“Pikunachus Tata Diosman sayasqa kajkuna jamuychej noqaman”

1, 2. 1) ¿Imajtintaj may sumajpuni kasqa Diospa qayllallanpipuni kananchej? 2) ¿Imatataj qhepan parrafospi yachakusunchej?

JEHOVÁ DIOSLLA may atiyniyoj, may jina yachayniyoj, maytataj munakuwanchej. Chayrayku payman qayllaykoyqa may sumajpuni. Ni imarayku munasunmanchu paymanta karunchakuytaqa (Sal. 96:4-6). Chaywanpis wakin runasqa Diosmanta karunchakorqanku.

² Chayrayku qhepan parrafospi yachakusunchej Diospa wakin kamachisninmanta. Paykunaqa Diosta simillamanta yupaycharqanku, sajra imastataj ruwarqanku. Paykunamanta yachakoyqa yanapawasunchej Diosmanta ni imarayku karunchakunapaj.

 3. ¿Imatataj Jehová Dios Cainman nisqa?

³ Cainmanta parlarinachej. Payqa mana llulla diosesta yupaychaspapis sajra imasllapi yuyaj. Chayrayku Jehová Diosqa payta mana allinpajchu qhawarqa (1 Juan 3:12). Chaywanpis Jehová Diosqa, Cainta yanapayta munaspa nerqa: “Sichus allinta ruwawaj chayqa, mana jina uyayojchu kawaj. Qanqa mana allintachu ruwanki, chayrayku juchaqa atipasuytaña munashan. Manachus jina kawaj chayqa, juchata atipawaj”, nispa (Gén. 4:6, 7). Chayta nispa Jehová Diosqa, Cainta nisharqa juchanmanta pesachikunanta, paypa ladonmantataj churakunanta. Ajinamanta Jehová Diospis paypaj ladonmanta churakunman karqa.

 4. ¿Caín Jehová Diosta kasukusqachu?

⁴ Jehová Diosqa, Cainta allin ñawiwan qhawanman karqa kasukojtin. Jinapis Cainqa mana Diosta kasukorqachu. Astawanpis sajra imasllapi yuyasqanrayku, munayninwan sonqonta suwachikusqanraykutaj juchallikorqa (Sant. 1:14, 15). Cainqa jovencitollaraj kashaspa, nichá yuyallarqapischu Diosta phiñachinanpaj jina imatapis ruwananta. Chaywanpis jatunyaspañaqa mana Jehová Diospa kʼamisqanta japʼikorqachu. Manaqa Diosta mana kasukuspa hermanonta wañurpacherqa.

 5. ¿Imastaj juchaman urmachiwasunman?

⁵ Noqanchejpis ichá Caín jina Jehová Diosta yupaychashasunman, pakaypitaj sajra imasta ruwashasunman (Jud. 11). Ichapis predicacionman, tantakuykunamanpis mana faltakuspa rishasunman. Jinapis ichá sajra imaspi yuyashasunman, astawan kapuyniyoj kayta munapayashasunman chayri wajkunata chejnikushasunman (1 Juan 2:15-17; 3:15). Jinamantataj juchapi urmasunman. Runasqa ichapis mana yachankumanchu imachus sonqonchejpi kasqanta chayri imastachus ruwasqanchejta. Jinapis Jehová Diosqa tukuy imata yachan. Payqa sutʼita yachan tukuy sonqochus manachus yupaychashasqanchejta (Jeremías 17:9, 10 leey).

 6. ¿Imajtintaj may sumajpuni kasqa Jehová Diospa ladollanpipuni kananchej?

⁶ Jehová Diosqa juchallikojtinchej khuyakuwasunman. Chayrayku pay niwanchej: “Noqaman kutirikamuychej, noqataj qankunaman kutirimusaj”, nispa (Mal. 3:7). Jehová Diosqa yachan sajra munayninchejwan atipachikunapaj jina kasqanchejta. Chaywanpis payqa munan sinchʼita sayananchejta, sajra kajtataj saqepunanchejta (Isa. 55:7). Jehová Diospa ladollanpipuni kasunchej chayqa, pay yanapawasunchej, kallpatataj qowasunchej sajra munayninchejta atipanapaj (Gén. 4:7).

 7. ¿Imajtintaj Salomón Jehová Diosmanta karunchakusqa?

⁷ Rey Salomonmantañataj parlarina. Payqa, joven kashaspa Jehová Diosta tukuy sonqo kasukorqa. Diostaj may yachayniyojman tukucherqa, Jerusalenpi templonta ruwapunantataj kamacherqa. Jinapis tiemponman Salomonqa, Diosmanta karunchakorqa leyninta pʼakisqanrayku (1 Rey. 3:12; 11:1, 2). Imajtinchus Diospa leyninpi reykunapaj kay jina kamachiy karqa: ‘Ama ashkha warmisniyoj kachunchu, ama sonqonpi Jehová Diosmanta karunchakunanpaj’, nispa (Deu. 17:17). Salomontaj chay leyta mana kasukorqachu. Imajtinchus payqa 700 ‘warmisniyoj karqa’, 300 ‘tanta warmisniyojtaj’ (1 Rey. 11:3). Chantapis Salomonqa waj nacionmanta warmiswan casarakuspa, Diospa leyninta pʼakillarqataj (Deu. 7:3, 4). Chay warmisnintaj qhasi manakaj diosesta yupaychaj kanku.

 8. ¿Imasta ruwaspataj Salomón Jehová Diosta phiñachisqa?

⁸ Salomonqa pisimanta pisi Diospa leyesninta pʼakerqa. Tiemponmantaj sajra imasta ruwaspa Jehová Diosta phiñacherqa. Imajtinchus Salomonqa china dios Astartepaj, millay lanti Quemospajpis altaresta ruwacherqa. Chantapis Jerusalenpa chimpan orqopi waj ashkha altarestapis ruwachillarqataj. Salomontaj chay llulla diosesta warmisninwan khuska yupaycharqa (1 Rey. 11:5-8; 2 Rey. 23:13). Salomonqa, ichapis yuyarqa Diospa templonpi uywa wañuchisqa jaywanasta jaywajtin, millay imasta ruwasqanmanta Jehová Dios perdonanallanta.

 9. ¿Imataj kasqa Salomón mana Jehová Diosta kasukusqanrayku?

⁹ Jehová Diosqa juchallikojta mana qhawallanchu. Chayrayku Biblia nin: “Tata Diosqa Salomonpa contrampi phiñakorqa, paypa sonqon israelitaspa Señorninku Tata Diosmanta karunchakusqanrayku”, nispa. Chaywanpis Jehová Diosqa, Salomonta yanapananpaj payman iskay kutita rikhurerqa. Salomontataj kamacherqa ama waj dioskunata yupaychaspa purinanta. Salomontajrí Jehová Diospa “kamachisqantaqa mana kasorqachu”. Chayrayku Jehová Diosqa Salomonta manaña yanaparqachu, nitaj allin ñawiwan qhawarqachu. Chantapis Jehová Diosqa mana saqerqachu Salomonpa miraynin tukuynin Israel nacionta kamachinanta. Chayraykutaj unayta ashkha problemaspi rikukorqanku (1 Rey. 11:9-13).

10. ¿Pikunataj Diosmanta karunchawasunman?

¹⁰ Amigosninchej Diosta mana kasukojtinku, nitaj Diospa munasqanman jina kausakojtinkoqa, paykuna jina yuyayta qallarisunman, Diosmantapis karunchawasunman. Diosta mana tukuy sonqo yupaychaj hermanospis Diosmanta karunchawasunman. Chantapis familiaresninchej, vecinosninchej, escuelamanta chayri trabajomanta compañerosninchej Diosmanta karunchallawasunmantaj.

11. ¿Imaspitaj piensarisunman amigosninchej mana Diosmanta karunchanawanchejpaj?

¹¹ (1 Corintios 15:33 leey). Casi tukuy runaspis kʼachas kanku. Mundomanta wakin runasqa mana sajra imastapunichu ruwanku. Chaywanpis piensarinanchej tiyan chay jina runaswan masichakunanchej allinninchejpajchus manachus kananpi. Piensarillasunmantaj chay jina runas Diosman qayllaykunapaj yanapanawanchejpichus manachus. Chantapis qhawarisunman imastachus ñaupajman churashasqankuta, imasmantatajchus astawan parlasqankuta. Ichapis astawan parlanku ropamanta, qolqemanta, computadorata, celularta, tabletata rantiymanta, fiestasman riymanta, pujllaymanta chayri waj imasmanta. Qhawarinallanchejtaj tiyan wasa rimakuchus kasqankuta, millaytachus chansakusqankutapis. Imajtinchus Jesús nerqa: “Sonqopi imachus juntʼa kashan, chaymanta simeqa parlan”, nispa (Mat. 12:34). Amigosninchej Diosmanta karunchashawasqanchejta reparanchej chayqa, amaña paykunawan purinachu (Pro. 13:20).

12. 1) ¿Imatataj Jehová Dios israelitasman nisqa Sinaí Orqo kʼuchupi? 2) Chanta, ¿imatataj israelitas nisqanku?

¹² Israelitasmantapis mayta yachakusunman. Paykunaqa Egiptomanta kacharichisqa kasqankutawan Sinaí Orqo kʼuchupi tantakorqanku. Tantasqa kashajtinkutaj Jehová Diosqa ninapi chay orqoman uraykamorqa. Rikhurimorqataj lliuj lliujkuna, qhon qhonkuna, yanayarishaj phuyutaj. Uj cornetaj waqaynintaj sinchʼita uyarikorqa (Éxo. 19:16-19). Chantá Jehová Diosqa israelitasman nerqa: “Noqamin Señorniyki Tata Dios kani, sinchʼi, celoso Dios”, nispa. Chantá nillarqataj payta munakojkunata, kamachisqasninta kasukojkunatawan khuyakunanta (Éxodo 20:1-6 leey). Arí, Jehová Diosqa israelitasman nisharqa kasukojtinku, paykunata yanapananta. Chayta noqanchejpis uyarisunman karqa chayqa, ichapis israelitas jinallataj Jehová Diosman nisunman karqa. Paykunaqa nerqanku: “Noqaykoqa Tata Diospa tukuy kamachisqasninta ruwasqayku”, nispa (Éxo. 24:3). Chaywanpis pisi tiemponman israelitasqa Jehová Diospa kamachisqasninta pʼakerqanku.

13. ¿Imajtintaj israelitas Aaronman nisqanku “dioskunata ruwapuwayku” nispa?

¹³ Israelitasqa mayta manchachikorqanku Diospa atiyninta rikuspa. Chayrayku Moisesta Sinaí Orqoman kacharqanku, Jehová Dioswan parlamunanpaj (Éxo. 20:18-21). Sinaí Orqomanta mana usqhayta Moisés uraykamojtintaj, israelitasqa Aaronman qayllaykuspa, nerqanku: “Kunanqa dioskunata ruwapuwayku ari ñawpaqeykuta rinankupaj, imaraykuchus Egipto jallpʼamanta orqhomuwarqayku, chay Moisesqa imanakunchus, mana rikhurimunchu”, nispa (Éxo. 32:1, 2). Reparanchej jina israelitasqa Moisesllapi astawan atienekorqanku. Moisés unayta chinkapojtintaj israelitasqa, chʼin pampapi saqerpasqa jina sientekorqanku.

14. 1) ¿Ima nispataj israelitas waka uña lantita yupaychasqanku? 2) ¿Imatataj Jehová Dios Moisesman nisqa israelitas waka uña lantita yupaychasqankurayku?

¹⁴ Israelitasqa yacharqanku ni ima lantita yupaychanankuchu kasqanta (Éxo. 20:3-5). Chayta yachaspapis uj waka uña lantita yupaycharqanku. Jinamantataj israelitasqa Jehová Diospa leyninta pʼakerqanku. Chaywanpis israelitasqa, pantarqanku chay waka uña lantita yupaychaspa Jehová Diosllatapuni yupaychashasqankuta yuyaspa. Aaronpis chay waka uña lantita yupaychanankupaj nerqa: ‘Qʼaya ruwasunchej Jehová Diospaj uj fiestata’, nispa. Chayta rikuspataj Jehová Diosqa Moisesman nerqa: “Egiptomanta orqhomusqayki runasqa millayta juchallikunku. Paykunaqa usqhayllata tʼaqarpayakunku, ima ñantachus noqa nerqani rinankuta, chaymanta”, nispa. Jehová Diosqa mayta phiñakusqanrayku tukuy israelitasta tukurpachiyta munarqa (Éxo. 32:5-10).

15, 16. 1) ¿Imatataj Moisés ruwasqa Diospa ladonmanta kasqanrayku? 2) ¿Pejpa ladonmantataj Aarón churakusqa? (17 paginapi dibujota qhawariy).

¹⁵ Chaywanpis Jehová Diosqa ‘phiñakuyninta tiyaykuchikorqa, manañataj israelitasta chinkachiyta yuyarqachu’. Astawanpis Jehová Diosqa israelitasta saqerqa paypa ladonmanta churakunankuta (Éxo. 32:14). Moisesqa waka uña lantej ñaupaqenpi israelitasta tusurashajta, qhaparishajta, takishajta rikuspa, waka uña lantita japʼiytawan ñutʼuta kutarparerqa. Chantá Moisesqa nerqa: “Pikunachus Tata Diosman sayasqa kajkuna jamuychej noqaman”, nispa. Chayta uyarispataj, tukuynin levitas payman kʼaskarqanku (Éxo. 32:17-20, 26).

¹⁶ Aaronpis waka uña lantita ruwasqanmanta pesachikuspa, levitaswan khuska Jehová Diospa partenmanta churakorqa. Levitasqa, Diospa partenmanta churakuspa allintapuni ruwarqanku. Imajtinchus chay diaqa chay waka uña lantita yupaychajkunamanta may chhika israelitas wañorqanku. Jehová Diospa ladonmanta churakojkunataj, mana wañorqankuchu. Diostaj paykunata bendecinanta nerqa (Éxo. 32:27-29).

17. ¿Imajtintaj waka uña lantita yupaychaj israelitasmanta Bibliapi qhelqakusqa?

¹⁷ Waka uña lantita yupaychaj israelitasmanta parlaspa, apóstol Pablo jinata nerqa: ‘Tukuy chay imasqa noqanchej yachakunanchejpaj karqa, ama paykuna jina llulla dioskunata yupaychanapaj’, nispa. Chantá nillarqataj: “Chay tukuy imas paykunata qhatirerqa, noqanchej yachakunanchejpaj. Qhelqakorqataj kay tiempoj tukukuyninpi kausajkuna, ama paykuna jina ruwananchejpaj. Ajinaqa pichus sinchʼita sayashasqanta yuyakojqa, allinta qhawakuchun ama urmananpaj”, nispa (1 Cor. 10:6, 7, 11, 12). Kay versiculosqa reparachiwanchej noqanchejpis Diosta yupaychashaspa sajra imasta ruwayta qallariyta atisqanchejta. Sajra imasta ruwajtinchejtaj ichapis yuyasunman Jehová Dios allillanpaj qhawanawanchejta. Chay jinata yuyaspaqa pantasunman. Jehová Dios allinpaj qhawanawanchejpajqa, llimphu kausayniyoj kananchej tiyan, kamachisqasninta kasukunanchej tiyan, amigosnintaj kananchej tiyan (1 Cor. 10:1-5).

18. ¿Imapitaj israelitas jina urmasunman?

¹⁸ Sinaí Orqomanta Moisés mana usqhayta uraykamojtin, israelitasqa sajra imasta ruwaspa pantarqanku. Noqanchejpis kay mundoj tukukuynin mana usqhayta chayamusqanrayku sajra imasta ruwaspa pantasunman. Ichá yuyayta qallarisunman Jehová Dios sumaj kausayta apamunanpaj mayraj faltasqanta chayri manaña apamunanta. Ajinamantataj munaynillanchejta ruwayta qallarisunman, Jehová Diospa munayninta ruwanamantaqa. Munaynillanchejta ruwaspataj Diosmanta karunchakusunman millay sajra imasta ruwaspa. Chayrayku allinta qhawarikunanchej tiyan.

19. Jehová Dios munakuwasqanchejrayku, ¿imata ruwananchejtataj munan?

¹⁹ Jehová Diosqa munakuwasqanchejrayku munan kasukunanchejta, payllatataj yupaychananchejta (Éxo. 20:5). Mana Jehová Diosta kasukuspaqa, Satanasta kasukushasunman, paytaj mana allinninchejtachu munan. Pablo nerqa: “Mana atinkichejchu Jehová Diospa copanmanta ujyashaspa, supaykunaj copanmantapis ujyayta. Nillataj atinkichejchu, ‘Jehová Diospa mesanmanta’ mikhushaspa, supaykunaj mesanmantapis mikhuyta”, nispa (1 Cor. 10:21).

20. ¿Jehová Dios pantajtinchej khuyakuwasunmanchu?

²⁰ Caín, Salomón, israelitas imaqa juchasninkumanta pesachikuyta aterqanku, sajra ruwayninkutapis saqepuyta aterqanku (Hech. 3:19). Imajtinchus Jehová Diosqa paykunata khuyakunman karqa, perdonanmantaj karqa imaynatachus Aaronta perdonarqa, ajinata. Chayrayku Jehová Diosqa noqanchejtapis niraj juchapi urmashajtinchej kʼamiriwanchej. Payqa kʼamiriwanchej Biblianejta, publicacionesnejta, hermanosnejtapis. Chay kʼamiwasqanchejta tukuy sonqo japʼikusunchej chayqa, Jehová Dios khuyakuwasunchej.

21. ¿Jehová Diosta kasukuyta atillanchejchu?

²¹ “Diospa jatun khuyakuyninta ama qhasipaj” japʼinachu (2 Cor. 6:1). Imajtinchus Jehová Diosqa khuyakuwanchej “munayninpa contranpi kaj imasta, kay mundoj sajra imasninta munapayayta ima” qhesachananchejpaj (Tito 2:11-14 leey). Sajra runaspa chaupinpi tiyakusqanchejrayku, mana Jehová Diosta kasukuyta atillanchejchu. Chayrayku tukuy atisqanchejta kallpachakuna Jehová Diospa qayllallanpipuni kanapaj. Chantapis ama qonqanachu Jehová Diosta manchachikuna kasqanta, pay sapallanta sirvina kasqanta, payllaman sayasqa kananchej kasqantataj (Deu. 10:20).