Desastres naturalesmanta, ¿imatá Biblia nin?

Kay tiempopi terremotosta, loco parasta, sinchʼi wayrasta mana Dioschu rikhurichin. Astawanpis Diosqa chay llakiykunapi sufrejkunata yanapayta munan. Kay tiempopi desastres kasqanqa mayta llakichiwanchej, Diospa Gobiernontaj pisimantawan chayta chinkachenqa. Chay pʼunchay chayamunankama, Diosqa desastresrayku sufrejkunata sonqochashan (2 Corintios 1:3).

• ¿Imajtintaj nisunman desastres naturales mana Diospa castigonchu kasqanta?

• Jatuchaj desastres kasqan, ¿qhepa pʼunchaykunapi kausashasqanchejtachu rikuchin?

• Desastresrayku sufrejkunata, ¿imaynatá Dios yanapan?

• ¿Biblia yanapawasunmanchu desastrespaj wakichisqa kanapaj?

• Desastresrayku sufrejkunata sonqochanapaj versículos

Bibliaqa niwanchej terremotosta, loco parasta, sinchʼi wayrasta Dios apaykachasqanta sajra runasta castigananpaj. Jinapis kay tiempomanta desastresqa waj jinataj. ¿Imaraykú chayta ninchej?

• Kunan tiempopi desastresqa tukuy runasta llakichin. Biblia rikuchiwanchej Jehová terremotosta, loco parasta, sinchʼi wayrasta sajra runasta castiganallanpaj apaykachasqanta, cheqan runastataj jarkʼasqanta. Diosqa Sodomata, Gomorrata chinkachishaspa cheqan runa Lotta, iskaynin warmi wawasnintawan salvarqa (Génesis 19:29, 30). Jehovaqa tukuy runaspa sonqonkuta qhawarqa, chayraykutaj sajra runasllata wañucherqa (Génesis 18:23-32; 1 Samuel 16:7).

• Desastresqa jinallamanta chayamun, mana suyashajtillanchej. Diostajrí sajra runasman manaraj ima desastretapis apachimushaspa, ñaupajta willacherqaraj. Pikunachus Diospa willachisqanta kasukojkunataj salvakorqanku (Génesis 7:1-5; Mateo 24:38, 39).

• Runasllataj wakin desastresta rikhurichinku. ¿Imaynatá chayta ruwanku? Jallpʼanchejta chʼichichaspa, chantá maymanchus yaku juntʼaykun, maypichus terremotos tiyan, maypichus anchata chirin chayri ruphan chay lugarespi wasichakuspa (Apocalipsis 11:18). Diosqa mana juchayojchu runas chay imasta ruwasqankumanta, mana allinpitaj tukusqankumanta (Proverbios 19:3).

Arí. Bibliaqa niwanchej ‘kay mundoj imasninpa tukukuyninpi’ chayri ‘qhepa pʼunchaykunapi’ desastres naturales kananta (Mateo 24:3; 2 Timoteo 3:1). Kay tiemponchejmanta parlaspa Jesús nerqa: “Kaynejpi jaqaynejpitaj yarqhaykuna, terremotos ima kanqa”, nispa (Mateo 24:7). Diosqa pisimantawan imaschus llakichiwanchej, chantá imaschus sufrichiwanchej chay imasta chinkachenqa, desastres naturalestapis (Apocalipsis 21:3, 4).

• Diosqa Palabrannejta sufrejkunata sonqochan. Bibliaqa niwanchej Diosqa noqanchejmanta llakikusqanta, llakisqa kajkunawanpis llakisqallataj kasqanta (Isaías 63:9; 1 Pedro 5:6, 7). Chantapis nillawanchejtaj desastres naturalesta wiñaypaj chinkachinanta. (“Desastresrayku sufrejkunata sonqochanapaj versículos” nisqa recuadrota leeriy).

• Diosqa kamachisninnejta desastresrayku sufrejkunata sonqochan. Bibliaj profeciasnenqa nerqa Jesús “sonqo pʼakisqa kajkunata” jampinanta, chantá “llakisqa kajkunata” sonqochananta (Isaías 61:1, 2). Kay tiempopitaj Diospa kamachisnenqa Jesús jina ruwanankupaj kallpachakunku (Juan 13:15).

  Diosqa desastresrayku llakiypi kajkunaman, kamachisninnejta yanapata chayachin (Hechos 11:28-30; Gálatas 6:10).

Arí. Bibliaqa mana desastresmanta jarkʼakunapaj librochu, jinapis Bibliapi sumaj yuyaychaykuna tiyan desastresmanta jarkʼakunapaj. Wakin yuyaychaykunata qhawarina:

• Uj desastrepaj ñaupajmantaña wakichikuy. Biblia nin: “Allin yuyayniyoj runaqa sajra kajta rikuspa pakakun”, nispa (Proverbios 22:3). Allin yuyayniyoj runaqa niraj ima desastrepis kashajtin wakichisqaña kashan. Wakichisqa kanapajqa familianchejwan uj mochilata wakichikusunman, chantá uj desastre kajtin maypichus tinkunanchejta nisunman, chaymantataj chay nisqanchejta ensayana.

• Kapuwasqanchejmanta nisqaqa, kausayninchej aswan valorniyoj. Bibliaqa niwanchej: “Kay mundomanqa mana imayoj jamorqanchej, nitaj imatapis apasunmanchu”, nispa (1 Timoteo 6:7, 8). Salvakunanchejpajqa wasinchejtapis, imaschus kapuwasqanchejtapis saqepunanchej tiyan. Amapuni qonqanachu kapuwasqanchej imasmanta nisqaqa, kausayninchej aswan valorniyoj kasqanta (Mateo 6:25).