Hermanosmanta yachakuspa ashkha bendicionesta japʼerqani

Noqaqa Quebec llajtapi nacekorqani. Chay llajtaqa Canadá suyupi kashan, Quebec sutiyoj provinciapi. Chay provinciapeqa francesta parlanku. Tatayqa Louis sutikun, mamaytaj Zélia. Paykunaqa may munakuywan uywawarqanku. Papasoyqa wajkunawan parlayta manchachikoj, jinapis leey mayta gustaj. Noqatarí escribiy mayta gustawaj. Chayrayku jovenyaspa noticiasta escribispa trabajasaj nerqani.

Doce watasniyoj kashajtiy, iskay hermanos visitaj jamuwarqayku. Ujnenqa Rodolphe Soucy sutikorqa, tataywan khuskataj trabajaj. Ujnintajrí paypa amigon karqa. Chaypacha Jehovaj testigosninmanta pisillata yacharqani, nitaj paykunamanta yachayta maskʼasharqanichu. Chay hermanosqa may kʼachas karqanku, tapuyniykumantaj Bibliawan kutichiwarqayku. Chayqa mayta tʼukuchiwarqayku. Chayrayku tukuynin familia Bibliata estudiayta qallarerqayku.

Noqaqa catolicospa colegionkupi kasharqani, wakin profesoresniytaj tata curas karqanku. Paykunaqa Bibliapi imastachus yachakusqayta, compañerosniyman willasqayta yacharqosqanku. Chayrayku paykunamanta ujninkoqa, compañerosniypa ñaupaqenpi pantasqa kashasqayta niwarqa. Jinapis chayta Bibliapi rikuchinanmantaqa, gobiernoj contranpi oqharikushasqayta niwarqa. Chaypachaqa manchayta chʼajwaykorqayku. Jinapis repararqani iglesiapi yachachikusqanqa, mana Bibliaj nisqanman jinachu kasqanta. Niñataj chay colegiopi kayta munarqanichu. Chayrayku tatasniypa permisonkuwan, waj colegioman cambiakorqani.

Bibliata estudiallarqanipuni. Jinapis wasimanta wasi predicayta manchachikusqayrayku, mana ñaupariyta aterqanichu. Iglesia catolicaqa lugarniypi manchay atiyniyoj karqa. Paykunaqa Jehovaj testigosninta mana predicajta saqejchu kanku. Quebec provinciata kamachej Maurice Duplessispis, paykunaman kutisqa karqa. Chayrayku runasqa Jehovaj testigosninta tukuy imasta nej kanku, wakin hermanostapis maqaykoj kanku. Predicaj llojsinapajqa mana manchachikoj kana karqa.

Hermano John Raeqa mayta yanapawarqa. Payqa Galaad Escuelaman risqa, clase 9 nisqamantataj graduakusqa. Chay hermanoqa ashkha imasta yachaspapis, llampʼu sonqo karqa, qayllaykunapaj jinataj. Payqa maypi jinalla yuyaychawaspapis, kausayninwan mayta yachachiwarqa. Hermano Johnqa francés parlayta yachakusharqa. Noqataj sapa kuti paywan predicaj kani, francespi predicananpajtaj yanapaj kani. Paywan masichakusqayqa, Jehovaj testigon kayta munanaypaj yanapawarqa. Chayrayku 26 de mayo de 1951 watapi bautizakorqani. Chaytaj karqa Jehovaj testigosninta rejsisqaymanta, chunka watanman.

Quebec llajtapi congregacionneyqa juchʼuysitulla karqa. Jinapis casi tukuy precursores karqanku. Chayrayku noqapis precursor karqani. Chay tiempopeqa Bibliallawan predicaj kayku. Publicacionesqa mana kapuwarqaykuchu. Chayrayku Bibliaj nisqanta sutʼinchanaypaj, ashkha versiculosta umaypi japʼinaypaj kallpachakorqani. Jinapis wakin runasqa Biblia mana imprimátur nisqayoj kajtenqa, mana leeyta munajchu kanku. Chay imprimaturqa Iglesia catolicamanta uj autorización karqa, Bibliaj ñaupaj paginanpitaj rikhurej.

1952 watapi hermana Simone Patrywan casarakorqani. Payqa Jehová Diosta tukuy sonqo sirvej, kikin llajtamantataj karqayku. Casarasqaykutawan Montreal llajtaman riporqayku. Niraj watanmantaj imillitayku nacekorqa, Lise sutitataj churarqayku. Noqaqa niraj casarakushaspaña precursor kayta saqeporqani. Jinapis señoraywanqa, pisi imasllawan kausakunaykupaj kallpachakorqayku. Ajinamanta congregacionpi, familia jina tukuy atisqaykuta yanapakunaykupaj.

Chunka watanman watejmanta precursor kaypi piensarerqani. 1962 watapi, Ñaupajman Apajkunapaj Escuelaman invitawarqanku. Chaytaj ruwakorqa Canadá suyumanta Betelpi. Chay escuelamanqa ancianos uj killata rej kanku. Chaypeqa Camille Ouellette hermanowan uj cuartollapi karqayku. Payqa warmiyoj, wawasniyoj kaspapis, tukuy sonqo predicaj. Chaytaj tʼukuchiwarqa. Chay tiempopeqa, Quebec provinciapi familiayoj kaj hermanosmanta, pisilla precursores karqanku. Jinapis hermano Camilleqa, mayta kallpachakusharqa precursor kananpaj. Payqa watejmanta precursor kaypi piensarinayta niwarqa. Chaymanta pisi killasninman, repararqani precursor kayta atisqayta. Wakin hermanosqa, chay ruwasqayta mana allinpajchu qhawarqanku. Jinapis yacharqani, Jehová Diospaj astawan llankʼajtiy pay bendecinawanta. Chayrayku watejmanta precursor regular karqani.

1964 watapi, precursores especiales sutichasqa karqayku, Qhebec llajtaykumantaj kachawarqayku. Chay tiempopi runasqa, predicasqaykuman churanakullajpuni kanku, jinapis niña chhikatachu. Chay llajtapeqa ashkha watasta sirverqayku.

Uj sábado tarde, Sainte-Marie sutiyoj juchʼuy llajtitapi kasharqani. Chayqa Qhebec llajtamanta qayllallapi kashan. Chay lugarmanta uj policía carcelman wisqʼaykuwarqa, mana permisollawan wasimanta wasi predicasqayta nispa. Chantá Baillargeon sutiyoj juezpajman apawarqanku. Payqa manchachikunapaj jina karqa. Chay juezqa pichus abogadoy kananta tapuriwarqa. Noqataj hermano Glen Howa kananta nerqani. Chay hermanoqa manchay rejsisqa abogado karqa. Chayraykuchá juezqa niwarqa: “Ama niwaychu”, nispa. Hermano Glenqa, ashkha hermanosta yanaparqa juiciopi atipanankupaj. Chayrayku may rejsisqa karqa. Niraj unayninmantaj, juzgadomanta willachimuwarqanku contraypi karqa chay demanda oqharikusqanta.

Quebecmanta runas churanakuwasqaykurayku, tantakunaykupaj mana allin lugaresta tariyta atillarqaykuchu. Noqaykoqa uj thanta garajepi tantakoj kayku, manataj imapis qʼoñikunaykupaj karqachu. Llajtaykupeqa chiri tiempopi maytapuni chirin. Qʼoñikunaykupajqa querosenwan lauraj estufalla kapuwarqayku. Niraj reunión qallarishajtin, chay estufaj muyuyninpi horasta kaj kayku. Chaypitaj kallpachaj experienciasta willanarikoj kayku.

Watas pasasqanman jina, ashkha runas Diospa llajtanman yaykumunku. Chayta rikuytaj mayta kusichiwan. 1960 wata chaynejta, Quebec llajtapi, Côte-Nord nisqa lugarpi, península de Gaspé nisqapiwan, pisi congregacioneslla karqa. Kunantajrí chay lugarespi ashkha hermanos tiyan. Paykunataj kʼachitu Tantakuna Wasispi tantakunku.

1970 watapi, señoraytawan khuska congregacionesta waturispa sirvinaykupaj invitawarqayku. 1973 watapitaj, superintendente de distrito kanaypaj churawarqanku. Chay wataspi sumaj wakichisqa hermanosmanta ashkhata yachakorqani. Paykunamanta iskayqa, Laurier Saumur,b David Splanec ima karqanku. Iskayninku congregacionesta waturispa llankʼaj kanku. Sapa asamblea tukukusqantawan, Davidwan purajmanta yuyaychanakoj kayku. Jinamanta astawan sumaj yachachejkuna kanaykupaj. Uj pacha David niwarqa: “Léonce, qhepa discursoykeqa kʼachitu kasharqa, mayta gustawarqa. Jinapis tukuy chay sutʼinchasqaykitaqa, kinsa discursosman tʼaqarpayman karqa”, nispa. Noqaqa discursosniypi ashkha imasmanta ujllapi sutʼinchaj kani. Chayta mana ruwanaypajtaj kallpachakunay karqa.

Superintendente de distrito kaspaqa, congregacionesta waturejkunata kallpachanay karqa. Chaywanpis Qhebec llajtapeqa ashkha hermanos rejsiwarqanku. Chayman rejtiytaj, chay hermanosqa noqawan predicayta munaj kanku. Noqataj paykunawan predicaj kani, congregacionesta waturej hermanotataj qonqapoj kani. Chayrayku uj pacha, chay hermano kʼachamanta niwarqa: “Hermanóy, hermanospaj tiempochakusqaykeqa may sumaj. Jinapis kay semanaqa noqata waturikoj jamuwarqanki. Noqapis kallpacharinawaykita necesitani ari”, nispa. Chay niwasqanqa, llankʼayniyta allinta juntʼanaypaj mayta yanapawarqa.

1976 watapi uj jatun llakiy chayamuwarqa, imaraykuchus munasqa warmisitay sinchʼita onqoykuytawan wañuporqa. Payqa tukuymanta llakikoj, Jehová Diostapis manchayta munakoj. May kʼacha warmipuni karqa. Llakiyniyta aguantanaypajqa, Jehová Diospaj astawan llankʼarqani. Payman mayta agradecekuni, chay llakiy tiempopi munakuywan yanapawasqanmanta. Chaymanta qhepata Carolyn Elliottwan casarakorqani. Payqa inglesta parlan, sumaj precursorataj karqa. Predicacionpi yanapakunanpajtaj Quebec llajtaman jampusqa. Carolynqa manchay kʼacha, tukuy sonqotaj wajkunata yanapariyta munan, astawanqa manchalista, pikunachus mana wajkunawan masichakullankuchu, chaykunata ima. Payqa mayta yanapawarqa congregacionesta waturispa sirvinaypaj.

1978 watamanta enero killapi, Precursorespaj Escuelapi yachachinayta niwarqanku. Chay escuelaqa Quebec llajtapi karqa. Noqaqa may mancharisqa kasharqani. Imaraykuchus ni noqapis chay escuelaman rerqanirajchu, imamantachus yachachikunan karqa chaypis, mosoj karqa. Jinapis chay escuelapeqa unayña precursores kajkuna karqanku. Noqa yachachej kajtiypis, paykunamanta mayta yachakorqani.

Chaymanta killasninman, uj Asamblea Internacional Quebecpi ruwakorqa. Chaytaj sutikorqa “Fe victoriosa”. Chay jatun tantakoyqa Montreal llajtapi karqa, Estadio Olímpico nisqapi. Chaypeqa ni jaykʼaj jina 80 mil runasmanta astawan tantakorqayku. Noqataqa reporteroswan asambleamanta parlanaypaj kamachiwarqanku. Reporterostaj telepi, radiopi, periodicospipis asambleamanta may sumajta parlarqanku. Chaytaj mayta kusichiwarqa. Telepiwan radiopiwan, 20 horasmanta astawan parlarqayku. Periodicospitaj asambleamanta may chhika noticias llojserqa. May ashkha runaspuni Jehová Diosmanta, llajtanmantawan uyarerqanku.

Bautizakusqaymantapacha, Quebec provinciapi sirverqani. Chaypitaj francesta parlakun. Jinapis 1996 watapi Toronto llajtaman kachawarqayku, inglés parlaypi superintendente de distrito kanaypaj. Noqaqa mana sumajtachu inglesta parlaj kani. Chay parlaypi discursosta qonaymantataj mancharisqa kasharqani. Chayrayku Jehová Diosmanta astawan mañakorqani pay yanapanawanpaj.

Torontopi iskay watasta sirverqayku, may kusisqataj karqayku. Señorayqa pacienciawan yanapawarqa, mana manchachikuspa inglespi parlanaypaj. Hermanospis yanapallawarqankutaj, kallpachawajtaj kanku. Pisi tiempollapi ashkha amigosniyoj karqayku.

Iskay pʼunchaypaj jatun tantakuy kajtin, viernes tardesninta wasimanta wasi predicaj llojsej kani. Jinapis chay asambleasta wakichiypi yanapakullajtaj kani. Wakenqa ichapis mana entiendejchu kanku, imaraykuchus chay chhika ruwanayoj kashaspa predicaj llojsisqayta. Chaywanpis runaswan sumajta parlareyqa mayta kallpachawaj. Kunanpis predicaj llojsispa mayta kusikullanipuni.

1998 watapi watejmanta Montreal llajtaman kachawarqayku, precursores especiales jina sirvinaykupaj. Chaypeqa watasta yanapakorqani, ashkha runas kanku chaypi willakunanpaj wakichispa. Chantapis kamachisqa karqani telepi, radiopi, periodicospi ima trabajajkunawan parlanaypaj. Ajinamanta runas Jehovaj testigosninmanta niña pantasqata yuyanankupaj. Kay qhepa wataspi, ashkha runas waj suyusmanta Canadaman tiyakoj jampunku. Casi tukuyninkutaj Bibliamanta mayta yachakuyta munanku. Señoraywanqa paykunaman predicaspa mayta kusikuyku.

Kunankamaqa bautizakusqaymantapacha, 68 watastaña Jehová Diosta sirvishani. Chaypi piensarispataj, payman mayta agradecekuni. Kunanqa predicayta niña manchachikunichu, ashkha runastataj Diospa llajtanman yaykumunankupaj yanapani. Chaytaj mayta kusichiwan. Warmi waway Lisepis, qosanwan khuska precursores kanku. Paykunaqa wawasninkuta uywaytawan precursor regularta orqhorqanku. Wawayqa tukuy atisqanta predicashallanpuni. Chaytaj mayta kusichiwan. Chantapis mayta agradecekuni yanapawarqanku chay hermanosta. Paykunaqa kausayninkuwan, parlasqankuwantaj yanapawarqanku, Jehovaman astawan qayllaykunaypaj, tukuy atisqayta paypaj llankʼanaypajpis. Chantapis yachachiwarqanku, Jehová Diospa atiynillanwan llajtanpi imatapis ruwayta atisqanchejta (Sal. 51:11). Jehová Diospa sutinta jatunchayta atisqaymanta, payman agradecekullasajpuni (Sal. 54:6).