Jehová Diospata kanchej

 1. ¿Imajtintaj nisunman tukuy imapis Jehová Diospata kasqanta? (Patapi kaj fotota qhawariy).

TUKUY imatapis Jehová Dios ruwarqa. Chayrayku “cielopis, aswan patapi janaj pachapis, kay pachapis, kaypi imaschus kajpis Señorniykichej Tata Diospata kanku” (Deu. 10:14; Apo. 4:11). Noqanchejtapis Jehová Dios ruwawarqanchej, chayrayku paypata kanchej (Sal. 100:3). Chaywanpis Jehová Diosqa wakin runasta ajllakorqa paypatapuni kanankupaj.

 2. ¿Pikunatataj Jehová Dios ajllakusqa paypatapuni kanankupaj?

² Kay 135 Salmopi nin, Jehová Diosqa “paypatapuni kanampaj” kasukoj israelitasta ajllakusqanta (Sal. 135:4). Profeta Oseaspis nillarqataj, mana israelita kajkunamanta wakin runas ayllunmanta kanankuta (Ose. 2:23). Profeta Oseaspa nisqantaj juntʼakorqa Jehová Dios mana israelita kajkunata ajllayta qallarishajtin. Paykunatataj Jehová Dios ajllarqa Jesuswan cielomantapacha gobernamunankupaj (Hech. 10:45; Rom. 9:23-26). Chay ajllasqa cristianosqa “Diospaj tʼaqasqa suyu, paypa ajllakusqan llajtataj” kanku (1 Ped. 2:9, 10). Mosoj jallpʼapi kausakuyta suyakojkunapis Jehová Diospa ajllasqa ayllullantaj kanku (Isa. 65:22).

 3. 1) ¿Pikunataj Jehová Diosta uj tropa jinalla yupaychashanku? 2) ¿Imatataj qhepan parrafospi yachakusunchej?

³ “Juchʼuy tropa” ovejasmanta kajkunaqa cielopi kausakuyta suyakushanku. ‘Waj ovejasmanta’ kajkunataj, kay jallpʼapi wiñaypaj kausakuyta suyakushanchej. Iskaynin tropastaj ‘uj tropa’ jinalla Jehová Diosta yupaychashanchej (Luc. 12:32; Juan 10:16). Jehová Diostataj kusichiyta munanchej, payman qayllaykojta saqewasqanchejrayku. Qhepan parrafospitaj yachakusunchej imaynasmantachus Jehová Diosta kusichiyta atisqanchejta.

 4. 1) ¿Imaynatataj Jehová Diosta kusichisunman? 2) ¿Imatataj Jesús ruwasqa Diosta kusichinanpaj?

⁴ Jehová Diostaqa kusichisunman payman kausayninchejta qopuspa, bautizakuspataj. Bautizakojtinchejqa tukuy runas yachanqanku Jehová Diospata kasqanchejta, payllatataj kasukuyta munasqanchejta (Heb. 12:9). Jesuspis bautizakuspa Diosta kusichiytapuni munasqanta rikucherqa. Jehová Diosmantaj kay jinatapis nishanman jina karqa: “Diosníy, tukuy sonqo munayniykita ruwayta munani”, nispa (Sal. 40:7, 8). Jesusqa Diospa ajllasqan llajtamantaña kaspapis, Diospa munayninta ruwananpaj bautizakorqa.

 5. ¿Imatataj Jehová Dios nisqa Jesús bautizakushajtin?

⁵ Jehová Diosqa mayta kusikorqa Jesús bautizakushajtin. Biblia niwanchej: “Jesusqa bautizachikuytawan, yakumanta llojserqa, cielotajrí kicharikorqa, Diospa atiynintataj palomata jina paypa patanman uraykamojta rikorqa. Jinallapi cielomanta Dios nimorqa: ‘Kaymin munasqa Wawayqa, paytaqa allinpaj qhawani’”, nispa (Mat. 3:16, 17). Jehová Diosqa mayta kusikorqa Wawan payllata yupaychayta munaspa bautizakusqanmanta. Jehová Diosqa kusikullantaj payman kausayninchejta qopojtinchej, bendeciwasunchejtaj (Sal. 149:4).

 6. ¿Imajtintaj uj tata kusikunman?

⁶ Jehová Dios bautizakojtinchej imaynatapunichus kusikusqanta reparanapaj, uj tatapi piensarina. Uj tataqa huertanpi ashkha tʼikasta plantanman. Uj diataj imillitan ujnin tʼikitata tatanman regalanman. Tatantaj chay tʼikitata japʼispa mayta kusikunman, chay tʼikita huertanmanta kajtinpis. Ajinallatataj Jehová Diospis mayta kusikun, paypata kajtinchejñapis tukuy sonqo payman kausayninchejta qopojtinchej (Éxo. 34:14).

 7. ¿Pejkunaj sutisninkutataj Diosninchej uj libroman churan yuyarisqa kanankupaj?

⁷ (Malaquías 3:16 leey). Nacekusqanchejmantapacha Jehová Diospata kanchej. Chaywanpis Jehová Diosta kusichinapajqa munayninman jina kausakunanchej tiyan, bautizakunanchej tiyan, payllatataj gobiernonchejta jina qhawananchej tiyan (Pro. 23:15). Jehová Diosqa yachan pikunachus payta tukuy sonqo yupaychashasqankuta. Paykunaj sutisninkutataj uj “libroman” churan “yuyarisqa kanankupaj”.

8, 9. Jehová Diospa libronpi sutisninchej kanallanpajpuni, ¿imatataj ruwananchej kasqa?

⁸ Sutinchej Jehová Diospa ‘libronpi’ kanallanpajpuneqa, Malaquías nisqanman jina Jehová Diosta manchachikunanchej tiyan, sutintataj jatunchananchej tiyan. Chaywanpis waj dioskunata yupaychasunman chayqa, sutinchej Jehová Diospa libronmanta orqhosqa kanqa (Éxo. 32:33; Sal. 69:28).

⁹ Chayrayku mana ninallanchejchu tiyan “Jehová Diospa munayninta ruwasaj” nispa, nitaj bautizakunallanchejchu tiyan. Manaqa Jehová Diospa munasqanman jina kausakunanchej tiyan. Wañupunanchejkamataj ruwasqasninchejpi yachakunan tiyan Jehová Diosta kasukusqanchej (1 Ped. 4:1, 2).

10. ¿Simillamantachu Diosninchejta yupaychana kasqa?

¹⁰ Pasaj semanapi yachakorqanchej, Cainwan Salomonwan israelitaswan imaqa, simillamanta Diosta yupaychaspa sajra imasta ruwasqankuta. Paykunaj kausayninkumanta yachakunchej tukuy sonqo Diosninchejta yupaychana kasqanta, manataj simillamantachu. Chayrayku ‘sajra kajtaqa chejnisqata chejnikuna, allin kajmantaj kʼaskaykuna’ (Rom. 12:9). Jehová Diospis sutʼita nerqa: “Reparankichej pichus cheqan runa, pitajchus mana cheqan runa kasqanta; reparallankichejtaj pichus Diosta yupaychasqanta, pitajchus mana yupaychasqantawan”, nispa (Mal. 3:18).

11. ¿Imaspitaj piensarisunman Diospa partenmanta kasqanchejta runas sutʼita rikunankupaj?

¹¹ Jehová Diostaqa kusichiyta munallanchejtaj llajtanman pusamuwasqanchejrayku. Chayrayku ‘runasqa sutʼita rikunanku’ tiyan Diospa partenmanta kasqanchejta (1 Tim. 4:15; Mat. 5:16). Chaypajtaj piensarisunman Diosta kasukushasqanchejpichus manachus. Piensarillasunmantaj Jehovaj testigosnin jina rejsichikushasqanchejpichus manachus. Imajtinchus Jehová Diosqa maytachá llakikunman paypa partenmanta kasqanchejta wajkunaman willariyta pʼenqakojtinchej (Sal. 119:46; Marcos 8:38 leey).

12, 13. ¿Imastataj wakin hermanos ruwaj kasqanku mundomanta runas jina purisqankurayku?

¹² Wakin hermanosqa ‘kay mundomanta runas jina’ purinku. Ajinamantataj ruwasqasninkupi mana yachakunchu Testigos kasqankuta (1 Cor. 2:12). Kay mundomanta runasqa ‘aychankoj munaynillanta’ ruwanku (Efe. 2:3). Chay jina runasmanta Diosninchej qhawakuychej niwajtinchejpis, wakin hermanosqa mundomanta runas jina chujchankuta kʼutuchikunku, fierota peinakunku, matʼi ropasta, kʼaka ropasta chayri chutu ropasta churakunku. Ajina vistisqastaj reunionesmanpis rinku (1 Tim. 2:9, 10). Runastaj chay jinata purej hermanosta rikuspa, mana reparayta atinkuchu Testigoschus manachus kasqankuta (Sant. 4:4).

¹³ Wakin hermanostaj ‘kay mundomanta runas jina’ purisqankurayku, fiestaspi mundomanta runas jinallataj tusunku, parlankupis. Wakin hermanostajrí, Internetpi redes sociales nisqaman mana allin fotosninkuta, comentariostawan churanku. Chay jina hermanosqa, ichapis mana jatun juchapi urmarqankuchu, nitaj congregacionpi kʼamichikorqankuchu. Chaywanpis paykunaqa, llimphu kausayniyoj kanankupaj kallpachakoj hermanosta pantachinkuman (1 Pedro 2:11, 12 leey).

14. ¿Imastataj ruwananchej kasqa Diospata kasqanchejrayku?

¹⁴ “Kay mundopeqa tiyan: aychaj sajra munaynin, ñawispa rikusqanta munapayay, kapuyninmanta runaykachay ima” (1 Juan 2:16). Chaywanpis noqanchejqa, Diospata kasqanchejrayku mana kay mundomanta runas jinachu kanchej. Chayrayku “Diospa munayninpa contranpi kaj imasta, kay mundoj sajra imasninta munapayayta ima” qhesachanchej. Chantá “kay tiempopi allin yuyaywan” kausakunchej, “cheqan kajta ruwaspa, Diosta yupaychaspataj” (Tito 2:12). Chayrayku mikhushaspapis, ujyashaspapis, trabajashaspapis, vistikuspapis chayri imata ruwashaspapis, tukuy imata ruwananchej tiyan Diosninchej jatunchasqa kananpaj (1 Corintios 10:31, 32 leey).

15. ¿Imajtintaj hermanosninchejwan allinta kausakunanchej kasqa?

¹⁵ Jehová Diosqa paypata kananchejpaj ajllakuwarqanchej. Chaymanta agradecekunapajtaj, hermanosninchejwan allinta kausakunanchej tiyan. Imajtinchus hermanosninchejtapis Diosninchej ajllakorqa paypata kanankupaj. Chayta mana qonqakuspaqa, hermanosninchejta munakusunchej, khuyakusunchej, allin kajtapunitaj paykunapaj ruwasunchej (1 Tes. 5:15). Chaytataj ruwananchejpuni tiyan. Imajtinchus Jesús nerqa: “Qankunachus purajmanta munanakunkichej chayqa, tukuy yachanqanku yachachisqasniy kasqaykichejta”, nispa (Juan 13:35).

16. ¿Imatataj reparachiwanchej Jehová Dios levitasman uj leyta qosqan?

¹⁶ Jehová Dios Moisesman leyesta qosqanmanta ujninta qhawarina. Chay leypi nisharqa, levitas Diospa templonpi imastachus apaykachaj kanku, chay imasta allinta apaykachanankuta. Chay leyta mana kasukojkunataj wañuchisqa kanankuta (Núm. 1:50, 51). Reparanchej jina Jehová Diosqa templonpi apaykachakoj imasta jarkʼarqa. Chayrayku nisunman Jehová Diosqa kamachisninta astawanraj jarkʼananta. Chaytaj reparachiwanchej hermanosninchejwan allintapuni apanakunanchej kasqanta. Chantapis Jehová Diosqa mayta munakuwasqanchejrayku jinata nerqa: “Pillapis aylluyta llankhaykojqa ñawi papaytapis llankhaykunman jina”, nispa (Zac. 2:8).

17. ¿Imastataj Jehová Dios sumajta qhawamushasqa, uyarimushasqataj?

¹⁷ Profeta Malaquías nisqanman jina, Jehová Diosqa ‘sumajta uyarishan’ imaynatachus kamachisnin parlanakusqankuta (Mal. 3:16). “Jehová Diosqa paypata kajkunata rejsin” (2 Tim. 2:19). Chayrayku Jehová Diosqa tukuy ima ruwasqanchejta qhawamushan, parlasqanchejtapis sumajta uyarimushan (Heb. 4:13). Chayrayku reparanpacha maykʼajchus hermanosninchejmanta mana khuyakusqanchejta. Reparallantaj maykʼajchus kapuyninchejmanta wajkunaman qorisqanchejta, kʼachas kasqanchejta, perdonanakusqanchejta, wasinchejman wajyarinakusqanchejtapis (Heb. 13:16; 1 Ped. 4:8, 9).

18. ¿Imastataj ruwasunman Diosta kusichinanchejpaj llajtanman pusamuwasqanchejrayku?

¹⁸ Jehová Diostaqa kusichiytapuni munanchej llajtanman pusamuwasqanchejrayku. Payta kusichinanchejpajtaj kausayninchejta qoporqanchej. Kay tiempopeqa sajra runaspa chaupinpi, mana cheqan kajta ruwajkunaj chaupinpitaj kausashanchej. Chaywanpis runaspa ñaupaqenpi ‘mana kʼaminas kaspa, mana juchayojtaj kaspa’ “kʼanchajkuna jina” lliphipisunman (Fili. 2:15). Chayrayku imastachá Diosninchej chejnin chaykunata chejninanchej tiyan (Sant. 4:7). Chantapis Diosta kusichinapajqa, hermanosninchejta tukuy sonqo munakunanchej tiyan Diospata kasqankurayku (Rom. 12:10).

19. ¿Jehová Dios saqerpawasunmanchu?

¹⁹ Biblia niwanchej: “Tata Diosqa ayllunta mana saqerparenqachu”, nispa (Sal. 94:14). Kay versiculoqa reparachiwanchej Jehová Dios ni imarayku saqerparinawanchejta. Jehová Diosmantaqa ni wañuypis tʼaqayta atiwasunmanchu (Rom. 8:38, 39). “Kausaspaqa Jehová Diospaj kausanchej. Wañuspataj Jehová Diospaj wañunchej. Ajina ari, kausaspapis wañuspapis Jehová Diospata kanchej” (Rom. 14:8). Tumpamantawantaj Jehová Diosqa wañusqasta kausarichimonqa, chaytaj uj sumaj bendición kanqa (Mat. 22:32). Kay tiempopipis Jehová Diosqa maytaña bendecishawanchej. Imajtinchus Biblia nin: “Uj nacionqa kusikuyniyojmin, Tata Diosqa Diosnin kajtin. Chay aylluta pay ajllakun, paypata kanampaj”, nispa (Sal. 33:12).