¿Yuyarikunkichu?

¿Kay killasmanta Torremanta Qhawaj revistasta leerqankichu? ¿Kay tapuykunaman kutichiyta atiwajchu?

¿Jesusmantachu mañakunanchej tiyan?

Mana. Jesusqa Diosmanta mañakunata yachacherqa, paypis Diosmanta mañakorqa (Mat. 6:6-9; Juan 11:41; 16:23). Yachachisqasninpis Jehovamanta mañakorqanku, nitaj Jesusmantachu (Hech. 4:24, 30; Col. 1:3, 4) (1/1, página 14).

¿Imaynatá Jesuspa wañuyninta yuyarinapaj wakichikusunman?

Jesús wañupusqanmanta ajllasqa versiculosta leespa. Astawan willaj rispa. Ima suyakuytachus Jehová qowasqanchejpi tʼukurispa, Jehovamanta mañakuspa ima (15/1, páginas 14-16).

¿Imapitaj rikukorqanku iskay presochasqa egipcios Joseman mosqoyninkumanta willajtinku?

Joseqa vinota jaywajkunaj kurajninman, vino jaywananman kutiykunanta nerqa. Tʼantata ruwajmanrí, faraón sachʼaman warkhuchispa wañuchinanta nerqa. Chaytaj José nisqanman jinapuni karqa (Gén. 40:1-22) (1/2, páginas 12-14).

¿Ima regalotataj Japonmanta hermanos japʼerqanku?

Traducción del Nuevo Mundo nisqa Bibliamanta Mateo librota japonespi japʼerqanku. Hermanosqa willaypi chay librowan mayta yanapachikushanku, ashkha japonesestaj Bibliamanta pisillata yachaspapis, leeyta munanku (15/2, página 3).

¿Imataj ñaupa tiempomanta cristianosta willayninkuwan tukuynejman chayanankupaj yanaparqa?

Romapeqa pax romana kasqanrayku, allin kausay karqa. Astawan ñankunata ruwasqankuraykutaj cristianosqa chay ñankunanejta viajarqanku. Ashkha runas griegota parlasqankuraykutaj, willayninkuwan tukuy laya runasman chayarqanku. Romamanta leyqa, ‘evangelio’ cheqa kasqanta rikuchinankupaj yanaparqa (15/2, páginas 20-23).

¿Imaraykú cheqa cristianos Pascuata mana ruwankuchu?

Imaraykuchus Jesusqa mana yachachisqasninman kausarimuyninta yuyarinankutachu nerqa, manaqa wañuyninta (Luc. 22:19, 20) (1/3, página 8).

¿Imaraykú publicacionesninchej niña anchata sutʼinchanchu Bibliapi runasmanta, wakin imasmanta ima parlakusqan, jamoj imaswan ninakusqanta?

Bibliaqa wakin runasmanta parlaspa, jamoj imaswan ninakusqanta nin. Chaymanta uj sutʼinchaytaj Gálatas 4:21-31 versiculospi kashan. Bibliapi chaykunamanta mana sutʼinchajtenqa, mana imawanchus ninakusqanta maskʼanachu tiyan. Astawanqa chaykuna imatachus yachachiwasqanchejta japʼikuna (Rom. 15:4) (15/3, páginas 17, 18).

¿Imaraykutaj Egiptopi qʼopa ukhupi valorniyoj imata tarisqanku may sumaj karqa?

Pachaj watas jinaña, qʼopa ukhupi totoramanta ruwasqa papelpi apóstol Juanpa qhelqasqasninmanta uj chhikanta tarerqanku. Chaytaj, Juan wañupusqanmanta ashkha watasninman qhelqakorqa. Chay tarisqanku qhelqaqa, Bibliaj nisqasnin kunankamapis kikillanpuni kasqanta rikuchin (1/4, páginas 10, 11).

¿Imaraykutaj nisunman juchallikojta qharqoy Jehovaj munakuyninta rikuchisqanta?

Bibliaqa juchallikojta mana pesachikojtin qotuchakuymanta qharqona may sumaj kasqanta nin (1 Cor. 5:11-13). Imaraykuchus Diospa sutinta jatunchan, qotuchakuyta llimphu kananpaj yanapan, juchallikojtapis yuyayninman churakunanpaj, pesachikunanpaj ima yanapanman (15/4, páginas 29, 30).