Bibliamanta yachakusqankoqa kausayninkuta tijracherqa

¿IMATAJ uj runata tatasnin uywasqanku religionman kutinanpaj yanaparqa? ¿Imaynatá uj wayna munakuyniyoj tatata tarerqa, pitachus mayta maskʼasharqa? Imatachus paykuna kutichisqankuta qhawarina.

“Jehovaman kutirikuyta munarqani” (ELIE KHALIL)

NACEKUSQAN WATA: 1976

SUYUN: CHIPRE

ÑAUPAJ KAUSAYNIN: HERENCIANTA USUCHEJ WAYNA

ÑAUPAJ KAUSAYNIY: Chiprepi nacekorqani, Australiapitaj wiñakorqani. Tatasniy, Jehovamanta sutʼinchajkuna karqanku, Diosta, Palabranta imataj, munakuyta mayta yachachiwarqanku. Chaywanpis waynayashaspa manaña tatasniyta kasorqanichu. Tutasnin wasimanta llojsej kani, wiña masisniywantaj autosta suwaj kayku, sapa kutitaj chʼampaykunapi satʼikoj kani.

Qallariypeqa, pakayllamanta imatapis ruwaj kani, tatasniyta mana llakichinayrayku, chaywanpis pisimanta pisi imatapis ruwallajña kani. Amigosneyqa, kurajkunasniy karqanku, nitaj Jehová Diosta munakojchu kanku. Paykuna, sajra ruwaykunaman tanqawasqankurayku, uj kuti tatasniyman manaña creeyninkumanta yachayta munasqayta nerqani. Nitaj yanapanawankutapis saqerqanichu. Tatasneyqa, mayta llakikorqanku.

Wasimanta ripuytawantaj, drogasman qokorqani. Chantapis marihuanata tarpoj kani, ashkhatataj vendej kani. Khuchichakuyman urmarqani, fiesta wasillapiña sayaj kani. Chantá imallamantapis phiñarparikoj kani. Pillapis mana munasqayman jina ruwajtin chayri parlajtin chay ratopacha phiñarparikoj kani. Qhapariykoj chayri maqaykoj kani. Cheqamantapuni mana cristiano jinachu ruwasharqani.

BIBLIAMAN JINA KAUSAYNIYTA TIJRACHISQAY: Drogaman qokoj runawan, amigosta ruwakorqani, chay runajtaqa, tatan wawita kashajtin wañupusqa. Yaqha sutʼiyanankamataj parlarikoj kayku. Wakin kutisqa, tatanta mayta faltachasqanta niwaj. Wawitamantapacha, Biblia wañusqas kausarinankuta nisqanta yachasqayrayku, Jesús kay Jallpʼapi kashaspa wañusqasta kausarichisqanta, paraisopi kausarichinallantataj willarqani (Juan 5:28, 29). Nejtaj kani: “Tataykiwan watejmanta tinkukapunki, tukuytaj paraisopi kusisqas kausakusunchej”, nispa. Chayta uyarispa chay runaqa mayta kusikorqa.

Chantapis amigoyqa, wakin kutis, qhepa pʼunchaykunamanta, chayri Trinidad yachachiymanta yachakuyta munaj. Noqaqa, Jehová Diosmanta, Jesusmanta, qhepa pʼunchaykunamanta ima, imatachus Biblia yachachisqanta, Bibliallanpitaj rikucherqani (Juan 14:28; 2 Timoteo 3:1-5). Amigoyman Jehová Diosmanta astawan parlaspaqa, astawan Jehovapi yuyaj kani.

Tatasniy, Diosmanta yachachiwasqankuta, pisimanta pisi, yuyarikuyta qallarisharqani, imaraykuchus sonqoypi kasharqa. Wakin kuti amigosniywan fiestaspi drogakushaspa, jinallapi Jehovamanta yuyarikoj kani. Amigosneyqa, Diosta munakusqankuta nej kanku, chaywanpis ruwasqankoqa, mana chayta rikuchejchu. Puraj uya mana kayta munasqayraykutaj, Diosman kutirikunayta yacharqani.

Imatachus ruwananchej kasqanta yachanchej, chaywanpis chayta ruwayqa mana atikullanchu. Sutʼincharinapaj, drogasta, sajra amigosta ima saqeyta atillarqani, Bibliamantapis uj ancianowan yachakuyta qallarerqani.

Chaywanpis, phiñakuyniyta mana atipayta atillarqanichu. Wakin kuti phiñakuyniywan atipachikuspaqa, mayta llakikoj kani, ni imapaj sirvisqaytataj yuyaj kani. Chayrayku, Bibliamanta yachachiwaj hermanowan parlarerqani. Chay hermanoj paciencian, kʼacha kaynin imaqa, mayta kallpachawarqa. Uj kuti chay hermanoqa, La Atalaya revistamanta ujnin yachaqananta phiñakuyniywan mana atipachikunaypaj imatachus ruwanallaypajpuni leenayta niwarqa.a Phiñakuyniywan mana atipachikunaypaj, imatachus ruwanayta ukhuncharqayku. Chay yachaqanapi tʼukurispa, Jehovamanta mañakuspa ima, pisimanta pisi phiñakuyniyta atiparqani. Kay 2000 watapi Jehovamanta sutʼinchaj jina bautizakorqani, tatasniytaj mayta kusikorqanku.

BENDICIONESTA JAPʼISQAY: Kunanqa, sonqo tiyasqa kausakuni, sonqo yuyayninpis llimphu, manañataj cuerpoyta drogawan, khuchichakuykunawan chʼichichanichu. Ñaupajmanta nisqaqa, kunan tantakuykunaman rispa, llankʼaspa, sonqota kusirichispa ima, may kusisqa, manañataj qhasipajchu kausasqayta yachani.

Jehová Diosman mayta agradecekuni, kʼacha tatasta qowasqanmanta, imaraykuchus tatasneyqa Diosman kutirikunayta suyasharqanku. Chantapis Jesús imatachus Juan 6:44 nisqanpi tʼukurini, pay nerqa: “Mana pipis noqaman jamunmanchu, manachus kachamuwaj Tatay pusamunman chayqa”, nispa. Mayta kusikuni, Jehová, Payman pusawasqanrayku kutirikusqaymanta.

“Tatayoj kayta munarqani” (MARCO ANTONIO ALVAREZ SOTO)

NACEKUSQAN WATA: 1977

SUYUN: CHILE

ÑAUPAJ KAUSAYNIN: HEAVY-METAL BANDAPI TOCAJ

ÑAUPAJ KAUSAYNIY: Chile suyumanta, Punta Arenas llajtapi, mamaywan tiyakorqani. Phishqa watayoj kashajtiy, tatasneyqa tʼaqakorqanku, chaytaj mayta llakichiwarqa. Tatayoj kaytataj munarqani.

Mamayqa, Jehovamanta sutʼinchajkunawan, Bibliamanta yachakusharqa, tantakuykunamantaj pusawaj. Noqaqa mana riyta munajchu kani, chayraykutaj sapa kuti rishaspa, qʼellikuspa, jistuspa mamayta phiñachej kani. Chunka kinsa watayoj kasqaymantapachataj manaña tantakuykunaman rejchu kani.

Chay kutispajqa, takiykuna maytaña gustawaj, tocayta yachasqaytataj repararqani. Chayrayku 15 watayoj kashajtiy localespi, fiestaspi, heavy-metal sutichasqa takiykunata tocaj kani. Sumajta tocaj amigoswan masichakusqayraykutaj música clásica, nisqa gustawaj. Universidadpi takiykunata yachakuyta qallarerqani, 20 watayoj kashaspataj, astawan yachakunaypaj Santiagoman riporqani. Chaypitaj heavy-metal bandaspi tocallajpuni kani.

Chaywanpis mana sonqo juntʼasqachu karqani. Llakiykunasniyta qonqanaypajtaj, bandapi tocaj amigosniywan machaykoj, drogakoj ima kani, paykunataqa familiayta jina qhawaj kani. Mana kasukoj runa kasqayqa, yana pʼachawan pʼachallikusqaypi, sunkhayoj kasqaypi, chujchasapa kasqaypi ima rikukoj.

Sapa kuti maqanakusqayrayku policiawan apachikoj kani. Uj kuti drogasta vendejkuna, amigosniyta, noqata ima toriawarqayku. Machasqa kaspataj, chay runasta maqayta qallarerqani, paykunaqa maqaykuwaspa quijadayta pʼakiykuwarqanku.

Amigosniy ruwawasqanku, astawanraj sonqoyta nanachiwarqa. Uj pʼunchay noviay aswan sumaj amigoywan, watastaña wasanchawasqanta, tukuynin amigosniy chayta pakawasqankuta ima yacharqani. Chaytaj mayta llakichiwarqa.

Punta Arenasman kutiporqani, violonchelota tocaspa, takiykunamanta yachachispa imataj llankʼarqani. Chantá heavy-metal bandaspi graballarqanipuni. Chay kutispitaj Sussanta rejserqani, paywantaj tiyakuyta qallarerqani. Aswan qhepamantaj Sussanqa, maman, Trinidad yachachiypi creesqanta, noqa chay yachachiypi mana creesqayta ima yacharqa. Chayrayku tapuwarqa: “¿Chantá mayqentaj cheqari?”, nispa. Trinidad yachacheyqa, llulla kasqanta nerqani, chaywanpis Bibliapi chayta mana rikuchiyta atisqayta nillarqanitaj. Chaywanpis Jehovamanta sutʼinchajkuna Bibliawan sutʼinchayta atisqankuta nerqani. Chay kutipitaj Diosmanta yanapata mañakorqani, chaytaqa watastaña mana ruwarqanichu.

Pisi pʼunchayninmantaj, rejsisqay runata jina rikorqani, chantá Jehovamanta sutʼinchajchus manachus kasqanta taporqani. Payqa, imaynachus pʼachallisqa kasqaymanta mancharikorqa, chaywanpis ima diaschus tantakuykuna kasqanta kʼachamanta niwarqa. Chay hermanowan tinkuspa, Jehová mañakuyniyta uyarisqanta yacharqani. Tantakuyman rerqani, ni pi rikunawanpajtaj, qhepapi tiyakorqani. Chaywanpis hermanos, yoqallitu kasqaymantapacha rejsiwasqankurayku, noqamanta yuyarikorqanku. Hermanosqa rikuwaspa kusikorqanku, abrazawarqanku ima, chaytaj mayta kusichiwarqa. Familiaywanpis kashayman jina karqani. Wawa kashajtiy Bibliamanta yachachiwaj hermanota rikuspa, watejmanta yachachinawanta nerqani.

BIBLIAMAN JINA KAUSAYNIYTA TIJRACHISQAY: Uj pʼunchay Proverbios 27:11 versiculota leerqani, chaypi nin: “Yachayniyoj kay, wawáy, kusichiwankitaj”, nispa. Uj juchasapa runa, Diosta kusichiyta atisqanpi yuyayqa tʼukuchiwarqa. Chantá Jehová Dios maskʼasqay tata kasqanta entienderqani.

Janaj pachapi kaj Tatayta kusichiyta, munayninta ima ruwayta munarqani, chaywanpis watastaña alcoholman, drogasman ima qokorqani. Jesús, Mateo 6:24 versiculopi nisqanta entienderqani, chaypi nin: “Mana pipis atinchu iskay patronesta ujllapi sirviyta”, nispa. Kausayniyta tijrachinaypaj kallpachakushajtiy, 1 Corintios 15:33 yuyaychasqan mayta yanapawarqa, chaypi nin: “Ama chʼawkiyachikuychejchu. Sajra runaswan pureyqa kʼacha ususta chinkachin”, nispa. Sajra runaswan purillajtiypuneqa, ni jaykʼaj sajra ruwaykunata saqeyta atinayta yacharqani. Bibliaj yuyaychasqanqa, sutʼi karqa, chayrayku imaschus urmachinayawasharqa chayta usqhayllata saqenay karqa (Mateo 5:30).

Takiykuna maytapuni gustawasqanrayku, heavy metal nisqa takiykunata tocayta, uyariyta ima mana saqeyta atillarqanichu. Chaywanpis qotuchakuymanta amigosniypa yanapayninwan saqeyta aterqani. Manaña machajchu kani, niñataj drogakojchu kani, sunkhayta, chujchayta ima kʼutukorqani, manañataj yana pʼachata churakojchu kani. Sussanman, chujchayta kʼutuchikunayta nejtiy, payqa imaraykuchus kʼutuchikuyta munasqayta yachayta munarqa, niwarqataj: “Tantakuyniykiman, qanwan risaj, imatachus yachachishasusqankuta yachanaykipaj”, nispa. Payqa, tantakuy mayta gustasqanrayku, Bibliamanta yachakuyta qallarerqa. Tiemponmantaj casarakorqayku, 2008 watapitaj iskayniyku Jehovamanta sutʼinchaj jina bautizakorqayku. Kunantaj, mamaywan khuska Jehová Diosta kusiywan sirvishayku.

BENDICIONESTA JAPʼISQAY: Kay sajra pachata, wasanchaj amigosta ima saqeni. Takiykunaqa, gustallawanpuni, chaywanpis ima takiykunatachus uyariyta, takiyta ima sumajta ajllani. Kausayniymanta parlarini, familiaresniyta, waj runasta, astawanraj waynasta yanapanaypaj. Kay sajra pacha, tukuy imasta rikuchisqan imaqa allillan rijchʼakunman, chaywanpis “qʼopa jina” kasqanta yachanankuta munani (Filipenses 3:8).

Diosman qayllaykuspa, qotuchakuypi cheqa sonqo amigosta tarini, chaypeqa munakuy rikukun. Chaywanpis munakuyniyoj Tatata tarini.

[Sutʼinchaynin]

[13 paginapi sutʼinchaynin]

“Jehová, payman pusawasqanrayku kutirikuni”