasta herenciatajina japʼirqankuchu. Chaywanpis Jehovallata sirvinanku kasqanrayku, pay yanapananpi suyakunkuman karqa. Chayrayku paykunaman Dios nirqa: “Noqamin qampata kasaj, herenciaykitaj kasaj”, nispa (Núm. 18:20). Ñuqanchikqa, mana runap ruwasqan templopichu Diosta sirvinchik, chaywanpis sacerdotesjina, levitasjina ima, sirviyta munasqanchikta rikuchiyta munanchik. Dios necesitasqanchikta qunawanchikpitaq atienekusqanchikta rikuchinchik. Kay pachap tukukuyninpiqa, astawanraq chayta rikuchinanchik tiyan (Apo. 13:17).

Diospa chiqan kayninta ñawpaqta maskʼana

10, 11. ¿Imaspitaq wakin cristianos Jehovapi atienekusqankuta rikuchirqanku? Sutʼinchariy.

¹⁰ Jesusqa, discipulosninman Diospa chiqan kayninta, ñawpaqta maskʼanankuta nillarqataq (Mat. 6:33). Chaytaq imallatapis Jehovap nisqanmanjina ruwananchikta niyta munan, nitaq runas yuyasqankumanjinachu (Isaías 55:8, 9 ñawiriy). Sutʼincharinapaq, wakin runasqa niraq cristianos kachkaspa tabacota tarpuq chayri vendeq kanku. Wakintaq armasta ruwaq chayri vendeq kanku, chayri maqanakuyta yachachiq kanku. Bibliamanta yachakusparí, chaykunata saqipurqanku, bautizakurqankutaq (Isa. 2:4; 2 Cor. 7:1; Gál. 5:14).

¹¹ Andrew hermanop kawsayninmanta parlarina, payqa warminwan khuska Bibliamanta yachakurqa, Diostataq yupaychayta qallarirqa. Llamkʼaynin gustaptinpis, saqipurqa. ¿Imaraykú? Mana Bibliap yachachisqanmanjinachu kasqanrayku, Diospa chiqan kaynintataq ñawpaqman churayta munasqanrayku. Manaña llamkʼasqanraykutaq iskay wawasninta uywananpaq pisi qullqillaña kapurqa. Kawsayninqa, levitaspa kawsayninkuwan kikinchakunman karqa. Chaywanpis chay hermanoqa, Jehovapi atienekurqa wak llamkʼaytataq maskʼakurqa. Chayrayku chay imaspi tʼukurispa Andrew, familian ima, jinata niyta atinku: “Cheqamanta Tata Diospa makenqa mana juchʼuyyapunchu”, nispa (Isa. 59:1). Chantapis kapusqallanwan kawsakuspaqa, warminwan khuska precursores regulares kayta atirqanku. Nintaq: “Qullqirayku, maypichus tiyakunaykurayku, unquyrayku, machuyachkasqaykurayku ima, wakin kutispi llakikurqayku. Chaywanpis Jehovaqa yanapawarqaykupuni. [...] Warmiywan khuska pasaq wataspi tʼukurispaqa, Jehovata yupaychaywanqa ni mayqin sumaq pagasqa llamkʼaypis kikinchakusqanta sutʼita reparayku”, nispa (Ecl. 12:13).a

12. ¿Imaynamantataq Diospa chiqan kayninta ñawpaqta maskʼallasunmanpuni? Riqsisqayki hermanop kawsayninmanta parlariy.

¹² Jesusqa discipulosninman nirqa: “Sichus mostaza muju chhikallampis creesqaykichej kanman chayqa, kay orqota niwajchej: Kaymanta jaqayman ithiriy, nispa, rinmantaj. Mana imapis qankunapaj kanmanchu mana atikojqa”, nispa (Mat. 17:20). Tukuy tapurikusunman: “¿Diospa chiqan kayninta ñawpaqta maskʼallaymanpunichu ima chʼampaypi kanay kaptinpis?”, nispa. Chayta nisqanpi mana atienekuyta atinchikchu chayqa, wak hermanoswan, imaynatachus Jehová yanapasqanmanta parlarisunman. Ajinamanta Jehovapi atienekunallanchikpaqpuni astawan kallpachakusun.

Jehová quwasqanchikmanta agradecekuna

13. Jehovata sirvinapaq kallpachakunchik chay, ¿imatataq suyakusunman?

¹³ Jehovata sirviyta jatunpaq qhawasunchik chayqa, levitasjinallataq, pay yanapanawanchikpi atienekusun. Diosqa tukuy necesitasqanchikta quwasun. Davidpi tʼukurina, payqa chhanka juskʼupi kaspapis, Jehovap yanapayninpi atienekullarqapuni. Ñuqanchikpis mana muchuy atina chʼampaypi kachkaspapis Jehovapi atienekusunman. Asafmanta yuyarikunallataq, payqa “Diospa wasinman yayk[uspa]” manaña imachus llakichisqanpi yuyarqachu (Sal. 73:17). Ñuqanchikpis kallpachasqasllapuni kananpaqqa, Jehovapi atienekunanchik tiyan. Arí, ima chʼampayllapipis, Diosta sirvisqanchikta may sumaqpaq qhawasqanchikta rikuchisun. Ajinamantaqa, Jehová herencianchik kananta saqisun.

14, 15. ¿Imaynatá Bibliamanta juk yachachiy sutʼinchakuptin qhawananchik tiyan, imaraykú?

¹⁴ Wakin kutispiqa, “taripay mana atina Diospa yachaynintapis” sutʼinchakun (1 Cor. 2:10-13). ¿Imaynatá Jehová palabranta entiendenapaq yanapawasqanchikta qhawanchik? Apóstol Pedrop kutichiyninmanta mayta yachakusunman. Juk kutipi Jesús nirqa: “Manachus Runaj Churimpa aychanta mikhunkichej, nitaj yawarnintapis ujyankichej chayqa, mana qankunapis kawsayniyojchu kankichej”, nispa. Wakinqa, aychanmantapuni, yawarninmantapunitaq parlachkasqanta yuyaspa nirqanku: “Chay nisqasnenqa ancha sinchʼi. Pitaj chayta ruwayta atinmanri?” nispa. Chayrayku “ñawpa kawsayninkuman kutiporqanku”. Pedrorí Jesusman nirqa: “Pimantaj riykumanri? Qampallata tiyapusunki wiñay kawsay palabra”, nispa (Juan 6:53, 60, 66, 68).

¹⁵ Apóstol Pedroqa, aychanta mikhunamanta, yawarninta ukyanamanta ima, Jesús parlasqanta mana allinta entienderqachu. Chaywanpis chiqa yachachiykunata entiendekunanpaqqa, Cristoniqta, Dios yanapachkasqanta yacharqa. Ñuqanchikrí, ¿imaynatá mayqin yachachiyllatapis astawan sutʼinchakuptin qhawanchik? ¿Imaraykuchus ajinata sutʼinchakuchkasqanta entiendenchikchu? (Prov. 4:18.) Apostolespa tiemponpi Berea llaqtapi tiyakuqkunaqa, “Diospa Palabranta tukuy sonqo japʼikorqanku. Sapa pʼunchay Diosmanta Qhelqasqata allinta [...] waturerqanku”. Ñuqanchikpis paykunajina ruwasunman (Hech. 17:11). Ajinata ruwaspaqa, Diosta sirviyta atisqanchikta, herencianchikjina kasqanta ima aswan sumaqpaq qhawasun.

Creeqllawan casarakuna

16. ¿Imatá 1 Corintios 7:39 kamachisqanta juntʼanapaq ruwananchik tiyan, ajinamanta Dios herencianchik kananpaq?

¹⁶ Wakin cristianosqa, soltero qhipakunanku kaptinpis Diospi “creej[llawan]” casarakuna kamachiyta kasukunku (1 Cor. 7:39). Paykunaqa, Jehová munakunanpi, yanapananpi ima atienekunanku tiyan. Chantapis sapayakuspa, llakisqa kaspa imaqa, Davidjina imachus llakichichkasqanmanta Payman willakunqanku. David nirqa: “Ñawpaqempi phutiyniyta willakuni; ñawpaqempi llakiyniyta sutʼinchakuni. Ancha llakisqapuni kashajtiy”, nispa (Sal. 142:1-3). Profeta Jeremiaspis wakin kutispi ajinapi rikukunman karqa. Imaraykuchus achkha watasta sapallan Diosmanta willarqa. Paymantaqa, Diosqa Jeremiasniqta parlapawanchik librop 8 yachaqananpi ukhunchakun.

17. ¿Imatá juk hermana sapayakuyta atipananpaq ruwan?

¹⁷ Estados Unidos suyupi tiyakuq hermana kawsayninmanta parlariwanchik, pay nin: “Mana soltera qhipakuyta munasqaytachu nichkani. Manaqa ñuqapaqjina hermanota tariyta suyachkani. Mamayqa mana Diosta yupaychanchu, payqa pillapis ñuqawan casarakuyta munaqwan casarakunaytapacha munaq. Chaywanpis tapurqani: Pillawanpis riqsiytawanpacha casarakuyman chayqa, mana allin riwaptin, ¿qamchu yanapawanki?, nispa. Tiemponmanqa, allin llamkʼayniyuq kasqayta, mana wakkuna yanapanawankutapunichu necesitasqayta, kusisqataq kasqayta repararqa. Chaymantapachataq niña imatapis niwaqchu”. ¿Imatá kay hermana sapayakuspa ruwan? Pay nin: “Jehovapi atienekuni, payqa ni jaykʼaq saqirpariwanchu”. ¿Imataq payta Jehovapi atienekunanpaq yanaparqa? Pay nillantaq: “Diosmanta mañakusqayqa mayta yanapawan. Chantapis Dios kasqantapuni, ñuqawantaq kachkasqanta yuyarichiwan. Tukuyta Kamachiq Dioswan parlaspaqa maytapuni kusikuni”, nispa. Payqa “aswan kusiy wajman qoriy qorichikunamanta” kasqanta reparan. Chayrayku nin: “Wakkunataqa, mana imata qunawankuta suyaspallachu yanaparini. Chantapis sapa kuti wakkunata yanapariypi yuyaspaqa, mayta kusikuni”, nispa (Hech. 20:35). Kay cristianaqa Jehovata yupaychayta, herenciantajina qhawasqantataq may sumaqpaq qhawan.

18. ¿Imaynatá Jehovap herencianman tukusunman?

¹⁸ Solteros kaspapis chayri casarasqas kaspapis, Jehová herencianchik kananta saqisunman. Ajinamantaqa, llaqtanpi kasqanchikmanta kusikusun (2 Cor. 6:16, 17). Unay tiempomanta kamachisninjinataq Jehovap herencian kayta atisunman (Deuteronomio 32:9, 10 ñawiriy). Jehovaqa, Israel suyuta herencian kananpaq akllarqa, ñuqanchiktapis sumaq herenciantajina qhawawasun nitaq saqirpariwasunchu (Sal. 17:8, 9).

[Sutʼinchaynin]

¿Imatá kutichiwaq?

Imaynatá Jehová herencianchik kananta saqinchik:

• Diospa Reinonta, chiqan kaynintawan ñawpaqta maskʼaspa

• Jehová quwasqanchikmanta agradecekuspa

• “Creej[llawan]” casarakuy kamachiyta jatunpaq qhawaspa

[13 paginapi sutʼinchaynin]

Jehovata ñawpaqta sirviptinchikqa, pay herencianchik kanqa

[15 paginapi dibujo/foto]

Jeremías ruwasqanqa mayta kallpachawanchik