Aswan sumajta estudiana

 1. ¿Imaraykutaj wakin hermanos mana Bibliata estudiayta atillankuchu?

KAY tiempopi kausayqa, manchay trabajo. Ashkha hermanosninchej, familiankupaj diantinta trabajanku. Wakin hermanostaj, trabajonkuman sapa día ashkha horasta rinkutaj, jamunkutaj. Wakintatajrí trabajonku qʼala tʼunasqata saqen. Tukuynin chay hermanos wasinkuman manchay saykʼusqa chayanku. Chayrayku Bibliata estudianankupaj niña kallpanku kanchu.

 2. ¿Ima ratotaj Bibliata, publicacionesta ima estudianki?

² Diospa Palabranta, publicacionesta ima sumajta estudianapajqa, tiempochakunapuni tiyan. Chayta ruwaspalla, Jehová Diosman sumaj kʼaskasqa kasun, wiñay kausaytapis japʼiyta atisun (1 Tim. 4:15, 16). Wakin hermanosninchejqa, Bibliata ukhunchanankupaj sutʼiyayta sayarikunku. Imajtinchus chay horasqa wasinkupi ni ima chʼajwa kanchu, sumaj samarisqastaj kashanku. Wakin hermanostaj Bibliata chʼisiyaykuyta estudianku. Imajtinchus chay horasta, maypichus mana chʼajwa kanchu chaypi, sumajta tʼukuriyta atinku.

3, 4. ¿Imaraykutaj pisi publicacionesllaña llojsishan?

³ Tukuyninchej yachanchej, Bibliata publicacionestawan ukhunchanapaj tiempochakunanchej kasqanta. Jinapis ichá mana yachanchejchu, mayqen publicaciontachus estudiananchejta. Wakenqa ninku: “Chay chhika publiacionestaqa nichá jaykʼajpis leeyta tukuymanchu”, nispa. Wakin hermanosqa tukuynin publicacionesta leenku, tukuynin videostataj qhawanku. Jinapis ashkha hermanosninchejqa, mana chayta ruwayta atillankuchu. Diospa Llajtanta Kamachejkunaqa, chayta sumajta yachanku. Chayrayku papelpi, jinallataj Internetpi llojsimoj publicacionesta pisiyacherqanku.

⁴ Kunanqa jw.org^® nisqapi, JW Broadcasting^® nisqapiwan, ashkha experiencias llojsin. Chaykunataj mayta kallpachawanchej. Chayrayku Anuario de los testigos de Jehová libro, manaña llojsishanchu. Tukuypaj Torremanta Qhawaj revista, ¡Rijchʼariy! revistapis watapi kinsa kutillataña llojsin. Tukuy chay imasta ruwakun, “imaschus aswan allin” kajta ruwanapaj, aswan tiempoyoj kananchejpaj (Fili. 1:10). Qhepan parrafospi qhawarisun, imatachus ñaupajman churana kasqanta. Chantá yachakusun, imaynatachus Bibliata sapallanchejpi estudianata.

5, 6. ¿Imastataj sumajta estudiananchej kasqa?

⁵ ¿Imatá ñaupajta estudiananchej tiyan? Diospa Palabranta. Sapa pʼunchay Bibliata estudianapaj tiempochakunanchej tiyan. Kunanqa chaupi semana tantakuypaj, sapa semana pisi capitulosllataña leerinchej. Ajinamanta astawan tiempo kapuwanchej, leesqanchejpi tʼukurinapaj, chay leesqanchejta astawan ukhuncharinapaj ima. Chay capitulostaqa mana leerpanallachu tiyan. Imaraykuchus leesqanchejqa sonqonchejman yaykunan tiyan, Jehová Diosmantaj astawan kʼaskaykuchinawanchej tiyan (Sal. 77:12).

⁶ ¿Imastawan sumajta estudiananchej tiyan? Congregacionpaj Torremanta Qhawaj revistata, Bibliamanta Yachaqanapaj librota ima. Cristiano Kausayninchej tantakuypajpis, sumajta wakichikunallataj tiyan. Chantapis leerinallataj, tukuypaj Torremanta Qhawaj revistata, ¡Rijchʼariy! revistatawan.

 7. Internetpi tukuynin publicacionesta, videosta ima, mana leeyta chayri qhawayta atispa, ¿llakikunachu kasqa?

⁷ Ichapis nisunman: “Internetpi jw.org nisqapi may chhika yachachiykuna churakun. JW Broadcastingpipis ashkha videos qhawanapaj llojsin”, nispa. Jinapis kaypi piensarina: Mercadopeqa tukuy imata vendenku. Chayman rispataj mana tukuynin vendesqankutachu rantikunchej, manaqa imastachus necesitasqallanchejta. Ajinallataj Internetpeqa ashkha publicaciones, videos ima kapuwanchej. Chayrayku ama llakikunachu, mana tukuyninta leeyta chayri qhawayta atisqanchejmanta. Tukuy atisqallanchejta leena chayri qhawana. Qhepan parrafospi yachakusun, imaynatachus estudiananchej kasqanta. Yachakullasuntaj imatachus ruwana kasqanta, chay estudiasqanchej yanapanawanchejpaj.

 8. 1) ¿Imaynatá Torremanta Qhawaj revistata wakichikusunman? 2) ¿Allinta wakichikuy yanapawasunmanchu?

⁸ Estudiayqa mana imatapis pata patanta leerpayllachu, nitaj kutichiykunata marcaykuyllachu, astawanqa imatapis yachakuyta munaspa sumajta leeriy. Qhawarina imaynatachus wakichikuna kasqanta, congregacionpaj Torremanta Qhawaj revistata. Ñaupajtaqa sapa yachaqanaj qallariyninpi, “¿Imatá kaypi yachakusun?” nisqata leerina. Chantá yachaqanaj titulonta, subtitulosninta, yuyarikunapaj tapuykunatawan leerina, chaykunapitaj tʼukurina. Chaymantá enteron yachaqanata calmallawan, sumajtataj leerina. Imamantachus sapa párrafo parlashasqanta reparana. Casi tukuynin parrafospi, chayta yachasunman parrafoj qallariyninta leespa. Chantá piensarina, imaynatachus sapa párrafo, subtituloswan, titulowan ima khuskachasqa kasqanta. Chantapis mana rejsisqanchej palabrasta, imastachus astawan ukhunchariyta munasqanchejtawan anotakuna.

 9. 1) Torremanta Qhawaj revistata estudiashaspa, ¿imaraykutaj textosta sumajta qhawarinanchej tiyan? 2) Josué 1:8 nisqanman jina, ¿imatawantaj ruwana textosta leeshaspa?

⁹ Torremanta Qhawaj revistata estudianapaj tantakuypeqa, astawanqa Bibliata estudianchej. Chayrayku Bibliaj textosninta sumajta qhawarina, astawanraj mayqenkunachus congregacionpi leekonqa, chaykunata. Qhawarina sapa textomanta mayqen palabraschus, parrafoj yachachisqanta sutʼinchasqanta. Chantapis tukuynin textospi tʼukurinapaj tiempochakuna, piensarinataj imaynatachus chayman jina ruwananchejta (Josué 1:8 leey).

10. Hebreos 5:14 nisqanman jina, ¿imaraykutaj tatas wawasninkuman sumajta estudiayta yachachinanku tiyan?

¹⁰ Familiapi Diosta yupaychanapaj tantakuymanta parlarina. Cristiano tatasqa chay tantakuyta ruwayta munanku, wawasninku miskʼirichikunankupaj jina. Wakin tatasqa chay tantakuypi Broadcastingta familiankuwan qhawanku, chayri Noej arcanta jina ruwanku. Tatas familiankuwan chaykunata chayri chayman rijchʼakoj imasta ruwasqankoqa, may sumajpuni. Jinapis mana sapa semanachu chaykunata ruwananku tiyan. Imajtinchus tatasqa wawasninkuman sumajta estudiayta yachachinanku tiyan. Wawasqa yachananku tiyan tantakuykunapaj wakichikuyta. Yachanallankutaj tiyan, escuelankupi imatapis tapojtinku kutichinankupaj wakichikuyta (Hebreos 5:14 leey). Tatas, wawasniykichejman Bibliata estudiayta wasiykichejpi yachachinkichej chayqa, tantakuykunapi, jatun tantakuykunapipis, sumajta atiendenqanku. Imajtinchus chay tantakuykunapeqa, mana videos kanpunichu. Jinapis wawastaqa edadninkuman jina, yuyaysitunkuman jinataj yachachina tiyan.

11. ¿Imaraykutaj Bibliamanta yachakojkunata sumajta estudiayta yachachinanchej tiyan?

¹¹ Bibliamanta yachakojkunapis, sumajta estudiayta yachakunanku tiyan. Paykunata estudiachej rinanchejpaj, tantakuykunapajpis kutichiykunata marcakojtinkoqa, mayta kusikunchej. Jinapis paykunata yachachinanchej tiyan sapallankupi estudiayta, yachachiykunata sumajta ukhunchayta ima. Ajinamanta problemasniyoj kashajtinku, imatachus ruwanankuta yachanankupaj, mana waj hermanostarajchu tapukamonqanku. Astawanpis problemasninkuta allinchanankupaj, publicacionesninchejpi maskʼanqanku.

12. ¿Imaraykutaj estudiayta munanchej?

¹² Wakenqa estudiayman mana yachasqachu kanchej. Chayrayku ichá ninchej: “Nisina noqamanqa estudiay gustawanmanchu”, nispa. Jinapis estudiayqa gustasunkiman. Qallarinapajqa pisi tiempollata estudiasunman, qhepan kutispitaj astawan astawan unaysituta estudiasunman. Chantapis imallatapis yachakuyta munaspa estudiananchej tiyan. Ñaupajtaqa estudiayta munanchej, Jehová Diosman astawan kʼaskaykunapaj. Jinapis estudiallasunmantaj, wajkuna tapuriwasqanchejman kutichinapaj, chayri uj problemanchejta allinchanapaj.

13. 1) ¿Imastataj uj joven ruwanman cumpleañosmanta compañerosninman sutʼincharinanpaj? 2) ¿Imaynatataj jóvenes Colosenses 4:6 nisqanman jina ruwankuman?

¹³ Colegiopi kashaj jovenpi tʼukurina. Casi tukuynin compañerosnin diachakusta ruwanku. Paytaj imaraykuchus cumpleañosman mana risqanta Bibliawan sutʼinchayta munan. Jinapis mana atinanta yuyan. ¿Imatá ruwanman? Payqa imatachus publicaciones cumpleañosmanta nisqanta maskʼarinman. Ñaupajtaqa estudianman, Diosninchej diachakusta mana allinpajchu qhawasqanpi sinchʼita creenanpaj. Chantá estudianman, imatachus yachakusqanta sumajta sutʼincharinanpaj (Mat. 14:6-11; 1 Ped. 3:15). Estudiashaspaqa, ñaupajta piensarinan kanman imaraykuchus compañerosnin cumpleañosta ruwasqankuta. Chantá imatachus publicacionesninchej diachakusmanta nisqanta maskʼanan kanman. Ajinamanta chay jovenqa, imatachus creesqanta sutʼinchayta atillanqa. Ashkha runasqa, wajkuna cumpleañosta ruwasqankuraykulla diachakunku. Sumajta wakichikuspañaqa, pillapis yachaytapuni munaspa tapurejtin, sumajta kutichiyta atenqa (Colosenses 4:6 leey).

14, 15. ¿Imastataj ruwasunman Bibliaj ujnin libronta mana allinta rejsispa?

¹⁴ Qhepan tantakuypi Bibliaj ujnin juchʼuy libronta estudiananchej kasqanpi piensarina. Ichá kanman Oseasmanta Malaquiaskama librosmanta mayqellanpis. Ichapis chay librotaqa mana allintachu rejsinchej. ¿Imatá ruwasunman? Ñaupajtaqa chay libro imamantachus parlasqanta astawan yachayta munananchej tiyan. Qhepan parrafospi imaynatachus chayta ruwananchejta qhawarisun.

¹⁵ Qallarinapajqa chay librota qhelqajmanta mashkhatachus yachasqanchejpi piensarina. Kaykunapi piensarisunman: pichus kasqanpi, maypichus kausakusqanpi, imatachus ruwasqanpi ima. Chaykunata ruwaspaqa, imaraykuchus wakin palabrasta, wakin kikinchaykunata ima oqharisqanta entiendesun. Libronta leeshaspataj, reparana mayqen palabraschus chay qhelqajta astawan rejsinapaj yanapawasqanchejta.

16. ¿Imaynatá recuadropi kaj textos Amós librota sumajta entiendenapaj yanapawanchej? (“Bibliapi parlaj runasmanta astawan yachakuna” nisqa recuadrota leeriy).

¹⁶ Qhelqajmanta astawan yachaytawanña, maykʼajchus chay librota qhelqasqanta yachananchej kanman. Chaypajqa Traducción del Nuevo Mundo de las Santas Escrituras nisqa Bibliapi, “Tabla de los libros de la Biblia” nisqata qhawarisunman. Chantapis Bibliata estudianapaj yanapa folletoj 3 rakʼiyninpi, “Judapi chantá Israelpi profetas, reyes ima” nisqata qhawarisunman. Profeciasmanta parlaj librota estudiasqanchejrayku, chay libro qhelqakushajtin imaynachus kausay kasqanta yachananchej kanman. Chantapis yachakusunman, chay profeta runasta ima sajra ruwaykunamantachus juchachasqanta. Yachakullasunmantaj, pikunachus paypa tiempollanpitaj kausasqankuta. Chay librota astawan entiendenapajqa, ichapis Bibliamanta waj librostawan qhawaykurinanchej kanqa. Profeta Amospa tiemponpi kausay imaynachus kasqanta entiendeyta munanchej chayqa, Traducción del Nuevo Mundo nisqa Bibliapi Amós 1:1 versiculota qhawaykusunman. Chay versiculoqa, 2 Reyes chantá 2 Crónicas librosman apawanchej, chay versiculostataj leerisunman. Oseas librota leeypis yanapallawasunmantaj. Imaraykuchus Oseasqa, Amospa tiempollanpitajsina kausakorqa. Chaykunata leespaqa, imayna tiempopichus profeta Amós kausakusqanta sumajta entiendesun (2 Rey. 14:25-28; 2 Cró. 26:1-15; Ose. 1:1-11; Amós 1:1).

17. 1) Zacarías libroj 12 capitulonta leeshaspa, ¿imastataj qhawaykusunman? Manachayqa estudiasqaykipi imatachus tarisqaykimanta parlariy. 2) Ajinata Bibliata estudiaspa, ¿miskʼichikusunmanchu?

¹⁷ Bibliataqa astawan yachakuyta munaspa leerina tiyan. Zacarías libromanta 12 capitulota leerishasqanchejpi piensarina. Chaypeqa Mesías wañuchisqa kananmanta parlan (Zac. 12:10). Versículo doceqa, ‘Natanpa ayllunmantaʼ kajkuna Mesiasta wañuchisqankumanta waqanankuta nin. Chayta leeytawan pasapunallamantaqa, piensarisunman: “¿Imajtintaj Natanpa familian Mesías wañupusqanmanta waqananku karqari? ¿Imaynatá chayta yachayman?”, nispa. Sumaj kanman chaykunata ukhuncharinanchej. Traducción del Nuevo Mundo nisqa Bibliapi, Natanpa laditonpi uj juchʼuy letra rikhurin. Chay letrataj iskay textosman apawanchej. Ujqa 2 Samuel 5:14, chaytaj Natán Davidpa ujnin wawan kasqanta willawanchej. Ujnin textotaj Lucas 3:31, chaytaj niwanchej Jesusqa Marianejta Natanpa mirayninmanta kasqanta (Torremanta Qhawaj agosto de 2017, 32 paginanpi 4 parrafota leeriy). Chaykunata yachaspaqa, mayta tʼukunchej. Ichapis Jesús Davidpa mirayninmanta jamunan kasqanta yacharqanchejña (Mat. 22:42). Jinapis Davidpa wawasnenqa veintemanta astawan karqanku. Tukuy chay imasta yachaspaqa, profeta Zacariaspa nisqanta astawan sutʼita entiendenchej.

18. 1) Lucas libroj ñaupaj capitulonpi leeshaspa, ¿imastataj qhawaykusunman? Manachayqa estudiasqaykipi imatachus tarisqaykimanta parlariy. 2) Ajinata Bibliata estudiaspa, ¿miskʼichikusunmanchu?

¹⁸ Kaypiñataj piensarina: Lucas libroj ñaupaj capitulonpi yachakunchej, ángel Gabriel Mariata visitasqanta. Chay angelqa Mariaman wawayoj kananta willaytawan nerqa: “Payqa jatunpaj qhawasqa kanqa, sutichasqataj kanqa Aswan Patapi kaj Diospa Wawan. Jehová Diostaj payta churanqa kamachinanpaj, tatan Davidta jina. Jacobpa miraynintataj wiñaypaj rey jina kamachenqa”, nispa (Luc. 1:32, 33). Kay versiculospi leenchej, Jesús “Aswan Patapi kaj Diospa Wawan” kasqanta. Ichapis chay versiculospi chayllata qhawarinchej. Jinapis ángel Gabrielqa, Jesús rey kananta nillarqataj. Chayrayku María chayta uyarispa, imatachus yuyasqanpi piensarisunman. ¿Yuyanmanchu karqa Jesús Herodespa cuentanmanta chayri ujnin wawanpa cuentanmanta rey kananta? Chayrí, ¿ninmanchu karqa: “Kunanqa uj reypa maman kasaj, familiaypis reypa wasinpi tiyakonqanku”, nispa? Bibliapi ni maypi ninchu, María chayta ángel Gabrielman nisqanta. Nillataj ninchu María Diospa Gobiernonpi uj sumaj lugarta mañakusqanta, imaynatachus Jesuspa iskay discipulosnin mañakorqanku, ajinata (Mat. 20:20-23). Chaypi piensarispa, reparanchej Mariaqa manchay llampʼu sonqo warmi kasqanta.

19, 20. Santiago 1:22-25, 4:8 versículos nisqanman jina, ¿ima yuyaywantaj estudiananchej tiyan?

¹⁹ Diospa Palabranta, publicacionesta ima estudianchej, Jehová Diosman astawan kʼaskaykunapaj. Jinapis estudiashaspaqa, imayna runaschus kasqanchejtapis reparakunallataj tiyan. Ajinamanta Dios allinpaj qhawanawanchejpaj, imatachus cambiananchej kasqanta yachasun (Santiago 1:22-25; 4:8 leey). Chayrayku niraj estudiashaspa, Jehová Diosninchejmanta atiyninta mañakuna. Chantapis paymanta rogakunallataj, estudiasqanchej yanapanawanchejpaj, imapichus cambiananchejta reparachinawanchejpaj ima.

²⁰ Salmo 1:2, 3 versiculospi Diospa ujnin kamachinmanta parlan. Tukuypis pay jina kayta munanchej. Chay salmoqa chay runamanta nin: “Diospa kamachisqampi pay sonqonta churan, chay kamachisqampitaj tuta pʼunchay unanchan. [...] Tukuy ima ruwasqanqa ñawpajman rin allinta”, nispa.