¿Imaynatá kusisqa kausakusunman?

¿KUSISQACHU KAUSAKUNKI? Jina kajtin, ¿imataj kusichisunki? ¿Familiaykichu, trabajoykichu chayri uj iglesiaman risqaykichu? Wakin runasqa ninku: “Bachiller llojsejtiy kusisqa kasaj chayri profesionniyoj kajtiy kusisqa kasaj”, nispa. Wakintaj ninku: “Sumaj trabajoyoj kajtiy kusisqa kasaj chayri autoyoj kajtiy kusisqa kasaj”, nispa. Ichá qanpis kikillantataj ninki.

Ashkha runasqa uj imata ruwajtinku chayri imatachus munasqankuta japʼejtinku kusikunku. Jinapis chay kusikuyninkoqa, mana unaypajchu. Chayrayku sonqo pʼakisqa kanku.

Kusisqa kausakunanchejpajqa mana tukuy imayojpunichu kananchej tiyan, manachayqa sonqo juntʼasqa kayta yachananchej tiyan. Chayrayku “kay kapuwajtin chayri jaqayta ruwajtiy kusisqa kasaj” ninchej chayqa, ni jaykʼaj kusisqa kausakuyta atisunchu.

Kusisqa kaytaqa sanito kaywan kikinchasunman. Mana onqonapajqa sumajta mikhunchej, ejerciciosta ruwanchej, waj imastawan ruwanchej. Kusisqa kausakunapajpis, wakin imasta ruwananchej tiyan.

¿Imastataj ruwasunman? Kusisqa kausakunapajqa, ashkha imasta ruwasunman. Jinapis kay urapi kashan chay yuyaychaykunaqa, mayta yanapawasunman.

• SONQO JUNTʼASQA KANA, AMATAJ MICHʼAKUNACHU

• CUIDAKUNA, ONQOYTATAJ ATIPANA

• WAJKUNATA MUNAKUNA

• PERDONAYTA YACHANA

• IMAPAJCHUS KAUSASQANCHEJTA YACHANA

• SUMAJ KAUSAYTA SUYAKUNA

Uj sumaj libro nin: “Kusisqas kanku cheqanta kausajkunaqa”, nispa (Salmo 119:1, Qheshwa Biblia). Imaynatachus chayta ruwanata yachakunachej.