Suyakushasqanchejpi creeyninchejta sinchʼiyachina

1, 2. 1) ¿Imapitaj mana kikinchu Diospa kamachisnin imatachus suyakusqankuwan, runas suyasqankuwan? 2) ¿Imatá kay yachaqanapi yachakusunchej?

JEHOVAQA sumaj imasta ruwananta niwanchej. Sutʼincharinapaj, sutinta llimphuchanqa, munaynintataj ruwanqa cielopi jinallataj kay Jallpʼapipis (Mat. 6:9, 10). Kay imas ruwakunantaqa mayta suyakushanchej. Chantapis Jehovaqa nillawanchejtaj cielopi chayri Jallpʼapi wiñay kausayta qonawanchejta (Juan 10:16; 2 Ped. 3:13). Chantapis suyakushallanchejtaj kay qhepa pʼunchaykunapi, Jehová imaynatachus yanapanawanchejta, ñaupajman pusanawanchejta ima.

² Biblia nin: “Creespaqa yachanchej, imapichus suyakushanchej, chayta japʼinanchejtapuni”, nispa. Kaytaj niyta munan, tukuy creejkuna Jehovaj tukuy ima nisqan juntʼanantapuni yachasqanchejta (Heb. 11:1). Kay tiempopi ashkha runasqa imallatapis japʼiyta suyakushanku chayri munashanku. Jinapis mana yachankuchu chay imasta maykʼajllapis japʼinankutapuni. Sutʼincharinapaj, uj runaqa ichapis ashkha qolqeta sorteopi ganakuyta munanman. Jinapis mana yachanchu gananantapuni. Kay yachaqanapi yachakusunchej imaynatachus Jehovaj nisqasninpi creeyninchejta kallpachananchejta. Chantá yachakullasuntaj imaynatachus kay tiempopi sinchʼi creeyniyoj kasqanchej yanapawasqanchejta.

 3. ¿Imaraykú atienekunchej Diospa nisqasnin juntʼakunanpi?

³ Mana pipis creeyniyojchu nacekunchej. Creeyniyoj kayta munanchej chayqa, Diospa atiyninwan yanapachikunanchej tiyan (Gál. 5:22, Mosoj Testamento [MT], 1956). Jehovaj atiynenqa yanapawasun payta rejsinapaj. Paylla tukuy atiyniyoj, yachayniyojtaj kasqanta entiendespaqa, tukuy ima nisqan juntʼakunanpi atienekusunchej. Jehovaqa yachan tukuy ima nisqanta juntʼanantapuni, chaymantataj parlan juntʼanmanñapis jina. Chayrayku nin: “Tukuy ima ruwasqaña”, nispa (Apocalipsis 21:3-6 leey). Jehovaqa “cheqa kaj Dios”, imaraykuchus tukuy ima nisqanta juntʼanpuni. Chayrayku imastachus aswan qhepaman ruwananta niwasqanchejpi atienekunchej (Deu. 7:9).

 4. ¿Imapitaj Diospa kamachisnin creerqanku?

⁴ Hebreos libroj 11 capitulonpeqa, Diospa 16 kamachisninmanta parlakun. Paykunaqa Jehovaj nisqasninpi sinchʼita creerqanku. Chantá Diospa waj kamachisninmanta parlakullantaj, pikunachus “creesqankurayku” Jehovata kusicherqanku (Heb. 11:39). Tukuy paykunaqa, ‘warmej mirayninta’ suyasharqanku, mayqenmantachus Jehová parlarqa, chayta. Chantapis paykunaqa yacharqanku, warmej miraynin Diospa tukuy enemigosninta chinkachinanta, Jallpʼatataj uj paraisoman tukuchinanta (Gén. 3:15). Yachallarqankutaj, wañupojtinku paykunata Dios kausarichinanta. Nitaj suyasharqankuchu cielopi kausarichisqa kayta, imaraykuchus Jesusqa niraj wañuporqachu chay suyakuy kananpaj (Gál. 3:16). Astawanpis suyakorqanku kay Jallpʼapi wiñaypaj kausakuyta, uj kʼachitu paraíso kajtin (Sal. 37:11; Isa. 26:19; Ose. 13:14).

5, 6. 1) ¿Imatá Abrahamwan, familianwan suyakorqanku? 2) ¿Imatá ruwarqanku sinchʼi creeyniyojllapuni kanankupaj? (21 paginapi dibujota qhawariy).

⁵ Hebreos 11:13 Diospa cheqa sonqo kamachisninmanta nin: “Diospa nisqampi creespallapuni wañuporqanku, chay Diospa qonan kasqanta manaraj japʼishaspa. Karullamanta chay imasta rikorqanku, napaykorqankutaj”, nispa. Paykunaqa paraisota suyakusharqanku, chaypiñapis tiyakushankuman jinataj yuyaj kanku. Paykunamanta ujnenqa Abraham karqa. Jesús paymanta nerqa: “Kusikorqa pʼunchayniyta rikunanta yuyaspa, rikuspataj mayta kusikorqa”, nispa (Juan 8:56). Sara, Isaac, Jacob, wajkuna ima suyakullarqankutaj Diospa Gobiernon ima pʼunchaychus kay Jallpʼata kamachimunanta (Heb. 11:8-11).

⁶ ¿Imatá Abraham, familian ima ruwarqanku sinchʼi creeyniyojllapuni kanankupaj? Jehovamanta yachakullarqankupuni. Wakin kuteqa yachakorqanku angelesnejta, Dios mosqoypi jina parlasqannejta ima. Ichapis yachakullarqankutaj Diospa ñaupa kamachisninmanta chayri ñaupa qhelqasmanta ima. Abraham, familian ima nipuni qonqarqankuchu Diospa nisqasninta. Paykunamanqa chaykunapi tʼukuriy mayta gustaj. Chayrayku ni jaykʼaj iskayrayarqankuchu Jehovaj nisqasnin juntʼakunanmanta. Chaytaj Jehovaman cheqa sonqollapuni kanankupaj yanaparqa, chʼampaykunasniyoj, qhatiykachasqas kajtinkupis.

 7. ¿Imatá Jehová qowanchej sinchʼi creeyniyoj kanapaj, imatá ruwananchej tiyan?

⁷ ¿Imataj yanapawasun sinchʼi creeyniyoj kanapaj? Jehovaqa Bibliata qowanchej. Chaynejtataj yachachiwanchej imatachus qhepaman ruwananta, imatachus kusisqa kanapaj ruwananchejta ima. Chayrayku Bibliaj yuyaychayninman jina kausakunanchej, sapa día leenanchej ima may sumaj (Sal. 1:1-3; Hechos 17:11 leey). Chantapis Jehovaqa “allin kamachi, yuyayniyoj[nejta]” “horampi mikhunata” qowanchej (Mat. 24:45). Ñaupa tiempomanta Diospa kamachisnin jina, noqanchejpis Jehovaj nisqasninpi tʼukurinanchej, leenanchej ima tiyan. Chaytaj yanapawasun Diosman cheqa sonqollapuni kanapaj, Diospa Gobiernon ima pʼunchaychus kay Jallpʼata kamachinanta suyakunapaj ima.

 8. ¿Imaynatá Diosmanta mañakuy yanapawanchej sinchʼi creeyniyoj kanapaj?

⁸ ¿Imapiwantaj Diospa ñaupa tiempomanta kamachisninta yanaparqa sinchʼi creeyniyoj kanankupaj? Jehovamanta yanapata mañakusqanku, mañakusqankuta uyarisqanta yachasqanku ima (Neh. 1:4, 11; Sal. 34:4, 15, 17; Dan. 9:19-21). Ajinallatataj, creeyninchej sinchʼiyanqa Jehovamanta yanapata mañakojtinchej, mañakusqanchejta uyarisqanta yachajtinchej, maychus tiemponpi necesitasqanchejta qowajtinchej ima (1 Juan 5:14, 15 leey). Jehovaj atiyninta mañakunallapuni, sinchʼi creeyniyoj kanapaj (Luc. 11:9, 13).

 9. ¿Imasraykutaj Diosmanta mañakusunman?

⁹ Jehovamanta mañakushaspaqa, mana necesitasqallanchejtachu mañakunanchej tiyan. Manaqa mañakushaspa agradecekunanchej tiyan, sapa diataj jatunchananchej tiyan. Imaraykuchus Jehová noqanchejpaj ruwarqa ashkha tʼukuna imasta (Sal. 40:5). Chantapis Jallpʼantinmanta hermanospaj mañakunanchej tiyan. Sutʼincharinapaj, mañakusunman carcelpi kaj hermanospaj, ancianospaj ima. Mañakuykunasninchejta Jehová uyarisqanta yachaspaqa, astawan payman qayllaykunchej, creeyninchejtaj astawan sinchʼiyan (Heb. 13:3, 7).

10. ¿Imaraykú Diospa ashkha kamachisnin mana manchachikorqankuchu, cheqa sonqosllapunitaj karqanku?

¹⁰ Apóstol Pabloqa Hebreos libroj 11 capitulonpi nerqa: “Wakin warmispis wañusqasninkuta kawsarichisqata japʼikaporqanku. Wakin runastajrí sinchʼi ñakʼarichisqa wañorqanku, manataj munarqankuchu kacharichisqa kayta, aswan sumaj kawsarimpuyta taripanankurayku”, nispa (Heb. 11:35). Diospa ashkha kamachisnin cheqa sonqosllapuni karqanku, chʼampaykunapi rikukuspapis. Imaraykuchus creerqanku wañusqasta Dios kausarichinanpi. Yacharqankutaj aswan qhepaman Jehová paykunata kausarichinanta, kay Jallpʼapi wiñaypaj kausakunankuta ima. Imapichus Nabot, Zacarías ima rikukusqankupi tʼukurina. Paykunaqa Diosta kasukusqankurayku rumiswan chʼanqasqa wañorqanku (1 Rey. 21:3, 15; 2 Cró. 24:20, 21). Danielqa wijchʼuykusqa karqa yarqhasqa leonesman. Kinsa amigosnintaj nina larwashaj hornoman wijchʼuykusqas karqanku. Paykunaqa wañuytapis mana manchachikorqankuchu, Diosman cheqa sonqo kayta munasqankurayku. Paykunaqa Jehová atiyninta qonanpi, ima ñakʼariytapis aguantanankupaj yanapananpi ima atienekorqanku (Dan. 3:16-18, 20, 28; 6:13, 16, 21-23; Heb. 11:33, 34).

11. ¿Imatá aguantarqanku wakin profetas creeyninkurayku?

¹¹ Ashkha profetas Micaya, Jeremías jina ‘alqochasqa, carcelespi watasqa ima karqanku’. Elías jinataj wakin profetasqa “chʼin pampaspi, orqospi ima ayqeykachaspa purikorqanku, qaqa juskʼuspi, jallpʼa tʼoqospi ima kawsakuspa”. Ajinapi rikukuspapis tukuyninku cheqa sonqollapuni karqanku. Imaraykuchus yacharqanku ‘imatachus suyakusqankuta japʼinankutapuni’ (Heb. 11:1, 36-38; 1 Rey. 18:13; 22:24-27; Jer. 20:1, 2; 28:10, 11; 32:2).

12. ¿Pimantataj mayta yachakusunman, imataj yanaparqa jatuchaj llakiykunata aguantananpaj?

¹² Jesucristomanta mayta yachakusunman. Payqa astawan jatun llakiyta aguantarqa, Jehovamantaj cheqa sonqo karqa. ¿Imataj yanaparqa aguantananpaj? Pablo nerqa: “Diospa churasqan kusiyta aswan qhepaman taripananta yachasqanrayku, payqa [kurkupi] ñakʼarerqa pʼenqaypi rikhurinanta mana kasu ruwaspa, Diospa pañanmantaj tiyaykukorqa”, nispa (Heb. 12:2). Chayrayku Pabloqa cristianosta nerqa Jesusmanta yuyarikunankuta (Hebreos 12:3 leey). Jesús jina, ñaupa tiempomanta ashkha cristianos, Jehovata kasukusqankurayku wañorqanku. Chay cristianosmanta ujnenqa Antipas karqa (Apo. 2:13). Chay cristianosqa suyakusqanku tʼinkata japʼinkuña. Paykunamanta ñaupajta kausakojkunataj, kay Jallpʼapi kausakuyta suyakushanku (Heb. 11:35). Jesús 1914 watapi kamachiyta qallarerqa. Chaymanta pisi tiemponmantaj ajllasqa cristianosmanta wañojkunaqa cielopi kausakunankupaj kausarimorqanku. Paykunataj ni jaykʼaj wañuyta rejsenqankuchu, Jesuswan khuskataj runasta kamachimonqanku (Apo. 20:4).

13, 14. ¿Ima llakiykunapitaj hermano Rudolf rikukorqa, imataj yanaparqa chaykunata aguantananpaj?

¹³ Kunanpis ashkha hermanos Jesús jina ruwanku. Paykunaqa Jehovaj nisqasninpi tʼukurinku, chʼampaykunapi rikukuspataj Jehovaj nisqasninta mana qonqapunkuchu. Kunantaj Rudolf Graichen hermanoj kausayninmanta parlarina, payqa Alemaniapi nacekorqa 1925 watapi. Chay hermanoqa yuyarikun jovencito kashaspa, wasinpa perqasninpi Bibliamanta cuadrosta pintasqata rikusqanta. Pay nin: “Ujnin cuadropi pintasqa kasharqa atojwan ovejawan, leopardowan chivituwan, waka uñawan leonwan ima: tukuyninkutaj khuska kasharqanku, uj wawallataj michisharqa”, nispa (Isa. 11:6-9). Chaytaj chay hermanota yanaparqa paraisopi yuyanallanpajpuni, chay suyakuypi creeyninta sinchʼiyachinanpaj ima. Chayraykutaj Jehovaman cheqa sonqollapuni karqa, Alemania nazi nisqamanta policía, Alemania comunista nisqamanta policía ashkha watasta mayta qhatiykachajtinkupis.

¹⁴ Rudolf hermanoqa waj llakiykunapi rikukullarqataj. Maman Ravensbrück nisqa carcelpi wisqʼasqa kashaspa tifus nisqa onqoywan wañuporqa. Tatantaj uj documentota firmarqa, manaña Jehovaj testigonchu kasqanta ninanpaj. Jinapis payqa sinchʼi creeyniyojllapuni karqa. Carcelmanta llojsiytawantaj congregacionesta waturispa llankʼarqa. Chantá Galaad Escuelaman rerqa, Chilemantaj kachasqa karqa. Chilepitaj congregacionesta waturispa llankʼallarqataj, Patsy nisqa misionerawantaj casarakorqa. Casarakusqankumanta watanmantaj, wawitanku nacekuytawan wañuporqa. Unayninmantaj warmin 43 watasniyoj wañuporqa. Ajina llakiykunapi rikukuspapis hermano Rudolfqa, Jehovata sirvillarqapuni. Machituña kaspapis, onqosqa kaspapis, precursor regular karqa, ancianotaj. Kausayninmanta La Atalaya del 1 de agosto de 1997 revistaj, 20-25 paginasninpi leesunman.^[1]

15. ¿Pikunataj qhatiykashasqa kaspapis kusisqa kashanku?

¹⁵ Kunanpis Jehovaj testigosnenqa Diosta kusiywan sirvishallankupuni sinchʼi qhatiykachasqa kaspapis. Paykunamanta ashkhas Eritreapi, Singapurpi, Corea del Surpi ima wisqʼasqas kashanku, “espadata” mana oqhariyta munasqankurayku (Mat. 26:52). Sutʼincharinapaj, hermanosninchej Isaac, Negede, Paulos ima 20 watasmanta astawanña Eritreapi wisqʼasqa kashanku. Chaypitaj mayta ñakʼarichishanku. Tukuy chay wataspi paykunaqa casarakuyta, tatasninkuta qhawayta ima mana atinkuchu. Jinapis Jehovaman cheqa sonqosllapuni kanku, sinchʼi creeyniyojtaj. Kunantaj carcelmanta guardiaspis paykunata respetanku. Paykunaj fotonku jw.org nisqapi rikhurin, mayta ñakʼarispapis kusisqa kashanku.

16. Sinchʼi creeyniyoj kajtinchej, ¿imatataj ruwayta atisun?

¹⁶ Mana tukuy hermanoschu carcelespi kashanku chayri ñakʼarichisqa kashanku. Jinapis ashkhas ñakʼarishanku wajchayay, sinchʼi llakiykuna, guerras kasqanrayku. Wakintaj Abraham jina, Isaac jina, Jacob jina, Moisés jina ruwanku. Jehovata tukuy atisqankuta sirvinankupajtaj may rejsisqa chayri qhapaj kayta qhesachanku. ¿Imataj hermanosninchejta yanapan Diosta kusiywan sirvinallankupajpuni? Diosta munakusqanku, Diospa nisqasninpi sinchʼita creesqanku ima. Yachankutaj Jehová cheqa sonqo kamachisninman paraisopi wiñay kausayta qonanta. Chaypitaj cheqan kausaylla kanqa (Salmo 37:5, 7, 9, 29 leey).

17. 1) ¿Imatá ruwananchej tiyan sinchʼi creeyniyoj kanapaj? 2) ¿Imatá qhepan yachaqanapi yachakusunchej?

¹⁷ Kay yachaqanapeqa yachakorqanchej imaynatachus Jehovaj nisqasninpi tʼukuriy, mana saqespa mañakuy ima sinchʼi creeyniyoj kanapaj yanapawasqanchejta. Chaytaj creeyninchejrayku llakiykunapi kajtinchej, aguantanapaj yanapawasun, ‘imapichus suyakushanchej, chayta japʼinanchejkama’. Bibliataj creeymanta astawan sutʼinchan, chaytataj qhepan yachaqanapi yachakusunchej.