Leejkunaj tapuyninku

Mana sacerdoteschu karqanku chay levitasqa, templopi imaymana ruwanasniyoj karqanku. Wakenqa templota qhawajkuna, nisunman guardias karqanku. Paykunataj uj kamachejniyoj chayri uj capitanniyoj karqanku. Ñaupa tiempomanta qhelqaj Filón sutiyoj judioqa, chay guardiasmanta nin: “Wakin guardiasqa temploj punkusninta qhawaj kanku. Wakintaj templo chaupipi kaj wasej ñaupaqenpi sayaj kanku. Ajinamanta mana pipis yaykunallanchu karqa chayman, ni pi pantaykuspa chayri munaspapuni yaykunanpaj. Wakintajrí tuta pʼunchay templopi guardiata ruwaj kanku. Chaytataj sorteopi chayasqanman jina turnopi ruwaj kanku”, nispa.

Chay guardiasqa Jatun Juntata yanapaj kanku. Romamanta gobiernotaj, guardiasllata espadasniyoj kanankuta saqej.

Joachim Jeremias nisqa yachayniyoj runa nin: “Jesusqa payta presochajkunaman nerqa: ‘Sapa día templopi tiyaykuspa yachachej kani, manataj japʼiwarqankichejchu’, nispa. Jesusqa chayta templomanta guardiasllaman niyta atinman karqa”, nispa (Mat. 26:55). Chay runa nisqanman jina, aswan ñaupajta Jesusta presochayta munajkunaqa, templomanta guardiasllataj karqanku (Juan 7:32, 45, 46). Aswan qhepaman, Jatun Juntapi kajkunaqa chay guardiasta, capitanninkutawan kacharqanku, Jesuspa discipulosninta paykunaman pusamunankupaj. Ichapis templomanta guardiasllataj, apóstol Pablota templo ukhumanta qhatataspa orqhomorqanku (Hech. 4:1-3; 5:17-27; 21:27-30).