Willayninchej Chhulla Jina

WILLAYNINCHEJQA may valorniyoj. Jinapis mana tukuy runaschu valorniyojpaj qhawanku. Wakin runas Bibliata allinpaj qhawaspapis mana creenkuchu noqanchejwan Bibliamanta yachakunanku kasqanta.

Sutʼincharinapaj, Gavinqa tantakuykunaman rispapis, mana munajchu Bibliamanta yachakuyta. Pay nin: “Bibliamanta pisillata yachaj kani, chaytataj ni pi reparananta munarqanichu. Nitaj munajchu kani chʼaukiyanawankuta, religionninkumanta kanaypaj tanqanawankuta ima”, nispa. Gavinta qan rejsiwaj karqa chay, ¿imatataj yuyawaj karqa? ¿Gavinta yanapayta atikullanmanchu karqa? Bibliaj yachachiykunasnin imaynatachus runata kausayninpi yanapananpi tʼukuriy. Jehová nerqa israelitasman parlasqasnin “chhulla jina ka[nanta], qhora patapi[taj] chhillchi jina” (Deu. 31:19, 30; 32:2). Willayninchej imaspichus chhullawan kikinchakusqanta qhawarina, ajinamanta “tukuy runas[ta]” sumajta yanapayta atisun (1 Tim. 2:3, 4).

Sutʼiyaymanta chhullaqa may sumaj. ¿Imaynatá chhulla rikhurin? Yaku wausisqan chiriyasqanman jina pisimanta pisi juchʼuy yaku sutʼuysitusman tukun, ajinamanta chhullaqa rikhurin. ¿Imaraykú Biblia nin Jehovaj parlasqan chhulla jina kasqanta? Jehová llajtanman kʼachamanta, munakuywan, khuyakuywan ima parlasqanrayku. ¿Imaynatá Jehová jina ruwasunman? Imapichus runas creesqankuta respetaspa. Paykuna kikinku tʼukurinankupaj, ajllanankupaj ima yanapaspa ima. Ajinata ruwanchej chayqa, imatachus nisqanchejta japʼikonqanku, willayninchejtaj sonqonkuman chayanqa.

Sutʼiyaymanta chhullaqa uj qhasa yakitu jina. Willayninchej waj runaspaj uj qhasa yakitu jina kananpajqa, Bibliamanta astawan yachakunankupaj imaymanamanta yanapaypi tʼukurinanchej tiyan. Chris sutiyoj hermanoqa Gavinta Bibliamanta yachachisqayki nerqa. Chaywanpis mana tanqarqachu yachakunanpaj. Astawanpis waj jinasmanta yanaparqa Bibliamanta yachakuyta munananpaj. Chrisqa Gavinman nerqa Biblia uj sumaj yachachiyllamanta parlasqanta, chaymanta yachakuytaj tantakuykunapi yachachikusqanta sumajta entiendenanpaj yanapananta. Chantá Chrisqa Bibliaj yachachiynin cheqapuni kasqanta yachananpaj Bibliaj profeciasnin payta yanapasqanmanta Gavinman nerqa. Chayraykutaj Bibliaj profeciasnin juntʼakusqanmanta mayta parlarerqanku. Ajinamantataj Gavinqa may kallpachasqa kasharqa, Bibliamantataj yachakuyta qallarerqa.

Sutʼiyaymanta chhullaqa kausananchejpaj yanapawanchej. Israelpeqa chʼaki tiempopi manchay calor. Ashkha killastataj pisillata paran. Chhulla mana kajtenqa, plantitas chʼakipunman. Jehovaqa kay tiemponchejpi paypa “palabranta uyarinamanta” runas chʼakichikunankuta nerqa (Amós 8:11). Chantá ajllasqa cristianos “Diospa apachimusqan chhulla jina” kanankuta nillarqataj. Imaraykuchus paykuna Diospa gobiernon imastachus apamunanta runasman willananku karqa. “Waj ovejas[manta]” kajkunataj paykunawan khuska willamunku (Miq. 5:7; Juan 10:16). Willayninchejqa cheqa kajta uyariyta munajkunata yanapan, Diosmanta yachakunankupaj, Diospa amigosnin kanankupaj ima. Chayrayku chay willayta, jatunpaj qhawananchej tiyan.

Sutʼiyaymanta chhullaqa Jehovamanta uj bendición (Deu. 33:13). Willayninchejqa uyarejkunapaj uj bendición chayri uj regalo kanman. Gavinpajqa Bibliamanta yachakusqan uj bendición karqa, imaraykuchus tapuykunasninpa kutichiykunasninta tarerqa. Chantapis mayta ñauparerqa, bautizakorqa ima. Kunantaj warmin Joycewan Diosmanta khuska willaspa may kusisqa kashan.

Willayninchejta chhullawan kikinchasun chayqa, willaypi sapa uj yanapakusqanchej may sumaj kasqanta reparasun. Imaraykuchus uj yaku sutʼuysitullawanqa mana pampata joqʼochayta atisunmanchu. Ajinallataj willayninchejwanpis, ujllaqa mana tukuy runasman willayninchejwan chayayta atisunchu, chaywanpis tukuyninchej willamusunchej chayqa “tukuy runas[man]” willayninchejwan chayasun (Mat. 24:14). Willayninchej runaspaj uj bendición kananpajqa, chhulla jina may sumaj, uj qhasa yakitu jina, kausayninchejpaj may sumaj ima kanan tiyan.